ដោយៈប៊ី
ភ្នំពេញៈ ខុនដូដែលមានតម្លៃបំផុតលើពិភពលោក គួរស្ថិតនៅទីក្រុងនិងមជ្ឈមណ្ឌលហិរញ្ញវត្ថុពិភពលោកដ៏អស្ចារ្យ ដូចជា ទីក្រុងឡុងដ៍ និងញូវយ៉កជា ប៉ុន្តែបែរជាខុនដូមានតម្លៃបំផុតលើពិភពលោក ស្ថិតនៅប្រទេសម៉ូណាកូ ដែលមានផ្ទៃដីត្រឹមតែ២០២ហិកតា និងមានប្រជាជនត្រឹមជាង៣៨ម៉ឺននាក់ប៉ុណ្ណោះ។
ម៉ូណាកូ គឺជាគោលដៅទាក់ទាញសម្រាប់អ្នកមានបំផុត ធ្វើជាកន្លែងសំរាកលំហែលំហែរ។ ប្រទេសដ៏តូចមួយនេះត្រូវបានរៀបចំឡើង ដើម្បីធ្វើជាកន្លែងសាងសង់អាគារដ៏គួរឱ្យចាប់អារម្មណ៍ និងមានតម្លៃថ្លៃបំផុតនៅលើពិភពលោក ដូចជាអាគារខុនដូOdeon Tower ជាដើម។ នេះបើយោងតាមគេហទំព័រ Luxatic.com។
តម្លៃPenthouse ក្នុងអាគារOdeon Tower ត្រូវបានដាក់លក់ក្នុងតម្លៃ៤៤០លានដុល្លារ ដែលជាយូនីតខុនដូមានតម្លៃថ្លៃបំផុតលើពិភពលោក។
អគារ Odeon Tower គឺជាអគារមួយ ក្នុងចំណោមអគារលំនៅដ្ឋានខ្ពស់បំផុតនៅអឺរ៉ុប និងជាអគារខ្ពស់ដំបូងគេ ដែលត្រូវបានសាងសង់នៅប្រទេសម៉ូណាកូ តាំងពីទសវត្សរ៍ទី៨០។
Penthouse នៅក្នុងអគារ Odeon Tower មានទំហំ៣៣.៥០០ ហ្វីតការ៉េ និងមានកម្ពស់៥ជាន់ ហើយលក្ខណៈពិសេសរបស់វា មានដូចជា កន្លែងហាត់ប្រាណ សូណា រោងកុន បណ្ណាល័យ បារវីស្គី និងបន្ទប់ប៊ីយ៉ា (billiard room) ជាដើម។
អ្វីដែលគួរឱ្យចាប់អារម្មណ៍បំផុត គឺមានអាងហែលទឹកដ៏ស្រស់ស្អាត ដែលម្ចាស់លំនៅដ្ឋានរីករាយ នឹងទេសភាពដ៏ស្រស់ស្អាតបំផុត នៃប្រទេសម៉ូណាកូទាំងមូល៕
