ដោយៈ ប៊ី
ភ្នំពេញៈ ក្រុមហ៊ុន NagaCorp ទទួលបានចំណូលប្រមាណ៨៧៨,៧លានដុល្លារអាមេរិក នៅក្នុងឆ្នាំ២០២០ ធ្លាក់ចុះចំនួន៥០.០ភាគរយ ធៀបនឹងឆ្នាំ២០១៩។ នេះបើយោងតាមការចុះចេញផ្សាយរបស់គេហទំព័រ GGRAsia នៅថ្ងៃទី៩ ខែមីនា ឆ្នាំ២០២១។
ក្រុមហ៊ុនNagaCorp ប្រកាសទទួលបានចំណូលជាង៨៧៨លានដុល្លារពីប្រតិបត្តិការនៅកម្ពុជា
ក្រុមហ៊ុនបានឱ្យដឹងនៅក្នុងសេចក្តីថ្លែងការណ៍ ដែលបានប្រកាសនៅផ្សារហ៊ុននៅហុងកុងថា ក្រុមហ៊ុននេះទទួលបាន ប្រាក់ចំណេញសុទ្ធជាង១០២,៣លានដុល្លារអាមេរិក សម្រាប់រយៈពេលពេញមួយឆ្នាំ២០២០ ដែលគាំទ្រដោយការស្តារឡើងវិញនៅឆមាសទី២ ឆ្នាំកន្លងមកនេះ។
ប្រាក់ចំណេញសុទ្ធនេះបានធ្លាក់ចុះ៨០,៤ភាគរយ បើធៀបនឹងទំហំទឹកប្រាក់ជិត៥២១,៣លានដុល្លារអាមេរិក ក្នុងឆ្នាំ២០១៩។
ក្រុមហ៊ុនបានឱ្យដឹងថា ក្រុមហ៊ុនទទួលបានចំណូលសរុបប្រមាណ៨៧៨,៧លានដុល្លារអាមេរិក នៅក្នុងឆ្នាំ២០២០ ធ្លាក់ចុះចំនួន៥០.០ភាគរយ ធៀបនឹងឆ្នាំ២០១៩។
ក្រុមហ៊ុនបានប្រកាសភាគលាភចុងក្រោយ ចំនួន០,១៨៨ដុល្លារអាមេរិក ក្នុងមួយហ៊ុន ដែលនឹងត្រូវបានបញ្ចេញនៅថ្ងៃទី៥ ខែកក្កដា ខាងមុខនេះ។
ក្រុមហ៊ុនចុះបញ្ជីនៅហុងកុងនេះ ក៏បានស្នើអភិវឌ្ឍន៍រមណីយដ្ឋាន មិនមែនល្បែង ដែលមានទឹកប្រាក់៣៥០លានដុល្លារ នៅជិតប្រាសាទអង្គរវត្ត ដែលជាតំបន់បេតិកភណ្ឌពិភពលោករបស់យូណេស្កូ។
កាស៊ីណូទាំងអស់នៅក្នុងប្រទេសកម្ពុជា ត្រូវបានបញ្ជាឱ្យបិទជាបណ្តោះអាសន្នកាលពីថ្ងៃទី១ ខែមេសា ឆ្នាំមុន ដែលជាផ្នែកមួយនៃវិធានការណ៍ ដើម្បីការពារការរីករាលដាលនៃជំងឺកូវីដ១៩៕
