ដោយ៖ សុផារី

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា ហៅកាត់ CDC នៅថ្ងៃទី២៥ ខែមករា បានអនុម័តគម្រោងវិនិយោគរោងចក្រចំនួន៣ ដែលមានទុនវិនិយោគសរុបចំនួន១៨លានដុល្លារអាមេរិក។

តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនដូចខាងក្រោម៖

១- “NEW TARGET FOOTWEAR (CAMBODIA) CO., LTD” គម្រោងបង្កើតរោងចក្រផលិតស្បែកជើង ដែលមានទីតាំងវិនិយោគស្ថិតនៅភូមិទីប៉ាត់ ឃុំជាងទង ស្រុកត្រាំកក់ ខេត្តតាកែវ ក្នុងទុនវិនិយោគប្រមាណ៧,៥លានដុល្លារអាមេរិក និងអាចបង្កើតការងារបានចំនួន១.៩៣៨កន្លែង។

២-“GOLDEN ISLAND GARMENTS (CAMBODIA) CO., LTD” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិព្រៃមាន ឃុំព្រៃពួច ស្រុកអង្គស្នួល ខេត្តកណ្តាល ក្នុងទុនវិនិយោគប្រមាណ៥,៤លានដុល្លារអាមេរិក និងអាចបង្កើតការងារបានចំនួន ២.១៣៥កន្លែង។

៣-“JIN LONG QUAN (CAMBODIA) CO., LTD” គម្រោងបង្កើតរោងចក្រផលិតគ្រឿងបន្សំសម្លៀកបំពាក់ ស្បែកជើង កាបូប និងមួក ដែលមានទីតាំងវិនិយោគស្ថិតនៅភូមិកោះគរ សង្កាត់រកាខ្ពស់ ក្រុងតាខ្មៅ ខេត្តកណ្តាល ក្នុងទុនវិនិយោគប្រមាណ៥,១លានដុល្លារអាមេរិក និងអាចបង្កើតការងារបានចំនួន ៨៨៣កន្លែង។

ដោយ៖ សុផារី

ភ្នំពេញ៖ លោក វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានមានប្រសាសន៍ថា បំណុលសាធារណៈរបស់កម្ពុជាស្ថិតនៅក្នុងកម្រិតទាប  ដែលមិនចោទជាបញ្ហាឡើយ ដោយកម្ពុជាមានបំណុលសាធារណៈតិចជាងគេបង្អស់ បន្ទាប់ពីប្រទេសប្រុយណេ ដែលជាប្រទេសមិនមានខ្ចីបំណុលពីបរទេសឡើយ។

គិតត្រឹមបំណាច់ឆ្នាំ២០២២ កម្ពុជាមានបំណុលសាធារណៈចំនួន៩.៩៧២,៥៩លានដុល្លារ ក្នុងនោះបំណុលក្រៅប្រទេស៩.៩៥៥,០៨លានដុល្លារ និងបំណុលក្នុងស្រុក តាមរយៈការលក់មូលបត្របំណុលមានជិត២០លានដុល្លារ។

លោក វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ ក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា “បំណុលសាធារណៈរបស់កម្ពុជាស្ថិតនៅក្នុងកម្រិតទាប  ដែលមិនចោទជាបញ្ហាឡើយ ដោយស្ថិតនៅ ៣០ ភាគរយ នៃ GDP សរុបរបស់ប្រទេសកម្ពុជា ហើយជាបំណុលសាធារណៈ។ ចំណែកបំណុលឯកជនក៏មានខ្លះដែរ ប៉ុន្តែមួយរយៈចុងក្រោយនេះ ត្រូវបានសងចេញទៅវិញច្រើនហើយ”។

លោកឱ្យដឹងថា “ទិដ្ឋភាពរួមនៃការគ្រប់គ្រងថវិកាសេដ្ឋកិច្ច បំណុលរបស់កម្ពុជានៅតិចជាងគេទាំងអស់ នៅអាស៊ាននេះបំណុលសាធារណៈរបស់យើង តិចជាងគេ បន្ទាប់ពីប្រុយណេ ព្រោះប្រុយណេ អត់មានខ្ចីលុយគេចាយទេ ប៉ុន្តែដកប្រុយណេចេញ ខ្មែរបំណុលទាបជាងគេទាំងអស់”។

លោកបន្តថា “បំណុលសម្រាប់ពលរដ្ឋម្នាក់ៗក៏ទាបដែរ ប្រជាជនយើងម្នាក់ជំពាក់ប្រមាណ ៦០០ដុល្លារ តែសម្រាប់អាមេរិកវិញ បំណុលអាមេរិកមានជាង១២០% នៃ GDP ហើយប្រជាជនម្នាក់ៗជំពាក់ប៉ុន្មាន ជិត១សែនដុល្លារម្នាក់”៕

ដោយ: គង់ លាងហួរ

អន្តរជាតិ: ក្រុមហ៊ុន Tesla គ្រោងបោះទុនវិនិយោគជាង៣,៦ពាន់លានដុល្លារ ដើម្បីពង្រីករោងចក្រផលិត នៅរដ្ឋ Nevada ជាមួយនឹងរោងចក្រថ្មីចំនួន២ ដែលរោងចក្រទី១សម្រាប់ផលិតរថយន្តដឹកទំនិញអគ្គិសនី។

រោងចក្រផ្សេងទៀតនឹងផលិតកោសិកាថ្មអាគុយថ្មីហៅថា “៤៦៨០” និងមានសមត្ថភាពផលិតថ្មគ្រប់គ្រាន់ សម្រាប់រថយន្តធុនស្រាលចំនួន២លានគ្រឿងក្នុងមួយឆ្នាំ។ ជាមួយគ្នានេះ រោងចក្រនេះនឹងផ្តល់ការងារដល់មនុស្សប្រហែល៣.០០០នាក់ផងដែរ។

អគារ ដែលមានស្រាប់របស់ក្រុមហ៊ុនដែលដឹកនាំដោយ លោក Elon Musk នៅក្នុងទីក្រុង Sparks ផលិតអាគុយលីចូម-អ៊ីយ៉ុង គ្រឿងបន្លាស់រថយន្ត និងផលិតផលផ្សេងទៀតដូចជា Powerwall ដែលជាប្រព័ន្ធបម្រុងទុកថាមពលសម្រាប់អ្នកប្រើប្រាស់។

ប្រធានក្រុមហ៊ុន Tesla លោក Robyn Denholm ធ្លាប់បានមានប្រសាសន៍ កាលពីខែវិច្ឆិកា ថា ក្រុមហ៊ុន Tesla អាចនឹងផលិតរថយន្ត 100 Semis ក្នុងឆ្នាំ២០២២ ប៉ុន្តែក្រុមហ៊ុនមិនបានបង្ហាញពីតួលេខណាមួយ នៅក្នុងរបាយការណ៍ផលិតកម្ម នាត្រីមាសទី៤របស់ខ្លួននោះទេ។

លោក Musk បានមានប្រសាសន៍ថា ក្រុមហ៊ុនផលិតរថយន្ត EV មួយនេះ មានគោលបំណងផលិតរថយន្តចំនួន៥០.០០០គ្រឿង ក្នុងឆ្នាំ២០២៤។

ចំណែក ក្រុមហ៊ុន PepsiCo គ្រោងនឹងដាក់ឱ្យដំណើរការរថយន្ត 100 Semis នៅឆ្នាំ២០២៣។ អតិថិជនផ្សេងទៀតសម្រាប់ឡានដឹកទំនិញនេះ រួមមាន ក្រុមហ៊ុនផលិតស្រាបៀរ Anheuser-Busch ក្រុមហ៊ុន United Parcel Service និងក្រុមហ៊ុនWalmart ។

Semi នឹងត្រូវប្រឈមមុខនឹងការប្រកួតប្រជែងពីក្រុមហ៊ុន Daimler’s Freightliner ក្រុមហ៊ុន Volvo និង ក្រុមហ៊ុន Nikola Corp ដែលបានដាក់ចេញនូវរថយន្តដឹកទំនិញដើរ ដោយថ្មអាគុយផ្ទាល់ខ្លួនរបស់ពួកគេផងដែរ៕

ដោយ៖ វឌ្ឍនៈ

ភ្នំពេញ ៖ ព្រឹត្តិការណ៍ប្រកួតកីឡាអាស៊ីអាគ្នេយ៍ ឬស៊ីហ្គេម ដែលកម្ពុជាធ្វើជាម្ចាស់ផ្ទះ សម្រាប់ឆ្នាំ២០២៣នេះ កម្ពុជាបានត្រៀមកញ្ចប់ថវិកាប្រមាណ២០០លានដុល្លារអាមេរិក។

នេះបើតាមលោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ថ្លែងនៅក្នុងវេទិកាផ្សព្វផ្សាយស្តីពី “ការគ្រប់គ្រងម៉ាក្រូសេដ្ឋកិច្ច និងច្បាប់ថវិកាឆ្នាំ២០២៣” នៅសណ្ឋាគារសូហ្វីតែល នាព្រឹកថ្ងៃទី២៥ ខែមករា ឆ្នាំ២០២៣។

លោកបន្តថា តាមពិត ថវិកាសម្រាប់ស៊ីហ្គេមបានចាប់ផ្ដើមចាយ តាំងពីឆ្នាំ២០២២ម្ល៉េះ តាំងពីការរៀបចំនូវទីតាំងប្រកួតកន្លែងស្នាក់នៅរបស់កីឡាជាដើម។ ហើយថវិកានឹងអស់ច្រើន បើសិនជាគ្មានការចូលរួម ដូចជាពហុកីឡដ្ឋានមរតកតេជោ គឺជាជំនួយរបស់ប្រទេសចិន តែយើងក៏បានធ្វើនូវស្តាតតូចៗនៅជុំវិញនោះ ដែលចំណាយថវិកាប្រមាណ៣០ ទៅ៤០លានដុល្លារសហរដ្ឋអាមេរិក។

លោកបន្ថែមថា សម្រាប់កន្លែងស្នាក់នៅរបស់កីឡាករ យើងមិនបានធ្វើដោយខ្លួនឯងទេ គឺយើងសហការជាមួយឯកជន ដោយមិនអស់លុយទេ។ ក្រុមហ៊ុនវើលដ៏ប្រ៊ីដជាអ្នករៀបចំសាងសង់កន្លែងស្នាក់នៅរបស់កីឡាករ សម្រាប់ការប្រកួតនៅពេលខាងមុខ។ ប៉ុន្តែ សម្រាប់ការចំណាយនៃការប្រព្រឹត្តិទៅ នៃស៊ីហ្គេម និងអាស៊ានប៉ារ៉ាហ្គេម គ្រោងចំណាយមិនតិចជាង២០០លានដុល្លារអាមេរិកនោះទេ ទាំងការរៀបចំ និងការធ្វើពិធីប្រកួត។

យើងក្រលេកទៅមើលហេដ្ឋារចនាសម្ព័ន្ធនានានៅជុំវិញ ទីតាំងសំខាន់ក្នុងការរៀបចំកន្លែងប្រកួតស៊ីហ្គេម គឺពហុកីឡដ្ឋានជាតិមរតកតេជោ មានការរចនា និងកែលម្អបន្ថែម ដើម្បីឱ្យមានភាពងាយស្រួលដល់ភ្ញៀវទេសចរជាតិ អន្តរជាតិ ក្នុងការធ្វើដំណើរទៅទីកន្លែងប្រកួត ដូចជា ផ្លូវជាតិលេខ៦អា បាន និងកំពុងកែលម្អបានស្អាត និងជិតរួចរាល់ ផ្លូវនៅតាមមហាវិថីឈ្នះឈ្នះ ក៏កំពុងរៀបចំកែលម្អបន្ថែម សម្រាប់ការប្រព្រឹត្តិទៅ នៃការប្រកួតស៊ីហ្គេម ជាដើម។

តាមរយៈព្រឹត្តិការណ៍នេះដែរ កម្ពុជារំពឹងថា នឹងនាំភ្ញៀវទេសចរអន្តរជាតិចូលមកម្ពុជាបានច្រើនឡើងវិញ ពោលគឺវិលទៅរកស្ថានភាពមុនកូវីដ១៩ និងអាចនាំអ្នកវិនិយោគបរទេសចូលមកកម្ពុជា និងសិក្សាស្វែងយល់ពីសក្ដានុពល និងឱកាសវិនិយោគ នៅក្នុងប្រទេសឡើងវិញផងដែរ៕

ដោយ៖ សុផារី

ភ្នំពេញ៖ ប្រទេសកម្ពុជាបន្តធ្វើកំណែទម្រង់ បង្កបរិយាកាសអំណោយផលសម្រាប់ការវិនិយោគនៅកម្ពុជា និងកម្ពុជាកំពុងមានអ្នកមានចំណូលមធ្យមច្រើន។

ប្រមុខរាជរដ្ឋាភិបាលកម្ពុជាបានលើកឡើងថា កម្ពុជាអនុញ្ញាតឲ្យធ្វើការវិនិយោគ ១០០% សម្រាប់ផ្លូវដែកថ្មីល្បឿនលឿនពីទីក្រុងភ្នំពេញ ទៅកាន់ទីក្រុងហូជីមិញ។

នេះបើយោងតាមប្រសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងជំនួបជាមួយលោក អូលីវេ្យ បិច រដ្ឋមន្ត្រីប្រតិភូអម រដ្ឋមន្ត្រីក្រសួងអឺរ៉ុប និងការបរទេសបារាំង នៅថ្ងៃទី២៥ ខែមករា ឆ្នាំ២០២៣ នេះ។

ប្រតិភូបារាំងសម្រេចធ្វើការជាមួយកម្ពុជា ស្វែងរកការវិនិយោគលើវិស័យ រថភ្លើងល្បឿនលឿន ការដឹកជញ្ជូនតាមផ្លូវទឹកគោកអាកាស សំណង់ ថាមពល និងវិស័យដទៃទៀតនិងសុំស្វែងយល់ ពីសម្ដេចតេជោ អំពីវិស័យវិនិយោគជាអាទិភាព របស់កម្ពុជា។

ជាការឆ្លើយតប សម្ដេចតេជោបានស្វាគមន៍ និងបានជម្រាបជូន ប្រតិភូវិនិយោគបារាំងទាំងមូលថា កម្ពុជាអនុញ្ញាតឲ្យធ្វើការវិនិយោគ១០០% សម្រាប់ផ្លូវដែកថ្មីល្បឿនលឿនពីទីក្រុងភ្នំពេញ ទៅកាន់ទីក្រុងហូជីមិញ។ ចំពោះផ្លូវដែក២ខ្សែទៀត ដែលមានស្រាប់ គឺត្រូវធ្វើការពង្រីក ហើយលើកទឹកចិត្តឲ្យមានការ វិនិយោគពីវិស័យឯករីជនតាមរយៈ មករោង B.O.T។

តំណាងភាគីបារាំងបានលើកឡើងថា លោកមានជំនឿលើការវិនិយោគនៅកម្ពុជា យ៉ាងខ្លាំង ដោយឈរលើមូលហេតុថា កម្ពុជាបានចាប់ផ្ដើមពីចំណុចសូន្យ ហើយបានបំបែកឯកតកម្ម លើការជំរុញកំណើនសេដ្ឋកិច្ច រយៈពេល២០ឆ្នាំ៕

ដោយ៖ សហការី

ភ្នំពេញ៖ ប្រតិភូវិនិយោគមួយក្រុម ដែលដឹកនាំដោយមន្ត្រីជាន់ខ្ពស់ របស់បារាំង បានជម្រាបសម្តេចតេជោ ហ៊ុន សែន នាយករដ្ឋមន្ត្រីកម្ពុជា ពួកគេមានជំនឿចិត្តក្នុងការវិនិយោគនៅកម្ពុជា ព្រោះកម្ពុជាមានពលរដ្ឋមានចំណូលកម្រិតមធ្យមច្រើន បូករួមជាមួយកត្តាអំណោយផលមួយចំនួនទៀត។

ក្នុងដំណើរទស្សនកិច្ចនៅកម្ពុជា លោក អូលីវេ្យ បិច (Olivier Becht) រដ្ឋមន្ត្រីប្រតិភូនៃក្រសួងអឺរ៉ុប និងការបរទេសបារាំង ទទួលបន្ទុកពាណិជ្ជកម្ម ក្រៅប្រទេស ការទាក់ទាញវិនិយោគិន និងជនជាតិបារាំងនៅបរទេស នៅព្រឹកថ្ងៃពុធ ទី២៥ ខែមករា ឆ្នាំ២០២៣នេះ បានដឹកនាំអ្នកវិនិយោគបារាំងមួយក្រុម ជួបសម្តែងការគួរសម និងពិភាក្សាលើការងារវិនិយោគ ជាមួយសម្តេចតេជោ ហ៊ុន​ សែន និងមន្ត្រីជាន់ខ្ពស់របស់កម្ពុជា។

យោងតាមលោក អ៊ាង សុផល្លែត ជំនួយការផ្ទាល់របស់សម្តេចតេជោនាយករដ្ឋមន្ត្រី បានឱ្យដឹងថា នៅក្នុងជំនួបនោះ លោក អូលីវេ្យ បិច បានគោរពជម្រាបជូនសម្តេចតេជោថា គណៈប្រតិភូវិនិយោគរបស់បារាំងមានជំនឿចិត្តលើការវិនិយោគនៅកម្ពុជា ដោយឈរលើមូលហេតុថា កម្ពុជាបានចាប់ផ្តើមពីចំណុចសូន្យ ហើយបានបំបែកឯកទគ្គកម្មលើកំណើនសេដ្ឋកិច្ចប្រមាណ៧ភាគរយ រយៈពេល២០ឆ្នាំកម្ពុជា បន្តធ្វើកំណែទម្រង់ បង្កបរិយាកាសល្អសម្រាប់ការវិនិយោគ កម្ពុជា កំពុងមានប្រជាពលរដ្ឋមានចំណូលកម្រិតមធ្យមច្រើន។

លោក អូលីវេ្យ បិច បានជម្រាបសម្តេចតេជោថា ឈរលើមូលហេតុទាំងនេះហើយ ដែលនាំឱ្យអ្នកវិនិយោគបារាំង សម្រេចចិត្តធ្វើការជាមួយកម្ពុជា ស្វែងរកការវិនិយោគលើវិស័យរថភ្លើងល្បឿនលឿន ដឹកជញ្ជូនតាមផ្លូវទឹក គោក និងអាកាស សំណង់ ថាមពល និងវិស័យដទៃទៀត។

សម្តេចតេជោ បានស្វាគមន៍ និងជម្រាបជូនប្រតិភូវិនិយោគរបស់បារាំង ទាំងមូលថា កម្ពុជាអនុញ្ញាតឱ្យអ្នកវិនិយោគបរទេសអាចវិនិយោគ១០០ភាគរយ សម្រាប់ផ្លូវដែកល្បឿនលឿនពីរាជធានីភ្នំពេញ ទៅកាន់ក្រុងហូជីមិញ។ ដោយឡែកផ្លូវដែកពីរខ្សែទៀត គឺត្រូវពង្រីក ដោយលើកទឹកចិត្តឱ្យមានការវិនិយោគពីវិស័យឯកជន តាមទម្រង់ BOT។

ពាក់ព័ន្ធថាមពលស្អាតវិញ សម្តេចតេជោនាយករដ្ឋមន្ត្រី បានគូសបញ្ជាក់ថា ថា កម្ពុជា កំពុងប្រើប្រាស់ថាមពលស្អាតប្រមាណ៦២ភាគរយហើយ ហើយកំពុងទាក់ទាញការវិនិយោគមកបន្ថែមទៀត។ ប៉ុន្តែមិនអនុញ្ញាតឱ្យបង្កើតរោងចក្រអគ្គិសនីប្រើប្រាស់ធ្យូងថ្មថ្មី ឬធ្វើទំនប់វារីអគ្គិសនីកាត់ទន្លេមេគង្គឡើយ។

សម្តេចតេជោ បានលើកឡើងដែរថា កម្ពុជា កំពុងតែលើកទឹកចិត្តឱ្យ ប្រើប្រាស់ថាមពលពន្លឺព្រះអាទិត្យ ដែលនេះជាឱកាសមួយសម្រាប់ការវិនិយោគនៅកម្ពុជា។

សម្តេចតេជោ ក៏បានជម្រាបប្រតិភូលើវិស័យវិនិយោគ អំពីវិស័យអាទិភាពមួយចំនួនទៀតរបស់កម្ពុជា ដែលរួមមាន ការជំរុញវិស័យឧស្សាហកម្ម ជំរុញការវិនិយោគលើឧស្សាហកម្មបច្ចេកវិទ្យាជាន់ខ្ពស់ ជំរុញឱ្យមានការវិនិយោគលើឧស្សាហកម្មកែច្នៃ ដោយកម្ពុជាមានវត្ថុធាតុដើម ដូចជាស្វាយចន្ទី កៅស៊ូ ដំឡូង ស្រូវ។ល។ សម្រាប់កែច្នៃ មិនត្រឹមតែសម្រាប់ទីផ្សារកម្ពុជាប៉ុណ្ណោះទេ តែអាចនាំទៅកាន់ទីផ្សារប្រទេសដទៃទៀត ដែលជាដៃគូរបស់កម្ពុជា។

ស្ថានទូតបារាំងនៅកម្ពុជា បានឱ្យដឹងថា អមដំណើរដោយគណៈប្រតិភូធុរជនដឹកនាំដោយសហព័ន្ធធុរកិច្ចបារាំង MEDEF International និង Business France លោក អូលីវេ្យ បិច នឹងជួបពិភាក្សាការងារជាមួយថ្នាក់ដឹកនាំនយោបាយកម្ពុជាជាច្រើនរូប រួមមានសម្តេចតេជោ ហ៊ុន សែន លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា។

ក្នុងដំណើរទស្សនិច្ចនេះ លោករដ្ឋមន្ត្រីប្រតិភូ នឹងមានជំនួបផ្សេងៗជាមួយសហគមន៍បារាំងនៅកម្ពុជា ពិសេសតំណាងសហគមន៍ធុរកិច្ចបារាំងដ៏រស់រវើក។ ប្រជាពលរដ្ឋបារាំងចំនួន៥០០០នាក់ ដែលកំពង់រស់នៅកម្ពុជា បានចុះបញ្ជីជាមួយស្ថានទូត។

លោករដ្ឋមន្ត្រីប្រតិភូ ក៏នឹងចូលរួមពិធីបញ្ចុះបឋមសិលាសាងសង់ឡើងវិញ នូវស្តូបរំលឹកដល់វិញ្ញាណក្ខន្ធយុទ្ធជនពលីកម្ពុជា និងបារាំង នៅក្នុងសង្គ្រាមលោកលើកទី១ តាមការសម្រេចរបស់រាជរដ្ឋាភិបាលកម្ពុជា ដែលនឹងប្រព្រឹត្តទៅក្រោមវត្តមានរបស់លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងលោកស្រី ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ។

ក្រៅពីនេះ លោក អូលីវេ្យ បិច នឹងទៅពិនិត្យដំណើរការសាងសង់រោងចក្រប្រព្រឹត្តកម្មទឹកស្អាតបាក់ខែង ដែលទទួលបានហិរញ្ញប្បទានពីទីភ្នាក់ងារបារាំងសម្រាប់ការអភិវឌ្ឍ (AFD) ធនាគារវិនិយោគអឺរ៉ុប និងសហភាពអឺរ៉ុប។

លោក អូលីវេ្យ បិច ក៏នឹងអញ្ជើញទៅទស្សនាប្រាសាទអង្គរ ជាពិសេសការដ្ឋានជួសជុលប្រាសាទមេបុណ្យខាងលិច ដែលផ្តល់ហិរញ្ញវត្ថុដោយប្រទេសបារាំង។

ស្ថានទូតបារាំង បានគូសបញ្ជាក់ថា ដំណើរទស្សនកិច្ចនេះបង្ហាញពីការប្តេជ្ញាចិត្តកាន់តែខ្លាំងឡើងៗរបស់ប្រទេសបារាំង នៅតំបន់អាស៊ាន ដែលឆ្លុះបញ្ចាំងឱ្យឃើញតាមរយៈការចូលរួម របស់លោកប្រធានាធិបតីបារាំង ក្នុងកិច្ចប្រជុំកំពូលប្រទេស G20 កាលពីចុងឆ្នាំ២០២២នៅកោះបាលី និងកិច្ចប្រជុំសហប្រតិបត្តិការសេដ្ឋកិច្ច អាស៊ីប៉ាស៊ីហ្វិក (APEC) នៅទីក្រុងបាងកក។

អាស៊ីអាគ្នេយ៍ គឺជាតំបន់សំខាន់មួយនៃយុទ្ធសាស្រ្តបារាំងនៅឥណ្ឌូប៉ាស៊ីហ្វិក ដោយសារតំបន់នេះគឺជាទីតាំងរស់រវើកជាងគេបំផុតក្នុងពិភពលោកបើនិយាយពីទិដ្ឋភាពសេដ្ឋកិច្ច ដោយមានអត្រាកំណើនខ្ពស់ ហើយអាស៊ានគឺជាដៃគូពាណិជ្ជកម្មលំដាប់ទី៣របស់សហភាពអឺរ៉ុប៕