ដោយៈសុខុម
ញូវយ៉ក: ដោយសារតម្លៃផ្ទះ និងអត្រាការប្រាក់កម្ចីទិញផ្ទះចេះតែបន្តហក់ឡើង ពលរដ្ឋអាមេរិក កាន់តែច្រើនឡើងគ្មានលទ្ធភាពទិញផ្ទះ។ នេះបើយោងតាមសារព័ត៌មាន CNN ចុះផ្សាយនៅថ្ងៃព្រហស្បតិ៍ ទី៧ ខែមេសា នេះ។
ពលរដ្ឋអាមេរិកកាន់តែច្រើនគ្មានលទ្ធភាពទិញផ្ទះ ខណៈការប្រាក់កម្ចីទិញផ្ទះហក់ឡើងកាន់តែខ្ពស់
ផ្អែកតាមរបាយការណ៍ថ្មីមួយ របស់ក្រុមហ៊ុនអចលនទ្រព្យ ATTOM បានបង្ហាញថា តម្លៃផ្ទះនៅសហរដ្ឋអាមេរិក ក្នុងត្រីមាសទី១ បានហក់ឡើងយ៉ាងតិច១០%ពីឆ្នាំមុនក្នុងសង្កាត់ (County) ២ភាគ៣ដែលត្រូវបានតាមដានវិភាគទូទាំងសហរដ្ឋអាមេរិក។
ការធ្លាក់ចុះលទ្ធភាពទិញផ្ទះ បានកើតឡើងយ៉ាងឆាប់រហ័ស។ ផ្ទះសម្រាប់មួយគ្រួសាររស់នៅ ដែលមានតម្លៃមធ្យម បានហក់ឡើងថ្លៃខ្ពស់មិនធ្លាប់មានជាប្រវត្តិសាស្ត្រ ក្នុងសង្កាត់ជិត៨០ភាគរយ ក្នុងចំណោមសង្កាត់ទាំងអស់ដែលត្រូវបានតាមដានវិភាគ បើធៀបនឹង៣៨%កាលពីឆ្នាំមុន។
របាយការណ៍ដដែលបានបង្ហាញថា តម្លៃផ្ទះបន្តហក់ឡើងលឿនជាងអត្រាប្រាក់ឈ្នួលក្នុងសង្កាត់ភាគច្រើន ដោយរាល់៥ទីផ្សារ គឺមាន៤ទីផ្សារហើយដែលតម្លៃផ្ទះ បន្តហក់ឡើងលឿនជាងអត្រាប្រាក់ឈ្នួល។
យោងតាមរបាយារណ៍ដដែលបង្ហាញថា ទីផ្សារដែលអត្រាប្រាក់ឈ្នួលកើនឡើងលឿនជាងការហក់ឡើង នៃតម្លៃផ្ទះមានតិចតួចណាស់ ដូចជា នៅ Seattle នៅ San Jose កាលីហ្វូញ៉ា និងផ្នែកខ្លះនៃក្រុងញូវយ៉ក៕ CNN៕
