ដោយ ហ្សូលី
ភ្នំពេញៈ ពិភពលោកកំពុងប្រកួតប្រជែងគ្នាយ៉ាងសកម្ម ទៅលើវិស័យអចលនទ្រព្យ។ អគារខ្ពស់ៗស្ទើរគ្រប់ប្រទេស សាងសង់ប្រដេញគ្នា និងបង្អួតការរចនាម៉ូដព្រមទាំងថវិកាចំណាយលើការសាងសង់។
តើដំណែង«អគារចំណាយទុនថ្លៃជាងគេបំផុត»បានទៅលើប្រទេសណា?
តំណែង «អគារចំណាយទុនច្រើនជាងគេលើលោក» បានទៅលើប្រទេសអារ៉ាប៊ីសាអ៊ូឌីត ដែលចំណាយថវិកាប្រមាណ១៥ពាន់លានដុល្លារ សាងសង់អគារAbraj Al Bait។
អគារនេះមានកម្ពស់រហូតដល់១២០ជាន់ ហើយក៏ជាអគារខ្ពស់ជាងគេបំផុតនៅលើពិភពលោកផងដែរ។ អគារនេះចំណាយថវិកាអស់១៥ពាន់លានដុល្លារ សម្រាប់ការសាងសង់ និងមានទីតាំងនៅទីក្រុងដ៏បរិសុទ្ធ Mecca នៃប្រទេសអារ៉ាប៊ីសាអូឌីត។
អគារAbraj Al Bait ស្ថិតនៅជិតវិហារអ៊ីស្លាមMasjid al-Haram ធំជាងគេនិងពិសិដ្ឋបំផុត។វាជាអគារដែលបម្រើលើវិស័យបដិសណ្ឋាកិច្ច។ សណ្ឋាគារនេះលាតសន្ធឹងលើផ្ទៃដី១,៥០០,០០០ម៉ែត្រការ៉េ និងអាចផ្ទុកមនុស្សបាន១,០០០,០០នាក់។
ក្រុមស្ថាបត្យករ Dar Al-Handasah របស់ប្រទេសលីបង់ បានសាងសង់សណ្ឋាគារប្រណីត ដែលគ្រប់គ្រងដោយរដ្ឋាភិបាលអារ៉ាប់ប៊ីសាអូឌីតនេះ។ សណ្ឋាគារនេះបានបើកជាផ្លូវការក្នុងឆ្នាំ ២០១២ ។
ការសាងសង់សណ្ឋាគារប្រណីតនេះត្រូវបានចាប់ផ្តើមនៅឆ្នាំ២០០៤ហើយចំណាយពេល៨ឆ្នាំសម្រាប់ការបញ្ចប់។ អគារនេះមានកម្ពស់សរុប៦០១ម៉ែត្រ គឺជាសណ្ឋាគារខ្ពស់ជាងគេបំផុតនៅលើពិភពលោក។ វាក៏ជាអាគារខ្ពស់ជាងគេទីបួន នៅលើពិភពលោក។
អគារមួយនេះ មានបំពាក់នាឡិកាដែលខ្ពស់ជាងគេ និងធំជាងគេបំផុតនៅលើពិភពលោក។ សណ្ឋាគារនេះក៏មានប៉មអគារចំនួន៦ ដែលជាសាលបួងសួង ដែលមានសមត្ថភាពផ្ទុកមនុស្សបាន៣៨០០នាក់ មជ្ឈមណ្ឌលសន្និបាត ផ្សារទំនើប៥ជាន់និងកន្លែងជំនួយពីរទីតាំង៕
