ដោយៈ រ៉ាណេត
ភ្នំពេញៈ ខណៈពេលដែលវិស័យមួយចំនួន បាននិងកំពុងទទួលរងនូវផលប៉ះពាល់ពីវិបត្តិ ដែលកំពុងកើតមាននៅពេលបច្ចុប្បន្ននេះ សម្រាប់តែវិស័យអចលនទ្រព្យ អាចប្រែក្លាយពីវិបត្តិមួយនេះ មកជាឱកាសវិនិយោគសម្រាប់អ្នកមានលុយគ្រប់គ្រាន់ ក៏ដូចជាផ្តល់នូវឱកាសល្អសម្រាប់ភ្នាក់ងារអាជីពយ៉ាងមានប្រសិទ្ធភាពផងដែរ។
លោក សន សៀប អគ្គនាយកក្រុមហ៊ុនភ្នាក់ងារអចលនទ្រព្យ Key Real Esteate បានប្រសាសន៍ នៅក្នុងកិច្ចពិភាក្សារួមតាមបណ្តាញអេឡិចត្រូនិក កាលពីពេលថ្មីៗនេះថា នៅក្នុងកំឡុងពេល ដែលកំពុងតែលំបាកដោយសារមានវិបត្តិនេះ សម្រាប់អ្នកជំនួញនៅក្នុងវិស័យអចលនទ្រព្យខ្លះ ក៏ពួកគេនៅតែអាចប្រែក្លាយពីវិបត្តិ ទៅជាឱកាសវិនិយោគរបស់ខ្លួនបានយ៉ាងប្រសើរផងដែរ។
លោកបញ្ជាក់ថា “នៅក្នុងកាលទេសដែលលំបាក វាក៏មានឱកាសនៅក្នុងនោះផងដែរ សំខាន់យើងមើលឃើញឱកាសនោះវាយ៉ាងម៉េច” ។ លោកបន្ថែមថា “ខ្ញុំយល់ថានៅក្នុងវិស័យអចលនទ្រព្យនេះ ឱកាសរបស់យើងទោះនៅក្នុងកាលទេសៈ ទីណាក៏មានដែរ នៅពេលដែលសេដ្ឋកិច្ច ធ្លាក់ចុះយើងក៏អាចមានប្រយោជន៍ ព្រោះអាចមានម្ចាស់អចលនវត្ថុមួយចំនួននឹងត្រូវការលក់ក្នុងតម្លៃមួយទាបជាងទីផ្សារ” ។
លោកបន្តថា នៅពេលដែលមានអ្នកទិញ យើងក៏អាចប្រាប់ពីឱកាសនៃការទិញអចលនវត្ថុដែលមានតម្លៃល្អ ដែលមានឱកាសចំណេញពីការទិញ នៅពេលខាងមុខក្នុងនាមយើងជាភ្នាក់ងារអាជីព។ ទាំងអស់នេះវាជាការពិត ដែលយើងធ្លាប់បានជួប។
លោកសន សៀប បានបន្តថា នៅក្នុងអំឡុងពេលនេះ បើទោះជាយើងមិនសូវចេញក្រៅ ហើយនៅតែក្នុងផ្ទះ ក៏យើងស្វែងរកព័ត៌មានបានពេញលេញ នៅក្នុងដៃពីអចលនវត្ថុដែលនឹងត្រូវដាក់លក់ក្នុងតម្លៃទាបជាងទីផ្សារ សម្រាប់ផ្តល់ជូនទៅកាន់អ្នកទិញបន្តបានតាមរយៈកិច្ចទំនាក់ទំនងលើបណ្តាញអេឡិចត្រូនិក តាមទូរស័ព្ទ ហើយនឹងបន្តភ្ជាប់កិច្ចពិភាក្សាជាមួយភាគីទាំងសងខាង ក៏ដូចជាទាក់ទងជាមួយដៃគូភ្នាក់ងាររបស់យើងផងដែរ។
លោកបន្តថា “ខ្ញុំជឿថាបច្ចុប្បន្ននេះ អ្នកដែលកាន់ព័ត៌មានពេញលេញក្នុងដៃនៃអចលនទ្រព្យ ដែលត្រូវការលក់បន្ទាន់ ហើយធូរថ្លៃពិតប្រាកដ វានឹងមិនពិបាករកអតិថិជនបន្តនោះទេ” ។
ចំណែកលោកគាម សៀកឡុង អគ្គនាយកក្រុមហ៊ុន Century21 Dream Property បានមានប្រសាសន៍ផងដែរថា អចលនវត្ថុស្ទើរគ្រប់ផ្នែកទាំងអស់ សុទ្ធតែនៅមានតម្រូវការមិនថា ស្ថិតនៅក្នុងកំឡុងពេលដែលកំពុងទទួលរងនូវវិបត្តិ ឬថ្ងៃខាងមុខនោះទេ។ ដូច្នេះសម្រាប់អ្នកដែលផ្តោតទៅលើបុរី នៅតែអាចលក់បុរីបាន អ្នកដែលផ្តោតទៅលើខុនដូ នៅតែអាចលក់ខុនដូបាន ហើយសម្រាប់អ្នកដែលផ្តោតសំខាន់ ទៅលើដីឡូតិ៍ក៏នៅតែអាចរកអតិថិជន និងអាចលក់បានដូចគ្នា សំខាន់ឱ្យតែយើងមានអចលនវត្ថុល្អ និងមានតម្លៃទាបជាងទីផ្សារពិតប្រាកដ គឺមិនពិបាករកអតិថិជនដែលមានលុយទិញបន្តនោះទេ។
លោកបន្តថា “នៅក្នុងអំឡុងពេលនេះ ភ្នាក់ងារអាចងាយនឹងរកបានអតិថិជនពិតប្រាកដ ដែលមិនពិបាកចំណាយពេលវេលាចោលទៀតនោះទេ។ លោកបន្តថា “អ្នកលក់ក៏មានតម្រូវការលក់ពិតប្រាកដ ហើយលក់ក្នុងតម្លៃក្រោមទីផ្សារ ហើយអ្នកទិញដែលមានតម្រូវការពិតប្រាកដក៏មិនសូញសាញ” ។
លោកបន្តថា នេះមានន័យថា គាត់ត្រូវការលុយបង្វិលជាចាំបាច់ ដូច្នេះនៅពេលដែលយើងអាចជួលលក់ និងសម្រាលបន្ទុកបន្ទាន់របស់គាត់បាន យើងនឹងក្លាយជាភ្នាក់ងារដែលស្និទ្ធ និងជាទីទុកចិត្តរបស់គាត់បាន។ ដោយឡែកសម្រាប់អតិថិជន ដែលបានទិញអចលនវត្ថុតម្លៃក្រោមទីផ្សារ តាមការណែនាំរបស់យើង ពេលទទួលបានចំណេញច្រើន យើងក៏ក្លាយជាដៃគូសហការប្រកបដោយទំនុកចិត្តតរបស់គេផងដែរ៕
