ដោយ ពេជ្រ
ភ្នំពេញៈ ក្រុមហ៊ុនអភិវឌ្ឍន៍អចលនទ្រព្យលំដាប់អន្តរជាតិ Meridian International Holding បានទទួលពានរង្វាន់ក្នុងនាមក្រុមហ៊ុនអភិវឌ្ឍន៍ល្អផ្តាច់គេ និងពានរង្វាន់អមជាច្រើនទៀត ក្នុងព្រឹត្តិការណ៍ប្រគល់ពានរង្វាន់ដ៏ធំប្រចាំឆ្នាំនៃទ្វីបអាស៊ី។
ការរៀបចំពានរង្វាន់ ដែលធ្វើឡើងដោយក្រុមហ៊ុន Property Guru Cambodia នៃឆ្នាំ២០២០នេះ ក្រុមហ៊ុននេះបានរៀបចំពានរង្វាន់សរុបចំនួន៣២ នៃកម្មវិធីប្រចាំឆ្នាំលើកទី៥របស់ខ្លួន ដែលត្រូវបានធ្វើឡើងនៅទីក្រុងភ្នំពេញ។
យោងតាមសេចក្តីប្រកាសព៌តមានរបស់ក្រុមហ៊ុនបានឲ្យដឹងថា នេះគឺជារាត្រីមួយប្រកបដោយភាពចែងចាំង និងមិនអាចបំភ្លេចបានឡើយ ដែលក្រុមហ៊ុន Meridian International Holding ទទួលបានពានរង្វាន់រហូតដល់ទៅ១៣ សម្រាប់គម្រោង Flatiron by Meridian ដែលជាគម្រោងថ្មីចុងក្រោយរបស់ក្រុមហ៊ុន ដោយរួមបញ្ចូលទាំង ពានរង្វាន់ទទួលបានការស្ងើចសរសើរ ជាពិសេស (Highly commended) និងការទទួលស្គាល់ជាពិសេស មកលើក្រុមហ៊ុនផងដែរ។
គម្រោង Flatiron by Meridian បានផ្តល់ជាប្លង់កម្មសិទ្ធអចិន្ត្រៃយ៍ដល់អ្នកវិនិយោគ ដែលផ្តោតលើអគារអភិវឌ្ឍន៍ចម្រុះ និងមានទីតាំងនៅក្នុងបេះដូងនៃមជ្ឈមណ្ឌលពាណិជ្ជកម្មនៃទីក្រុងភ្នំពេញ។
ខាងក្រោមនេះគឺជាពានរង្វាន់ចំនួន៨ ដែលក្រុមហ៊ុនទទួលបាន៖
- ពានរង្វាន់ក្រុមហ៊ុនអភិវឌ្ឍន៍ល្អដាច់គេ
- ពានរង្វាន់ក្រុមហ៊ុនអភិវឌ្ឍន៍អគារពហុមុខងារល្អដាច់គេ
- ពានរង្វាន់ការអភិវឌ្ឍលំនៅដ្ឋានបម្រើសេវាកម្មល្អដាច់គេ
- ពានរង្វាន់អគារពហុមុខងារដែលមានការរចនាម៉ូតខាងក្នុងល្អដាច់គេ
- ពានរង្វាន់លំនៅដ្ឋានបម្រើសេវាកម្ម ដែលមានការរចនាខាងស្ថាប័ត្យកម្មល្អដាច់គេ។
- ពានរង្វាន់អគារពហុមុខងារដែលមានការរចនាខាងស្ថាប័ត្យកម្មល្អដាច់គេ។
- ការទទួលស្គាល់ជាពិសេសលើកិច្ចការទំនួលខុសត្រូវសង្គម
- ការទទួលស្គាល់ជាពិសេសលើការរចនាម៉ូតប្រកបដោយនិរន្តរភាព។
ការបើកសម្ពោធអគារ នៅចំទីតាំងកណ្តាលនៃរាជធានីនេះ គឺដើម្បីធ្វើឲ្យប្រសើរ
ឡើងនូវការអភិវឌ្ឍនៅក្នុងតំបន់ តាមរយៈការបង្កើតអគារអភិវឌ្ឍន៍ចម្រុះថ្មី យ៉ាងរស់រវើកមួយ។ ក្រុមហ៊ុនអភិវឌ្ឍន៍ បានបង្កើតឲ្យមានទីតាំងប្រមូលផ្តុំមនុស្សមួយ ដែលជាក្តីប្រាថ្នារបស់អតិថិជន ហើយដែលយើងអាចមើលឃើញ តាមរយៈសមិទ្ធិផលនៃអគារលេចធ្លោកម្ពស់៤១ជាន់ និងទទួលបានពានរង្វាន់មួយនេះ។
អគារនេះមានការិយាល័យធ្វើការចំនួន ៣០០យូនីត ហាងទំនិញចំនួន៥ ហាងភេសជ្ជៈនិងភោជនីយដ្ឋាន និងមានអាផាតមិន-អូតែលចំនួន៣២២យូនីត ដែលនឹងត្រូវគ្រប់គ្រងដោយក្រុមហ៊ុន The Ascott Limited ជាក្រុមហ៊ុនបុត្រសម្ព័ន្ធផ្តាច់មុខរបស់ក្រុមហ៊ុន CapitaLand Limited ដែលជាក្រុមហ៊ុនឈានមុខគេទី១ នៅក្នុងតំបន់អាស៊ីប៉ាស៊ីហ្វិកក្នុងការគ្រប់គ្រងលំនៅដ្ឋានបម្រើសេវាកម្មបែបអន្តរជាតិ។
ការរចនាម៉ូតដែលមានលក្ខណៈខុសប្លែកពីគេនេះ គឺក្នុងគោលបំណងដើម្បីជម្រុញកម្រិតថ្មីមួយនៃការរចនាម៉ូត និងដើម្បីលើកទឹកចិត្តការរស់នៅ តាមបែបផែនរស់រវើកនិងការធ្វើការងារបែបបរិយាកាសថ្មី ទៅដល់អ្នកប្រើប្រាស់ តាមរយៈសមាហរណកម្មនៃអាជីវកម្មប្រកបដោយការគិតពិចារណាខ្ពស់ និងជម្រើសនៃការសម្រាកលំហែរ។
ដោយមានការវិនិច្ឆ័យនិងដាក់ពិន្ទុ ពីសំណាក់អ្នកជំនាញឯករាជ្យពី៩ ផ្នែកផ្សេងៗគ្នា មានដូចជាផ្នែករចនាម៉ូត គុណភាព សេវាកម្ម គំនិតបង្កើតថ្មី ភាពជាម្ចាស់គំនិតដើម និងការប្តេជ្ញាចិត្តទៅរកនិរន្តរភាព ពានរង្វាន់ Property Guru នេះ ត្រូវបានគេទទួលស្គាល់ថាជាកម្មវិធីដ៏ល្អមួយនៅក្នុងវិស័យនេះ។
គណៈកម្មការធ្វើការទទួលស្គាល់ ចំពោះគម្រោងអចលនទ្រព្យណា ដែលមានការចូលរួមចំណែក ទៅក្នុងការសាងសង់ដោយគិតគូរ ទៅលើបរិស្ថាននិងសហគមន៍ ក៏ដូចជាភាពល្អដាច់គេលើការរចនាម៉ូត សោភ័ណភាព និងមុខងារចម្រុះនៃអគារ។
សម្រាប់ឆ្នាំកន្លងទៅនេះ ក្រុមហ៊ុន Meridian International Holding ចេះតែបន្តពង្រឹងខ្លួនកាន់តែរឹងមាំទៅៗ ដោយចាប់ផ្តើមពីការអភិវឌ្ឍអចលនទ្រព្យកម្រិតមធ្យមទៅកម្រិតខ្ពស់នៅរាជធានីភ្នំពេញ។ ចំពោះពានរង្វាន់ថ្មីនេះ ជាកម្លាំងចលករមួយថ្មី ដែលជម្រុញ ក្រុមហ៊ុនឲ្យកាន់តែមានការប្តេជ្ញាចិត្តក្នុងការបង្កើតថ្មី និងផ្តោតទៅលើមុខងារចម្រុះសម្បូរបែបនៃអគារ និងផ្នត់គំនិតដែលរួមបញ្ចូលទាំងបែបបទនៃការរស់នៅ ដែលជាសេចក្តីប្រាថ្នារបស់អតិថិជន និងអ្នករស់នៅទីក្រុង ក៏ដូចជាការប្តូរមុខមាត់ថ្មីនៃវិស័យអចលនទ្រព្យរបស់ប្រទេសកម្ពុជា៕
