ដោយៈ ជេស៊ីកា
ភ្នំពេញៈ ធនាគារហត្ថាដែលជាធនាគារឈានមុខមួយ ក្នុងចំណោមធនាគារធំៗរបស់កម្ពុជា នឹងចុះហត្ថលេខាវិនិយោគលើប័ណ្ណបំណុល ដែលទឹកប្រាក់១៥លានដុល្លារអាមេរិក ក្នុងគំរោងព្រលានយន្តហោះអន្តរជាតិតេជោ ក្រុងតាខ្មៅ។
ប្រធានអគ្គនាយកធនាគារហត្ថា លោកឧកញ៉ាហួត អៀងតុងបានមានប្រសាសន៍ឲ្យដឹងតាមប្រព័ន្ឋតេឡេក្រាម កាលពីរសៀលថ្ងៃទី៣ មិនានេះថា ការវិនិយោគនេះយើងធ្វើឡើង ប្រកបដោយទំនុកចិត្ត និងស្របតាមការអំពាវនាវរបស់ប្រមុខរាជរដ្ឋាភិបាលកម្ពុជា គឺសម្តេចតេជោហ៊ុន សែននាយករដ្ឋមន្រ្តី។
លោកឧកញ៉ាបានបន្តថា “ពិធីចុះហត្ថលេខាវិនិយោគនេះ នឹងធ្វើឡើងនៅថ្ងៃស្អែកនេះ នៅក្នុងវិមានកាណាឌីយ៉ា”។
ព្រលានយន្តហោះអន្តរជាតិតេជោ ក្រុងតាខ្មៅបាននិងកំពុងសម្រេចបានវឌ្ឍនភាពយ៉ាងប្រសើរ ដោយបច្ចុប្បន្នមានគ្រឹះស្ថានហិរញ្ញវត្ថុជាច្រើនបានចូលរួមទិញប័ណ្ណបំណុលរបស់គំរោងនេះ។
ព្រលានយន្តហោះអន្តរជាតិភ្នំពេញ បាននិងកំពុងសាងសង់គំរោងដំណាក់កាលទី១ ដែលគ្រោងនឹងបញ្ចប់នៅចុងឆ្នាំ២០២៣ ខាងមុខនេះ ជាមួយនឹងទំហំទុន វិនិយោគ១៥០០លានដុល្លារអាមេរិក និងមានវិសាលភាពគ្របដណ្តប់លើផ្ទៃដី២៦០០ហិកតា។
ព្រលានយន្តហោះអន្តរជាតិថ្មីនេះ នឹងមានសមត្ថភាពគ្រប់គ្រាន់ក្នុងការទទួលចុះចតយន្តហោះខ្នាតធំ ដែលហោះហើរអន្តរទ្វីបបាន៕
