ដោយ វុត្ថា
ភ្នំពេញៈ គម្រោងបុរី និងលំនៅឋានមួយចំនួន ត្រូវបានរងគ្រោះដោយធម្មជាតិពីជំនន់ទឹកភ្លៀង ហើយបញ្ហានេះមិនថា នៅក្នុងប្រទេសកម្ពុជា ឬ ប្រទេសមួយនៅលើពិភពលោកនោះទេ ឱ្យតែមានគ្រោះទឹកជំនន់តែងតែ ទទួលរងនូវផលប៉ះពាល់ដោយមិនអាចជៀសផុតបាន។
លោកឃាង ពុទ្ធី ប្រធានក្រុមប្រឹក្សាភិបាលនៃសមាគមអ្នកជំនាញអចលនទ្រព្យកម្ពុជា បានប្រាប់គេហទំព័រ Propertyarea.asia បានឱ្យដឹងនារសៀលថ្ងៃទី២០ តុលាកន្លងមកថា គម្រោងបុរី និងលំនៅឋានប្រទេសកម្ពុជា និងប្រទេសមួយចំនួននៅលើពិភពលោក ក៏ទទួលរងនូវផលប៉ះពាល់ពីគ្រោះទឹកជំនន់ ប៉ុន្តែក៏ការរៀបចំហេដ្ឋារសម្ព័ន្ធមិនបានល្អក៏ជាកត្តាគួបផ្សំផងដែរ។
លោកពន្យល់ថា “បើទោះបីគម្រោងបុរី និងលំនៅឋានមួយចំនួន បានចាក់ដីយ៉ាងណាក៏ដោយ តែភាពប្រឈមនឹងការជន់លិចនៅតែមាន គ្រាន់តែតិចហើយនឹងច្រើនតែប៉ុណ្ណោះ ព្រោះនេះជាគ្រោះធម្មជាតិ ប៉ុន្តែបញ្ហានេះយើងមិនអាចដាក់ការទទួលខុសត្រូវចំពោះភាគីណាមួយក៏មិនត្រឹមត្រូវដែរ” ។
លោកបន្ថែមទៀតថា ប៉ុន្តែម្ចាស់គំរោងអភិវឌ្ឍន៍គួរតែគិតពីគុណភាព ដោយត្រូវសិក្សា លើការរៀបចំប្រព័ន្ធហេដ្ឋារចនាសម្ព័ន្ធ តភ្ជាប់ជាមួយប្រព័ន្ធហេដ្ឋារចនាសម្ព័ន្ធសាធារណៈឱ្យបានត្រឹមត្រូវ ដើម្បីឱ្យលំហូទឹកចេញឱ្យបានលឿន ជាពិសេសត្រូវគិតគូពីហានិភ័យណាមួយ ដែលកើតឡើងដល់អតិថិជន ដែលបានទិញគម្រោងបុរី និងលំនៅឋានខ្លួនផងដែរ។
ចំណែក លោក ច្រឹក សុខនីម ប្រធានសមគមភ្នាក់ងារ និងវាយតម្លៃអចលនវត្ថុកម្ពុជា បានឱ្យដឹងដែរថា ក្នុងរយៈពេលប៉ុន្មានសប្តាហ៍កន្លងមកនេះ មិនថាកម្ពុជា និងបណ្តាប្រទេសនៅតាមដងទន្លេមេគង្គនោះទេ សុទ្ឋតែបានទទួលរងនូវផលប៉ះពាល់ ពីគ្រោះទឺកជំនន់។
លោកបន្តថា គ្រោះទឹកជំនន់ធំៗនេះ បានកើតឡើងយូៗម្តងនោះទេ ដែលកើតឡើងដោយគ្រោះធម្មជាតិ ដែលពិបាកក្នុងគេចផុតណាស់ ក៏ប៉ុន្តែអ្វីដែលសំខាន់ដែលយើងចាប់អារម្មណ៍មានដង់ស៊ីតេនៅទាប បើសិនជានៅក្នុងគម្រោងបុរីមួយៗ មានប្រព័ន្ធស្តុកទឹកខ្វក់ និងប្រព័ន្ធទឹកភ្លៀងត្រូវបានរៀបចំល្អ វានឹងជួយឱ្យគម្រោងបុរីមិនទទួលរងនូវផលប៉ះពាល់ពីគ្រោះទឹកជំនន់ទឺកភ្លៀងខ្លាំងនោះទេ ។
លោកបន្ថែមថា “ដោយសារគ្រោះជំនន់ទឹកភ្លៀង ក្នុងរយៈពេលប៉ុន្មានថ្ងៃកន្លងមកនេះមានទំហំធំ បើទោះបីយើងមានប្រព័ន្ធការពារ ឬអាងស្តុកទឹកធំប៉ុន្មានក៏មិនអាចជួយបានដែរ” ។ លោកបន្ថែមថា “ប៉ុន្តែម្ចាស់អភិវឌ្ឍន៍លើគម្រោងបុរី និងលំនៅឋាន ក៏ត្រូវគិតគូផងដែរពីប្រព័ន្ធលូឱ្យបានត្រឹមត្រូវ បើទោះបីមានប្រព័ន្ធលូ តែយើងមិនបានមើលការថែទាំក៏ជាបញ្ហាដែរ” ។
លោកបញ្ជាក់ទៀតបញ្ហាទឹកជនលិច ដោយសារគ្រោះទឹកភ្លៀង កើតឡើងដោយសារគ្រោងបុរីមួយចំនួនដែលមានទំហំតូច ហើយមិនមានការគ្រប់គ្រង់បានល្អ (property management) នៅពេលលក់ផ្ទះរួចគាត់ដើរចេញបាត់ ដូច្នេះមានន័យការថែទាំលូមិនបានត្រឹមត្រូវ វាធ្វើឱ្យមានកកស្ទះ ក៏បានណ្តាលឱ្យមានការជន់លិចទឹកផងដែរ។
បញ្ហាគ្រោះជំនន់ទឹកភ្លៀង នៅក្នុងរយៈពេលប៉ុន្មានថ្ងៃមកនេះ អភិបាលរាជធានីភ្នំពេញ លោកឃួង ស្រេង បានបញ្ជាឱ្យមន្ទីរសាធារណការរាជធានីភ្នំពេញ ដោយមានអត្តរាគមន៍ពីបញ្ជាការដ្ឋានអង្គរក្សសម្តេចតេជោ និងកម្លាំង ង៧០ បានសហការធ្វើទំនប់ និងធ្វើការបូមទឹកចេញពីតំបន់បុរីមួយចំនួន នៅភាគខាងលិខទីក្រុងភ្នំពេញ ដែលស្ថិតនៅក្នុងបុរី ពិភពថ្មីត្រពាំងថ្លឹង៤ ក្នុងសង្កាត់ចោមចៅទី១ ខណ្ឌពោធិ៍សែនជ័យ ។
បើតាមរដ្ឋបាលរាជធានីភ្នំពេញ គម្រោងបុរីមួយចំនួននៅភាគខាងត្បូង នៃរាជធានីភ្នំពេញ ក៏ទទួលរងនូវផលប៉ះពាល់ខ្លាំងពីជំនន់ទឹកភ្លៀងផងដែរ ដែលជំរុញឱ្យជម្លៀសអ្នកដែលរស់នៅក្នុងគម្រោងបុរី និងលំនៅឋានទាំងនោះ ទៅកាន់ទីទួលមានសុវត្ថិភាព៕
