ដោយៈ និស្ស័យ

    សៀមរាបៈ កាលពីសប្តាហ៍មុន សមាគមមិត្តភាពកម្ពុជា ចិនបានរៀបចំព្រឹត្តិការណ៍ជិះកង់រួមគ្នា ក្នុងតំបន់ទេសចរណ៍អង្គរ ដើម្បីរឹតចំណងមិត្តភាព និងជំរុញវិស័យទេសចរណ៍។

ពិធីនេះមានការចូលរូមពីលោក លី សារី អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប បានចូលរួមក្នុងព្រឹត្តិការណ៍ជិះកង់ទេសចរណ៍ក្នុងតំបន់រមណីយដ្ឋានអង្គរ រៀបចំដោយសមាគមមិត្តភាពកម្ពុជា-ចិន និងមូលនិធិចិនPeaceland ក្នុងគោលបំណងលើកកម្ពស់ទំនាក់ទំនងមិត្តភាពប្រជាជន និងប្រជាជន កម្ពុជា-ចិន ព្រមទាំងជំរុញការអភិវឌ្ឍវិស័យទេសចរណ៍ និងជំរុញកំណើនសេដ្ឋកិច្ច និងវប្បធម៌ តាមរយៈសកម្មភាពកីឡាទេសចរណ៍ ដែលមិត្តភាពចំពោះបរិស្ថាន តាមរយៈសង្គមស៊ីវិលរបស់ចិនចំនួន៨ស្ថាប័នដែលមកចូលរួម។

លោកលី សារី អភិបាលរងខេត្ត បានលើកឡើងថា ព្រឹត្តិការណ៍នេះ នឹងជួយជំរុញការចូលរួមសកម្មភាពកីឡា និងសុខភាពសាធារណៈ ដែលមានសារៈសំខាន់សម្រាប់ជីវភាពរស់នៅ ប្រកបដោយគុណភាព និងរួមគ្នាថែរក្សាបរិស្ថាន និងផ្តល់គុណតម្លៃដល់វិស័យទេសច​រណ៍ធម្មជាតិនិងវប្បធម៌។

ព្រឹត្តិការណ៍ជិះកង់ទេសចរណ៍កម្ពុជា-ចិន នាថ្ងៃនេះ មិនត្រឹមតែបានចូលរួមផ្សព្វផ្សាយ ទាក់ទាញភ្ញៀវទេសចរ ឱ្យមកទស្សនាប្រទេសកម្ពុជា និងលើកកម្ពស់សុខភាព តាមរយៈការជិះកង់ប៉ុណ្ណោះនោះទេ ព្រឹត្តិការណ៍នេះ ក៏ជាការរឹតចំណងមិត្តភាព រវាងប្រទេសទាំងពីរឱ្យកាន់តែជិតស្និទ្ធ ស្របតាមយុទ្ធសាស្រ្តគ្រប់ជ្រុងជ្រោយរវាងកម្ពុជា-ចិន ដែលកំពុងឈានទៅដល់កម្រិតកំពូល ដែលថ្នាក់ដឹកនាំរបស់ប្រទេសយើងទាំងពីរបានកំណត់ជា “ឆ្នាំទេសចរណ៍កម្ពុជា-ចិន កាលពីឆ្នាំ២០២៥ កន្លងផុតទៅ”។

សកម្មភាពនេះជាសក្ខីភាពដ៏អស្ចារ្យ សម្រាប់ការពង្រឹងកិច្ចសហប្រតិបត្តិការទ្វេភាគី និងការផ្លាស់ប្តូររវាងប្រជាជន និងប្រជាជន។ ព្រឹត្តិការណ៍នាពេលនេះ មិនត្រឹមតែមានតួនាទីសំខាន់លើការលើកកម្ពស់ការយល់ដឹងអំពីការអភិរក្សបេតិកភណ្ឌ និងការពារបរិស្ថានប៉ុណ្ណោះទេ ថែមទាំងជាការចូលរួម នៅក្នុងយុទ្ធនាការដោយលើកទឹកចិត្តឱ្យភ្ញៀវជនជាតិចិន កាន់តែច្រើនមកទស្សនាកម្ពុជា និងរួមគ្នាផ្សព្វផ្សាយពីតំបន់ ទេសចរណ៍កម្ពុជាឱ្យក្លាយជាគោលដៅទេសចរណ៍ដ៏សំខាន់សម្រាប់ជនជាតិចិន ឆ្លើយតបនឹងឆ្នាំទេសចរណ៍កម្ពុជា-ចិនថែមទៀត៕

ដោយៈ ចំណាន

ខេត្តកែប-ព្រះសីហនុៈ កាលពីចុងាសប្តាហ៍មុន លោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជា និងជាប្រធានគណៈកម្មការអន្តរក្រសួង សម្រាប់សិក្សាវាយតម្លៃ និងរៀបចំប្លង់មេលើបណ្តាកោះ ដែលមានសក្តានុពលសេដ្ឋកិច្ច បានដឹកនាំក្រុមការងារចុះបំពេញបេសកកម្ម ពិនិត្យវឌ្ឍនភាពជាក់ស្តែង នៃគម្រោងអភិវឌ្ឍន៍តាមបណ្តាកោះ នៅក្នុងភូមិសាស្ត្រខេត្តកែប និងខេត្តព្រះសីហនុ។

បេសកកម្មនេះ មានគោលបំណងពិនិត្យ និងវាយតម្លៃវឌ្ឍនភាពជាក់ស្តែងនៃការអភិវឌ្ឍ សម្រាប់ជាមូលដ្ឋានក្នុងការរៀបចំរបាយការ​ណ៍គោរពជូនប្រមុខរាជរដ្ឋាភិបាល ដើម្បីជំរុញការអភិវឌ្ឍនៅតាមបណ្តាកោះ ឱ្យកាន់តែមានភាពរស់រវើកបន្ថែមទៀត។

ជាការកត់សម្គាល់ គម្រោងវិនិយោគអភិវឌ្ឍន៍នៅតាមបណ្តាកោះក្នុងខេត្តកែប និងខេត្តព្រះសីហនុ មួយចំនួនមានវឌ្ឍនភាពគួរជាទីកត់សម្គាល់ ខណៈគម្រោងមួយចំនួនមានវឌ្ឍនភាពតិចតួច។

គម្រោងអភិវឌ្ឍនៅតាមបណ្តាកោះ បានចូលរួមចំណែកដល់ការអភិវឌ្ឍវិស័យទេសចរណ៍ ដែលត្រូវបានចាត់ទុកថាជាឧស្សាហកម្មគ្មានផ្សែង តាមរយៈការបង្កើនផលិតផលទេសចរណ៍ និងភាពសម្បូរបែបនៃគោលដៅទេសចរណ៍៕

ដោយៈ គង់ សូរិយា

    ភ្នំពេញៈ រដ្ឋមន្ត្រីក្រសួងទេសចរណ៍ លោកហួត ហាក់បានស្នើឱ្យរដ្ឋបាលរាធានី ខេត្តនីមួយៗ បង្កើត អត្តសញ្ញាណពិសេសផ្ទាល់របស់រាជធានី ខេត្តនីមួយៗ (Branding) ឱ្យមានភាពទោល លេចធ្លោ និងពិសេសរបស់ រាជធានីខេត្តនីមួយៗ។

លោកពន្យល់ថា នេះជាតម្លៃបន្ថែមខ្ពស់ ក្នុងវិស័យទេសចរណ៍ ដើម្បីទាក់ទាញភ្ញៀវទេសចរជាតិ និង អន្តរជាតិ មកកាន់ខេត្តរបស់ខ្លួន ឱ្យបានកាន់តែច្រើនបន្ថែមទៀត។

ក្រសួងទេសចរណ៍ សហការជាមួយរដ្ឋបាលខេត្តក្រចេះ រៀបចំសិក្ខាសាលាស្តីពី “ការអភិវឌ្ឍ និងគ្រប់គ្រងទេសចរណ៍” ដើម្បីចូលរួមអបអរសាទរព្រឹត្តិការណ៍បុណ្យទន្លេ លើកទី១០ ឆ្នាំ២០២៦ ក្រោមប្រធានបទ“ទន្លេបៃតង បេតិកភណ្ឌវប្បធម៌ និងធម្មជាតិមហាសាល” ក្រោមអធិបតីភាពលោកហួត ហាក់ រដ្ឋមន្ត្រីក្រសួងទេសចរណ៍ និងលោកវ៉ា ថន អភិបាលនៃគណៈអភិបាលខេត្តក្រចេះ។

សិក្ខាសាលានេះ រៀបចំឡើងក្នុងគោលបំណង ដើម្បីចែករំលែកចំណេះដឹង បទពិសោធអំពីចំណុចខ្លាំង ចំណុចខ្វះខាត កាលានុវត្តភាពក្នុងការវិនិយោគ បញ្ហាប្រឈម ទស្សនវិស័យ និងការកំណត់គោ​ល​ដៅអភិវឌ្ឍក្នុងវិស័យទេសចរណ៍ សំដៅជំរុញកំណើនភ្ញៀវទេសចរជាតិ និងអន្តរជាតិ ឱ្យមកទស្សនាខេត្តក្រចេះ និងខេត្តក្បែរខាងឱ្យកាន់តែច្រើនថែមទៀត។

សិក្ខាសាលាដ៏មានសារៈសំខាន់នេះ មានការអញ្ជើញចូលរួមពីគ្រប់សសរស្តម្ភនៃកិច្ចសហប្រតិបត្តិការទាំង៦ រួមមាន៖ ក្រសួងស្ថាប័នអន្តរវិស័យ តំណាងរដ្ឋបាលរាជធានី-ខេត្ត មន្ទីរទេសចរណ៍ទាំង២៥រាជធានី-ខេត្ត មន្ទីរអង្គភាពជុំវិញខេត្ត មន្ត្រីរាជការ វិស័យឯកជន ដៃគូអភិវឌ្ឍ ប្រតិបត្តិករ សេវាករទេសចរណ៍ ម្ចាស់អាជីវកម្មសមាគមទេសចរណ៍ សមាគមយុវជន សិស្ស និស្សិត អ្នកផលិតមាតិកា Influencers និងអ្នកពាក់ព័ន្ធក្នុងវិស័យទេសចរណ៍ សរុបប្រមាណជាង៥០០នាក់។

ថ្លែងក្នុងពិធីនេះ លោកហួត ហាក់បានគូសរំលេចថា ក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាតេជោ ហ៊ុន សែនអតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា និងការដឹកនាំដ៏ឈ្លាសវៃ ប៉ិនប្រសប់ និងថាមពលរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី កម្ពុជាបន្តរក្សាបាននូវសុខសន្តិភាព ស្ថិរភាពនយោបាយ សណ្តាប់ធ្នាប់សង្គម និងការអភិវឌ្ឍលើគ្រប់វិស័យ ជាពិសេសវិស័យទេសចរណ៍នៅតែបន្តរក្សាភាពធន់ និងជាគោលដៅទេសចរណ៍ប្រកបដោយសុខសុវត្ថិភាព។

លោកបានរំលេចបន្ថែមថា ក្នុងឆ្នាំ២០២៥ កន្លងទៅ កម្ពុជាបានទទួលទេសចរអន្តរជាតិសរុប៥,៥៧លាននាក់ ជាមួយទេសចរជាតិប្រមាណ២៥,១៦លាននាក់ កើនឡើង១១,៧% និងចំណូលទេសចរអន្តរជាតិ៣,៨៧៨ លានដុល្លារអាម៉េរិក កើនឡើង៦,៦%។

ក្នុងន័យនេះ ដើម្បីរួមចំណែកអភិវឌ្ឍវិស័យទេសចរណ៍ ប្រកបដោ​យចីរភាព ភាពធន់ និងបរិយាបន្ន ឯកឧត្តមរដ្ឋមន្ត្រីបានស្នើឱ្យគ្រប់ភាគីពាក់ព័ន្ធទាំងថ្នាក់ជាតិ និងថ្នាក់ក្រោមជាតិ រួមគ្នាលើកកម្ពស់ការផ្សព្វផ្សាយទេសចរណ៍ ឱ្យបានកាន់តែទូលំទូលាយថែមទៀត ស្របតាមទិសស្លោក “ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍” ដែលបានដាក់ចេញដោយសម្តេចតេជោ ហ៊ុន សែន “ទេសចរណ៍រីកលូតលាស់ក្នុងសន្តិភាព” ដែលបានដាក់ចេញដោយសម្តេចបវរធិបតីនាយករដ្ឋមន្ត្រី និង “បុគ្គលម្នាក់ៗជាអ្នកផ្សព្វផ្សាយទេសចរណ៍កម្ពុជាម្នាក់” ដែលបានដាក់ចេញដោយមហាគ្រួសារវិស័យទេសចរណ៍។

លោករដ្ឋមន្រ្តីបានបន្តថា សិក្ខាសាលានាព្រឹកដ៏សែនមនោរម្យនេះ ត្រូវបានរៀបចំឡើង ដើម្បីលើកកម្ពស់សមត្ថភាព និងចំណេះដឹងរបស់ភាគីពាក់ព័ន្ធ ក្នុងវិស័យទេសចរណ៍ ពោលគឺផ្តោតសំខាន់លើការបង្កើនគុណភាពសេវាកម្មទេសចរណ៍ ការអភិរក្សធនធានធម្មជាតិ និងវប្បធម៌ ព្រមទាំងការគ្រប់គ្រងគោលដៅទេសចរណ៍ ឱ្យមានប្រសិទ្ធភាព និងចីរភាពនៅខេត្តក្រចេះ។

នៅក្នុងដំណើរការប្រព្រឹត្តទៅ នៃសិក្ខាសាលាស្តីពី “ការអភិវឌ្ឍ និងគ្រប់គ្រងទេសចរណ៍” ក្រសួងទេសចរណ៍ និងរដ្ឋបាលខេត្តក្រចេះ បានរៀបចំវេទិកាពិភាក្សា លើប្រធានបទចំនួន២ ក្នុងនោះវេទិកាពិភា​ក្សាប្រធានបទទី១ស្តីពី”ការអភិវឌ្ឍទេសចរណ៍ប្រកបដោយនិរន្តរភាពតាមដងទន្លេ៖ ការភ្ជាប់ធនធានធម្មជាតិ វប្បធម៌ និងសហគមន៍” និងវេទិកាពិភាក្សាប្រធានបទទី២ ស្តីពី“ការអភិវឌ្ឍខ្សែទស្សនកិច្ចទេសច​រណ៍ភូមិភាគឦសាន”៕