ការបញ្ចប់និងដំណើរការផ្លូវរថភ្លើងក្រោមដីនឹងជួយលើកកំពស់ទីផ្សារអចលនទ្រព្យក្រុងហូជីមិញ

ដោយៈសុខុម

ហូជីមិញ: ទីផ្សារអចលនទ្រព្យក្នុងទីក្រុងហូជីមិញ នៃប្រទេសវៀតណាម ត្រូវបានរំពឹងថានឹងទទួលបានកំណើនខ្ពស់ នៅឆ្នាំ២០២២នេះដោយគម្រោងហេដ្ឋារចនាសម្ព័ន្ធមួយចំនួន ដែលនឹងត្រូវបញ្ចប់ ឬចាប់ផ្តើមអំឡុងឆ្នាំនេះ។

យោងតាមសារព័ត៌មាន Vietnam News ចុះផ្សាយកាលពីថ្ងៃទី៥ មីនា ឱ្យដឹងថា មួយចំនួនធំនៃគម្រោងទាំងនោះ គឺជាគម្រោងហេដ្ឋារចនាស ម្ព័ន្ធតភ្ជាប់ ឬកាត់បន្ថយការកកស្ទះចរាចរណ៍។

លោក Trần Quang Lâm ប្រធានមន្ទីរដឹកជញ្ជូនក្រុងហូជីមិញ បានលើកឡើងថា កិច្ចខិតខំប្រឹងប្រែងបាន និងកំពុងបន្តធ្វើ​​ ដើម្បីបញ្ចប់កិច្ចការចំនួន៣ឱ្យទាន់ពេលវេលា៖ ទី១- ការបញ្ចប់ការស្ថាបនាផ្លូវរថភ្លើងក្រោមដីលេខ១ រវាង Bến Thành និង Suối Tiên ទី២- ចាប់ផ្តើមដំណើរការផ្លូវរថភ្លើងក្រោមដីនោះ។ ចំណែកឯ ទី៣- ចាប់ផ្តើមការងារស្ថាបនាផ្លូវរថភ្លើងក្រោមដីលេខ១។

ផ្អែកតាមការរំពឹងទុកថា ការអភិវឌ្ឍហេដ្ឋារចនាសម្ព័ន្ធ ក្នុងទីក្រុងនេះនឹងជំរុញឱ្យតម្លៃអចលនទ្រព្យហក់ឡើងខ្ពស់។

លោក Cao Hữu Phi អគ្គនាយកក្រុមហ៊ុនអចលនទ្រព្យ COPiHOME បានប្រាប់គេហទំព័រ cafeland.vn ថា តម្លៃអចលនទ្រព្យនៅឆ្នាំនេះនឹងហក់ឡើងខ្លាំង នៅតាមតំបន់ដែលកំពុងមានការអភិវឌ្ឍហេ ដ្ឋារចនាសម្ព័ន្ធរឹងមាំ។

លោក Nguyễn Thái Phiên អគ្គនាយករងក្រុមហ៊ុនអចលនទ្រព្យ NovaGroup បានលើកឡើងថា ការរីករាលដាលវីរុសកូវីដ-១៩ គឺជាឧបសគ្គដ៏ធំមួយ ចំពោះការរីកចម្រើននៅក្នុងទីផ្សារអចលនទ្រព្យ។ លោកបានបន្ថែមទៀតថា ទោះជាយ៉ាងណា ការវិនិយោគលើហេដ្ឋារចនាសម្ព័ន្ធកំពុងជំរុញវាឱ្សស្ទុះឡើងហើយនៅពេលនេះ។

ក្រុមហ៊ុនប្រឹក្សាអចលនទ្រព្យ CBRE បានព្យាករណ៍ថា ការផ្គត់ផ្គង់អចលនទ្រព្យប្រភេទលំនៅដ្ឋាន​ នឹងងើបឡើងខ្លាំងក្នុងរយៈពេល២ឆ្នាំខាងមុខ ដោយយូនីតថ្មីៗជិត២២.០០០យូនីត គ្រោងនឹងបើកលក់គ្រាន់តែនៅក្នុងឆ្នាំ២០២២ នេះ៕ Vietnam News៕