ដោយ ៖ រ៉ាណេត
ភ្នំពេញ ៖ ពិតណាស់ថា នៅពេលដែលមានតម្រូវការទិញលក់លើផ្នែកណាមួយនៃអចលនទ្រព្យដូចជាលំនៅឋាន ខុនដូជាដើម គឺតែងជំរុញឱ្យតម្លៃនៃផ្នែកនោះមានការកើនឡើង។ ប៉ុន្តែសម្រាប់ផ្នែកទីផ្សារដីធ្លីវិញហាក់មានភាពខុសប្លែកពីគេបន្តិច តម្លៃដីអាចមានឱកាសឡើងថ្លៃខ្លាំងគឺអាស្រ័យទៅលើទីផ្សារជួលក្នុងរយៈពេលវែង មិនដូចការឡើងថ្លៃតាមរយៈទីផ្សារទិញលក់ ដែលឡើងខ្ពស់ក្នុងមួយរយៈពេលខ្លីប្រៀបដូចពពុះសាប៊ូនោះទេ។
អគ្គនាយកក្រុមហ៊ុនភ្នាក់ងារអចលនទ្រព្យ TOWN CITY Real Estate និងជាអនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក វ៉ន ចាន់ថន បានប្រសាសន៍នៅល្ងាចថ្ងៃទី១០ ខែធ្នូ ឆ្នាំ២០២០ថា ថ្វីត្បិតតម្រូវការនៃការទិញលក់ដីនៅក្នុងតំបន់ណាមួយបានធ្វើឱ្យតម្លៃដីឡើងថ្លៃ ប៉ុន្តែបើធៀបទៅនឹងតម្រូវការជួលដីសម្រាប់ប្រើប្រាស់ក្នុងរយៈពេលយូរវិញគឺកាន់តែធ្វើឱ្យតម្លៃដីឡើងថ្លៃកាន់តែខ្លាំង ហើយមានពេលខ្លះអាចឡើងខ្ពស់ហួសពីការរំពឹងក៏មានដែរ។
លោក វ៉ន ចាន់ថន បានមានប្រសាសន៍បញ្ជាក់ថា “តម្រូវការនៃការជួលដីសម្រាប់ប្រើប្រាស់នៅក្នុងវិស័យណាមួយ ភាគច្រើនគឺគេធ្វើឡើងមិនមែនត្រឹមរយៈពេលខ្លីនោះទេ ហើយក៏ធ្វើឡើងទៅតាមគម្រោង និងផែនការយុទ្ធសាស្ត្ររបស់អ្នកជួលផងដែរ ដែលយ៉ាងហោចណាស់ក៏ចាប់ពីរយៈពេលកន្លះឆ្នាំឡើងទៅ ឬលើសពីនេះរហូតដល់៥-១០ឆ្នាំក៏មាន” ។
លោកបន្តថា “ប្រសិនបើនៅក្នុងតំបន់មួយដែលមានតម្រូវការជួលដីសម្រាប់ប្រើប្រាស់ធ្វើជាទីតាំងវិនិយោគលើផ្នែកអ្វីមួយ ឬអភិវឌ្ឍន៍ក្នុងវិស័យផ្សេង ដូចជាជួលសម្រាប់សាងសង់ជាឃ្លាំង ជួលសម្រាប់សាងសង់ជារោងចក្រ ឬជួលសម្រាប់អភិវឌ្ឍន៍គម្រោងអាជីវកម្មបែបសហគមន៍ ដែលគម្រោងទាំងអស់នេះសុទ្ធតែមានរយៈពេលយូរ ដូច្នេះចង់មិនចង់វាបានធ្វើឱ្យដីដែលធ្លាប់តែនៅទំនេរ ធ្លាប់នៅតែជាដីស្រែ ឬដីដុះស្មៅដែលគេទុកចោលក្លាយជាដីមានសកម្មភាពអាជីវកម្ម។ ក្នុងរូបភាពបែបនេះ សាកនឹកស្រមៃទៅមើលថា វានឹងមានទិដ្ឋភាពបែបណា? ខ្ញុំចង់មានន័យថា នៅពេលដែលតំបន់ណាមួយដែលសកម្មភាពបែបនេះវានឹងជំរុញមានមនុស្សចូលទៅរស់នៅ ហើយកាន់តែធ្វើឱ្យតម្រូវការប្រើប្រាស់ដីកាន់តែច្រើន ហើយតម្លៃក៏ដូចគ្នា វាក៏កើនឡើងខ្ពស់ផងដែរ” ។
ដោយឡែកពាក់ព័ន្ធទៅនឹងការឡើងថ្លៃនៃតម្លៃដីក្រោមសកម្មភាពទិញលក់វិញ លោក វ៉ន ចាន់ថន បានបញ្ជាក់ថា ប្រសិនគេទិញដើម្បីអភិវឌ្ឍន៍ ឬសាងសង់គម្រោងអ្វីមួយ ម្ចាស់គម្រោងក៏គេទិញដីដែលមានតម្លៃទាបដែលអាចសមស្របទៅនឹងថ្លៃដើមនៃខ្ទង់ចំណាយក្នុងគម្រោងអភិវឌ្ឍន៍របស់គេដែរ មានន័យថា ភាគច្រើនគេទិញដីដែលមានទំហំ និងមានតម្លៃនៅទាបដែលងាយស្រួលក្នុងការអភិវឌ្ឍ ងាយស្រួលលក់ ងាយទទួលបានចំណេញ។
លោកថា នៅមានរូបភាពមួយទៀត គឺការឡើងថ្លៃនៅពេលដែលមានសកម្មភាពទិញក្នុងពេលតែមួយ ផ្អើលទិញតាមគ្នាទាំងដែលតំបន់នោះគ្មានគម្រោងអភិវឌ្ឍន៍ណាមួយជាក់លាក់ ឬផ្អើលទិញតាមការញុះញ៉ុងរបស់ឈ្មួញ ដែលរូបភាពបែបនេះគេតែងហៅថា ទីផ្សារពពុះសាប៊ូ ឡើងថ្លៃតែមួយពេល ហើយក៏ស្ងប់បាត់ឈឹង។ រូបភាពបែបនេះគឺមានច្រើន ហើយក៏ជាការប្រឈមទៅនឹងហានិភ័យខ្ពស់សម្រាប់អ្នកដែលផ្អើលទិញតាមគេ។ ដូច្នេះមុនពេលសម្រេចចិត្តទិញ គប្បីសិក្សា ស្វែងយល់ពីតម្រូវការប្រើប្រាស់នៅក្នុងតំបន់ឱ្យបានច្បាស់៕
