ដោយ ដួង ចន្ទ្រា
ភ្នំពេញ៖ មជ្ឈមណ្ឌលពាណិជ្ជកម្មចិនដ៏ធំមួយ បានបើកដំណើរការនៅតាមបណ្តោយផ្លូវជាតិលេខ៤ ដែលជាតំបន់ឧស្សាហកម្មដ៏ធំរបស់កម្ពុជា និងកំពុងក្លាយជាទីតាំងវិនិយោគដ៏ធំនៅភាគខាងលិចក្រុងភ្នំពេញ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានមានប្រសាសន៍ក្នុងពេលចូលរួមពិធីបើកតំបន់ឧស្សាហកម្ម ដែលមានឈ្មោះចេឌូបាយីកម្ពុជា-ចិន ដែលមានទីតាំងស្ថិតនៅតាមបណ្តោយផ្លូវជាតិលេខ ៤ ក្នុងឃុំរការ ស្រុកអង្គស្នូល ខេត្តកណ្តាល នាព្រឹកថ្ងៃទី២១ ខែមិថុនា ឆ្នាំ២០១៨នេះថា មជ្ឈមណ្ឌលពាណិជ្ជកម្មនេះ នឹងបង្កើតឱកាសការងារ និងប្រាក់ចំណូលជូនប្រជាជន លើកកម្ពស់វិស័យទេសចរណ៍ជាតិ ព្រមទាំងជំរុញទំហំពាណិជ្ជកម្មទ្វេភាគីរវាងកម្ពុជា និងចិន ថែមទៀត។
លោកបន្តថា សេដ្ឋកិច្ចកម្ពុជាកំពុងមានកំនើនរឹងមាំ និងវឌ្ឍនភាពនៃវិស័យសំណង់ ដែលធ្វើឲ្យកើនឡើងនូវតម្រូវការប្រើប្រាស់សម្ភារ និងគ្រឿងសង្ហារឹមប្រណិតៗ ហើយការមកដល់នៃផ្សារពាណិជ្ជកម្មចិន នឹងផ្តល់ជម្រើសកាន់តែច្រើនសម្រាប់ប្រជាជនកម្ពុជា ដែលប្រាថ្នាចង់បានជីវិតរស់នៅតាមបែបស៊ីវិល័យ ស្របតាមបរិបទរីកចម្រើននៃវិស័យសេដ្ឋកិច្ច។
ជាមួយគ្នានេះ រដ្ឋមន្ត្រីពាណិជ្ជកម្មកម្ពុជា បានអំពាវនាវដល់សហគ្រិន និងផលិតករកម្ពុជា សហការជាមួយក្រសួងពាណិជ្ជកម្ម ដាក់តាំងបង្ហាញផលិតផល និងមុខទំនិញ នៅក្នុងបរិវេណពិព៌ណ ដែលផ្តល់ជូនដោយក្រុមហ៊ុន ចេឌូបាយី គ្រឿងសង្ហារឹម គ្រុប ដើម្បីស្វែងរកអតិថិជន និងដៃគូពាណិជ្ជកម្ម មកពីប្រទេសចិន សំដៅលក់ និងចែកចាយទៅកាន់ទីផ្សារធំៗនៅក្នុងប្រទេសចិន។
លោកស្រី Zhang Ying អនុប្រធានមន្ទីរពាណិជ្ជកម្ម នៃខេត្តស៊ីឈួនប្រទេសចិន បានជម្រាបជូនអង្គពិធី អំពីសក្តានុពលសេដ្ឋកិច្ចរបស់ខេត្តស៊ីឈួន ដែលជាមជ្ឈមណ្ឌលឧស្សាហកម្មធំមួយនៅក្នុងប្រទេសចិន ហើយការវិនិយោគបង្កើតផ្សារពាណិជ្ជកម្មនៅក្នុងប្រទេសកម្ពុជា គឺដើម្បីធ្វើគំរូផ្សារលើកដំបូងរបស់ខេត្តស៊ីឈួន នៅក្នុងតំបន់អាស៊ាន សំដៅឆ្លើយតបនឹងគោលនយោបាយផ្លូវមួយ ខ្សែក្រវ៉ាត់មួយ របស់រដ្ឋាភិបាលចិន៕
