(ភ្នំពេញ)៖ លោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុក រដ្ឋលេខាធិការដ្ឋានអាកាសចរស៊ីវិល នៅថ្ងៃទី០៩ ខែមីនា ឆ្នាំ២០២៣នេះ បានអនុញ្ញាតឲ្យគណៈប្រតិភូនៃក្រុមហ៊ុនវិនិយោគយូណាន ដែលជាក្រុមហ៊ុនអភិវឌ្ឍអាកាសយានដ្ឋានអន្ដរជាតិសៀមរាបអង្គរថ្មី ចូលជួបសម្ដែងការគួរសម ពិភាក្សាការងារ និងផ្លាស់ប្ដូរយោបល់។

គណៈប្រតិភូនៃក្រុមហ៊ុនវិនិយោគយូណាន ដឹកនាំដោយលោក Liu Minglin ប្រធានក្រុមហ៊ុន និងលោក Lu Wei ប្រធានក្រុមហ៊ុនវិនិយោគអាកាសយានដ្ឋានអន្តរជាតិអង្គរ (AIAI) ព្រមទាំងមានការចូលរួមពីមន្ដ្រីពាក់ព័ន្ធជាច្រើនរូបទៀត។

លោក ស៉ីន ចាន់សិរីវុត្ថា អនុរដ្ឋលេខាធិការ និងជាអ្នកពាក្យអាកាសចរស៊ីវិលបានឱ្យដឹងថា ក្នុងជំនួបនេះលោកបណ្ឌិត ម៉ៅ ហាវណ្ណាល់ បានជម្រាបជូនអំពីកង្វល់មួយចំនួ​ន នៅពេលបិទអាកាសយានដ្ឋានសៀមរាបអង្គរចាស់ គឺធ្វើយ៉ាងណាប្រើប្រាស់ធនធានមនុស្ស ដែលជាបុគ្គលិក និងឧបករណ៍សម្ភារ ដែលយកពីអាកាសយានដ្ឋានចាស់ ឲ្យមានភាពរលូន ហើយការជ្រើសរើសយកបុគ្គលិកនេះ ត្រូវឈរលើគោលការណ៍ដោយស្ម័គ្រចិត្ត។

ក្នុងឱកាសនោះ ក្រុមហ៊ុនវិនិយោគយូណាន ក៏បានជម្រាបអំពីការខិតខំបង្ហាញនូវសមត្ថភាព ក្នុងការចាត់ចែងគ្រប់គ្រងអាកាសយានដ្ឋានអន្ដរជាតិសៀមរាបអង្គរថ្មី ឲ្យកា្លយទៅជាអាកាសយានដ្ឋានមួយ ប្រកបដោយស្ដង់ដារ ដូចប្រទេសជឿនលឿនមួយចំនួន នៅក្នុងតំបន់អាស៊ាន។

លោកបានលើកឡើងថា ក្រុមហ៊ុនវិនិយោគយូណាន គឺជាក្រុមហ៊ុន TOP 10 មួយនៅក្នុងពិភពលោក ដែលមានចំណូលប្រចាំឆ្នាំ ៣០០ពាន់លានដុល្លារក្នុងមួយឆ្នាំ​ និងមានបុគ្គលចំនួន ៤ម៉ឺននាក់ និងមានក្រុមហ៊ុនបុត្រសម្ព័ន្ធចំនួនជាង ៥០០ក្រុមហ៊ុន ហើយក្រុមហ៊ុននេះ គឺជាភាគហ៊ុនិកមួយដ៏ធំ នៅក្នុងការអភិវឌ្ឍអាកាសយានដ្ឋានសៀមរាប។

ទន្ទឹមគ្នានេះ ក្រុមហ៊ុនវិនិយោគយូណាន ក៏បានបង្ហាញនូវគម្រោងអភិវឌ្ឍន៍តំបន់រណប ដែលមានដីបម្រុងជាង ១ពាន់ហិកតា ដើម្បីទាក់ទាញអ្នកវិនិយោគ មកកសាងតំបន់សេដ្ឋកិច្ចពិសេស ក៏ដូចជាសកម្មភាពផ្សេងៗ ក្នុងការគាំទ្រផលិតក្នុងស្រុក និងការនាំចេញផងដែរ។

សូមជម្រាបថា អាកាសយានដ្ឋានអន្តរជាតិសៀមរាប-អង្គរ បានចាប់ផ្តើមសាងសង់កាលពីខែមីនា ឆ្នាំ២០២០ ដោយក្រុមហ៊ុន Angkor International Airport Investment (Cambodia)Co.,Ltd(AIAI)។

អាកាសយានដ្ឋានអន្តរជាតិនេះ បាននិងកំពុងដំណើរការសាងសង់លើផ្ទៃដីប្រមាណជា ៧០០ហិកតា ស្ថិតនៅក្នុងភូមិក្រៀលពង ឃុំពពេល និងភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប ដែលមានចម្ងាយប្រមាណ ៥០គីឡូម៉ែត្រ ពីទីប្រជុំជនក្រុងសៀមរាប និងចម្ងាយ ៤០គីឡូម៉ែត្រ ពីរមណីយដ្ឋានអង្គរ ដែលចម្ងាយនេះ មិនធ្វើឱ្យប៉ះពាល់ដល់តំបន់ការពារបេតិកភណ្ឌនោះទេ។

ដោយឡែកព្រលានយន្តហោះសៀមរាបកំពុងដំណើរការបច្ចុប្បន្ន ជាការវិនិយោគដោយ ក្រុមហ៊ុន​សម្បទាន​ព្រលាន​យន្ត​ហោះ (SCA) របស់ប្រទេសបារាំង ដែលមានសិទ្ធិគ្រប់គ្រង​ព្រលានយន្ត​ហោះទាំង៣ (ភ្នំពេញ សៀមរាប និងព្រះសីហនុ) រហូតដល់ឆ្នាំ២០៤០។ ចំពោះព្រលានយន្តហោះសៀមរាបនេះ រាជរដ្ឋាភិបាលកម្ពុជា បង្កើត​គណៈកម្មការ​ចរចាមួយ​ជាមួយ SCA ដើម្បីសម្របសម្រួលបញ្ចប់កិច្ចសន្យាមុនកាលកំណត់។

ក្រុមហ៊ុនវិនិយោគអាកាសយានដ្ឋានអន្តរជាតិអង្គរ (AIAI) មានភាគហ៊ុនិក៖
១៖ ក្រុមហ៊ុនវិនិយោគយូណាន (Yunnan Investment Group) មានភាគហ៊ុនចំនួន ៧៦.៦%
២៖ ក្រុមហ៊ុនសំណង់យូណាន (Yunnan Construction Group) មានភាគហ៊ុនចំនួន ២០% និង
៣៖ ក្រុមហ៊ុនគ្រប់គ្រង និងប្រតិបត្តិការអាកាសយានដ្ឋានយូណាន (Yunnan Airport Group) មានភាគហ៊ុនចំនួន ៣.៤%។

គម្រោងការអភិវឌ្ឍអាកាសយានដ្ឋានអន្តរជាតិសៀមរាបអង្គរនេះ មានក្រុមហ៊ុនដៃគូចំនួន៤៥ ដែលបានពាក់ព័ន្ធដល់ការផ្គត់ផ្គង់ សាងសង់ និងតំឡើង ឧបករណ៍ បរិក្ខារ និងសម្ភារៈ ដោយប្រើប្រាស់បុគ្គលិក (អ្នកជំនាញការ វិស្វករ និងកម្មករ) សរុបចំនួន ៣ ៦៥២នាក់ ក្នុងនោះមានបុគ្គលិកខ្មែរចំនួន ២ ៧២១នាក់ បុគ្គលិកចិនចំនួន ៩៣១នាក់៕

ដោយៈ គង់ សូរិយា

    ភ្នំពេញៈ មន្រ្តីជាន់ខ្ពស់ក្រសួងសាធារណៈការ និងដឹកជញ្ជូនបាន

ជួបពិភាក្សាការងារ អំពីគម្រោងទិសដៅយុទ្ធសាស្ត្រដឹកជញ្ជូនក្នុងទីក្រុងសម្រាប់រាជធានីភ្នំពេញ ជាមួយធនាគារអភិវឌ្ឍអាស៊ី (ADB)។

កិច្ចប្រជុំនេះបានធ្វើឡើងរវាង លោកត្រាក់ ថៃសៀង រដ្ឋលេខា​ធិការក្រសួងសាធារណការ និងដឹកជញ្ជូន បានទទួលជួបពិភាក្សាការងា​រជាមួយតំណាងធនាគារអភិវឌ្ឍអាស៊ី អំពីគម្រោងទិសដៅយុទ្ធសាស្ត្រដឹកជញ្ជូនក្នុងទីក្រុង សម្រាប់រាជធានីភ្នំពេញ (The Direction of an Urban Transport Strategy for Phnom Penh) ដោយមានការចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធ។

កិច្ចប្រជុំនេះត្រូវបានរៀបចំឡើង ក្នុងគោលបំណងដើម្បីពិភាក្សាអំពីវឌ្ឍនភាពនៃការរៀបចំ “គម្រោងទិស ដៅយុទ្ធសាស្ត្រដឹកជញ្ជូនក្នុងទីក្រុងសម្រាប់រាជធានីភ្នំពេញ”។

ថ្លែងក្នុងកិច្ចប្រជុំនាឱកាសនោះ លោកត្រាក់ ថៃស៊ាងបានលើកឡើងពីទិសដៅការងារសំខាន់ៗរបស់ ក្រសួងក្នុងការអភិវឌ្ឍវិស័យដឹកជញ្ជូន និងហេដ្ឋារចនាសម្ព័ន្ធ ក្នុងទីក្រុងសំខាន់មួយចំនួនរួមមាន៖ ក្រុង សៀមរាប ក្រុងព្រះសីហនុ និងក្រុងបាវិតជាដើម ឱ្យកាន់តែមានភាពទំនើប និងការតភ្ជាប់កាន់តែទូលំទូលាយ ប្រកបដោយភាពងាយស្រួល ដើម្បីទាក់ទាញភ្ញៀវទេសចរណ៍ និងការវិនិយោគបន្ថែម។

លោកបានគូសបញ្ជាក់ថា សកម្មភាពការងារទាំងនេះទាមទារឱ្យមាន ការចូលរួមពីគ្រប់ស្ថាប័នពាក់ព័ន្ធដៃគូអភិវឌ្ឍន៍ ជាពិសេសធនាគារអភិវឌ្ឍអាស៊ី ដើម្បីរួមចំណែកក្នុងការ ជំរុញការវិនិយោគ និងការ​អភិវឌ្ឍនៅក្នុងប្រទេសកម្ពុជា ជាពិសេសរាជធានីភ្នំពេញ៕

  ដោយៈ វឌ្ឍនៈ

ភ្នំពេញៈ លោកទេសរដ្ឋមន្រ្តីស៊ុន ចាន់ថុលរដ្ឋមន្ត្រីក្រសួងសាធា​រណការនិងដឹកជញ្ជូនបានថ្លែងថា នៅឆ្នាំ២០២៤ រាជរដ្ឋាភិបាលត្រូវរកថវិកាឱ្យបាន ដើម្បីសាងសង់ផ្លូវមួយខ្សែតភ្ជាប់ពីខេត្តកំពង់ធំ ទៅកាន់កំពង់ឆ្នាំង ដោយគ្រោងចំណាយទឹកប្រាក់អស់ប្រមាណ ២៥០លានដុល្លារអាមេរិក ជាមួយនឹងការសាងសង់ស្ពានវែងជាងគេ នៅកម្ពុជាផងដែរ។

លោកទេសរដ្ឋមន្រ្តីបានមានប្រសាសន៍បែបនេះ ក្នុងពេលចុះពិនិត្យកំពង់ផែពហុបំណង ក្នុងខេត្តកំពង់ឆ្នាំងនាព្រឹកថ្ងៃទី៩ មិនានេះថា សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីបានឯកភាពថា គម្រោងផ្លូវមួយនេះ យើងបានសិក្សាចប់សព្វគ្រប់ ជាលទ្ធផលបានបង្ហាញថា វានឹងមិនប៉ះពាល់ដល់បរិស្ថាននោះទេ។

លោកបញ្ជាក់ថា លោកបានរាយការណ៍ជូនសម្ដេចថា ផ្លូវនេះអាចសាងសង់បាន សម្រាប់ការដឹកជញ្ជូនទំនិញ និងការធ្វើដំណើររបស់ប្រជាពលរដ្ឋពីកំពង់ធំទៅកំពង់ឆ្នាំង ។ ទីបំផុតសម្ដេចក៏បានយល់ព្រម និងឯកភាពឱ្យរកថវិកា និងគ្រោងបើកការដ្ឋានសាងសង់ផ្លូវនេះនៅឆ្នាំ២០២៤ខាងមុខនេះផងដែរ ។

លោកបន្តទៀតថា “គម្រោងផ្លូវពីកំពង់ឆ្នាំង ទៅកាន់ខេត្តកំពង់ធំ ជាផ្លូវដ៏សំខាន់សម្រាប់សេដ្ឋកិច្ចកម្ពុជា ដោយអាចដឹកទំនិញពីខេត្តព្រះវិហារមកកាន់កំពង់ធំ រួចហើយបន្តមកកាន់ខេត្តកំពង់ឆ្នាំង និងចូលមកកាន់កំពង់ផែពហុបំណង ដែលកំពុងសាងសង់នៅក្នុងខេត្តកំពង់ឆ្នាំងនេះតែម្ដង”។ លោកបន្តទៀតថា “នៅពេលផ្លូវសង់រួច ប្រជាពលរដ្ឋក្នុងខេត្តសៀមរាប ព្រះវិហារ និងខេត្តកំពង់ធំ មិនចាំបាច់ធ្វើដំណើរវាងផ្លូវឆ្ងាយទៀតនោះទេ គឺអាចធ្វើដំណើរកាត់តាមផ្លូវថ្មីៗនេះ មានប្រវែងតែជាង៥០គីឡូម៉ែត្រប៉ុណ្ណោះ”។

លោកទេសរដ្ឋមន្រ្តីស៊ុន ចាន់ថុលបានបន្ថែមថា នៅបណ្ដាខេត្តប៉ែកខាងជើងភ្នំពេញ បាននិងកំពុងមានការអភិវឌ្ឍ ហេដ្ឋារចនាសម្ព័ន្ធយ៉ាងមមាញឹក ក្នុងនោះរួមមានផ្លូវជាតិលេខ៥ បានពង្រីកពី២គន្លងទៅ៤គន្លង គម្រោងផ្លូវល្បឿនលឿនភ្នំពេញ សៀមរាប កំពុងសិក្សាដែលនឹងអាចចប់នៅពេលឆាប់ៗ ហើយបើកការដ្ឋានសាងសង់នៅពេលបន្ទាប់ ។

អ្នកស្រីអាន សុធីតា នាយិកាប្រតិបត្តិក្រុមហ៊ុន PropNex Cambodia ក៏បានមានប្រសាសន៍ផងដែរថា តំបន់ប៉ែកខាងជើងភ្នំពេញ ជាពិសេសនៅតាមបណ្ដោយផ្លូវជាតិលេខ៥ នឹងក្លាយជាតំបន់ឧស្សាហកម្ម ដ៏ទាក់ទាញពីសំណាក់វិនិយោគិនជាតិ និងអន្តរជាតិ ដោយ​សារតែការកសាង ហេដ្ឋារចនាសម្ព័ន្ធជាបន្តបន្ទាប់ ដែលងាយស្រួលក្នុងការដឹកជញ្ជូនចេញនិងចូល។

តាមផែនការមេរបស់រដ្ឋាភិបាល បាននិងកំពុងរៀបចំតំបន់ជាប់ផ្លូវជាតិលេខ៥ ជាសួនឧស្សាហកម្ម ដើម្បីទាញយកផលប្រយោជន៍ពីការដឹកជញ្ជូនរវាងប្រទេសថៃ ឆ្លងកាត់កម្ពុជា មុនតភ្ជាប់់ទៅកាន់ប្រទេសវៀតណាម៕

ដោយៈ សុខុម

វ៉ាស៊ីនតោន: យោងតាមការវិភាគថ្មីមួយពីគេហទំព័រអចលនទ្រព្យ Realtor.com ដែលបានចេញផ្សាយកាលពីថ្ងៃពុធ ទី៨ ខែមីនា បង្ហាញថា ទីផ្សារលំនៅដ្ឋាននៅសហរដ្ឋអាមេរិក កំពុងជួបកង្វះផ្គត់ផ្គង់ផ្ទះថ្មីជាច្រើនលានខ្នង ខណៈចំនួនប្រជាជនចេះតែកើនឡើង និងត្រូវការបង្កើតគ្រួសារផ្ទាល់ខ្លួន។

គម្លាតរវាងការសាងសង់ផ្ទះ សម្រាប់មួយគ្រួសាររស់នៅ (single-family home) និងការបង្កើតគ្រួសារបានកើនឡើងរហូតដល់៦,៥លានផ្ទះ នៅចន្លោះឆ្នាំ២០១២ ដល់ឆ្នាំ២០២២។ នេះបើយោងតាមសារព័ត៌មាន CNN ចុះផ្សាយកាលពីថ្ងៃពុធ ទី៨ ខែមីនា។

ទោះជាយ៉ាងណា តួលេខនេះហាក់បំបោងជ្រុលបន្តិច ចំពោះកង្វះលំនៅដ្ឋាន ដោយសារលំនៅដ្ឋានសម្រាប់ច្រើនគ្រួសារ រស់នៅរួមគ្នា (multi-family home) ផ្តល់ជម្រើសទាំងសម្រាប់អ្នកទិញ និងអ្នកជួល។ ប្រសិនបើការសាងសង់ផ្ទះ សម្រាប់ច្រើនគ្រួសាររស់នៅរួមគ្នា ដែលមានតម្រូវការជួលខ្ពស់ត្រូវបានរាប់បញ្ចូលនោះ គម្លាតនេះត្រូវបានកាត់បន្ថយមកត្រឹម២,៣លានផ្ទះ។

នៅក្នុងទសវត្សរ៍ចន្លោះឆ្នាំ២០១២ ដល់ឆ្នាំ២០២២ គ្រួសារចំនួន១៥,៦លានគ្រួសារត្រូវបានបង្កើតឡើង។ អំឡុងពេលដូចគ្នានេះ លំនៅដ្ឋានចំនួន១៣,៣លានខ្នង ត្រូវបានចាប់ផ្តើមសាងសង់ ហើយ១១,៩លានខ្នងត្រូវបានសាងសង់បញ្ចប់។

នៅក្នុងឆមាសទី២ ចុងឆ្នាំ២០២១ ផ្ទះសម្រាប់មួយគ្រួសាររស់នៅត្រូវបានចាប់ផ្តើមសាងសង់ និងបញ្ចប់ជាស្ថាពរក្នុងល្បឿនលឿនបំផុតក្នុងទសវត្សរ៍ចុងក្រោយនេះ។

នៅក្នុងឆមាសទី១ ដើមឆ្នាំ២០២២ បានបន្តនិន្នាការក្នុងឆ្នាំ២០២១ រហូតដល់ពាក់កណ្ដាលឆ្នាំ នៅពេលធនាគារកណ្ដាលអាមេរិក (Federal Reserve) បានដំឡើងអត្រាប្រាក់កម្ចីទិញផ្ទះជាបន្តបន្ទាប់ជាប្រវត្តិសាស្ត្រដើម្បីទប់អតិផរណា។

ជាលទ្ធផល ទីផ្សារលំនៅដ្ឋាននៅសហរដ្ឋអាមេរិក បានទទួលរងផលប៉ះពាល់ពីការដំឡើងអត្រាការប្រាក់ ខណៈតម្រូវការរបស់អ្នកទិញបានធ្លាក់ចុះ ហើយបណ្ដាក្រុមហ៊ុនសាងសង់ ក៏បានចាប់ផ្តើមផ្អាកការសាងសង់ផ្ទះសម្រាប់មួយគ្រួសាររស់នៅ ដែលនាំឱ្យខ្វះការផ្គត់ផ្គង់ក្នុងទីផ្សារ៕ CNN៕

ដោយ: គង់ លាងហួរ

ភ្នំពេញ: ក្រុមហ៊ុនអាកាសចរណ៍ Qatar Airways បានប្រកាសចាប់ផ្តើមបើកដំណើរការ នូវជើងហោះហើរទៅកាន់ទីក្រុងភ្នំពេញឡើងវិញនៅក្នុងខែតុលាឆ្នាំ២០២៣នេះ។

ខណៈកំពុងថ្លែងនៅថ្ងៃបើកព្រឹត្តិការណ៍ ITB Berlin 2023 ដែលជាពិព័រណ៍ពាណិជ្ជកម្មទេសចរណ៍ អន្តរជាតិដ៏ធំបំផុតរបស់ពិភពលោក នាយកប្រតិបត្តិក្រុមហ៊ុនអាកាសចរណ៍ Qatar Airways លោក Akbar Al Baker បានមានប្រសាសន៍ថា ខ្លួននឹងបើកការហោះហើរឡើងវិញ ទៅកាន់គោលដៅចំនួន១១ រួមមានទីក្រុងភ្នំពេញ ប៉េកាំង តូក្យូ ប៊ឺមីងហាំ ប៊ុយណូស៊ែរ កាសាបាឡង់កា Davao Marrakesh Nice Osaka RasAl-Khaimah និងHaneda ។

យោងតាមប្រភពឧស្សាហកម្មអាកាសចរណ៍មួយ បានឱ្យដឹងកាលពីពេលម្សិលមិញនេះថា ការបើកជើងហោះហើរ មកកាន់ទីក្រុងភ្នំពេញត្រូវបានគេរំពឹងថា នឹងចាប់ផ្តើមប្រតិបត្តិការចាប់ពីថ្ងៃទី២៩ ខែតុលាតទៅ ក្រោយពីក្រុមហ៊ុនអាកាសចរណ៍នេះ បានដំណើរការជើងហោះហើរចុងក្រោយរបស់ខ្លួន ទៅកាន់ទីក្រុងភ្នំពេញ កាលពីខែមេសា ឆ្នាំ២០២០។

ក្រុមហ៊ុនអាកាសចរណ៍ Qatar Airways បានចាប់ផ្តើមជើងហោះហើរប្រចាំថ្ងៃរបស់ខ្លួន ទៅកាន់ទីក្រុងភ្នំពេញកាលពីខែកុម្ភៈ ឆ្នាំ២០១៣ ដូច្នេះហើយវាបានក្លាយជាក្រុមហ៊ុន អាកាសចរណ៍មជ្ឈឹមបូព៌ាដំបូងគេ ដែលបានដំណើរការជើងហោះហើរត្រង់មកកាន់កម្ពុជា។

ក្រុមហ៊ុនអាកាសចរណ៍ Qatar Airways បានចាប់ផ្តើមជើងហោះហើរត្រង់មកកាន់កម្ពុជា ក្នុងគោលបំណងដើម្បីតភ្ជាប់ប្រទេ សកាតាជាមួយនឹងគោលដៅជាច្រើន នៅទូទាំងទ្វីបអឺរ៉ុប មជ្ឈិមបូព៌ា អាហ្វ្រិក អាមេរិកខាងជើង និងអាមេរិកខាងត្បូង។

ក្រសួងទេសចរណ៍កម្ពុជាបានឱ្យដឹង នៅក្នុងសេចក្តីថ្លែងការណ៍មួយកាលពីថ្ងៃសៅរ៍កន្លងទៅថា ប្រទេសកម្ពុជាបានស្វាគមន៍ជើងហោះហើរឡើងវិញរបស់ក្រុមហ៊ុនអាកាសចរណ៍ China Eastern Airlines ទៅកាន់ខេត្តសៀមរាបរបស់ខ្លួនឡើងវិញ៕