ដោយ ៖ វុត្ថា
ភ្នំពេញ ៖ តម្លៃខុនដូនៅក្នុងតំបន់កោះពេជ្រនាពេលបច្ចុប្បន្ននេះ មានតម្លៃចន្លោះពី ២៥០០ ដុល្លារអាមេរិក ទៅ ៣០០០ ដុល្លារអាមេរិកក្នុងមួយម៉ែត្រការ៉េ ខណៈតំបន់នេះ បាននឹងកំពុងមានការរីកចំរើនលើគម្រោងខុនដូ លំនៅឋានប្រណិត និងអគារពាណិជ្ជកម្មជាច្រើន។
លោកស្រី អាន សុធីតា នាយិកាក្រុមហ៊ុនអចលនទ្រព្យ CBRE Cambodia បានប្រាប់គេហទំព័រ propertyare.asia នៅថ្ងៃទី ២៩ ខែកញ្ញា ឆ្នាំ ២០២០នេះ ឱ្យដឹងថា សម្រាប់តម្លៃខុនដូកម្រិតខ្ពស់ ( High-End) បច្ចុប្បន្ននេះហាក់មានការធ្លាក់ចុះបន្តិច ដោយសារជះឥទ្ធិពល និងទទួលរងផលប៉ះពាល់ដោយជំងឺ Covid-19 ។
លោកស្រីបន្តថា ជំងឺ Covid-19 បានជំរុញឱ្យគម្រោងខុនដូនាមួយចំនួនពេលបច្ចុប្បន្ននេះ បានប្រកាសពីការពន្យាពេលសាងសង់ផងដែរ ។ លោកស្រីបន្ថែមថា ជារួមទីផ្សារអចលនទ្រព្យ រួមជាមួយនឹងគម្រោងខុនដូនាពេលបច្ចុប្បន្ននេះ មិនទាន់មានដំណើរការល្អនៅឡើយទេ ទាមទារក្នុងរយៈពេលយូរបន្តិចទៀត បន្ទាប់ពីចប់ Covid-19។ ភាគច្រើនអ្នកដែលទិញខុនដូ នៅតំបន់កោះពេជ្យ សម្រាប់រស់នៅ និងវិនិយោគបន្តគឺជាជនបរទេស ដែលក្នុងនោះ ពួកគេទិញខុនដូកម្រិតខ្ពស់ ( High-End) ។ ម្យ៉ាងទៀត តំបន់នេះ គឺអ្វីៗមានតម្លៃខ្ពស់ ដែលទាមទារឱ្យមានអ្នកដែលមានធនធានទើបអាចទិញបាន។
លោក ខន គង្គា អគ្គនាយកក្រុមហ៊ុន ERA បានឱ្យដឹងដែរថា បច្ចុប្បន្ននេះ ប្រភេទខុនដូដែលពេញនិយមខ្លាំងជាងគេ នៅក្នុងទីក្រុងភ្នំពេញ គឺជាខុនដូប្រភេទសម្លៃធម្យម ខណៈដែលតម្លៃខុនដូកម្រិតខ្ពស់ហាក់ពិបាកក្នុងការវិនិយោគ។
លោកបន្ថែមថា “ខុនដូ តម្លៃទាប បើសិនវិនិយោគខុនដូក្នុងតម្លៃទាប យើងក៏ទទួលបានការជួល ឬ វិនិយោគបន្ត ក៏ទទួលផលទាបផងដែ”។ លោកបញ្ជាក់ថា “ស្ថានភាពទីផ្សារខុនដូបច្ចុប្បន្ននេះ គឺជាឱកាសក្នុងការរកផលចំណេញនាពេលអនាគត ដោយសារតែ តម្លៃគម្រោងខុនដូ ភាគច្រើនមានការបញ្ចុះតម្លៃ ហើយការបង់ប្រាក់មានការបត់បែន និងមានភាពងាយស្រួលជាងមុន”៕
