ដោយៈសុខុម
ហុងកុង: ក្រុមហ៊ុនអភិវឌ្ឍន៍អចលនទ្រព្យចិន Evergrande បានអះអាងនៅថ្ងៃព្រហស្បតិ៍ ទី៣០ ធ្នូ នេះលើគណនី Wechat របស់ខ្លួនថា ៩១,៧% នៃគម្រោងរបស់ខ្លួននៅទូទាំងប្រទេសចិន បានបន្តដំណើរការសាងសង់ឡើងវិញហើយ បន្ទាប់ពីខំប្រឹងប្រែងរើខ្លួន ពីវិបត្តិហិរញ្ញវត្ថុអស់ រយៈពេល៣ខែ។
នៅក្នុងកិច្ចប្រជុំមួយកាលពីថ្ងៃអាទិត្យ ទី២៦ ធ្នូ មហាសេដ្ឋី Hui Ka Yan ដែលជាប្រធានក្រុមហ៊ុន Evergrande បានប្ដេជ្ញាប្រគល់ផ្ទះជូនអតិថិជនឱ្យបានចំនួន៣៩.០០០យូនីត នៅក្នុងខែធ្នូ នេះ បើធៀបនឹងចំនួនផ្ទះតិចជាង១០.០០០យូនីត ដែលខ្លួនប្រគល់ជូនអតិថិជន ក្នុងខែនីមួយៗសម្រាប់រយៈពេល៣ខែមុននេះ។
ភាគហ៊ុនក្នុងក្រុមហ៊ុនចិន Evergrande បានហក់ឡើងខ្ពស់រហូតដល់ទៅជាង៨% គួរឱ្យភ្ញាក់ផ្អើលកាលពីព្រឹកថ្ងៃអង្គារ ទី២៨ ធ្នូ បន្ទាប់ពីក្រុមហ៊ុនអភិវឌ្ឍន៍អចលនទ្រព្យខ្នាតយក្ស ដែលជំពាក់បំណុលរុំកោះមួយនេះអះអាងថា ខ្លួនបានពន្លឿនការងារសាងសង់ បានច្រើនគួរសមជាលើកដំបូង។
ជាមួយនឹងបំណុលគរដូចភ្នំ រហូតដល់ទៅជាង៣០០ពាន់លានដុល្លារអាមេរិក ក្រុមហ៊ុនអភិវឌ្ឍន៍អចលនទ្រព្យ ដែលជំពាក់បំណុលច្រើនបំផុតរបស់ប្រទេសចិន មួយនេះកំពុងប្រឈមការខកខាន សងបំណុលច្រើនបំផុត មិនធ្លាប់មាននៅក្នុងសេដ្ឋកិច្ចធំបំផុតទី២ របស់ពិភពលោកមួយនេះ ហើយបាន និងកំពុងប្រវេប្រវាប្រមែប្រមូលសាច់ប្រាក់ តាមរយៈការលក់ទ្រព្យសកម្ម និងភាគហ៊ុនដើម្បីដោះបំណុល។
ក្រុមហ៊ុននេះ បានខកខានទូទាត់ថ្លៃគូប៉ុង នៅបរទេសតាមពេលវេលាកំណត់ ដែលមានតម្លៃ៨២,៥លានដុល្លារអាមេរិក កាលពីដើមខែនេះ ហើយការខកខាននេះ អាចនឹងរីករាលដាលកាន់តែធំលើបំណុល សញ្ញាប័ណ្ណអន្តរជាតិ រហូតដល់ទៅប្រមាណ១៩ពាន់លានដុល្លារអាមេរិក របស់ក្រុមហ៊ុននេះ។
ទន្ទឹមនេះក្រុមហ៊ុន Evergrande មានគូប៉ុងថ្មីដែលដល់ពេលត្រូវទូទាត់សងកាលពីថ្ងៃអង្គារ ទី២៨ ធ្នូ ចំនួន២៥៥លានដុល្លារអាមេរិក៕ Reuters៕
