ដោយៈគង់ សូរិយា
ភ្នំពេញៈ អ្នកជំនាញបានលើកឡើងថា នៅក្នុងអំឡុងដើមឆ្នាំនេះ សកម្មភាពទិញលក់អចលនទ្រព្យ មិនទាន់កំរើកឡើងវិញខ្លាំងនៅឡើយទេ ដោយសារបញ្ហាមួយចំនួន។
អគ្គនាយិកាក្រុមហ៊ុន PropNex Cambodia អ្នកនាងអាន សុធីតា បានមានប្រសាសន៍ឲ្យដឹងតាមទូរស័ព្ទ កាលពីថ្ងៃទី២ កុម្ភ៖កន្លងមកថា ទោះជាស្ថានភាពវឹកវរនៃ ជំងឺកូវីដអូមីក្រុងនៅតាមបណ្តាប្រទេសនានា មានភាពចលាចលខ្លាំងក្តី ប៉ុន្តែកម្ពុជាមានសភាពធម្មតា ដែលស្ថានភាពនេះល្អលើសពីការរំពឹងទុករបស់យើង។
អ្នកនាងបន្តថា “ ទោះជាយ៉ាងណាក្នុងស្ថានភាពនេះ សកម្មភាពទិញ លក់អចលនទ្រព្យ មិនហក់ឡើងខ្ពស់នោះទេ ដោយសារជាពេលវេលាដើមឆ្នាំ ដែលក្រុមហ៊ុននិមួយៗរៀបចំបិទបញ្ជីរ និងរៀបចំផែនការយុទ្ឋសាសស្រ្តសំរាប់ឆ្នាំថ្មី”។ អ្នកនាបន្តថា “ខ្ញុំគិតថានៅចុងត្រីមាសទី១ឆ្នាំនេះ អ្វីនឹងល្អប្រសើរឡើងវិញ ពិសេសសកម្មភាពទិញលក់ដីធ្លី និងគំរោងអភិវឌ្ឍន៍នានានឹងបង្ហាញឡើង”។
មានអ្នកជំនាញមួយចំនួន បានលើកឡើងស្រដៀងគ្នានេះ ដោយបាននិយាយថា ទីផ្សារពិតជាមានសភាពស្ងប់ស្ងាត់នៅដើមឆ្នាំនេះ។
អ្នកនាងអាន សុធីតា បានបន្តថា នេះជាស្ថានភាពឬជាននិន្នាការធម្មតានៃទីផ្សារ ដែលតែងតែមានសភាពស្ងប់ស្ងាត់ពេលដើមឆ្នាំ មានភាពសកម្មនៅពាក់កណ្តាលឆ្នាំ និងសកម្មភាពរាងថមថយមកវិញនៅចុងឆ្នាំ។
ចំណែកលោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមានប្រសាសន៍ ដោយលើកឡើងស្រដៀងគ្នាថា ស្ថានភាពទិញលក់ នៅតែធម្មតា ប៉ុន្តែទីផ្សារនឹងហក់ឡើងខ្ពស់មកវវិញនៅអំឡុងចុងត្រីមាសទី១នៃឆ្នាំនេះ ហើយសកម្មភាពនឹងមានភាពលេចធ្លោគឺការវិនិយោគដីធ្លីនឹងបន្តកើនឡើង ដែលមានអត្រាចំណេញចន្លោះពី១០ទៅ១៥ភាគរយក្នុងមួយឆ្នាំ។
លោកបន្តថា “សកម្មភាពទិញលក់ដីធ្លី ពិតជាមានភាពពេញនិយមជាងគេ ដោយសារទីផ្សារ និងផលចំណេញមានប្រាកដប្រជាខ្ពស់ ខណៈផ្នែកដទៃទៀតដូចជាខុនដូ លំនៅដ្ឋាននឹងបន្តកើនឡើងផងដែរ”៕
