ដោយវុត្ថា
ភ្នំពេញ៖ លោកJack Ma ជាប្រធានសហស្ថាបនិករបស់ក្រុមហ៊ុនអេឡិកត្រូនិកដ៏ល្បីប្រចាំនៅប្រទេសចិន Alibaba Group Holding Ltd, បានប្រកាសនឹងចូលនិវត្សរ៍ដោយលាឈប់ធ្វើជាប្រធានក្រុមហ៊ុននៅក្នុងនៅថ្ងៃទី១០ ខែកញ្ញា ឆ្នាំ២០១៩ខាងមុខនេះ។
សំណួរសំខាន់នៅទីនេះថាតើនណានឹងកាន់ដំណែងជំនួស លោក Jack Ma?បន្ទាប់ពីគាត់ចូលនិវត្សរ៍?។
បើយោងតាមការចុះផ្សាយរបស់សារព័ត៌មានBangkokpost បានអោយដឹងថា លោក Daniel Zhang ដែលបច្ចុប្បន្នលោកគឺជា នាយកប្រតិបត្តិក្រុមហ៊ុន Alibaba នឹងកាន់ដំណែងជំនួសលោកJack Ma ក្រោយពីលោក នឹងបញ្ចប់អាណត្តិជាប្រធានក្រុមប្រឹក្សាភិបាលរបស់ក្រុមហ៊ុនAlibaba បន្ទាប់ពីកិច្ចប្រជុំទូទៅប្រចាំឆ្នាំ របស់ក្រុមហ៊ុននៅក្នុងឆ្នាំ ២០២០។
លោក Ma បានលាលែងពីតំណែងជានាយកប្រតិបត្តិនៅក្នុងឆ្នាំ២០១៣ ។ លោក Daniel Zhang អាយុ ៤៦ ឆ្នាំបានបំពេញការងារតាំងពីឆ្នាំ២០១៥ បន្ទាប់ពីបានបម្រើការជាប្រធានផ្នែកប្រតិបត្តិការរបស់ក្រុមហ៊ុន។
លោក Ma ដែលបានឈានចូលវ័យ៥៤ឆ្នាំ កាលពីថ្ងៃចន្ទបានអះអាងថា លោកនឹងបន្តផ្តល់ការណែនាំ ដល់ថ្នាក់ដឹកនាំជាន់ខ្ពស់ ដែលជាផ្នែកមួយនៃក្រុមប្រឹក្សាផ្តល់យោបល់ដែលមានឈ្មោះថា “Alibaba Partnership”។
លោក Daniel Zhang អាយុ 46 ឆ្នាំពីមុនធ្លាប់ជាមន្រ្តីប្រតិបត្តិការរបស់ក្រុមហ៊ុន។ លោកត្រូវបានគេស្គាល់ថា ជាស្ថាបត្យករដ៏សំខាន់របស់ក្រុមហ៊ុនAlibaba ដែលស្គាល់ថា ” Singles Day” ជាព្រឹត្តិការណ៍ទិញដូរតាមអនឡាញ ដ៏ធំបំផុតនៅលើពិភពលោកកាលពីថ្ងៃទី ១១ ខែវិច្ឆិកា។
លោកJack Ma បានអោយដឹងនៅក្នុងលិខិតមួយ ដែលបានចេញផ្សាយដោយក្រុមហ៊ុនAlibaba ថា “ខ្ញុំនឹងធ្វើការជិតស្និទ្ធជាមួយលោក Daniel Zhang ដើម្បីធានាឱ្យមានការផ្លាស់ប្តូរដោយរលូននិងជោគជ័យ”។
លោក Ma ដែលជាសហស្ថាបនិកក្រុមហ៊ុន Alibaba ក្នុងឆ្នាំ១៩៩៩ គឺជាមនុស្សម្នាក់ ក្នុងចំណោមមហាសេដ្ឋីចិនដែលមានទ្រព្យចំនួន៣៦,៦ ពាន់លានដុល្លារ។ នេះបើយោងតាមទស្សនាវដ្តីដ៏ល្បីល្បាញ Forbes។
លោក Ma គឺជាអតីតគ្រូបង្រៀនភាសាអង់គ្លេស នៅក្នុងប្រទេសចិន ក្រោយមកលោកមានភាពល្បីល្បាញយ៉ាងខ្លាំងបន្ទាប់ពីបង្កើតក្រុមហ៊ុន Alibaba ដែលក្រុមហ៊ុននេះបានឲ្យលោករកលុយបានយ៉ាងច្រើន៕
