ដោយៈគង់ សូរិយា
ភ្នំពេញៈ មន្រ្តីអ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាបានមានប្រសាសន៍ថា ការបើកការដ្ឋានសាងសង់ស្ពានឆ្លងកាត់ទន្លេមេគង្គ នៅក្រុងក្រចេះ មិនទាន់កំណត់ពេលវេលាជាក់លាក់ទេ។
លោកបានមានប្រសាសន៍ឲ្យដឹងតាមទូរស័ព្ទ កាលពីថ្ងៃទី២០ តុលាកន្លងមកថា ការបើកការដ្ឋានស្ថាបនាស្ពានឆ្លងកាត់ទន្លេមេគង្គ តភ្ជាប់រវាងខេត្តក្រចេះ ទៅកាន់ផ្លូវជាតិ ឆ្ពោះទៅកាន់ខេត្តកំពង់ធំ អាចបើកការដ្ឋានស្ថាបនានៅចុងឆ្នាំនេះ ឬដើមឆ្នាំ២០២២ខាងមុខនេះ។លោកបន្តថា ពេលវេលាជាក់លាក់ យើងមិនអាចកំណត់បាននៅឡើយទេ ព្រោះអ្វីរង់ចាំសេចក្តីសម្រេចពីប្រមុខរាជរដ្ឋាភិបាល។
លោកបន្តថា “ស្ពានមិត្តភាពកម្ពុជា ចិនថ្មីនេះដើរតួនាទីសំខាន់ក្នុងការធ្វើដំណើរ និងសមាហរណកម្មផ្ទៃក្នុងប្រទេសកម្ពុជា”។
ស្ពានឆ្លងកាត់ទន្លេមេគង្គថ្មីនេះ បានសិក្សាបញ្ចប់រូចហើយ ដោយស្ពាននេះមានប្រវែងប្រមាណ១៧០០ម៉ែត្រ និងគ្រោងចំណាយថវិកាសាងសង់ អស់៦០លានដុល្លារអាមេរិក។
លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនធ្លាប់បានមានប្រសាសន៍ឲ្យដឹងថា ការសិក្សាស្ពាននេះបានបញ្ចប់រួចហើយ និងទទួលបានកញ្ចប់ថវិកាពីមិត្តចិនផងដែរ ហេតុនេះការបើកការដ្ឋានស្ថាបនានៅពេលណា អាស្រ័យលើកាលវិភាគរបស់សម្តេចតេជោហ៊ុន សែននាយករដ្ឋមន្រ្តីនៃកម្ពុជា។
លោកបន្តថា “ហេដ្ឋារចនាសម្ព័ន្ឋធំៗរបស់ជាតិ នៅតែបន្តការសាងសង់បើទោះបីជាកម្ពុជាកំពុងប្រឈមមុខនឹងវិបត្តិកូវីដ១៩ក្តី”៕
