ដោយគង់ សូរិយា
ភ្នំពេញៈ អាគារលំនៅដ្ឋានបែបសហកម្មសិទ្ឋ និងមជ្ឈមណ្ឌលពាណិជ្ជកម្មជាច្រើននឹងបញ្ចប់ ហើយបើកដំណើរការនៅឆ្នាំ២០២១ខាងមុខនេះ នៅទីក្រុងភ្នំពេញដែលនឹងក្លាយជាមជ្ឈមណ្ឌលពាណិជ្ជកម្មលំដាប់អន្តរជាតិនាពេលខាងមុខ។
គំរោងដែលនឹងបញ្ចប់ទាំងនោះ មាននៅពាសពេញរាជធានីភ្នំពេញ ដែលបាននិងកំពុងសាងសង់យ៉ាងសកម្ម។
គំរោងThe PeAk
គំរោងដ៏ធំ ដែលបានបោះទុនវិនិយោគទំហំទឹកប្រាក់៥០០លានដុល្លារនេះ បាននិងកំពុងសាងសង់យ៉ាងសកម្ម ដែលគំរោងនេះរួមបញ្ចូលនូវខុនដូ ចំនួនជាង១០០០យូនីត ផ្សារទំនើបស្តង់ដាអន្តរជាតិ The Capital ដែលមានមូលដ្ឋាននៅប្រសេងសឹង្ហបុរី សណ្ឋាគារកម្រិតផ្កាយ៥ Shangri_La និងការិយាល័យលំដាប់ផ្កាយ៥។
គំរោងនេះមានអាគារចំនួនបី ដែលមានកំពស់៥៥ជាន់ និងមានកំពស់សរុបជាង២០០ម៉ែត្រ។
គំរោងនេះស្ថិតនៅក្នុងសង្កាត់ទន្លេបាសាក់ ខ័ណ្ឌបឹងកេង១ ជិតទីក្រុងកោះពេជ្រ ដែលវិនិយោគដោយក្រុមហ៊ុនWorld Brigde Land Groupនិងក្រុមហ៊ុនOxley Holdingមានមូលដ្ឋាននៅប្រទេសសឹង្ហបុរី។
គំរោងGold Tower42
បើមិនមានការប្រែប្រួលទេនោះ គម្រោងនេះអាចនឹងបញ្ចប់នៅឆ្នាំ២០២១ បន្ទាប់ពីបានពន្យាពេលម្តងហើយម្តងទៀត។ គំរោងនេះដើមឡើយត្រូវបានវិនិយោគដោយក្រុមហ៊ុនYunwoo មកពីប្រទេសកូរ៉េ ប៉ុន្តែតាមព៌តមានជាក់លាក់បានអះអាងថា គម្រោងនេះត្រូវបានទិញដោយក្រុមហ៊ុនចិនរួចហើយ។
វាជាគំរោង ដែលបានពន្យាពេលសាងសង់យូរជាងគេនៅកម្ពុជា ដែលគំរោងនេះរួមមានខុនដូ ផ្សារទំនើប មន្ទីរពេទ្យជាដើម។
គម្រោងThe Gate Way
គំរោងមជ្ឈមណ្ឌលពាណិជ្ជកម្មភ្លោះ ស្ថិតនៅលើមហាវិថីសហព័ន្ឋរុស្ស៊ី ក្បែរស្ពានអាកាសតិចណូនេះ មានទស្សនទានអភិវឌ្ឍន៍ចម្រុះរួមមាន ការិយាល័យ ខុនដូ អាផាតម៉ិន និងសេវាកម្មជាច្រើនទៀត។
គំរោងនេះបាននិងកំពុងត្រៀមបញ្ចប់ ដោយសារបច្ចុប្បន្នការឌីសាញនៅក្នុងអាគារបានធ្វើឡើងយ៉ាងសកម្ម។ គំរោងនេះមានកំពស់៣៦ជាន់ និង៣៩ជាន់ ដែលកំពុងផ្តល់នូវImage ប្រណីតមួយសំរាប់ក្រុងភ្នំពេញ។
គំរោងThe Parkway
ជាមជ្ឈមណ្ឌលពាណិជ្ជកម្មថ្មីមួយស្ថិតនៅតំបន់ទួលគោក រាជធានីភ្នំពេញ ដែលរួមបញ្ចូលនូវការិយាល័យ អាផាតម៉ិន ខុនដូ និងសេវាកម្មជាច្រើនទៀត។ គម្រោងនេះបានបញ្ចប់ការសាងសង់ស្ទើរ១០០ភាគរយរួចហើយ។
គម្រោងនេះមានកំពស់៣៦ជាន់ ស្ថិតនៅលើផ្លូវ លេខ២៧៣ ក្នុងសង្កាត់បឹងកង់២ ខ័ណ្ឌទួលគោក។
មជ្ឈមណ្ឌលពាណិជ្ជកម្មBooyoung Town
គំរោងនេះ ត្រូវបានវិនិយោគដោយក្រុមហ៊ុនBooyoung Group ដែលទំនងជាក្រុមហ៊ុនកូរ៉េដំបូងគេ ដែលបានបញ្ចប់ការសាងសង់គំរោងមុនផែនការ និងមិនបានប្រកាសលក់ភ្លាមៗ ដើម្បីប្រមូលទុននោះទេ ប៉ុន្តែគំរោងនេះបាននិងកំពុងជិតបញ្ចប់ការសាងសង់ ជាមួយនឹងការដាក់ចេញផែនការលក់នាពេលឆាប់ៗខាងមុខ។
មជ្ឈមណ្ឌលពាណិជ្ជកម្មBooyoung Townស្ថិតនៅសង្កាត់ទឹកថ្លា ខ័ណ្ឌពោធិសែនជ័យនេះ មានទស្សនទានអភិវឌ្ឍន៍ចម្រុះរួមមានខុនដូ ផ្សារទំនើប សាលសីលល្បះខ្នាតអន្តរជាតិ ភោជនីយដ្ឋានចម្រុះ។
គំរោងនេះមានកំពស់២៤ជាន់ មានអាគារសរុបចំនួន៤ ស្ថិតនៅក្នុងផែនការអភិវឌ្ឍន៍ដំណាក់កាលទី២ និងឈានទៅអភិវឌ្ឍន៍ដំណាក់កាលទី២នាពេលខាងមុខ។
គំរោងPrince international plaza
គំរោងនេះត្រូវបានអភិវឌ្ឍន៍៍ដោយក្រុមហ៊ុនPrince Real Estate Groupដែលស្ថិតនៅលើមហាវិថីសហព័ន្ឋរុស្ស៊ី ទល់មុខនឹងគំរោងBooyoung Town។ គម្រោងនេះជាគំរោងអភិវឌ្ឍន៍ចម្រុះ រួមមាន មជ្ឈមណ្ឌលពាណិជ្ជកម្ម ខុនដូ និងមានកំពស់១៦ជាន់។
គំរោងនេះតាមផែនការនឹងបញ្ចប់ការសាងសង់នៅខែ មិនា ឆ្នាំ២០២១ខាងមុខនេះ បើមិនមានការប្រែប្រួលទេនោះ។
គម្រោងមជ្ឈមណ្ឌលពាណិជ្ជកម្មអន្តរជាតិចុងហ្វាង
មជ្ឈមណ្ឌលអន្តរជាតិចុងហ្វាង ដែលជាអគារខ្ពស់មួយនៅរាជធានីភ្នំពេញ។ អគារនេះមានកម្ពស់១៨០ម៉ែត្រ និងមានចំនួន៦០ជាន់ ហើយនឹងត្រូវបញ្ចប់ការសាងសង់
គ្រោងអាគារ នៅធ្នូ ឆ្នាំ២០២០និងដាក់ឲ្យដំណើរការនៅឆ្នាំ២០២១។
មជ្ឈមណ្ឌលអន្តរជាតិចុងហ្វាងនេ ជាអាគារពហុបំណងនេះរួមមាន ធនាគារពាណិជ្ជកម្មចិន មជ្ឃមណ្ឌលបណ្តុះបណ្តាលសហគ្រាសធុនតូច និងមធ្យម ប្រព័ន្ធគ្រប់គ្រងបច្ចេកវិទ្យា មជ្ឈមណ្ឌលទេសចរណ៍ ពាណិជ្ជកម្ម និងជាអគារហិរញ្ញវត្ថុសម្រាប់តំបន់អាស៊ីអាគ្នេយ៍ផងដែរ។
លើសពីនេះ ចំណុចពិសេសជាងគេ គឺភោជនីយដ្ឋាននៅជាន់ខ្ពស់ជាងគេ នៅក្នុងភ្នំពេញ ដែលជាការនិយមចូលចិត្តលំហែរកាយរបស់អតិថិជន៕
