ដោយគង់ សូរិយា
ភ្នំពេញ៖ មន្រ្តីជាន់ខ្ពស់រដ្ឋាភិបាលកម្ពុជាបានថ្លែងថា រយៈពេល៧ខែឆ្នាំនេះ អ្នកវិនិយោគចិនវិនិយោគទឹកប្រាក់រហូតដល់៥០០០លានដុល្លារនៅកម្ពុជា ដែលជាចំនួនដ៏ច្រើនធៀបនឹងធៀបនឹងអ្នកវិនិយោគអន្តរជាតិដទៃទៀត។
ឧបនាយករដ្ឋមន្រ្តីហោ ណាំហុងបានមានប្រសាសន៍ក្នុងពិធីបើកការដ្ឋានសាងសង់មជ្ឈមណ្ឌលពាណិជ្ជកម្ម Morgan Tower តម្លៃ១៦០លានដុល្លារអាមេរិកនៅទីក្រុងកោះពេជ្រនាព្រឹកថ្ងៃទី១៨ សីហានេះថា ទំហំទឹកប្រាក់ខាងលើនេះ គិតចាប់ពីខែមករា ដល់ខែកក្កដាកន្លងមកនេះ។លោកបន្តថា បើគិតពីឆ្នាំ២០១៣ ដល់ឆ្នាំ២០១៨អ្នកវិនិយោគចិនបានបោះទុនវិនិយោគរហូតដល់២១,០០០ដុល្លារនៅកម្ពុជា ហើយចិនបានកសាងផ្លូវជាតិ៣០០០គីឡូម៉ែត្រ និងស្ពានចំនួន៧នៅកម្ពុជា។
អាគារមជ្ឈមណ្ឌលពាណិជ្ជកម្មលំដាប់ផ្កាយប្រាំរបស់ Morgan Tower កំពស់៤៦ជាន់ ស្មើនឹង២១០ម៉ែត្រ នឹងប្រើប្រាស់ជាសណ្ឋាគារ ការិយាល័យ ភោជនីយដ្ឋាន និងជាប្រភេទអាគារបៃតង ដែលសន្សំសំចៃថាមពលអគ្គិសនី។
គំរោងវិនិយោគរបស់ចិននៅកម្ពុជា ផ្តោតលើវិស័យចម្បងៗជាច្រើន ដូចជាវិស័យវាយណភ័ណ្ឌ សំណង់ វារីអគ្គិសនី គមនាគមន៍ និងវិស័យទេសចរណ៍ជាដើម។
លោកឧបនាយករដ្ឋមន្រ្តីហោ ណាំហុងបានមានប្រសាសន៍ឲ្យដឹងទៀតថា រាជរដ្ឋាភិបាលកម្ពុជាសូមថ្លែងអំណរគុណដល់រដ្ឋាភិបាល និងប្រជាជនចិន ដែលបានឧបត្ថម្ភគាំ ទ្រចិនលើគ្រប់វិស័យ ទាំងវិស័យនយោបាយ សេដ្ឋកិច្ចនិងសង្គម ហើយឧបនាយករដ្ឋមន្រ្តីរូបនេះបានអះអាងថា ការអភិវឌ្ឍដ៏អស្ចារ្យរបស់កម្ពុជាលើគ្រប់វិស័យ ដែលស្តែងឲ្យ ឃើញសព្វថ្ងៃនេះ មិនអាចកាត់ផ្តាច់ពីការរួមចំណែកពីជំនួយ ការគាំទ្រ និងការវិនិយោគរបស់អ្នកវិនិយោគចិននោះទេ។
ឧកញ៉ាពុង ឃាវសែប្រធានក្រុមហ៊ុនOCIC ដែលគ្រប់គ្រងទីក្រុងកោះពេជ្របានថ្លែងថា មិនយូរប៉ុន្មានទៀតទេ កម្ពុជានឹងមានអាគារខ្ពស់ៗរាប់រយម៉ែត្រ ដែលនេះព្រោះតែកម្ពុជាមានស្ថិរភាពនយោបាយល្អប្រសើរ ក្រោមការដឹកនាំរបស់ប្រមុខរដ្ឋាភិបាល សម្តេចតេជោហ៊ុន សែននាយករដ្ឋមន្រ្តីនៃពកម្ពុជា៕
