ដោយ វុត្ថា
ភ្នំពេញៈ រដ្ឋាភិបាលកម្ពុជា បានឈានដល់ចំណុចចាប់ផ្តើមដាំបង្គោល កំណត់ព្រំដី និងចុះបញ្ជីកម្មសិទ្ធិដីធ្លី លើតំបន់ព្រលានយន្តហោះបាត់ដំបង (ព្រលានយន្តហោះវាលបែកចាន) ដើម្បីត្រៀមសាងសង់នាពេលខាងមុខនេះ តាមអនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។
លោកតិក សាលី អនុរដ្ឋលេខាធិការ នៃរដ្ឋលេខាធិការដ្ឋានអាកាសចរស៊ីវិលនៅក្នុងកិច្ចពិភាក្សាអំពីដំណើរការរៀបចំ ព្រលានយន្តហោះបាត់ដំបងជាមួយលោក លោក សឿម ប៊ុនរិទ្ធិ អភិបាលរងខេត្តបាត់ដំបង កាលពីចុងសប្តាហ៍កន្លងមកនេះ បានណែនាំដល់រដ្ឋបាលខេត្ត ត្រូវធ្វើការដាំបង្គោលកំណត់ព្រំដី ការចុះបញ្ជីកម្មសិទ្ធិដីធ្លីព្រលានយន្តហោះបាត់ដំបង (ព្រលានយន្តហោះវាលបែកចាន) ទៅតាមនិតីវិធីរបស់មន្ត្រីជំនាញផងដែរ។
លោកសឿម ប៊ុនរិទ្ធិ អភិបាលរងខេត្តបាត់ដំបង បានរាយការណ៍អំពីសកម្មភាពលទ្ធផលការងារ ដែលបានអនុវត្តកន្លងមក និងបញ្ហាប្រឈម រួមទាំងផែនការមួយចំនួនជូនគណៈប្រតិភូអាកាសចរស៊ីវិលផងដែរ និង បានចុះទៅទីតាំងព្រលានយន្តហោះ ដើម្បីពិនិត្យមើលការបោះបង្គោលព្រំដីព្រលានជាក់ស្តែង។
អភិបាលខេត្តបាត់ដំបង លោក ងួន រតនៈ ធ្លាប់បានឱ្យដឹងកន្លងមកនេះថា បច្ចុប្បន្ននេះ គម្រោងស្ថាបនាព្រលានយន្តហោះខេត្តបាត់ដំបង គឺត្រូវបានមន្ត្រីជំនាញ និងក្រុមការងារកំពុងតែយកចិត្តទុកដាក់ក្នុងការសិក្សា។
លោកបន្តថា “មន្ត្រីជំនាញផ្នែកបច្ចេកទេសអាកាសចរស៊ីវិល រួមជាមួយក្រុមហ៊ុនជំនាញក្នុងស្រុក ពួកគាត់កំពុងតែសិក្សាលម្អិតពាក់ព័ន្ធ ទៅនឹងការរៀបចំហេដ្ឋារចនាស ម្ព័ន្ធនានា ដែលពាក់ព័ន្ធទៅនឹងស្ដារ និងស្ថាបនាបន្ថែមទៅលើទីធ្លានៃព្រលានចាស់ថា តើគួរតែរក្សាទំហំព្រលានចាស់ ឬត្រូវធ្វើថ្មី និងពង្រីក” ។
លោងួន រតនៈបានបន្តថា ការស្ដារឬស្ថាបនាឡើងវិញក្នុងទំហំប៉ុណ្ណានោះ គឺត្រូវសិក្សាឱ្យច្បាស់ពីតម្រូវការជាក់ស្ដែង និងពិតប្រាកដនៅក្នុងស្រុក។ ជាមួយគ្នានេះក្រុមហ៊ុនជំនាញ ក៏កំពុងសិក្សាយ៉ាងលម្អិតទៅលើទីធ្លា សម្រាប់ទីចំណតរបស់យន្តហោះក្នុងស្រុក ក៏ដូចជាទីសម្រាប់រថយន្ត ចូលចតសម្រាប់ដឹកអ្នកដំណើរ និងសម្រាប់ដឹកទំនិញផងដែរ ដោយឡែកពាក់ព័ន្ធទៅនឹងពេលវេលា នៃការចាប់អនុវត្តគម្រោងជាក់លាក់នៅពេលណា ហើយចំណាយថវិកាអស់ប៉ុន្មាន នៅមិនទាន់អាចបញ្ជាក់បាននោះទេ។
រដ្ឋលេខាធិការដ្ឋានអាកាសចរស៊ីវិល លោក ស៊ីន ចាន់សិរីវុត្ថាបានឱ្យដឹងដែរថា អាកាសយានដ្ឋានខេត្តបាត់ដំបង នៅពេលបច្ចុប្បន្ននេះ គឺជាប្រភេទអាកាសយានដ្ឋានក្នុងស្រុក មានលក្ខណៈតូចចង្អៀត និងទ្រុឌទ្រោម ដែលយើងត្រូវតែពិនិត្យ ដើម្បីស្ដារ និងកែលម្អរឡើងវិញឱ្យស្របតាមទៅស្ដង់ដារអន្តរជាតិ ដែលការផ្តួចផ្ដើមនេះត្រូវបានរដ្ឋមន្ត្រីទទួលបន្ទុកអាកាសចរស៊ីវិល បានប្រគល់ការងារឱ្យក្រុមមន្ត្រីជំនាញ ដើម្បីលើកសំណើរ ថាតើត្រូវកែលម្អរ និងអភិវឌ្ឍន៍អាកាសយានដ្ឋានមួយនេះរបៀបណា។
លោកថ្លែងថា“ជាជំហានដំបូងយើងគិតថា ត្រូវស្ដារឡើងវិញដើម្បីឱ្យបានគ្រប់ស្ដង់ដារសុវត្ថិភាពត្រឹមកម្រិត3C ដែលយើងអាចទទួលចុះចតយន្តហោះក្នុងស្រុកប្រកបដោយសុវត្ថិភាព” ។ លោកបន្តថា “បន្ទាប់មកទៀត យើងបានពិនិត្យមើលផែនការអភិវឌ្ឍន៍របស់នគរូបនីយកម្មនៅខេត្តបាត់ដំបង ដែលបានបង្ហាញពីភាពសមស្រប ទៅនឹងផែនការនៃការអភិវឌ្ឍ និងយល់ស្របក្នុងការកែសម្រួល និងស្តារអាកាសយានដ្ឋានមួយនេះឡើងវិញសម្រាប់ប្រើប្រាស់ក្នុងរយៈពេលខ្លី និងមធ្យម ប៉ុន្តែសម្រាប់រយៈពេលវែង គឺចាំបាច់ត្រូវតែមានការផ្លាស់ប្ដូរទីតាំងថ្មី” ។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅក្នុងពិធីបុណ្យទន្លេ នៅខេត្តបាត់ដំបងកាលពីកន្លងមកនេះ បានលើកឡើង គម្រោងបើកដំណើរការឡើងវិញចំណតអាកាសយាន្តដ្ឋានខេត្តបាត់ដំបងនេះ ដោយបានស្នើទៅលោកអភិបាលខេត្ត និងរដ្ឋមន្ត្រីក្រសួងមហាផ្ទៃ ត្រូវជូនដំណឹងដល់ពលរដ្ឋ ហាមមិនឱ្យសាងសង់សំណង់ខ្ពស់ៗ ស្ថិតកៀកនឹងតំបន់ព្រលានយន្តហោះបែកចាន នាខេត្តបាត់ដំបងឡើយ ព្រោះអាចប៉ះពាល់ដល់គម្រោងសាងសង់ព្រលានយន្តហោះពេលអនាគត។
ព្រលានយន្តហោះខេត្តបាត់ដំបង បានផ្តើមបើកដំណើរការដំបូងនាអំឡុងឆ្នាំ១៩៦៧ ហើយត្រូវបិទដំណើរការទាំងស្រុងត្រឹមឆ្នាំ១៩៧៥ ខណៈរបបខ្មែរក្រហម កាន់កាប់អំណាច នារបបកម្ពុជាប្រជាធិបតេយ្យ។ ក្រោយរបបនេះបានដួលរលំ ព្រលានយន្តហោះខេត្តបាត់ដំបង ក៏ត្រូវបើកដំណើរការឡើងវិញ ប៉ុន្តែបម្រើឱ្យតែវិស័យអាកាសចរណ៍យោធាប៉ុណ្ណោះ ក្រោយមកទៀតនាអំឡុងឆ្នាំ១៩៩១ ចំណតអាកាសយានដ្ឋាននេះត្រូវបិទដំណើរការរហូតបច្ចុប្បន្នតែម្តង៕
