ដោយៈស៊ីវ ម៉េង
ភ្នំពេញៈ ក្រុមហ៊ុនអចលនទ្រព្យធំៗចំនួនពីរ គឺក្រុមហ៊ុនអចលនទ្រព្យ LSCG និង ក្រុមហ៊ុន Milky-Way Realty Investment PLC បានបោះទុនដំបូងរួមគ្នា១លានដុល្លារ បង្កេីតវគ្គបណ្តុះបណ្តាលភ្នាក់ងារអចលនទ្រព្យស្តង់ដាចំនួន១០០០នាក់។
ការបណ្តុះបណ្តាលនេះ នឹងធ្វើឡើងតាមបច្ចេកវិទ្យាទំនើប របស់ប្រទេសចិន និងបច្ចេកវិទ្យារបស់ខ្មែរ ដើម្បីឆ្លើយតបទៅនឹងតំរូវការទីផ្សារអចលនទ្រព្យជាតិ និងអន្តរជាតិនាពេល បច្ចុប្បន្ន និងពេលអនាគត ។
អគ្គនាយកក្រុមហ៊ុន LSCG លោកលី សុខឆាយបានមានប្រសាសន៍ឲ្យដឹងក្នុងពិធីចុះហត្ថលេខាកាលពីចុងសប្តាហ៍មុនថា ស្ថិតក្នុងតំណាក់កាល ដែលប្រទេសកម្ពុជាមានសុខសន្តិភាពពេញលេញ ហើយបាននឹងកំពុងមានការអភិវឌ្ឍន៍ និងរីកចម្រើនលើគ្រប់វិស័យ ក្នុងនោះវិស័យអចលនទ្រព្រក៏មានការរីកចំរើន និងបានដើរតួនាទីយ៉ាងសកម្ម ដែលជាឆ្អឹងខ្នងសេច្ឋកិច្ចជាតិ ទោះបីមានការរំខានខ្លះៗពីជំងឺរាតត្បាតកូវីត១៩ក៏ដោយ ។
លោកបន្ថែមទៀតថា “ការសហការណ៍បោះទុន បង្កើតវគ្គបណ្តុះបណ្តាលភ្នាក់ងារអចលនទ្រព្យស្តង់ដាចំនួន១០០០នាក់នេះ គឺជាចំណុចចាប់ផ្តើមដំបូង ដែលក្រុមហ៊ុនយើងទាំងពីរបានគិតគួរតាំងពីជាង២ឆ្នាំមុនកូវីតមកម្លេះ”។ លោកបន្តថា “ប៉ុន្តែដោយសារតែស្ថានភាពនៃជំងឺរាតត្បាតកូវីត១៩ ចេះតែបន្តអូសបន្លាយ ទើបបណ្តាលអោយក្រុមហ៊ុន យើងទាំងពីរ ពន្យាពេលចាប់ផ្តើមគំរោងមកទល់ពេលបច្ចុប្បន្ននេះ”។
ទន្ទឹមគ្នានោះដែរ លោក ប៉ាត់ ចំណាន ជា សហស្ថាបនិកក្រុមហ៊ុនអចលនទ្រព្យ Milky-Way Realty Investment PLC បានបន្ថែមទៀតថា ដោយមើលឃើញឱកាសក្នុងការសហការ រវាងក្រុមហ៊ុនទាំងពីរមានចក្ខុវិស័យដូចគ្នា។ យើងបានផ្តោតទៅលើបច្ចេកវិទ្យាផ្សារភ្ជាប់ជាមួយអចលនទ្រព្យ ដោយយើងអាចបង្វឹកភ្នាក់ងារអចលនវត្ថុ ឲ្យមានជំនាញច្បាស់លាស់ ដើម្បីឆ្លើយតបចំពោះទីផ្សារបច្ចុប្បន្ន។
លោកបន្តថា “ក្រុមហ៊ុនបានសំរេចចិត្តវិនិយោគរួមគ្នា ដោយច្របាច់ platform នៃក្រុមហ៊ុនទាំងពីរ និងបានបង្កើតវគ្គបណ្តុះបណ្តាល ភ្នាក់ងារអចលនទ្រព្យស្តង់ដាចំនួន ១០០០នាក់ ដើម្បីជំរុញការរីកចម្រើនក្នុងវិស័យនេះ”៕
