ដោយស៊ីវ ម៉េង
ភ្នំពេញៈ ក្នុងគោលដៅអភិវឌ្ឍន៍នៅមូលដ្ឋានស្រុកពញ្ញាក្រែក ឲ្យមានភាពរីកចម្រើន និងផ្តល់នូវស្តង់ដារស់នៅប្រកបដោយភាពស៊ីវិល័យ អ្នកវិនិយោគក្នុងស្រុកមួយក្រុមបានបោះទុនចន្លោះពី៣០ ទៅ៤០លានដុល្លារ ដើម្បីកសាងបុរីថ្មីមួយនៅទីប្រជុំជនស្រុកខាងលើនេះ។
ប្រធានក្រុមប្រឹក្សាភិបាលនៃបុរីក្រែកស៊ីធី លោកបណ្ឌិតតេង រិទ្ឋីបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី១៧ ធ្នូនេះថា ការបោះទុនវិនិយោគនៅទីប្រជុំជនស្រុកពញ្ញាក្រែកនេះ ដោយសារតំបន់នេះមានសក្តានុពលជាច្រើន ដែលប្រជាពលរដ្ឋនៅមូល ដ្ឋានមានជីវភាពធូរធារ និងទីតាំងគំរោងនេះមានចម្ងាយត្រឹម១៦គីឡូម៉ែត្រ ពីច្រកទ្វារអន្តរជាតិត្រពាំងផ្លុង ដែលជាតំបន់សេដ្ឋកិច្ច និងដោះដូរពាណិជ្ជកម្មដ៏សំខាន់មួយ ពិសេសបុរីនេះ ព័ទ្ឋជុំវិញដោយរោងចក្រ សហគ្រាស ស្ថាប័នគយ ពិសេសជាតំបន់មានប្រជាពលរដ្ឋរស់នៅច្រើន។
លោកបន្តថា “គោលដៅនៃការអភិវឌ្ឍរបស់យើង ដោយសារនៅទីរួមខេត្តថ្មី មានប្រជាពលរដ្ឋរស់នៅរាជធានីភ្នំពេញ ទិញដីច្រើននៅតំបន់នេះ ពិសេសយើងចង់ផ្តល់នូវការអភិវឌ្ឍប្រកបដោយនិរន្តរភាពនៅមូលដ្ឋាន”។
បុររីក្រែកស៊ីធី មានទំហំផ្ទៃដី១៦ហិកតា កំពុងផ្តល់នូវទស្សនទានអភិវឌ្ឍន៍ថ្មីនៅមូលដ្ឋាន តាមរយៈការផ្តល់នូវជម្រើសលំនៅដ្ឋាន ដូចជា ផ្ទះអាជីវកម្ម(Shop house) ផ្ទះវីឡាទោល វីឡាភ្លោះ ដែលមានតម្លៃត្រឹម៣៩,០០០ដុល្លារអាមេរិកឡើងទៅ ពិសេសគំរោងនេះមានផ្សារបែបពាក់កណ្តាលទំនើប ដែលមានស្តង់ចំនួន៤០០ស្តង់ ពិសេសផ្សារនិងបុរីនេះមានសួនច្បារ ចំណតរថយន្តធំទូលាយសំរាប់ទទួលភ្ញៀវទេសចរណ៍ជាតិ អន្តរជាតិ ដែលបានធ្វើដំណើរឆ្លងកាត់ពីប្រទេសវៀតណាម ចូលមកកាន់កម្ពុជា។
លោកឧកញ៉ាតេង រិទ្ឋីបានបន្តថា “អ្វីដែលក្រុមហ៊ុនផ្តល់ជូនអតិថិជន គឺជម្រើសនៃការបង់ប្រាក់ដ៏ទាក់ទាញ ជាមួយនឹងគំរោងដែលផ្តោតលើប្រណីតភាព គុណភាព និងបរិយាកាសរស់នៅប្រកបដោយផាសុខភាព”។លោកបន្តថា “យើងក៏បានគិតដល់ការធ្វើដំណើរជុំវិញបុរីនេះផងដែរ ដែលអ្នករស់នៅក្នុងបុរីនេះ អាចធ្វើដំណើរចេញចូលបុរីនេះបានយ៉ាងងាយស្រួល ដោយសារយើងបានរៀបចំផ្លូវតភ្ជាប់ និងព័ទ្ឋជុំវិញបុរីនេះទាំងអស់ ដើម្បីលើកកំពស់ស្តង់ដានៃការរស់នៅ និងបែបផែនជីវិតសម័យថ្មី”។
លោកបន្តថា បច្ចុប្បន្ននេះ យើងបានប្រើប្រាស់គ្រឿងចក្រជាង៣០គ្រឿង ដើម្បីចាក់បំពេញដី ដែលរហូតមកទល់ពេលនេះ ការចាក់ដីបំពេញក្នុងគំរោងទាំងមូលសម្រេចបានប្រមាណ២០ភាគរយនៃគំរោងទាំងមូលរួចហើយ។ លោកបន្តថា តាមពិតយើងចង់បើកការដ្ឋានសម្ភោធសាងសង់បុរីនេះកាលពីពេលថ្មីៗកន្លងមកនេះ ប៉ុន្តែដោយសារជំងឺកូវីដ១៩ យើងបានពន្យាពេល ហេតុនេះកាលបរិច្ឆេតនៃការសម្ភោធបើកការដ្ឋានសាងសង់បុរីក្រែកស៊ីធីថ្មី គ្រោង នឹងចាប់ផ្តើមនៅចុងខែធ្នូខាងមុខឆាប់ៗនេះ។
អតិថិជនចាប់អារម្មណ៍ទិញបុរីនេះសំរាប់រស់នៅ និងទុកចំណេញសូមទាក់ទងតាមរយ
ៈលេខទូរស័ព្ទ ០៩៧ ៧០ ៥៤ ៨៨៨ / ០៩៧ ៧១ ៥៤ ៨៨៨៕
