ដោយវុត្ថា
ទីក្រុងម៉ានីលៈ ធនាគារអភិវឌ្ឍន៍អាស៊ី (ADB) បានអនុម័តផ្តល់ប្រាក់កម្ចីចំនួន ១២៣លានដុល្លារ ដល់ប្រទេសហ្វីលីពីន ដើម្បីសាងសង់ផ្លូវថ្មើជើងឱ្យមានសុវត្ថិភាព ទូលាយនិងស្អាត ព្រមទាំងមានភាពធន់នឹងគ្រោះមហន្តរាយ សម្រាប់អ្នកថ្មើរជើងនៅតាមបណ្តោយមហាវិថីដែលមានការកកស្ទះបំផុតរបស់ទីក្រុងម៉ានីល។
គេហទំព័រ www.devdiscourse.com បានចុះផ្សាយឱ្យដឹងកាលពីថ្ងៃទី១៦ ខែធ្នូម្សិលមិញនេះថា គម្រោង EDSA Greenways Project នឹងជួយរដ្ឋាភិបាល ក្នុងការកសាងផ្លូវដើរ៥គីឡូម៉ែត្រ ដែលនឹងត្រូវភ្ជាប់ទៅនឹងស្ថានីយ៍ ធ្វើដំណើរឆ្លងកាត់តាមបណ្តោយមហាវិថី Epifanio de Los Santos Avenue ឆ្ពោះទៅកាន់ស្ថានីយ៍រថភ្លើង Balintawak ស្ថានីយ៍រថភ្លើង Cubao ស្ថានីយ៍រថភ្លើង Guadalupe និង ស្ថានីយ៍រថភ្លើង Taft ។
គេហទំព័រដដែលបន្តថា សំណង់ថ្មើរជើងនេះមានទទឹង៥ម៉ែត្រ បំពាក់ដោយជណ្តើរយន្ត និងប្រព័ន្ធត្រួតពិនិត្យនឹងមានភាពងាយស្រួល សម្រាប់អ្នកថ្មើរជើងរួមទាំងមនុស្សចាស់ ស្ត្រីមានផ្ទៃពោះ កុមារតូចៗ និងជនពិការ។
នាយកផ្នែកគមនាគមន៍ និងទំនាក់ទំនងអាស៊ីអាគ្នេយ៍ របស់ធនាគារអភិវឌ្ឍន៍អាស៊ី លោក Hiroaki Yamaguch ឱ្យដឹងថា គម្រោង EDSA Greenways Project គឺជាផ្នែកសំខាន់មួយ នៃយុទ្ធសាស្ត្រដឹកជញ្ជូនរបស់រដ្ឋាភិបាល ដើម្បីធ្វើឱ្យទីក្រុងមេនម៉ានីលក្លាយជាកន្លែងរស់នៅ កន្លែងធ្វើការ និងកន្លែងកម្សាន្តមានភាពល្អប្រសើរជាងមុន។
លោកបន្តថា “គម្រោងនេះគឺជាផ្នែកសំខាន់មួយ នៃការចូលរួមចំណែករបស់យើងក្នុងការជួយធ្វើឱ្យចក្ខុវិស័យនេះ ក្លាយជាការពិតសម្រាប់ប្រជាជនហ្វីលីពីន។លោកបន្ថែមថា “គម្រោងនេះជាផ្នែកមួយ នៃកម្មវិធីអភិវឌ្ឍន៍ហេដ្ឋារចនាសម្ព័ន “Build, Build, Build” របស់រដ្ឋាភិបាលដែលមានគោលបំណង ជំរុញការចំណាយសាធារណៈលើហេដ្ឋារចនាសម្ព័ន្ធ ដើម្បីទាក់ទាញការវិនិយោគផ្តល់ការតភ្ជាប់ល្អប្រសើរ និងជំរុញកំណើនសេដ្ឋកិច្ច។
អ្នកឯកទេសខាងដឹកជញ្ជូនជាន់ខ្ពស់ របស់ធនាគារអភិវឌ្ឍន៍អាស៊ីប្រចាំតំបន់អាស៊ីអាគ្នេយ៍ លោក Shuji Kimura ឱ្យដឹងថាថា ជាមួយនឹងបច្ចេកវិជ្ជាទំនើប សម្រាប់ផ្លូវដើរពីលើអាកាសនឹងជួយផ្តល់ភាពងាយស្រួល និងទទួលបានការធ្វើដំណើរ ប្រកបដោយសមធម៌សម្រាប់អ្នកដំណើរ ខណៈពេលដែលកាត់បន្ថយការបញ្ចេញឧស្ម័នកាបូនិច។
លោកបន្តថា គម្រោង Metro Manila ត្រូវបានគេចាត់ទុកថា ជាទីក្រុងដែលមានការកកស្ទះបំផុតនៅក្នុងទ្វីបអាស៊ី ទាក់ទងនឹងចំនួនប្រជាជនផ្ទៃដី និងបណ្តាញផ្លូវថ្នល់ដោយផ្អែកលើទស្សនវិស័យអភិវឌ្ឍន៍អាស៊ីឆ្នាំ ២០១៩ របស់ ADB” ៕
