ដោយ វុត្ថា
ភ្នំពេញ៖ នៅទីបំផុតសហភាពអឺរ៉ុប បានចាប់ផ្តើមចាប់អារម្មណ៍ក្នុងការពង្រីកទំនាក់ទំនង និងបង្កើនទំហំពាណិជ្ជកម្មនៅកម្ពុជា តាមរយៈការបើកការតាំងពិព័រណ៍ផលិតផលមកពីអឺរ៉ុបនៅចុងខែមិថុនានេះ។
ថ្លែងក្នុងសន្និសីទកាសែត ស្តីពីការតាំងពិព័រណ៍ផលិតផលមកពីអឺរ៉ុប (EuroFair) នៅព្រឹកថ្ងៃទី២២ ខែមិថុនានេះ លោក Arnaud DARC ប្រធានសភាពាណិជ្ជកម្មអឺរ៉ុបនៅកម្ពុជា បានលើកឡើងថា នេះគឺជាលើកទីមួយដែលព្រឹត្តការណ៍នេះរៀបចំឡើង ក្នុងគោលបំណងជំរុញពង្រីក និងបង្កើតទំនាក់ទំនង ក៏ដូចជាពង្រឹងចំណងមិត្តភាព រវាងកម្ពុជានិងអឺរ៉ុប សម្រាប់បច្ចុប្បន្នកាលក៏ដូជាសម្រាប់អនាគតកាល។ លោកបន្តថា ក្នុងព្រឹត្តិការណ៍នោះ មានក្រុមហ៊ុនប្រមាណជាង៤០មកពីអឺរ៉ុប នឹងនាំផលិត ផល ដូចជា គ្រឿងយន្ត គ្រឿងសង្ហារិម សិប្បកម្ម សំលៀកបំពាក់ គ្រឿងម៉ាស៊ីន គ្រឿងបរិក្ខាសុខាភិបាល គ្រឿងម៉ាស៊ីន ម្ហូបអាហារ និងផលិតផលជាច្រើនទៀត មកចូលរួមបង្ហាញពិព័រណ៌នេះ។
ពិព៌ណនេះនឹងប្រព្រឹត្តទៅចាប់ពីថ្ងៃទី២៩ ខែមិថុនា ដល់ថ្ងៃទី១ខែកក្កដា ឆ្នាំ២០១៨ខាងមុខនេះ នៅមជ្ឈមណ្ឌលពិព័រណ៍កោះពេជ្រ។
លោក Arnaud DARC បានបន្តថា នេះគឺជាឱកាសមួយដ៏វិសេសវិសាលសម្រាប់ក្រុមហ៊ុនធុរកិច្ច និងអ្នកប្រើប្រាស់ ដែលអាចមកជួបគ្នាស្វែងយល់ឲ្យបានកាន់តែច្រើនឡើងអំពីបណ្តាប្រទេសនៅអឺរ៉ុប ដែលផលិតនិងផ្តល់សេវាកម្មនានា ជូនអ្នកប្រើប្រាស់ទាំងនៅកម្ពុជា ក៏ដូចជានៅបរទេស។
ព្រឹត្តការណ៍ពិព័រណ៍ខាងលើនេះ ត្រូវបានរៀបចំឡើងដោយសភាពាណិជ្ជកម្មអឺរ៉ុបនៅកម្ពុជា ឧបត្ថម្ភដោយក្រុមហ៊ុនព្រលានយន្តហោះកម្ពុជា (Cambodia Airports)។ ព្រឹត្តិការណ៍នេះដែរ ក៏នឹងមានការអញ្ញើញចូលរួមពីសភាពាណិជ្ជកម្មជាតិនៃបណ្តាប្រទេសនៅអឺរ៉ុប និងសមាគមធុរកិច្ចចំនួន៥នៅកម្ពុជាផងដែរ រួមមាន សភាពាណិជ្ជកម្មបារំាង សភាពាណិជ្ជកម្មអាល្លឺម៉ង់ សភាពាណិជ្ជអង់គ្លេស សភាពាណិជ្ជកម្មអ៊ីតាលី និងសភាពាណិជ្ជកម្មកម្មអឺរ៉ុបខាងជើង៕
