ដោយៈគង់ សិរីជេស៊ីកា
ភ្នំពេញៈ គម្រោងសាងសង់ស្ពានមិត្តភាពកម្ពុជា កូរ៉េបាននិងកំពុងដាក់ក្នុងផែនការទិភាព នៃការខ្ចីឥណទានសរុប១៦០០លានដុល្លារ ពីដៃគូអភិវឌ្ឍន៍សម្រាប់ឆ្នាំ២០២២ខាងមុខ។
យោងតាមរបាយការណ៍របស់រដ្ឋាភិបាលបានបង្ហាញថា ឆ្នាំ២០២២គំរោងអាទិភាពចំនួន៦ ក្នុងចំណោមគំរោងទាំង៦នោះ មានគម្រោងហេដ្ឋារចនាសម្ព័ន្ឋធំៗចំនួន៦ រួមមាន គម្រោងសាងសង់ស្ពានទន្លេមេគង្គ និងផ្លូវតភ្ជាប់ខេត្តក្រចេះ គម្រោងពង្រីកកំណាត់ផ្លូវជាតិលេខ៧(ស្គន់ កំពង់ចាម) គម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់ផ្លូវជាតិលេខ៥ ជំហានទី២ គម្រោងធ្វើឱ្យប្រសើរឡើងនូវកំណាត់ផ្លូវជាតិលេខ៥ ពីធ្លាម្អមខេត្តពោធិ៍សាត់ ទៅក្រុងបាត់ដំបង និងក្រុងសិរីសោភ័ណ (កញ្ចប់ឥណទានដំណាក់កាលទី៣) គម្រោងកែលម្អបណ្ដាញតភ្ជាប់ជនបទដោយចីរភាព និងគម្រោងសាងសង់ស្ពានមិត្តភាពកម្ពុជា កូរ៉េ។
លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនធ្លាប់បានមានប្រសាសន៍ថា គំរោងស្ពានមិត្តភាពកម្ពុជា កូរ៉េស្ថិតក្នុងផែនការសាងសង់ ប៉ុន្តែការសិក្សាបញ្ចប់នាពេលណា និងសាងសង់នាពេលណា លោកមិនទាន់បញ្ជាក់លំអិតនៅឡើយទេ។
លោកបន្តថា “ស្ពាននេះ ត្រួវបានប្រកាសផ្តល់ជូនពីមេដឹកនាំកូរ៉េ ជូនកម្ពុជារួចហើយ”។
អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាធ្លាប់បានមានប្រសាសន៍ថា អ្នកជំនាញការកូរ៉េបាន និងកំពុងធ្វើការជាមួយអ្នកជំនាញកម្ពុជាហើយ លើគំរោងសាងសង់ស្ពាននេះ ប៉ុន្តែការសិក្សាបញ្ចប់នាពេលណា និងសាងសង់នៅទីតាំងណាមិនទាន់មានភាពជាក់លាក់នៅឡើយទេ វាអាស្រ័យលើការសិក្សាពីលំហូរទឹក ពីផលប៉ះពាល់បរិស្ថានផងដែរ៕
