ដោយៈគង់ សូរិយា
ភ្នំពេញៈ មជ្ឈមណ្ឌលពាណិជ្ជកម្មលំដាប់អន្តរជាតិ ថ្មីមួយ តម្លៃ៥៨០លានដុល្លារ និងខុនដូកំពស់ជាង ២០០ម៉ែត្រ និងបោះទុន វិនិយោគប្រមាណ ២០០លានដុល្លារ កំពុងរត់ប្រណាំងជាមួយពេល វេលា ដើម្បីបញ្ចប់តាមផែនការរបស់ខ្លួន។
ខុនដូនិងមជ្ឈមណ្ឌលពាណិជ្ជកម្មតម្លៃជិត៨០០លានដុល្លារចំនួនពីរត្រៀមបង្អួតខ្លួននៅសង្កាត់ទន្លេបាសាក់
វត្តមានអាគារពាណិជ្ជកម្មកំពស់ជាង២០០ម៉ែត្រទាំងពីរនេះ បាននិងនឹងផ្លាស់ប្តូរមុខមាត់ រាជធានីភ្នំពេញ។
មជ្ឈមណ្ឌលពាណិជ្ជកម្ម ដែលបាននិងកំពុងឈាន ទៅបញ្ចប់ការសាងសង់នាពេលខាងមុខនេះ គឺគំរោង The PeAk ដែលមានអាគារកំពស់៥៥ជាន់ចំនួន៣ ដែលគំរោងនេះរួមបញ្ចួលនូវផ្សារទំនើ់ប ខុនដូជាង១០០០យូនីត ការិយាល័យកម្រិតផ្កាយ៥ សណ្ឋាគារ Shangri- La កម្រិតផ្កាយ៥ និងសេវាកម្មជាច្រើនទៀត។
គំរោងដ៏ធំនេះ ត្រូវបានវិនិយោគដោយក្រុមហ៊ុន World Bridge Group សហការជាមួយក្រុមហ៊ុន Oxley Holding Group ដែលមានមូលដ្ឋាននៅ ប្រទេសសឹង្ហបុរី។
មជ្ឈមណ្ឌលពាណិជ្ជកម្មដ៏ធំនេះ ត្រូវបានពន្យាពេល ការសាងសង់ និងបញ្ចប់មិនបានតាមផែនការ ដោយសារក្រុមហ៊ុនសាងសង់មានបញ្ហា ប៉ុន្តែបន្ទាប់ពីគំរោងដ៏ធំនិងចំណាយទុនវិនិយោគ៥៨០លានដុល្លារនេះ ផ្លាស់ប្តូរក្រុមហ៊ុនសាងសង់ ធ្វើឲ្យគំរោងនេះបាននិងកំពុងបង្កើនល្បឿនរបស់ខ្លួន។
ខុនដូប្រណីតមួយទៀតកំពស់ជាង២០០ម៉ែត្រ Morgan Tower ដែលវិនិយោគដោយក្រុមហ៊ុន Morgan Group បាននិងកំពុងបង្កើនល្បឿន សាងសង់ផងដែរ ដោយគំរោងនេះស្ថិតនៅលើ ទីក្រុងកោះពេជ្រ។
ខុនដូដ៏ខ្ពស់នេះ ត្រូវបានប្រកាសទុនវិនិយោគ ប្រមាណ២០០លានដុល្លារអាមេរិក ដែលជាគំរោង ប្រណីតមួយ សាងសង់នៅទីតាំងជាប់ចំណាត់ ថ្នាក់លេខ១ នៅរាជធានីភ្នំពេញ ដែលតំបន់នេះ នឹងក្លាយជាមជ្ឈមណ្ឌលពាណិជ្ជកម្ម មជ្ឈមណ្ឌល កំសាន្តលំដាប់អន្តរជាតិនាពេលអនាគត៕
