ដោយៈគង់ សូរិយា
ភ្នំពេញៈ ស្ពានយោងដោយខ្សែកាបយ៉ាងស្រស់ស្អាត តភ្ជាប់ពីផ្លូវជាតិលេខ៥ទៅកាន់ទីក្រុងរណបជ្រោយចង្វារ សម្រេចបាន៥៦ភាគរយហើយ គិតរហូតមកទល់ពេលនេះ ខណៈដំណើរការសាងសង់បានធ្វើឡើងយ៉ាងសកម្ម។
លោកនីស៊ី ហារ៉ាប្រធានគ្រប់គ្រងគំរោងសាងសង់ស្ពាននេះ នៃក្រុមហ៊ុន OCIC បានមានប្រសាសន៍ឲ្យដឹងកាលពីចុងសប្តាហ៍មុនថា រហូតមកទល់ពេលនេះការសាងសង់ស្ពាននេះ សំរេចបាន៥៦ភាគរយនៃគំរោងទាំងមូល ស្របពេលការសាងសង់គ្រឹះបានបញ្ចប់១០០ភាគរយ។
លោកបន្តថា “បច្ចុប្បន្នកំពុងចាក់សសរចេញពីជើងតាង និងដំឡើងធ្នឹមស្ពានបាន១ចំនួន”។លោកបន្តថា “យើងអាចនិយាយថាធ្វើតាមផែនការ ដែលគ្រោងបញ្ចប់នៅពាក់កណ្តាលឆ្នាំ២០២៣”។
អគ្គនាយករងក្រុមហ៊ុន OCIC លោកទូច សំណាងធ្លាប់បានមានប្រសាសន៍ឲ្យដឹងថា នេះជាស្ពានដែលក្រុមហ៊ុនOCIC ត្រូវចំណាយប្រើប្រាស់ថវិកាជួយដីពីរដ្ឋបាលរាជធានីភ្នំពេញ សម្រាប់ការវិនិយោគទីក្រុងរណបជ្រោយចង្វារ ទីក្រុងនៃអនាគត។ លោកបន្តថា ស្ពាននេះជាប្រភេទស្ពានយោងដោយខ្សែកាប ដែលមានប្រវែងប្រមាណ៥០០ម៉ែត្រ និងគ្រោងចំណាយថវិកាសាងសង់អស់ប្រមាសណ៣០លានដុល្លារអាមេរិក។
លោកបន្តថា “ស្ពាននេះនឹងជួយលើកកំពស់មុខមាត់រាជធានីភ្នំពេញផង និងសម្រូលការកកស្ទះចរាចរណ៍៍នៅលើស្ពានជ្រោយចង្វារផងដែរ”៕
