ដោយៈរ៉ាណេត
បាត់ដំបងៈ បាត់ដំបង ជាខេត្តមួយដែលមានវិសាលភាពធំទូលាយ តម្លៃដីធ្លីនៅមានកម្រិតនៅឡើយ និងងាយស្រួលអភិវឌ្ឍន៍វិស័យសំណង់ រួមជាមួយនឹងការអំណោយផល ដល់ការបណ្តាក់ទុនវិនិយោគកែច្នៃតំបន់កម្សាន្តនានាផងដែរ។ នេះបើតាមការលើកឡើងរបស់លោក ងួន រតនៈ អភិបាលខេត្តបាត់ដំបង។
លោកអភិបាលខេត្តបានមានប្រសាសន៍តាមទូរស័ព្ទ កាលពីល្ងាចថ្ងៃទី២០ ខែធ្នូ ឆ្នាំ២០២០ថា បច្ចុប្បន្ននេះសកម្មភាពនៃការវិនិយោគ និងអភិវឌ្ឍន៍ក្នុងវិស័យសំណង់ និងអលនទ្រព្យក្នុងខេត្ត នៅមិនទាន់មានគម្រោងធំៗ ដែលមានលក្ខណៈជាបុរីច្រើននៅឡើយនោះទេ ពោលគែមានតែប្រភេទគម្រោងសាងសង់ បណ្តុំលំនៅដ្ឋានផ្ទាល់ដីកម្រិតមធ្យម ក៏ដូចជា គម្រោងសាងសង់លំនៅដ្ឋានលក្ខណៈជាឯកជន ដាច់ដោយឡែកតែប៉ុណ្ណោះ។
លោកបានបញ្ជាក់ថា “បើនិយាយពីតម្លៃអចលនទ្រព្យ ខ្ញុំមិនដឹងច្បាស់នោះទេ ប៉ុន្តែគ្រាន់តែដឹងថាសព្វថ្ងៃនេះ មានគម្រោងសាងសង់សំណង់មួយចំនួន នៅតែមានដំណើរការសាងសង់របស់គេរាល់ថ្ងៃ។ លោកបន្តថា “ក្នុងនាមខ្ញុំជាអាជ្ញាធរ សូមលើកទឹកចិត្តដល់វិស័យឯកជនទាំងជាតិ និងអន្តរជាតិចូលមកវិនិយោគ នៅក្នុងខេត្តបាត់ដំបងឱ្យបានច្រើន” ។
បច្ចុប្បន្នរាជរដ្ឋាភិបាលបាន និងកំពុងស្ថាបនាហេដ្ឋារចនាសម្ព័ន្ធនានា ឱ្យកាន់តែមានភាពល្អប្រសើរ បង្កភាពងាយស្រួលដល់ប្រជាពលរដ្ឋ ក៏ដូចជាបង្កើនភាពទាក់ទាញធុរជនផងដែរ។
លោកងួន រតនៈបានបញ្ជាក់ថា “ក្រៅតែពីវិស័យសំណង់ ខ្ញុំក៏សូមលើកទឹកចិត្តដល់បណ្តាអ្នកវិនិយោគផ្នែកអភិវឌ្ឍន៍វិស័យកម្សាន្ត និងទេសចរណ៍ចូលមកកាន់ខេត្តបាត់ដំបងឱ្យបានច្រើនផងដែរ ព្រោះបាត់ដំបងជាខេត្ត ដែលមានភាពសក្ដានុពលនៅក្នុងវិស័យទេសចរណ៍ធម្មជាតិផងដែរ ប៉ុន្តែបច្ចុប្បន្នខ្វះការចូលរួមពីវិស័យឯកជន ក្នុងការអភិវឌ្ឍន៍ និងកែច្នៃឱ្យកាន់តែមានភាពទាក់ទាញ” ។
លោកបន្ដថា នៅពេលដែលវិស័យទេសចរណ៍ ក្នុងខេត្តមានភាពទាក់ទាញ មានកំណើនទេសចរ នោះវានឹងជំរុញឱ្យមានសេដ្ឋកិច្ចក្នុងតំបន់ល្អ មានតម្រូវការទីកន្លែងស្នាក់នៅរយៈពេលខ្លី ហើយវាក៏ជាឱកាសសម្រាប់អ្នកវិនិយោគ និងអភិវឌ្ឍន៍ផ្នែកលំនៅដ្ឋានបែបលំហែរ និងកម្សាប្តផងដែរ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានប្រាប់កាលពីពេលថ្មីៗនេះថា វិស័យអចលនទ្រព្យ នៅក្នុងខេត្តបាត់ដំបង ជាពិសេសនៅតំបន់ក្រុង ចាប់ផ្តើមបង្ហាញសក្តានុពលសម្រាប់វិនិយោគ ហើយក្រុងមួយនេះក៏ចាប់ផ្តើមមានវិនិយោគ លើគម្រោងអចលនទ្រព្យជាបណ្តើរៗហើយដែរ។
លោកបានបញ្ជាក់ថា “វិស័យអចលនទ្រព្យនៅខេត្តបាត់ដំបង ចាប់ផ្តើមរីកចម្រើនជាបណ្តើរៗ ជាពិសេសតំបន់នៅក្នុងក្រុង និងនៅជាយក្រុង ហើយអ្នកវិនិយោគមួយចំនួនក៏ចាប់ផ្តើមវិនិយោគនៅតាមទីប្រជុំនៃតំបន់ស្រុកផងដែរ។
លោកបន្តថា “ផ្ទះល្វែងនៅកៀកទីក្រុងបាត់ដំបង អាចតម្លៃចន្លោះពី៧ ទៅ៨ម៉ឺនដុល្លារ ហើយតម្លៃផ្ទះល្វែង ក្នុងក្រុងអាចមានតម្លៃជាង១០ម៉ឺនដុល្លារ ហើយវានៅតែជាតម្លៃសមរម្យ ប៉ុន្តែល្បឿននៃការវិនិយោគ និងអភិវឌ្ឍន៍ទាំងនេះ នៅមិនទាន់មានល្បឿនលឿនដូចជាខេត្តសៀមរាបនៅឡើយនោះទេ” ៕
