ដោយៈវឌ្ឍនៈ
ភ្នំពេញៈ ដើម្បីឆ្នាំ២០២២នេះ ជំងឺកូវីដ១៩បំប្លែងថ្មីប្រភេទអូមីក្រុងបានចាប់ផ្ដើមរាលដាល នៅលើពិភពលោករួមទាំងកម្ពុជាផងដែរ ដែលធ្វើឱ្យវិនិយោគិន ក្នុងវិស័យអចលនទ្រព្យនៅតែបន្តរារែក និងមិនទាន់ដាក់ទុនធំៗ ក្នុងវិស័យនេះនៅឡើយ។
អ្នកជំនាញ នៃវិស័យអចលនទ្រព្យបានមើលឃើញថា ក្នុងស្ថានភាពបែបនេះ ការវិនិយោគអចលនទ្រព្យ នៅតែមិនទាន់មានភាពច្បាស់លាស់នៅឡើយ ខណៈមួយចំនួនបន្តមានសុទិដ្ឋិនិយមដដែល។
អ្នកស្រីអាន សុធីតា អគ្គនាយិកាក្រុមហ៊ុនអចលនទ្រព្យ PropNex Cambodia បានឱ្យដឹងកាលពីថ្ងងៃទី១៨ កុម្ភៈកន្លងមកថា ក្នុងស្ថានភាពនៃការរាលដាល នៃមេរោគកូវីដ១៩ប្រភេទអូមីក្រុងនេះ ការវិនិយោគអចលនទ្រព្យ នៅតែមិនទាន់មានភាពច្បាស់លាស់នៅឡើយ ព្រោះថាការរាលដាលមិនដឹងថា មានទ្រង់ទ្រាយធំប៉ុណ្ណា ហើយនឹងបញ្ចប់យ៉ាងម៉េចដែរ។
លោកស្រីបន្តថា “ស្ថានភាពអចលនទ្រព្យក្នុងឆ្នាំ២០២២នេះ ពិបាកនឹងថាអាចមានកំណើនណាស់ ព្រោះក្នុងដើមឆ្នាំនេះ វិនិយោគិនបរទេសនៅតែមិនទាន់អាចចូលមក ដើម្បីស្វែងរកកការបណ្ដាក់ទុនវិនិយោគ ដូចមុនស្ថានភាពកូវីដ១៩នៅឡើយ”។
ចំណែកលោកពៅ លីដា អគ្គនាយកនៃក្រុមហ៊ុនអចលនទ្រព្យ LD Property Investment ក៏បានឱ្យដឹងថា ក្នុងស្ថានភាព មិនទាន់ច្បាស់លាស់ នៃការរីករាលដាលអូមីក្រុងបែបនេះ វិនិយោគិនអចលនទ្រព្យថ្មីថ្មោង បើអាចសូមរក្សាភាពស្ងៀមស្ងាត់ និងកុំទាន់បណ្ដាក់ទុនវិនិយោគសិន ហើយត្រូវសិក្សាច្បាស់លាស់ជាមុនសិន ពីព្រោះថាក្រៅពីមេរោគរាតត្បាតកូវីដ១៩ ក៏មានច្បាប់វិនិយោកលើអចលនទ្រព្យ ដែលវិនិយោគិនថ្មីថ្មោងគួរសិក្សាស្វែងយល់បន្ថែមស៊ីជម្រៅ មុននឹងបណ្ដាក់ទុនវិនិយោគ ។
លោកបន្តថា “ទោះបីជាយ៉ាងណាក្ដី ក៏វិនិយោគិនអចលនទ្រព្យដែលមានបទពិសោធន៍ និងទុនគ្រប់គ្រាន់នៅតែបន្តអភិវឌ្ឍន៍ ជាមួយនឹងសុទិដ្ឋិនិយមខ្ពស់ចំពោះសេដ្ឋកិច្ចកម្ពុជា”។
លោកពៅ លីដា បានបន្តថា នៅតាមបណ្ដាខេត្តនានាក៏ឃើញថាវិនិយោគិន ចាប់ផ្ដើមមានសកម្មភាពឡើងវិញ ជាពិសេសក្រោយពេលរដ្ឋាភិបាលប្រកាសបើកប្រទេស តាំងពីអំឡុងចុងឆ្នាំ២០២១កន្លងទៅ៕
