ដោយៈគង់ សូរិយា
ភ្នំពេញៈ ការស្ថាបនាផ្លូវជាតិលេខ៥ ដែលជាផ្លូវវែងជាងគេនៅកម្ពុជាជាមួយនឹងហិរញ្ពប្បទានរបស់រដ្ឋាភិបាលជប៉ុន ប្រមាណ៥០០លានដុល្លារ ត្រូវបានអ្នកជំនាញមើលឃើញថា បន្ទាប់ពីផ្លូវនេះសាងសង់ចប់ តម្លៃអចលនទ្រព្យនៅតាមបណ្តោយផ្លូវនេះកើនឡើងចន្លោះពី១០ទៅ៣០ភាគរយ។
រដ្ឋាភិបាលកំពុងរៀបចំផែនការអភិវឌ្ឍន៍តំបន់នៅជាប់ផ្លូវនេះ ជាសួនឧស្សាហកម្ម ដើម្បីទទួលបានផលប្រយោជន៍ ពីការឆ្លងកាត់ការដឹកទំនិញពីប្រទេសថៃ ទៅកាន់ប្រទេសវៀតណាម ឆ្លងកាត់កម្ពុជា។
ប្រធានសមាគមអចលនទ្រព្យសកល លោកសំ សុខនឿនបានមានប្រសាសន៍ឲ្យដឹងថា ផ្លូវជាតិលេខ៥ ជាផ្លូវសំខាន់សម្រាប់សេដ្ឋកិច្ចកម្ពុជា ដោយតភ្ជាប់ពីរាជធានី-ភ្នំពេញទៅប្រទេសថៃ។ យ៉ាងណាក៏ដោយ ក្នុងរយៈពេល៣ឆ្នាំចុងក្រោយ តម្លៃដីនៅតាមផ្លូវមួយនេះមិនបានប្រែប្រួលអ្វីគួរឱ្យកត់សម្គាល់ទេ។ លោកបន្ថែមថា បច្ចុប្បន្នបើគេប្រៀបធៀបទីផ្សារ និងតម្លៃអចលនទ្រព្យនៅតាមផ្លូវជាតិលេខ៥ ជាមួយនឹងបណ្តាផ្លូវជាតិផ្សេងទៀតចេញពីរាជធានីភ្នំពេញ គឺនៅតាមផ្លូវជាតិលេខ៥ មិនទាន់ឃើញមានគម្រោងអភិវឌ្ឍន៍ធំៗ ឬលំនៅឋានលក្ខណៈជាបុរីច្រើនទេ ប៉ុន្តែវានឹងរីកចម្រើនក្នុងពេលឆាប់ៗ។
លោកបន្តថា “ខ្ញុំគិតថានៅពេលផ្លូវនេះកែលម្អរួច តម្លៃអចលនទ្រព្យនឹងកើនក្នុងរង្វង់៣០ភាគរយ ដោយសារភាពងាយស្រួលក្នុងការធ្វើដំណើរ ការកើនឡើងនៃគម្រោងអភិវឌ្ឍន៍ និងគម្រោងវិនិយោគចម្រុះដូចជា រោងចក្រ និងឃ្លាំងស្តុកទំនិញ”។
មានប្រសាសន៍ក្នុងកម្មវិធី MPWT Live Show កាលពីថ្ងៃ ៣០ ខែសីហា លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានឱ្យដឹងថា បច្ចុប្បន្នការស្ថាបនាផ្លូវពីក្រុងបាត់ដំបង-ក្រុងសិរីសោភ័ណ បានបញ្ចប់១០០ ភាគរយហើយ ចំណែកកំណាត់ផ្លូវពីព្រែកក្តាម-ពោធិ៍សាត់ និងពោធិ៍សាត់-បាត់ដំបង កំពុងសាងសង់ដោយគ្រោងរួចរាល់ឆ្នាំ ២០២២-២០២៣។
លោកបន្តថា សម្រាប់កំណាត់ផ្លូវជាតិលេខ៥ ចេញពីក្រុងសិរីសោភ័ណ ទៅក្រុងប៉ោយប៉ែតនឹងរួចរាល់ក្នុងឆ្នាំ២០២៤ ខណៈបច្ចុប្បន្នក្រសួងសាធារណការ កំពុងជ្រើសរើសក្រុមហ៊ុនសាងសង់។
ជាមួយគ្នានេះ លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមានប្រសាសន៍ឲ្យដឹងផងដែរថា នៅពេលបញ្ចប់ការដ្ឋាន អចលនទ្រព្យនៅបណ្តោយផ្លូវជាតិនេះ អាចនឹងកើនឡើងចន្លោះពី១០ ទៅ១៥ភាគរយ បើធៀបពេលបច្ចុប្បន្ន។ ការកើនឡើងក្នុងអត្រាទាបបែបនេះ គឺដោយសារវាជាផ្លូវចាស់ដែលមានការធ្វើចរាចរណ៍ឆ្លងកាត់ច្រើន ហើយគេគ្រាន់តែកែលម្អឡើងវិញប៉ុណ្ណោះ។
លោកបន្តថា “តម្លៃអចលនទ្រព្យនៅតាមបណ្តោយផ្លូវ ដែលកំពុងមានចរាចរណ៍ គឺមិនសូវប្រែប្រួលខ្លាំងដូចការស្ថាបនាផ្លូវថ្មីនោះទេ។ ប៉ុន្តែសម្រាប់គម្រោងសាងសង់ និងគម្រោងវិនិយោគថ្មីៗ អាចនឹងកើតមានច្រើន នៅពេលការសាងសង់ផ្លូវរួចរាល់ទាំងស្រុងង”៕
