ដោយៈ គង់ សូរិយា

       ភ្នំពេញៈ ក្រុមហ៊ុនវិនិយោគលើហេដ្ឋារចនាសម្ព័ន្ឋ លំដាប់យក្សចិនធំៗចំនួនបីបានបញ្ចប់ការសិក្សា លើការសាងសង់ផ្លូវរថភ្លើងក្រោមដីនៅរាជធានីភ្នំពេញ និងបញ្ចប់ការសិក្សាលើការស្តារទន្លេសាប ពីរាជធានីភ្នំពេញ ទៅកាន់ខេត្តសៀមរាបផងដែរ។

ថ្នាក់ដឹកនាំ ក្រុមហ៊ុនវិនិយោគធំៗចំនួន៣ នៃប្រទេសចិន រួមមានក្រុមហ៊ុនសាជីវកម្មស្ពានថ្នល់ចិន ក្រុមហ៊ុនBeijing Urban Construction Group និងក្រុមហ៊ុនChina Metro Group បានជួបសម្តេចតេជោនិងលើកឡើងបែបនេះ ក្នុងជំនួបសម្តេចកាលពីចុងសប្តាហ៍មុន។

នៅក្នុងកិច្ចពិភាក្សាគ្នានោះដែរ ក្រុមហ៊ុនចិន បានជំរាបជូនសម្តេចតេជោ ពីការបញ្ចប់ការសិក្សាសមិទ្ធិលទ្ធភាព គម្រោងសាងសង់ផ្លូវរថភ្លើងក្រោមដី នៅរាជធានីភ្នំពេញ និងបានដាក់បញ្ចូននូវរបាយការណ៍សិក្សាជូនក្រសួងសាធារណការ និងដឹកជញ្ជូន ដើម្បីពិនិត្យ និងពិភាក្សាបន្ត។ ជាមួយគ្នានេះ ក្រុមហ៊ុនក៏បានជំរាបជូនសម្តេចតេជោ ពីគម្រោងដឹកជញ្ជូនផ្លូវទឹក និងកំពង់ផែ ដែលក្នុងនោះក្រុមហ៊ុនបានបញ្ចប់ការសិក្សាបឋម គម្រោងស្តារផ្លូវទឹកទន្លេសាប ភ្នំពេញ សៀមរាប ដែលនិងប្រគល់ជូនក្រសួងសាធារណការ និងដឹកជញ្ជូនរួចរាល់។

ជាមួយគ្នានេះ ក្រុមហ៊ុនក៏បានជំរាបជូនសម្តេចតេជោ ពីគម្រោងអភិ​វឌ្ឍន៍ប្រព័ន្ធទឹកកខ្វក់ ក្នុងនោះបាននិងកំពុងសិក្សាផែនការមេ និងសមិទ្ធិលទ្ធភាពដំបូង សម្រាប់អភិវឌ្ឍន៍ហេដ្ឋារចនាសម្ព័ន្ធ បណ្តាញលូសំណង់ស្ថានីយ៍ប្រព្រឹត្តកម្មទឹកកខ្វក់ នៅក្រុងខេមរភូមិន្ទ ខេត្តកោះកុង ក្រុងបាត់ដំបង ខេត្តបាត់ដំបង និងក្រុងកំពង់ចាម ខេត្តកំពង់ចាម។

ថ្នាក់ដឹកនាំក្រុមហ៊ុនទាំងបី ក៏បានជំរាបជូនសម្តេចតេជោ ពីការជួយសាងសង់អគារវិទ្យាស្ថានសម្តេចតេជោសែន សាធារណការ និងដឹកជញ្ជូន ១ខ្នង កំពស់៤ជាន់ ដែលរួមមានបន្ទប់សិក្សា ការិយាល័យរដ្ឋបាល មន្ទីរពិសោធន៍ និងការបំពាក់សម្ភារសិក្សា និងឧបករណ៍បច្ចេកទេសពិសោធន៍ទំនើបៗ ដែលបានចំណាយថវិកាសរុបប្រមាណ ២លាន៥សែនដុល្លាអាមេរិក។ ក្រុមហ៊ុនសាជីវកម្មស្ពាន និងថ្នល់ចិន ក៏បានផ្តល់ថវិកាប្រមាណ ២លានដុល្លាអាមេរិក ដើម្បីជួយសាងសង់អគារពន្ទីរពេទ្យតេជោសែន កោះធំ ស្រុកកោះធំ ខេត្តកណ្តាល។ ក្រុមហ៊ុនចិនទាំងបី ក៏បានសុំការគាំទ្រពីសម្តេចតេជោ ចំពោះការវិនិយោគលើហេដ្ឋារចនាសម្ព័ន្ធ ដែលក្រុមហ៊ុនបានសិក្សារួច ដើម្បីឲ្យគម្រោងទាំងនោះប្រព្រឹត្តទៅដោយជោគជ័យបំផុត។

នៅក្នុងកិច្ចពិភាក្សាគ្នានោះ ក្រុមហ៊ុនចិនទាំង៣ បានជំរាបជូនសម្តេចតេជោនាយករដ្ឋមន្រ្តី ពីការសាងសង់ និងដាក់ឲ្យប្រតិបត្តិផ្លូវល្បឿនលឿន ភ្នំពេញ ក្រុងបាវិត ដែលត្រូវបានរៀបចំឡើងក្រោម កិច្ចសន្យាភាពជាដៃគូ រវាងរដ្ឋ និងឯកជន (PPP) ដើម្បីឈានទៅអនុវត្តគម្រោងសាងសង់ផ្លូវល្បឿនលឿនភ្នំពេញ ក្រុងបាវិត នៅពាក់កណ្តាលឆ្នាំ២០២៣ និងគ្រោងបញ្ចប់នៅឆ្នាំ២០២៧ ស្របគ្នានឹងការសាងសង់ផ្លូវល្បឿនលឿន ហូជីមិញ ម៉ុកបៃ ដែលគ្រោងនឹងបញ្ចប់ការសាងសង់នៅឆ្នាំ២០២៧។

ជាមួយ នឹងទិសដៅនៃការវិនិយោគ ក្រុមហ៊ុនវិនិយោគចិនទាំងនោះ បានជំរាបជូនសម្តេចតេជោនាយករដ្ឋមន្រ្តី ពីការវិនិយោគលើការដឹកជញ្ជូនផ្លូវទឹកសាប ការវិនិយោគលើការចំរ៉ាញ់ទឹកកខ្វក់ នៅខេត្តព្រះសីហនុ និងការសិក្សាពីផ្លូវរថភ្លើង ល្បឿនលឿនភ្នំពេញ ប៉ោយប៉ែត។ ក្រុមហ៊ុនក៏បានជំរាបជូនសម្តេចតេជោ ពីគម្រោងនៃការវិនិយោគផ្លូវរថភ្លើង ល្បឿនលឿនធន់ស្រាល ពីខេត្តសៀមរាបទៅកាន់អាកាសយានអន្តរជាតិថ្មី នៅជីក្រែង ក្នុងខេត្តសៀមរាប។

សម្តេចតេជោនាយករដ្ឋមន្រ្តី បានសំដែងនូវការវាយតម្លៃខ្ពស់ ចំពោះក្រុមហ៊ុនវិនិយោគទាំងបី ដែលបានប្តេជ្ញារួមគ្នាក្នុងការវិនិយោគហេដ្ឋារចនាសម្ព័ន្ធផ្លូវប្រកបដោយគុណភាព នៅកម្ពុជាសម្រាប់ពេលខាងមុខ៕

 ដោយៈ គង់ សូរិយា

       ភ្នំពេញៈ ស្របពេលរដ្ឋាភិបាល កំពុងស្វែងរកដំណោះស្រាយលើបញ្ហាអគារជាប់គាំងនៅក្រុងព្រះសីហនុ អភិបាលរងខេត្តលោកឡុង ឌីម៉ង់បានបង្ហើបខ្លះៗពីដំណោះស្រាយលើបញ្ហានេះ។

លោកឡុង ឌីម៉ង់បានមានប្រសាសន៍ឲ្យដឹងក្នុងវេទិកាThe Great Debate ដែលរៀបចំឡើងដោយសភាពាណិជ្ជកម្មអាមេរិក ប្រចាំកម្ពុជា និងបានរៀបចំឡើងនៅក្នុងគំរោងThe Urban Village កាលពីថ្ងៃទី៨ កុម្ភៈ កន្លងមកថា រដ្ឋាភិបាលកំពុងរៀបចំដំណោះស្រាយ ចំពោះបញ្ហាអគារជាប់គាំងទាំងនេះ  ដែលមានចំនួនចន្លោះពី១០០០ ទៅ១១០០អគារ ដើម្បីកំណត់អត្តសញ្ញាណថា អគារជាប់គាំងទាំងនោះគួរធ្វើបែបណា ដើម្បីអាចដំណើរការឡើងវិញ។

លោកបន្តថា ជាផែនការយើងនឹងរៀបចំ អគារជាប់គាំងទាំងនោះ បែងចែកជាZone ដោយZoneទី១ នឹងរៀបចំជាតំបន់លំនៅដ្ឋានតម្លៃសមរម្យ។ Zone ទី២ នឹងរៀបចំជាទីតាំងនៃសេវាកម្មផ្ទះសំណាក់ ភោជនីយដ្ឋាន មន្ទីរពេទ្យ ដើម្បីបំរើវិស័យទេសចរណ៍។ ចំណែកZone ទី៣ ជាតំបន់កណ្តាលទីក្រុងនឹងរៀបចំតាមសភាពជាក់ស្តែងនៅនឹងកន្លែង។

លោកឡុង ឌីម៉ង់បានបញ្ជាក់ថា វាជាបញ្ហាដ៏ស្មុគស្មាញ ប៉ុន្តែយើងបានគោះទ្វាររដ្ឋាភិបាល ដើម្បីចូលរួមដោះស្រាយបញ្ហានេះ ហើយដំណោះ​ស្រាយបែបណា និងអាចទទួលយកបានពីប្រជាពលរដ្ឋ ដែលជាម្ចាស់អគារជាប់គាំងបានឬមិនបាន យើងនឹងសិក្សាបន្ថែមទៀត ដើម្បីអាចដោះស្រាយ​បញ្ហានេះ ដោយឈរលើ់មូលដ្ឋានឈ្នះ ឈ្នះទាំងអស់គ្នា៕

ដោយៈ ​ច្រាយ ចំណាន

       ភ្នំពេញៈ សញ្ញាវិជ្ជមានជាច្រើនបានលេចឡើង បន្ទាប់ពីដំណើរទស្សនកិច្ចរបស់សម្តេចតេជោហ៊ុន សែននាយករដ្ឋមន្រ្តីនៃកម្ពុជា ទៅកាន់ប្រទេសចិនកាលពីចុងសប្តាហ៍មុន។

ជាមួយនឹងចំណងមិត្តភាពដ៏ជ្រាលជ្រៅ ជាមិត្តដែកថែប ជាដៃគូយុទ្ឋសាស្រ្តគ្រប់ជ្រុងជ្រោយ និងការពន្លឿននូវ “ការបង្កើតសហគមន៍ នៃជោគវាសនារួម” បាននិងកំពុងធ្វើឲ្យកម្ពុជាមានភាពកក់ក្តៅ ជាមួយក្តីសង្ឃឹមខ្ពស់ ដោយមន្រ្តីជាន់ខ្ពស់នៃរាជរដ្ឋាភិបាលបានរំពឹងថា អ្នកវិនិយោគ និងភ្ញៀវទេសចរណ៍ចិននឹងមកវិនិយោគ និងទស្សនាកម្ពុជាយ៉ាងច្រើនកុះករនាពេលខាងមុខ។

លទ្ឋផលទទួលបានតាមការរំពឹងទុក

ជាមួយនឹងគោលបំណងវិនិយោគ លើហេដ្ឋារចនាសម្ព័ន្ឋធំៗ និងស្នើសុំឲ្យមានការគាំទ្រ ពីមិត្តចិនរបស់សម្តេតេជោ លើការសាងសង់ផ្លូវដែកល្បឿនលឿនភ្នំពេញ សៀមរាប និងតភ្ជាប់ទៅកាន់ក្រុងប៉ោយប៉ែត គឺទទួល​បានការគាំទ្រពីប្រធានាធិបតីចិន ខណៈក្រុមហ៊ុនចិនធំមួយបានសិក្សាពីការស្ថាបនាផ្លូវនេះរួចទៅហើយ ជាមួយទុនវិនិយោគប្រមាណ៤០០០លានដុល្លារអាមេរិក។

លើសពីនេះ ក្រុមហ៊ុនចិនក៏បានបញ្ចប់​​ ការសាងសង់ផ្លូវរថភ្លើងក្រោមដីនៅរាជធានីភ្នំពេញ បញ្ចប់ការសិក្សាគំរោងស្តារទន្លេរសាប ពីរាជធានីភ្នំពេញ ទៅកាន់ខេត្តសៀមរាប បញ្ចប់និងត្រៀមសាងសង់ផ្លូវល្បឿនលឿនភ្នំពេញ បាវិតជាដើម។

លោកស៊ី ជិនពីង បានឧបត្ថម្ភជំនួយឥតសំណងមានទឹកប្រាក់ ៣០០លានយ័ន ចំពោះគម្រោងផ្លូវដែកកម្ពុជា ដើម្បីលើកកម្ពស់ជីវភាពរស់នៅរបស់ប្រជាជនកម្ពុជាផងដែរ។

ពង្រឹងបន្ថែមនូវទំនាក់ទំនងដ៏កក់ក្តៅ

       ជាមួយនឹងជំនួបរយៈពេល១០០នាទី នៅទីក្រុងប៉េកាំង ប្រធានាធិបតីចិន លោកស៊ី ជីនពីងបានផ្តល់សារដ៏កក់ក្តៅជាច្រើន ដល់សម្តេ​ចតេជោបានមានប្រសាសន៍ សំដែងនូវការស្វាគមន៍ ចំពោះសម្តេចតេជោនាយករដ្ឋមន្រ្តី ជាមេដឹកនាំពិភពលោកលើកទី១ ដែលបានអញ្ជើញមកបំពេញទស្ស​នកិច្ចនៅប្រទេសចិន បន្ទាប់ពីពិធីចូលឆ្នាំថ្មីរបស់ប្រជាជនចិន។

មេដឹកនាំទាំងពីរ នឹងបន្តពង្រឹងស្មារតីកសាងសហគមន៍តែមួយ ជោ​គវាសនាតែមួយ ដែលផ្តោតសំខាន់លើវិស័យចំនួន៦ រួមមានទី១ នយោ​បាយ និងការទូត ទី២ វិស័យសមត្ថភាពផលិត និងវាយភណ្ឌ ទី៣កសិកម្ម ទី៤ថាមពល ទី៥ សន្តិសុខ និងទី៦ទំនាក់ទំនងរវាងប្រជាជន និងប្រជាជន រួមទាំងការលើកកម្ពស់វិស័យសុខាភិបាលនៅកម្ពុជា។

នៅក្នុងជំនួបគ្នានេះ លោកស៊ី ជីនពីង បានគាំទ្រចំពោះជំហគោលនយោបាយរបស់កម្ពុជា ចំពោះភាពឯករាជ្យ បូរណភាពទឹកដី របស់កម្ពុជា។

ប្រធានាធិបតីមានប្រសាសន៍ ចាប់អារម្មណ៍ពីការអភិវឌ្ឍកសិកម្ម និងវារីវប្បធម៌ នៅតំបន់ជុំវិញបឹងទន្លេសាប។

ប្រធានាធិបតីចិនអនុញ្ញាត្តឲ្យកម្ពុជាចូលជាសមាជិកCIPS

ក្នុងជំនួបពិភាក្សាការ​ងាររបស់សម្តេចតេជោ ហ៊ុន សែន ជាមួយលោកប្រធានាធិបតីចិន លោកស៉ី ជិនពីង សម្តេចតេជោនាយករដ្ឋមន្ត្រី បានស្នើសុំឲ្យកម្ពុជា បានចូលជាសមាជិកអង្គការCIPS ដែលសមាជិកភាពនេះមានសារសំខាន់ខ្លាំងណាស់ ព្រោះនឹងបង្កលក្ខណៈងាយស្រួល ក្នុងការទូទាត់ឆ្លងដែន ដែលជាផ្នែកមួយក្នុងការទាក់ទាញវិនិយោគិន ការធ្វើធុរកិច្ច ពាណិជ្ជកម្ម និងទេសចរចិនផងដែរ។

ជាការឆ្លើយតបនឹងសំណើរ របស់សម្តេចតេជោហ៊ុន សែន លោកប្រធានាធិបតីចិន បានបង្ហាញភាពវិជ្ជមាន ដោយស្វាគមន៍នូវសំណើនេះ និងជំរុញក្រុមការងារបច្ចេកទេសពិនិត្យ និងសិក្សាអំពីកិច្ចសហប្រតិបត្តិការនេះ។

សារវិជ្ជមានកាន់តែច្រើន

       រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា លោកសុខ ចិន្តាសោភាបានមានប្រសាសន៍ឲ្យដឹងក្នុងសន្និ​សីទសារព៌តមានស្តីពី លទ្ឋផលនៃដំណើរទស្សនកិច្ច របស់សម្តេចតេជោកាលពីចុងសប្តាហ៍មុនថា អ្នកវិនិយោគចិន និងភ្ញៀវទេសចរណ៍ចិនច្រើនកុះករ នឹងមកវិនិយោគ និងធ្វើដំណើរទេសចរណ៍មកកាន់កម្ពុជា។

លោកបានថ្លែងថា ក្នុងវេទិកាជួបជាមួយអ្នកធុរកិច្ចចិន នៅទីក្រុងប៉េកាំង ក្រោមអធិបតីភាពសម្តេចតេជោ ក្រុមអ្នកវិនិយោគចិនជាច្រើនបានចូលរួមក្នុងព្រឹត្តិការណ៍ដ៏សំខាន់នេះ ដោយពួកគេបានចាប់អារម្មណ៍នូវអ្វី ដែលជាការលើកឡើងរបស់សម្តេចតេជោ ពិសេសពេលចប់កម្មវិធីពួកគេមិនបានចាកចេញភ្លាមៗទេ គឺក្រុមអ្នកធុរកិច្ចចិនបាននៅរហូតដល់ចប់កម្មវិធី។

លោកបន្តថា “ខ្ញុំមានក្តីសង្ឃឹម ដំណើរទស្សនកិច្ចរបស់សម្តេច បញ្រ្ចា​សទិស នៅពេលគេរត់ចោលចិន សម្តេចចូលទៅ។ នេះគេដឹងទាំងអស់នៅស្រុកចិន”។ លោកបន្តថា “នៅប្រទេសចិន ប្រជាជនចិនហៅប្រធានាធិបតីចិនថា “ពូស៊ី” ហើយពួកគេហៅសម្តេចតេជោថា “ពូ”ដែរ មានន័យថាពួកគេគោរព ស្រលាញ់សម្តេចតេជោដូចគ្នា”។

យើងបានធ្វើកិច្ចការច្រើនណាស់ ដោយលោកសុខ ចិន្តាសោភាបានលើកឡើងនូវពាក្យពុំនោលខ្មែរថា “ទំពក់ទៅ ទើបព្នៅ វាមក”៕

ដោយៈ វឌ្ឍនៈ

ភ្នំពេញៈ កម្ពុជាជាប្រទេសមួយ ដែលកំពុងមានភាពទាក់ទាញការវិនិយោគពីខាងក្នុង និងក្រៅខាងក្រៅ ដោយមានការបណ្ដាក់ទុនវិនិយោគជាបន្តបន្ទាប់ បើទោះបីជាពិភពលោកជួបវិបត្តិយ៉ាងណា ក៏កម្ពុជានៅតែទទួលបានគម្រោងវិនិយោគទាំងក្នុង និងពីខាងក្រៅប្រទេស។

តើកត្តាអ្វីខ្លះ ដែលវិនិយោគិន គួរតែមកបណ្ដាក់ទុនវិនិយោគនៅកម្ពុជា ?

អ្នកស្រីGrace Rachny Fong អគ្គនាយិកាក្រុមហ៊ុនអចលនទ្រព្យCentury 21 Cambodia បានមានប្រសាសន៍ថា កម្ពុជាជាប្រទេសមានអំណោយផលខ្ពស់សម្រាប់វិនិយោគិន ក្នុងនោះការធ្វើដំណើររបស់វិនិយោ​គិន ក្រៅប្រទេ​សចូលមកកម្ពុជា កាន់តែមានភាពទូលំទូលាយ ដោយកម្ពុជាបានតភ្ជាប់ជើងហោះហើរ ពីបណ្ដាប្រទេសនានាចូលមកត្រង់ ជាពិសេសពីប្រទេសមានវិនិយោគិនច្រើនជាងគេនៅកម្ពុជា ដូចជា ប្រទេសចិន សិង្ហបុរី ។

អ្នកស្រីនិយាយថា “កម្ពុជា ជាប្រទេសដែលស្ថិតនៅចំណុចកណ្ដាលនៃតំបន់អាស៊ាន ដែលងាយស្រួលសម្រាប់ការតភ្ជាប់ ជើងហោះហើរ ផ្លូវទឹក និងផ្លូវគោក”។

អ្នកស្រីGrace Rachnyបានបន្តថា កត្តាសំខាន់មួយទៀតដែលវិនិយោគិនចាប់អារម្មណ៍ និងពិចារណា ក្នុងការបណ្ដាក់ទុនវិនិយោគនៅកម្ពុជានោះ គឺតម្លៃអចលនទ្រព្យនៅមានភាពប្រសើរ បើធៀបនឹងបណ្ដាប្រទេសជិតខាង ជាក់ស្ដែងបើប្រៀបធៀបនឹងទីក្រុងហូជីមិញ នៃប្រទេសវៀតណាមឃើញថាតម្លៃមានភាពខុសគ្នាឆ្ងាយ ដែលវិនិយោគិននឹងពិចារណាជ្រើសរើសយកប្រទេសណា ដែលមានតម្លៃអចលនទ្រព្យទាប អាចឱ្យពួកគេរកប្រាក់ចំណេញបានខ្ពស់។

អ្នកវិនិយោគខ្លះទៀត ដែលមានចក្ខុវិស័យវែងឆ្ងាយ មានគម្រោងវិនិយោគរយៈពេលវែងនៅកម្ពុជា គឺរឹតតែចង់មកបណ្ដាក់ទុននៅកម្ពុជា ពីព្រោះគេនឹងទទួលបានប្រាក់ចំណេញកាន់តែខ្ពស់នៅពេលអនាគត ។

អ្នកស្រីGrace Rachny Fongបានបន្ថែមថា កត្តាមួយផ្សេងទៀត ដែលវិនិយោគិន បានគិតមកចង់មកកម្ពុជា គឺពន្ធនៃអចលនទ្រព្យក្នុងប្រទេសកម្ពុជាមានកម្រិតទាបនៅឡើយ ធៀបនឹងប្រទេសដទៃទៀតគឺមានតម្លៃពន្ធខ្ពស់។ ដូច្នេះវិនិយោគិនត្រូវចំណាយថ្លៃពន្ធក៏ខ្ពស់ ដែលជាការកាត់បន្ថយនូវប្រាក់ចំណេញមួយកម្រិត។ អ្វីដែលពិសេសសម្រាប់វិនិយោគិនបរទេសចង់មកកម្ពុជានោះ គឺការផ្ដល់ទិដ្ឋាការជូនជនបរទេស មិនមានភាពស្មុគ្រស្មាញ ដូច្នេះជនបរទេសនឹងកាន់តែច្រើនចូលកម្ពុជា ស្វែងរកការវិនិយោគក៏ដូចជាធ្វើដំណើរកម្សាន្តជាដើម ។

រាជរដ្ឋាភិបាលកម្ពុជាក៏បានខិតខំ ក្នុងការសម្របសម្រួលឱ្យវិនិយោគិនបរទេស ចូលមកកម្ពុជាបន្ថែមផងដែរ ដូចជាច្បាប់វិនិយោគថ្មីនៃព្រះរាជាណាចក្រកម្ពុជា ការផ្ដល់សិទ្ធិឱ្យជនបរទេស អាចបង្កើតក្រុមហ៊ុនធ្វើអាជីវកម្ម១០០ភាគរយជាដើម៕

ដោយៈ លក្ខិណា

ភ្នំពេញៈ សេចក្ដីប្រកាសព័ត៌មានរបស់ ក្រុមប្រឹក្សាអភិវឌ្ឍន៍កម្ពុជាបានបង្ហាញគម្រោងចំនួន២១ ត្រូវបានអនុម័តជាបន្តបន្ទាប់ក្នុងឆ្នាំ ២០២៣នេះ ប៉ុន្តែជាការកត់សម្គាល់គម្រោងទាំងនោះ សុទ្ធតែជាគម្រោងវិនិយោគរោងចក្រឧស្សាហកម្មទាំងអស់ ដែលមានទុនវិនិយោគក្រោម១០លានដុល្លារក្នុងមួយគម្រោង។

សេចក្ដីប្រកាសព័ត៌មានដដែលនេះឱ្យដឹងថា គម្រោងទាំង២១នេះមានទុនវិនិយោគជាង១៥០លានដុល្លាមេរិក ក្នុងនោះយើងឃើញថាគម្រោងធំជាងគេ មានទឹកប្រាក់ចំនួន៣៦,៦លានដុល្លារអាមេរិក គឺជាគម្រោងគម្រោងបង្កើតរោងចក្រកាត់ ដេរសម្លៀកបំពាក់ និងស្បែកជើងមានទីតាំងនៅស្រុកសំរោងទងខេត្តកំពង់ស្ពឺ ។ ក្រៅពីនោះសុទ្ធតែជាគម្រោងមានទឹកប្រាក់១០លានដុល្លារចុះក្រោម ។

គម្រោងភាគច្រើនដែលបានអនុម័ត ក្នុងរយៈពេលជាង១ខែកន្លងមកនេះ គឺមានទីតាំងវិនិយោគនៅខេត្តកំពង់ស្ពឺ ដោយក្នុងចំណោមគម្រោងទាំង២១ ខេត្តកំពង់ស្ពឺមានគម្រោងចំនួន៩គម្រោង ក្រៅពីនោះមាននៅខេត្តកណ្ដាល ស្វាយរៀង តាកែវ ព្រះសីហនុ និងរាជធានីភ្នំពេញ ។

លោកវ៉ី សំណាង អភិបាលខេត្តកំពង់ស្ពឺ បានថ្លែងក្នុងសន្និសីទសារព័ត៌មានមួយកាលពីពេលថ្មីៗនេះឱ្យដឹងថា បច្ចុប្បន្នតំបន់មួយចំនួនក្នុងខេត្តកំពង់ស្ពឹបានកែប្រែ ពីតំបន់កសិកម្មទៅជាឧស្សាហកម្ម និងកំពុងទាក់ទាញការវិនិយោគ លើគម្រោងឧស្សាហកម្មជាច្រើនទៀត ។

លោកបន្តថា “ការវិនិយោគលើឧស្សាហកម្ម ជាបន្តបន្ទាប់បានជំរុញឱ្យតម្លៃដីធ្លី នៅក្នុងខេត្តកំពង់ស្ពឺឡើងថ្លៃ ជាបន្តបន្ទាប់ និងបានកែប្រែជីវភាពប្រជាពលរដ្ឋ ក្នុងខេត្តកំពង់ស្ពឺបានមួយកម្រិតផងដែរ តាមរយៈការឡើងថ្លៃដី និងការផ្ដល់ឱកាសការងារដល់ប្រជាពលរដ្ឋក្នុងមូលដ្ឋាន”។

លោកវ៉ី សំណាងជឿជាក់ថា នៅពេលអនាគត ខេត្តមួយនេះនឹងទទួលបានការវិនិយោគបន្ថែមទៀត ស្របនឹងរដ្ឋបាលខេត្ត ក៏ត្រៀមលក្ខណៈសម្ប​ត្តិ ក្នុងការសម្របសម្រួលអ្នកវិនិយោគចូលមកថ្មីៗផងដែរ៕