ដោយៈប៊ី
បាងកកៈ ខុនដូប្រណីតនៅតំបន់សុកខុមវីត (Sukhumvit) ទីក្រុងបាងកក បានកាត់បន្ថយតម្លៃ ដើម្បីទាក់ទាញអ្នកទិញ ខណៈតម្រូវការខុនដូ ដែលជាលំនៅដ្ឋានទី២ កំពុងកើនឡើង។
លោកស្រី Aliwassa Pathnadabutr នាយកគ្រប់គ្រងនៅក្រុមហ៊ុន CBRE ថៃ ដែលជាសាខាក្រុមហ៊ុនសេវាកម្ម អចលនទ្រព្យពាណិជ្ជកម្ម និងវិនិយោគរបស់អាមេរិក CBRE Group Inc បានថ្លែងកាលពីចុងសប្តាហ៍នេះថា ទីផ្សារអចលនទ្រព្យនៅត្រីមាសទី ២ឆ្នាំនេះ បានបង្ហាញសញ្ញាវិជ្ជមាន បន្ទាប់ពីរដ្ឋាភិបាលបានបន្ធូរបន្ថយ វិធានបិទទ្វារប្រទេស ដោយការផ្ទុះនៃជំងឺ Covid-19 ។
លោកស្រីបានមានប្រសាសន៍ថា “តម្រូវការកំពុងចាប់ផ្តើមកើនឡើង ខណៈអ្នកអភិវឌ្ឍន៍កំពុងធ្វើយុទ្ធនាការផ្សព្វផ្សាយ ដើម្បីទាក់ទាញអ្នកទិញឱ្យលក់យូនីតខុនដូ ដែលនៅសល់ ហើយទទួលបានលំហូរសាច់ប្រាក់មកវិញ ដើម្បីទូទាត់ការធ្លាក់ចុះក្នុងពេលផ្ទុះជំងឺរាត្បាត។
ស្ថិតិរបស់ក្រុមហ៊ុន CBRE ក៏បានបង្ហាញផងដែរថា ចំនួនអ្នកទិញសក្តានុពល ដែលមកទស្សនាគម្រោងក្នុងខែកក្កដា គឺខ្ពស់ជាងរយៈពេលដូចគ្នាកាលពីឆ្នាំមុន។
នៅឆ្នាំនេះទីផ្សារខុនដូប្រណីត មានការផ្គត់ផ្គង់តិចជាងមុន ខណៈពេលដែលគម្រោងថ្មីៗភាគច្រើនផ្តោតលើយូនីត ដែលមានតម្លៃទាបជាង៣លានបាត ឬតិចជាង ១៥០,០០០បាតក្នុងមួយម៉ែតការ៉េ ដើម្បីឆ្លើយតបនឹងអំណាច នៃការទិញរបស់ប្រជាជន អំឡុងពេលមានការធ្លាក់ចុះសេដ្ឋកិច្ច។
លោកស្រីថ្លែងថា “ជាលទ្ធផល អ្នកអភិវឌ្ឍន៍ខុនដូពិសេសនៅតំបន់ Sukhumvit ដែលមាន៤០០០ យូនីតកំពុងបញ្ចុះតម្លៃរបស់ពួកគេពី៥ ទៅ៤០ភាគរយ ដូច្នេះពួកគេអាចបិទគម្រោងនេះបានឆាប់បំផុត” ។
ក្រុមហ៊ុន CBRE ក៏បានរកឃើញថា កាលពីឆ្នាំមុនអតិថិជនចំនួន៦១ភាគរយ បានទិញខុនដូ សម្រាប់គោលបំណងលំនៅដ្ឋាន។ ៣៤ភាគរយបានទិញសម្រាប់ការវិនិយោគ និង៥ភាគរយទៀតទិញជាលំនៅដ្ឋានទី២ ។
ប៉ុន្តែនៅឆមាសទីមួយនៃឆ្នាំនេះ ចំនួនប្រជាជនដែលទិញខុនដូ ជាលំនៅដ្ឋានទី២ បានកើនឡើងដល់ ២៥ភាគរយ ខណៈអ្នកដែលទិញសម្រាប់វិនិយោគ បានធ្លាក់ចុះ១៦ ភាគរយ និង ៥៩ភាគរយបានទិញសម្រាប់គោលបំណងស្នាក់នៅ។
លោក Aliwassa មានប្រសាសន៍ថា “នេះគឺដោយសារតែស្ថានភាពសេដ្ឋកិច្ចបច្ចុប្បន្ន មិនសមស្របសម្រាប់ការលក់បន្តទេ ដូច្នេះមានមនុស្សតិចណាស់ ដែលជ្រើសរើសការវិនិយោគខុនដូ ខណៈអ្នកដែលមានផ្ទះរួចហើយ កំពុងស្វែងរកខុនដូដែលមានទីតាំងនៅតំបន់ទីក្រុង សម្រាប់ភាពងាយស្រួលក្នុងការធ្វើដំណើរ” ។
ជាមួយគ្នានេះដែរ នាយកគ្រប់គ្រងក្រុមហ៊ុន Major Development Pcl លោក Suriya Poolvoralaks បាននិយាយថា គម្រោងខុនដូប្រណីត Munich Sukhumvit ២៣ បច្ចុប្បន្ននេះ ត្រូវបានលក់អស់ ៧០ភាគរយហើយ ជាមួយនឹងអតិថិជនបរទេស១ភាគ៤ ដែលភាគច្រើនមកពីហុងកុង។
លោកបានមានប្រសាសន៍ថា “ស្ថានភាព Covid-19 បានរារាំងអតិថិជនបរទេស ដែលមានសក្តានុពលមិនឱ្យចូលមកកាន់ប្រទេសថៃ ដូច្នេះយើងបានចាប់ផ្តើមយុទ្ធនាការផ្សព្វផ្សាយ ដោយផ្តល់ការបញ្ចុះតម្លៃពី៣ម៉ឺន ទៅ៨ម៉ឺនបាតក្នុងមួយម៉ែតការ៉េ ដើម្បីទាក់ទាញអតិថិជនក្នុងស្រុក។
លោកបានបន្តថា “យើងរំពឹងថាការធ្វើបែបនេះ នឹងជួយជំរុញការលក់គម្រោងដល់ ៨០ទៅ៩០ភាគរយ” ៕
