ដោយគង់ សូរិយា
ភ្នំពេញ៖ រថភ្លើងលើអាកាស ដែលជាប្រព័ន្ឋដឹកជញ្ជូនដ៏ស៊ីវិល័យ នឹងសាងសង់នៅឆ្នាំ២០១៩ខាងមុខនេះ ដោយគ្រោងចំណាយទុនវិនិយោគសាងសង់៨០០លានដុល្លារអាមេរិក។
ទេសរដ្ឋមន្ត្រីស៊ុន ចាន់ថុលរដ្ឋមន្ត្រីក្រសួងសាធារណៈការ និងដឹកជញ្ជូនបានថ្លែងឲ្យដឹងកាលពីម្សិលម៉ិញនេះថា ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA) កំពុងសិក្សាលើបណ្តាញ និងការសាងសង់រថភ្លើងលើអាកាស (Sky Train) កណ្តាលរាជធានីភ្នំពេញ ដែលនឹងអាចសាងសង់នៅដើមឆ្នាំ២០១៩ខាងមុខនេះ ដើម្បីឲ្យគំរោងនេះបញ្ចប់មុនពេលកម្ពុជារៀបចំអេស៊ានហ្គេម។
លោកបន្តថា គំរោងសាងសង់ផ្លូវរថភ្លើងអាកាសនេះ មានប្រវែងសរុប១៨គីឡូម៉ែត្រ ដោយរត់កាត់មហាវិថីធំៗជាច្រើននៅរាជធានីភ្នំពេញ និងតភ្ជាប់ទៅកាន់ព្រលានយន្តហោះអន្តរជាតិ។
លោកបណ្ឌិតវ៉ាន់ វ៉ាតអ្នកឯកទេសផ្នែករៀបចំដែនដី និងនគរូបនីយកម្មបានថ្លែងថា ការសាងសង់ផ្លូវរថភ្លើងលើអាកាស ពិតជាល្អប្រសើរ ព្រោះវាមិនត្រឹមតែជួយសម្រួលបញ្ហាចរាចរណ៍នោះទេ ប៉ុន្តែវាក៏ជួយលើកកំពស់សោភ័ណភាពរាជធានីភ្នំពេញ និងជាផ្នែកមួយជួយទាក់ទាញភ្ញៀវទេសចរណ៍ផងដែរ។
លោកបន្តថា “រថភ្លើងលើអាកាសវាបង្ហាញពីភាពស៊ីវិល័យរបស់ទីក្រុងមួយ ដែលមានការរីកចម្រើន និងជួយធ្វើឲ្យទីក្រុងកាន់មានរសរវើក និងជាមធ្យោបាយមួយទៀតជួយសម្រួលការកកស្ទះចរាចរ”៕
