ដោយ : រ៉ាវី
ភ្នំពេញ : បច្ចុប្បន្ននៅក្នុងប្រទេសដែលកំពុងអភិវឌ្ឍមួយនេះ កំពុងតែមានភាពផុលផុសយ៉ាងខ្លាំងទៅលើវិស័យអចលនទ្រព្យ ខណៈពេលដែលមានការសម្រុកវិនិយោគយ៉ាងគំហុកពីសំណាក់ជនបរទេស ជាពិសេសជនជាតិចិន និងជប៉ុន ដែលជំរុញឱ្យតម្លៃនៃវិស័យដីធ្លីមានការកើនឡើងយ៉ាងខ្លាំង ជាក់ស្ដែងក្រៅពីតំបន់មជ្ឈមណ្ឌលពាណិជ្ជកម្មចម្រុះនាទីក្រុងភ្នំពេញ តាមបណ្តាខេត្តមួយចំនួនក៏មានភាពពុះកញ្ជ្រោលផងដែរ ដូចជា ក្រោងកំពង់សោម កំពត់ សៀមរាប និងខេត្តកោះកុងជាដើម ។ យ៉ាងណាក៏ដោយអ្នកជំនាញបានព្រមាន ជាមួយនឹងការបង្ហាញពីគន្លឹះមួយចំនួនដែលអាចចៀសផុតពីហានិភ័យ ហើយអាចទទួលបានចំណេញច្រើនក្រោយពេលលក់ ។
ជាទូទៅតម្លៃអចលនទ្រព្យត្រូវបានគេប្រដូចទៅទឹកចរន្តនៃទឹកសមុទ្រ ដែលភាពឡើងចុះគ្រប់វិនាទី ម្ដងជោរ ម្ដងនាច ហើយមានពេលខ្លះក៏នៅស្មើត្រឹងតែម្ដង។ ដូច្នេះ ប្រសិនបើអ្នកមានអចលនទ្រព្យនៅក្នុងដៃ ហើយចង់ទទួលបានផលចំណេញច្រើន តើគួរលក់នៅពេលណាទើបល្អ ? ចម្លើយត្រូវបានបង្ហាញថា ដើម្បីអាចទទួលបានផលចំណេញច្រើនពីការលក់ អ្នកគួរតែទុកលក់នៅពេលតម្លៃអចលនទ្រព្យឡើងដល់ចំណុចកំពូលមួយ ប៉ុន្តែក៏មិនត្រូវទុករហូតទាល់តែតម្លៃចាប់ផ្តើមធ្លាក់ចុះទៅវិញនោះទេ។ មានន័យថា អ្នកមិនត្រូវទន្ទឹងរង់ចាំតម្លៃថ្លៃរហូតបាត់បង់ឱកាសមាស ឱកាសប្រាក់នោះទេ ពោលគឺយើងត្រូវតែធ្វើការប្រៀបធៀបតម្លៃដើមដែលអ្នកទិញ ជាមួយនឹងតម្លៃទីផ្សារនាពេលបច្ចុប្បន្នដែលកំពុងមានដង្ហើមហើយធ្វើការសម្រេចចិត្តតែម្ដង ខណៈបើតម្លៃនៃភាគចំណេញមានអត្រាស្ទើរតែស្មើនឹង90ភាគរយទៅហើយនោះ ។ នៅពេលដែលតម្លៃអចលនទ្រព្យរបស់អ្នកឡើងដល់កម្រិតមួយដែលអ្នកគិតថាមិនអាចឡើងហួសពីតម្លៃជាក់ស្ដែង អ្នកគួរតែសម្រេចចិត្តលក់ចេញទៅ ព្រោះបើអ្នកនៅតែព្យាយាមរក្សាទុក ថាមិនត្រូវអាចជួបការខាតបង់ ឬស្តាយក្រោយដោយសារតែតម្លៃដីធ្លាក់ចុះ ឬតម្រូវការទីផ្សារត្រូវបានគេបំពេញមុនក៏ថាបានដែរ។
ជាទូទៅម្ចាស់អចលទ្រព្យភាគច្រើនតែងរំពឹងចង់បានតម្លៃខ្ពស់បំផុត។ អ្នកត្រូវចាំថា ពេលខ្លះម្ចាស់អចលនទ្រព្យត្រូវជួបនឹងភាពបរាជ័យ ដោយសារតែចិត្តលោភលន់នេះឯង ចង់បានចំណេញខ្ពស់ ហួសកប់ពពក រហូតធ្វើឱ្យអ្នកទិញមិនហ៊ានចរចា ឬចរចាហើយមិនទិញក៏មានដែរ ខណៈដែលគេពិចារណាឃើញថា មិនអាចទទួលបានតម្លៃលើសពីការទិញរបស់ពួកគេ។ មិនតែប៉ុណ្ណោះ ឈ្មួញដែលជាអ្នកទិញ ក៏អាចនិយាយព័ត៌មានមិនល្អពីអ្នកប្រាប់ទៅកាន់អ្នកវិនិយោគដូចគ្នាក៏ថាបានដែរ ដែលទាំងអស់នេះសុទ្ធតែជះឥទ្ធិពលមិនល្អដល់អ្នកទាំងអស់។
មានម្ចាស់អចលនទ្រព្យខ្លះមិនបានក្តាប់ជាប់តម្លៃទីផ្សារជាក់ស្ដែង ហើយជឿតាមពាក្យចចាមអារាមថា តម្លៃដីនឹងកាន់តែឡើងថ្លៃ ជាមួយនឹងការព្យាយាមដាក់តម្លៃដីរបស់ខ្លួនខ្ពស់ហួសភាពជាក់ស្ដែង ដែលចំណុចនេះក៏ជាគ្រោះថ្នាក់ដែលអាចអោយមានការបាត់បង់នូវឱកាសទទួលបានលាភសក្ការៈពីអចលន្រព្យរបស់ខ្លួន។
មួយវិញទៀត ប្រសិនបើអ្នកត្រូវការលុយទៅបង្វិលធ្វើអ្វីផ្សេងទៀតដែលអាចនាំឱ្យចំណេញលុយត្រឡប់មកវិញច្រើន ប៉ុន្តែអ្នកនៅព្យាយាមរង់ចាំតម្លៃដីឡើងថ្លៃទើបសម្រេចលក់ ចុះបើជួនជាចៃដន្យ តម្លៃទីផ្សារអចលនទ្រព្យធ្លាក់ចុះ ឬជួបនឹងហានិភ័យណាមួយកើតឡើង សំណួរសួរថា តើអ្នកនៅតែអាចទទួលបានផលចំណេញពីដី ឬជួបភាពខាតបង់ ដែលចំណាយពេលវេលាឥតប្រយោជន៍ ? ដូច្នេះ ដើម្បីឱ្យមានភាពច្បាស់លាស់ និងអស់មន្ទិលសង្ស័យនៅក្នុងចិត្តខណៈបើអ្នកមិនបានជ្រាបច្បាស់ពីស្ថានភាពជាក់ស្ដែងនៃតម្លៃទីផ្សារ ជម្រើសចុងក្រោយ អ្នកគួរតែរកជំនួយការដែលជាអ្នកជំនាញផ្នែកអចលនទ្រព្យ ឬភ្នាក់ងារជំនាញដែលមានភាពច្បាស់លាស់ មានកេរ្តិ៍ឈ្មោះក្នុងវិស័យអចលនទ្រព្យធ្វើជាបង្អែក ទើបការសម្រេចចិត្តរបស់អ្នកមិនជួបភាពស្តាយក្រោយ ៕
