ដោយៈ សុខុម

សេអ៊ូល: ប្រជាជនកូរ៉េខាងត្បូង មួយចំនួនកំពុងរង់ចាំឱកាសល្អ ដើម្បីទិញផ្ទះ ក្នុងក្តីស្រមៃរបស់ខ្លួននៅក្នុងទីក្រុងសេអ៊ូល ខណៈអត្រាការប្រាក់ធនាគារចេះតែកើនឡើងខ្ពស់ កំពុងធ្វើឱ្យពួកគេរារែកចិត្ត និងពិចារណាយ៉ាងល្អិតល្អន់ មុននឹងសម្រេចចិត្តទទួលយកប្រាក់កម្ចី។

យោងតាមសារព័ត៌មាន CNA ចុះផ្សាយកាលពីថ្ងៃអង្គារ ទី២៤ ខែមករា ឱ្យដឹងថា ទោះជាតម្លៃផ្ទះចាប់ផ្តើមធ្លាក់ចុះក្ដី ក៏ប្រជាជនកូរ៉េខាងត្បូង នៅតែសម្ងំរង់ចាំមើលឱកាសល្អមកដល់ ពោលគឺរង់ចាំឱ្យការប្រាក់ធ្លាក់ចុះ។

តួយ៉ាង គម្រោងលំនៅដ្ឋាន Olympic Park Foreon ធ្លាប់ត្រូវបានរំពឹងទុកថា នឹងលក់ដាច់ខ្លាំង ខណៈប្រជាជនកូរ៉េក្នុងចំនួនលើសលុប កំពុងសម្លឹងរកទិញផ្ទះនៅក្នុងទីក្រុងសេអ៊ូល។ គម្រោងអភិវឌ្ឍន៍លំនៅដ្ឋាននេះគឺល្មម សម្រាប់អ្នកស្នាក់នៅជាង១០.០០០គ្រួសារ។

ប៉ុន្តែដោយសារអត្រាការប្រាក់ធនាគារកើនឡើង ពេលនេះគឺផ្ទះពិបាកនឹងលក់ចេញណាស់ ខណៈអ្នកទិញមួយចំនួន ក៏បានទទួលស្គាល់ថា ការទិញមិនមែនជាការសម្រេចចិត្តងាយស្រួលឡើយ។

*អត្រាការប្រាក់កើនឡើង

ចាប់តាំងពីខែសីហា ឆ្នាំ២០២២ ធនាគារកណ្តាលកូរ៉េ (Bank of Korea) បានដំឡើងអត្រាការប្រាក់ ពីកម្រិតទាបបំផុតពី០,៥%រហូតដល់៣,៥% ដែលជាកម្រិតខ្ពស់បំផុត មិនធ្លាប់មានចាប់តាំងពីឆ្នាំ២០០៨។

ទន្ទឹមនេះធនាគារធំៗទាំង៥របស់កូរ៉េខាងត្បូង ក៏បានដំឡើងអត្រាការប្រាក់កម្ចីទិញផ្ទះ ជាមធ្យមរបស់ខ្លួនពី៥,៤៧% រហូតដល់៨,១១%ផងដែរ។

វាជាលើកដំបូងហើយ ចាប់តាំងពីវិបត្តិហិរញ្ញវត្ថុពិភពលោក ឆ្នាំ២០០៨ ដែលអត្រាការប្រាក់កម្ចីទិញផ្ទះបានឡើងលើសពី៨%។

ពេលនេះមានការរំពឹងទុកខ្លះថា ធនាគារកណ្តាលកូរ៉េ អាចនឹងបញ្ឈប់ការដំឡើងអត្រាការប្រាក់ នៅប៉ុន្មានខែខាងមុខនេះ ចំពេលមានការព្រួយបារម្ភថា ការដំឡើងអត្រាការប្រាក់បន្ថែមទៀត អាចធ្វើឱ្យកំណើនសេដ្ឋកិច្ចធ្លាក់ចុះ ខណៈតម្រូវការធ្លាក់ចុះ ហើយការបោះទុនវិនិយោគសាជីវកម្មក៏ធ្លាក់ចុះ៕ CNA៕

ដោយៈ គង់ សូរិយា

       ភ្នំពេញៈ ក្រសួងបរិស្ថាន ត្រូវបានគេមើលឃើញថាដើរតួនាទីកាន់តែសកម្មឡើង ក្នុងការផ្សព្វផ្សាយសហគមន៍ទេសចរណ៍ និងតំបន់ទេសចរណ៍ធម្មជាតិ។

កាលពីចុងសប្តាហ៍មុន ក្រសួងនេះបានបង្ហាញពីសម្រស់ និងទិដ្ឋភាពដ៏ស្រស់ស្អាតនៃដងស្ទឹងអារ៉ែង ខណៈក្រសួងទេស​ចរណ៍។

យោងតាមបណ្តាញទំនាក់ទំនងសង្គមផ្លូវការរបស់ក្រសួងបរិស្ថានបានឲ្យដឹងថា ស្ទឹងអារ៉ែង ​ស្ថិត​ក្នុង​ឧទ្យាន​ជាតិ​ជួរភ្នំក្រវាញ​។ ស្ទឹងអារ៉ែង ​ស្ថិត​ក្នុងភូមិសាស្ត្រស្រុកថ្មបាំង ខេត្តកោះកុង។

ស្ទឹងអារ៉ែងលាតសន្ធឹង និងហូរកាត់ឃុំចំនួន៣ គឺឃុំជំនាប់ ឃុំប្រឡា​យ និងឃុំចំណារ។ ស្ទឺងអារ៉ែង ហ៊ុំព័ទ្ធដោយព្រៃត្រូពិច ដ៏ខៀវស្រងាត់ ដែលជាទីជម្រកនៃសត្វព្រៃ និងជីវៈចំរុះ កម្រៗ ជាច្រើនប្រភេទ។ ស្ទឹងអារ៉ែងក៏ផ្នែកមួយដែលបានទាក់ទាញភ្ញៀវទេសចរណ៍ ទៅបោះតង់សម្រាកកម្សាន្តលើឆ្នេរខ្សាច់ នារដូវទឹកស្រក ដើម្បីទស្សនា សត្វកម្រក្រពើភ្នំ និងត្រីនាគ ដែលរស់នៅតាមដងស្ទឹង៕

ដោយ: គង់ លាងហួរ

ភ្នំពេញ: ប្រទេសកម្ពុជាត្រូវបានគេរំពឹងថា នឹងទាក់ទាញលំហូរវិនិយោគថ្មី ក្នុងវិស័យឧស្សាហកម្ម ក្រោមកិច្ចព្រមព្រៀងពាណិជ្ជកម្មសេរីទ្វេរភាគី (FTAs) កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ ក្នុងតំបន់ (RCEP) រួមជាមួយនឹងច្បាប់វិនិយោគថ្មី។

លោកហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សា​ហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៍ថា “ការអនុវត្តកិច្ចព្រមព្រៀងពាណិជ្ជកម្ម បានផ្តល់ឱ្យកម្ពុជា នូវលទ្ធភាពទទួលបានទីផ្សារធំជាងមុន”។

លោកបានបន្តថា ទោះបីជាមានវិបត្តិពិភពលោក សង្រ្គាមនៅអ៊ុយក្រែន វិបត្តិថាមពល និងហិរញ្ញវត្ថុយ៉ាងណាក្តី ប៉ុន្តែកម្ពុជាមានភាពទាក់ទាញ និងសក្តានុពលសម្រាប់ការវិនិយោគ ដោយសារតែកម្ពុជាគ្រប់គ្រងប្រកប​ដោយប្រសិទ្ធភាព នូវវិបត្តិសុខភាពសាធារណៈ បានល្អជាងបណ្តាប្រទេសដទៃទៀតនៅក្នុងតំបន់។

លោកបានគូសបញ្ជាក់ថា សម្រាប់ឆ្នាំ២០២៣នេះ យើងមានសុទិ​ដ្ឋិនិយមខ្ពស់ថា កម្ពុជានឹងបន្តទាក់ទាញ ការវិនិយោគបន្ថែមទៀត ពីព្រោះកម្ពុជាមានសន្តិភាព រួមជាមួយការគ្រប់គ្រងកាន់តែប្រសើរឡើង នៃវិបត្តិកូវីដ ដែលនាំទៅដល់ ការបន្តសកម្មភាពសេដ្ឋកិច្ច សង្គមឡើងវិញយ៉ាងពេញលេញ។

កម្ពុជាបានចុះបញ្ជីរោងចក្រថ្មីចំនួន១៨៦ ក្នុងឆ្នាំ២០២២ ដែលនាំឱ្យចំនួនរោងចក្រសកម្មសរុ បក្នុងប្រទេសនេះកើនឡើងដល់១.៩៨២ ដែលមានតម្លៃទុនវិនិយោគសរុប១៦,៦៩ពាន់លានដុល្លារ កើនឡើងពី១៣,៨១ពាន់លានដុល្លារក្នុងឆ្នាំ២០២១។

កាលពីខែតុលា ឆ្នាំ២០២១ កម្ពុជាបានដាក់ចេញនូវច្បាប់វិនិយោគថ្មី ដែលផ្តល់នូវការលើកទឹកចិត្ត និងការការពារជាក់លាក់ ដល់វិនិយោគិន ដើម្បីទាក់ទាញលំហូរវិនិយោគ កាន់តែច្រើនមកកាន់ប្រទេសនេះ៕

 ដោយៈ វឌ្ឍនៈ

ភ្នំពេញៈ ពន្ធប្រថាប់ត្រាផ្ទេរកម្មសិទ្ធិអចលនទ្រព្យនៅកម្ពុជា បានកើនឡើងជាបន្តបន្ទាប់ ស្របនឹងការទិញលក់អចលនទ្រព្យក៏មានសន្ទុះ ជាក់ស្ដែ​ងរយៈពេល២០ឆ្នាំចុងក្រោយននេះ ចំណូលបានមកពីពន្ធប្រថាប់ត្រាផ្ទេរកម្មសិទ្ធិអចលនទ្រព្យ មានទំហំរហូតដល់ជាង៩០០លានដុល្លារអាមេរិក ។ នេះបើតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់។

យោងតាមរបាយការណ៍ស្តីពី សមិទ្ធផលសង្ខេបរយៈពេល៥ឆ្នាំ របស់ក្រសួងរៀបចំដែនដី នរគរូបនីយកម្ម និងសំណង់ បានបង្ហាញថា ចំណូលពន្ធប្រថាប់ត្រា លើការផ្ទេរកម្មសិទ្ធអចលនទ្រព្យ ដែលប្រមូលដោយអគ្គនាយកដ្ឋានពន្ធដារ សម្រេចបានទំហំទឹកប្រមាណ៣,៧ទ្រីលានរៀល ឬប្រហែល៩០០លានដុល្លារអាមេរិក។

ចំណូលដែលប្រមូលបានទាំងនេះ គឺគិតចាប់ពីឆ្នាំ១៩៩៩ រហូតមកដល់ដំណាច់ត្រីមាសទី៣ឆ្នាំ២០២២។

ចំណូលពីពន្ធប្រថាប់ត្រាលើការផ្ទេរអចលនទ្រព្យ គឺជាផ្នែកមួយនៃការងារប្រមូលចំណូលពីសេវាផ្សេងៗ ដែលកត់ត្រាដោយ ក្រសួងរៀបចំដែនដី នរគរូបនីយកម្ម និងសំណង់។

ចំណូលពីសេវាទាំងនោះរួមមាន សេវាសុរិយោដី សេវាសំណង់ ការជួលទីតាំងរោងចក្រ សេវាព័ត៌មានសុរិយោដីតាម ប្រពន្ធអេឡិចត្រូនិក និងពន្ធលើការផ្ទេរអចលនទ្រព្យ។ ចំណូលដែលប្រមូលបានពីសេវាទាំងនេះបូកបញ្ចូលគ្នា សម្រេចបានទំហំទឹកប្រាក់ប្រមាណ៤,៤ ទ្រីលានរៀល ឬប្រហែ​ល១ប៊ីលានដុល្លារ។ ក្នុងនោះ គ្រាន់តែចំណូលប្រមូលបានពីសេវាផ្ទេរកម្មសិទ្ធអចលនទ្រព្យមានចំណែកដល់៨០ភាគរយ។

ពន្ធប្រថាប់ត្រាលើការផ្ទេរកម្មសិទ្ធអចលនទ្រព្យ មានការកំណត់អត្រាពន្ធ ភាគរយ នៃតម្លៃអចលនទ្រព្យហើយ ពន្ធនេះត្រូវបានប្រមូលលើរាល់ការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ (ដូចជា ការទិញលក់ ឬការដោះដូរ ឬការធ្វើអំណោយ ឬការដាក់ភាគហ៊ុនជាអចលនទ្រព្យ ក្នុងក្រុមហ៊ុន) ទោះបីអចលនទ្រព្យនោះ មានប័ណ្ណកម្មសិទ្ធិជាប្លង់រឹង និងប្លង់ទន់ក្តី។

ក្នុងរយៈពេលប៉ុន្មានកន្លងមកនេះដែរ រាជរដ្ឋាភិបាលបានសម្រេចលើកលែងពន្ធប្រថាប់ត្រា ចំពោះលំនៅឋាន ដែលមានតម្លៃក្រោម៧ម៉ឺនដុល្លារអាមេរិក ដើម្បីសម្រួលដល់ពលរដ្ឋ ដែលមានចំណូលមធ្យមក្នុងការទទួលបានលំនៅឋានសមរម្យ ។

យោងតាមរបាយការណ៍អគ្គនាយកដ្ឋានពន្ធដារ ក៏បានបង្ហាញផងដែរថា ពន្ធប្រថាប់ត្រាផ្ទេរកម្មសិទិ្ធអចលនទ្រព្យ មានកំណើនខ្ពស់រាល់ឆ្នាំមិនថាឆ្នាំមានវិបត្តិកូវីដ១៩ ឬឆ្នាំមានសកម្មភាពទិញលក់ខ្ពស់នោះទេ។ ការណ៍នេះ បានបង្ហាញពីកំណើននៃការផ្ទេរកម្មសិទ្ធិ តាមការទិញលក់អចលនទ្រព្យនៅកម្ពុជារៀងរាល់ឆ្នាំ នៅតែមានសកម្មភាពផុសផុល៕

ដោយៈ ច្រាយ ចំណាន

       ភ្នំពេញៈ ទិន្នន័យបានបង្ហាញថា ទុនបម្រុង​អន្តរជាតិ​របស់​កម្ពុជាបាន​កើនឡើង​ជិត១៨ពាន់​លាន​ដុល្លារ​ កាលពី​ឆ្នាំ២០២២ ដែល​អាច​អនុញ្ញាត ឱ្យ​ធ្វើការ​នាំចូល​ទំនិញ និង​សេវាកម្ម​សំខាន់ៗ​សម្រាប់​រយៈពេល៧​ខែ ក្នុងករណី​ប្រទេស​ប្រឈម​នឹង​វិបត្តិ ឬ​គ្រាអាសន្ន​ណាមួយ។

សេដ្ឋវិទូ និង​អ្នកជំនាញបានឱ្យដឹងថា ការរក្សា​ទុនបម្រុង​អន្តរ​​ជាតិ​នេះ គឺ​បង្ហាញ​អំពី​កំណើនសេដ្ឋកិច្ច​ ដ៏​រ៉ឹងមាំ​របស់​កម្ពុជា និង​ការកើនឡើង​ជីវភាព និង​ប្រាក់ចំណូល​របស់​ប្រជាជន​។​

យោងតាម​ទិន្នន័យ​ធនាគារជាតិ​នៃ​កម្ពុជា ទុនបម្រុង​អន្តរ​​ជាតិ​របស់​កម្ពុជា បានថយ​មក​នៅ១៧,៨​ពាន់​លាន​ដុល្លារ​ គិត​ត្រឹម​ចុងឆ្នាំ​ ២០២២ ធ្លាក់ចុះ​ពី២០,៣​ ពាន់​លាន​ដុល្លារ​កាលពីឆ្នាំ​២០២១ ដោយសារ​ការប្រែប្រួល​ទីផ្សារ​ហិរញ្ញវត្ថុ​អន្តរជាតិ ការឡើង​ថ្លៃ​នៃ​ប្រាក់​ដុល្លារ និង​ការ​វិ​និ​​យោគ​ជាមួយ​ស្ថាប័នហិរញ្ញវត្ថុ​អន្តរជាតិ​ធំៗ នៅ​ប្រទេស​ចិន កូរ៉េខាងត្បូង ជប៉ុន និង​តំបន់​អឺរ៉ុប​លើ​សញ្ញា​បណ្ណ​បៃតង បរិ​ស្ថាន សង្គម និង​អភិបាលកិច្ច ​(ESG)​។​

អ្នកស្រាវជ្រាវ​សេដ្ឋកិច្ច​នៃ​រាជបណ្ឌិត្យ​​សភា​កម្ពុជា លោក គី សេរី​វឌ្ឍន៍ បាន​បានមានប្រសាសន៍ថា លោក​បាន​សង្កេតឃើញ​ទុន​​បម្រុង​អន្តរជាតិ​របស់​កម្ពុជា​បាន​កើន​​ឡើង​ទ្វេរដង ​បើ​ធៀប​នឹង​រយៈពេល១០​ឆ្នាំមុន ដែល​បង្ហាញថា សេដ្ឋកិច្ចកម្ពុជា​មានកា​រ​កើនឡើង ខណៈ​ប្រាក់ចំណូល និង​ប្រាក់​សន្សំ​របស់​ប្រជាជន​កម្ពុជា​ក៏​កំពុង​កើនឡើង​ដែរ​។​

លោក​ថ្លែងថា ​ទុនបម្រុង​អន្តរជាតិ គឺមាន​សារៈសំខាន់​ខ្លាំងណាស់​សម្រាប់​ប្រទេស ដោយសារ​វា​បង្ហាញឱ្យឃើញថា យើង​មាន​ស្ថានភាព​ហិរញ្ញ​វត្ថុ​ដ៏​រឹងមាំ ដែល​វា​អាចជួយ​សង្គ្រោះ​ប្រទេស​ នៅពេល​មាន​វិបត្តិ​ណាមួយ”​។

ការណ៍​នេះ​មានន័យថា នៅពេល​ដែលមាន​វិបត្តិ​ណាមួយ យើង​អាច​ប្រើប្រាស់​ទុនបម្រុង​នេះ ដើម្បី​នាំចូល​ទំនិញ​មក​ផ្គត់ផ្គង់ ​ក្នុងប្រទេស​រយៈពេល៧ខែ​បាន ហើយ​រដ្ឋា​ភិ​បាល​ក៏មាន​ពេល ​សម្រាប់​ដោះស្រាយ​ស្ថានភាព​លំបាកឬ​វិបត្តិ​ផងដែរ​»​។​

លោក Anthony Galliano អគ្គ​នា​យក​ក្រុមហ៊ុន​សេវាកម្ម​ហិរញ្ញវត្ថុ Cambodian Investment Management Co Ltd បានប្រាប់កាសែតមួយ​ថា ប្រទេស​កម្ពុជា​បាន​រក្សា​កម្រិត​ទុនបម្រុង​ អន្តរជាតិ​ខ្ពស់ជាង​អ្វីដែល​កំណត់​ជាទូទៅ ​សម្រាប់​ប្រ​-​ទេស​កំពុងអភិវឌ្ឍន៍ ដែល​ធ្វើឱ្យ​កម្ពុជា​ស្ថិតក្នុង​ស្ថានភាព​ហិរញ្ញវត្ថុ​ដ៏​រឹងមាំ​។​

លោក​លើកឡើងថា​ “​នេះ​ជាការ​ប្រុង​ប្រយ័ត្ន​ជាពិសេស​ ដោយសារតែ​ការ​​កើនឡើង ​នៃ​ការខ្ចីប្រាក់​ដោយ​ប្រទេស​​កម្ពុជា​។ កម្រិត​ខ្ពស់​នៃ​ទុនបម្រុង​អន្តរ​​ជាតិ​ ជួយ​កាត់បន្ថយ​ហានិភ័យ​សាច់​ប្រាក់​ ទទួលបាន​បំណុល​រយៈពេល​ខ្លី និង​សម្របសម្រួល​អត្រា​ការប្រាក់​កាន់តែ​ទាប”​។លោកបន្តថា “អ្វីៗ​ទាំងអស់នេះ ​គឺ​ផ្តល់​ផល​វិជ្ជមាន ​ដល់​ការចេញ​សញ្ញា​បណ្ណ​រដ្ឋ​នាពេល​ថ្មីៗ​នេះ”។

រូបិយប័ណ្ណ​បរទេស ឬ​ទុនបម្រុង​បរទេស ឬ​គេ​ស្គាល់​ជា​ទុនបម្រុង​បរទេស​រួមមាន​សាច់ប្រាក់ និង​ទ្រព្យសកម្ម​ផ្សេងទៀត​ដូចជា ​មាស ដែល​ត្រូវបាន​តម្កល់ទុក ​ដោយ​ធនាគារកណ្តាល និង​ស្ថាប័នហិរញ្ញវត្ថុ​ផ្សេងៗ​ទៀត ដូចជា​មូលនិធិ​រូបិយវត្ថុ​អន្តរជាតិ ​(IMF)​។ នេះ​បើតាម World Economic Forum៕

​