ដោយ ៖ វុត្ថា
ភ្នំពេញ ៖ រដ្ឋាភិបាលកម្ពុជាតាមរយៈក្រសួងរ៉ែ និងថាមពល បានផ្សព្វផ្សាយសេចក្តីព្រាង បទប្បញ្ញតិ្តបច្ចេកទេសអគ្គិសនីនៃព្រះរាជាណាចក្រកម្ពុជា សម្រាប់រៀបចំបណ្ដាញអគ្គិសនីប្រកបដោយសុវត្ថិភាពនៅក្នុងអគារ និងលំនៅដ្ឋាន ដែលម្ចាស់អគារ និងម្ចាស់លំនៅដ្ឋាន ត្រូវតែអនុវត្តដើម្បីបង្ការការពារហានិភ័យដែលកើតឡើ។
គន្លឺះសំខាន់ៗចំនួន៤ ដែលម្ចាស់អគារ និងលំនៅដ្ឋានត្រូវតែអនុវត្តជាចំាបាច់រួមមានដូចខាងក្រោម ៖
១. ការសាងសង់ ការដំឡើង និងការការពារបរិក្ខារអគ្គិសនីទាំងអស់ត្រូវដំឡើង ដាក់បរិធានការពារ និងអាចឱ្យគេថែទាំ ត្រួតពិនិត្យ និងការសាកល្បងបានគ្រប់ពេល
២. បរិក្ខារ ខ្សែចម្លងទាំងអស់ត្រូវមានសមត្ថភាពអាចឱ្យគេប្រើរហូតដល់កម្លាំងអតិបរមារបស់ឧបករណ៍ ឬគ្រឿងទទួលអគ្គិសនី
៣. ខ្សែចម្លងអគ្គិសនីទាំងអស់ត្រូវមានអ៊ីសូឡង់ការពារត្រឹមត្រូវ ឬត្រូវបានតម្លើង និងធានាសុវត្ថិភាព ដើម្បីបង្ការគ្រោះថ្នាក់
៤. គ្រប់តំណ និងការតភ្ជាប់ត្រូវរៀបចំឱ្យបានត្រឹមត្រូវដោយគិតដល់ភាពចម្លងអគ្គិសនីមានអ៊ីសូឡង់ និងភាពធនមេកានិច និងការការពារឱ្យបានគ្រប់គ្រាន់។
នៅក្នុងលំនៅដ្ឋាន ជាទូទៅខ្សែបណ្តាញមានសភាពសាមញ្ញ តែមានចំនួនច្រើនទៅតាមចំនួនបន្ទប់ ទំហំបន្ទប់ ចំនួនឧបករណ៍ប្រើប្រាស់ និង អានុភាពប្រើប្រាស់ ។ ធាតុផ្សេងៗនៃខ្សែបណ្តាញមាន ប្រអប់បញ្ជារួម ខ្សែមេ ឬ ទ្វារចរន្ត ប្រអប់បំបែក ខ្សែផ្តល់ចរន្ត ចំណុចបញ្ជា ឬ តភ្ជាប់ និង ខ្សែប្រើប្រាស់ចរន្ត ។
ខ្សែមេ ឬ ខ្សែទ្វារចរន្ត ជាខ្សែដឹកនាំថាមពលក្នុងផ្ទះទៅដល់ឧបករណ៍មួយចំនួនធំ ឬ មួយចំនួនតូច ដែលមានអានុភាពធំ ។ខ្សែផ្តល់ចរន្ត គឺជាខ្សែសម្រាប់ផ្តល់ចរន្តដល់ក្រុមឧបករណ៍ ដែលត្រូវបញ្ជាចេញពីចំណុចមួយក្នុងលំនៅដ្ឋាន ។ ជាទូទាំ ចំណុចបញ្ជាគឺនៅនឹងមាត់ទ្វារ ឬ នៅតាមទីកន្លែងធ្វើការ ឬ នៅជិតក្រុមឧបករណ៍ ។ ខ្សែប្រើប្រាស់ គឺខ្សែដែលភ្ចាប់ពីចំណុចបញ្ជាទៅឧបករណ៍អគ្គិសនី ៕
