ដោយ វុត្ថា
ភ្នំពេញ៖ ក្រុងចំនួនបីរបស់កម្ពុជា គឺក្រុងសៀមរាប ក្រុងព្រះសីហនុ និងក្រុងតាខ្មៅ នឹងទទួលបានបណ្ដាញចម្រោះទឹកកខ្វក់ និងប្រព័ន្ធរំដោះទឹកប្រកបដោយប្រសិទ្ធភាព ក្រោមគម្រោងសិក្សាសមិទ្ធិលទ្ធភាព និងផែនការមេរបស់ក្រសួងសាធារណការ និងដឹកជញ្ជូន។
លោកទេសរដ្ឋមន្ត្រី ស៊ុន ចាន់ថុលបានអញ្ជើញជាអធិបតីក្នុងពិធីចុះហត្ថលេខាលើអនុស្សរណៈនៃការយោគយល់ រវាងក្រសួងសាធារណការ និងដឹកជញ្ជូន និងក្រុមហ៊ុនប៉េជីង អឺបេន ខនស្ត្រាក់សិន គ្រុប ខូ អិល ធីឌី ស្ដីពី“កិច្ចសហប្រតិបត្តិការ លើគម្រោងសិក្សាសមិទ្ធិលទ្ធភាព និងផែនការមេ សម្រាប់បណ្ដាញទឹកកខ្វក់និងប្រព័ន្ធរំដោះទឹក ក្រុងសៀមរាប ក្រុងព្រះសីហនុ និងក្រុងតាខ្មៅ”កាលពីម្សិលម៉ិញនេះថា អនុស្សរណៈនៃការយោគយល់នេះ ធ្វើឡើងក្នុងគោលបំណងសិក្សាផែនការមេឱ្យបានស៊ីជម្រៅ ក្នុងការកសាងបណ្ដាញទឹកកខ្វក់ និងប្រព័ន្ធរំដោះទឹកក្នុងក្រុងទាំងបី ដើម្បីលើកម្ពស់គុណភាពសេវាសាធារណៈជូនប្រជាពលរដ្ឋ ទឹកស្អាត បរិស្ថានស្អាត និងកាត់បន្ថយការចំណាយថវិកាជាតិ ក៏ដូចឆ្លើយតបទៅនឹងកំណើនភ្ញៀវទេសចរ ដែលនឹងមានការកើនឡើងរហូតដល់ដប់លាននាក់ក្នុងឆ្នាំ២០២៣។
លោកបន្តថា “កិច្ចសហការរវាងវិស័យឯកជន និងវិស័យរដ្ឋក្នុងការជំរុញកំណើនសេដ្ឋកិច្ចជាតិ និងរួមចំណែកដល់ការកាត់បន្ថយភាពក្រីក្ររបស់ប្រជាពលរដ្ឋ”។
បច្ចុប្បន្ននេះក្រសួងសាធារណការ និងដឹកជញ្ជូនបាននឹងកំពុងសហការជាមួយអង្គការ JICA ក្នុងការរំដោះទឹកក្នុងទីក្រុងភ្នំពេញផងដែរ។
លោកទេសរដ្ឋមន្រ្តីស៊ុន ចាន់ថុលក៏បានកោតសរសើរយ៉ាងជ្រាលជ្រៅចំពោះក្រុមប៉េជីង អឺបេន ខនស្ត្រាក់សិនគ្រុប ខូ អិល ធីឌី ដែលបានសហការជាមួយក្រសួងសាធារណការ និងដឹកជញ្ជូន ក្នុងការសិក្សាផែនការមេសម្រាប់បណ្ដាញទឹកកខ្វក់ និងប្រព័ន្ធរំដោះទឹកក្រុងទាំងបី៕
