ដោយៈជេស៊ីកា
ភ្នំពេញៈ ទីផ្សារដីធ្លីនៅតែត្រូវបានអ្នកវិនិយោគក្នុងស្រុក ផ្តោតការចាប់អារម្មណ៍ ដោយសារពួកគេមើលឃើញផលចំណេញ មានភាពជាក់លាក់ និងចំណេញខ្ពស់ជាងគេ។
អ្នកឧកញ៉ាលី ហួរ ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា និងជាអ្នកអភិវឌ្ឍន៍អចលនទ្រព្យ ដ៏ជោគជ័យមួយរូបបានមានប្រសាសន៍ឲ្យដឹងតាមទូរស័ព្ទកាលពីថ្ងៃទី៩ មិនាថា ក្នុងស្ថានភាពនេះ បើសិនជាមានលុយទំនេរ គឺជាឱកាសល្អបំផុតសំរាប់វិនិយោគដីធ្លី ប៉ុន្តែត្រូវមើលផ្លូវ មើលទីតាំងឲ្យបានល្អផងដែរ។
អ្នកឧកញ៉ាបានបន្តថា “បើវិនិយោគដីធ្លី គួរវិនិយោគនៅក្នុងក្រុង និងតំបន់ជាយក្រុង ព្រោះបើមានវិបត្តិវាមិនសូវធ្លាក់ចុះតម្លៃច្រើន និងធ្វើឲ្យកើនតម្លៃលឿន នៅពេលទីផ្សារមានភាពល្អប្រសើរ”។
អ្នកឧកញ៉ាបន្តថា “យ៉ាងណាក៏ដោយ បើមិនមានប្រាក់ទំនេរឬប្រាក់ក្នុងដៃ សូមកុំយកលុយធនាគារទៅវិនិយោគ”។
អ្នកឧកញ៉ាលី ហួរ បានបន្ថែមថា យើងមើលកូនឬមនុស្សកើតរាល់ថ្ងៃ ដែលឥលូវប្រជាជនខ្មែរ មានប្រមាណ១៧លាននាក់។ ចឹងបីឆ្នាំទៀតអាចកើនដល់២០លាននាក់ ប៉ុន្តែដីមិនកើនឡើងនោះទេ ហេតុនេះការវិនិយោគដីធ្លីនៅជាយក្រុង និងក្នុងក្រុង ដែលមានតម្លៃល្អ គេលក់ប្រញាប់ ជាការវិនិយោគល្អ ដើម្បីទទួលបានផលចំណេញខ្ពស់នាពេលអនាគត៕
