ដោយៈ ស៊ីវ ម៉េង
ភ្នំពេញៈ ជាមួយនឹងបញ្ហាប្រឈម និងដោះស្រាយមិនចេញលើគំរោងជាប់គាំងនៅក្នុងព្រះសីហនុ លោកឧកញ៉ាបណ្ឌិតគីម ហ៊ាងបានលើកឡើងនូវដំណោះស្រាយមួយចំនួនទាក់ទងនឹងវិបត្តិនេះ។
លោកឧកញ៉ាបានមានប្រសាសន៍ ក្នុងកម្មវិធីដែលរៀបចំដោយក្រុមហ៊ុនKW Cambodia ដែលបានប្រារពធ្វើកាលពីថ្ងៃទី១៣ មករាកន្លងមកថា បញ្ហាជាប់គាំងលើគំរោង ប្រមាណ១០០០នៅក្រុងព្រះសីហនុ សួរថាអាចដោះស្រាយបានឬទេ? ចម្លើយពិតជាអាចដោះស្រាយបាន តាមរយៈយន្តការមួយចំនួន ដោយបញ្ហានេះគួរដោះស្រាយ ដោយឈរលើផលប្រយោជន៍រួមជាធំ។
លោកឧកញ៉ាបានបន្តថា ប្រសិនជាគំរោងជាប់គាំងទាំងអស់មាន១០០០គំរោង មានន័យថាមានបញ្ហាចំនួន១០០០បញ្ហា ហេតុនេះការដោះស្រាយគួរធ្វើឡើងតាមលំដាប់លំដោយ ដោយមួយឆ្នាំដោះឲ្យបាន៣០០គំរោង អញ្ចឹងរយៈពេលជាង៣ឆ្នាំអាចដោះស្រាយបញ្ចប់ហើយ។
លោកឧកញ៉ាបណ្ឌិតគីម ហ៊ាងបានបន្តថា “អ្នកដោះស្រាយ ត្រូវតែឈរលើផលប្រយោជន៍រួម និងជួបជាមួយម្ចាស់អាគារនិមួយៗ ដើម្បីដឹងបញ្ហាពិតប្រាកដ និងដោះស្រាយតាមករណីជាក់ស្តែង”។ លោកបន្ថែមថា “បញ្ហាមិនធំទេ អ្វីៗនឹងអាចដោះស្រាយបាន ប្រសិនជាដាក់មនុស្សត្រូវ និងប្រើប្រាស់យន្តការផលប្រយោជន៍រួមជាធំ”។
ក្នុងកិច្ចប្រជុំគណៈរដ្ឋមន្រ្តី ក្រោមការដឹកនាំរបស់សម្តេចតេជោហ៊ុន សែននាយករដ្ឋមន្រ្តីនៃកម្ពុជា បានអនុម័តដាក់លើសេចក្តីព្រាង “គោលនយោបាយគ្រប់គ្រង និងប្រើប្រាស់ដីធ្លី ដើម្បីអភិវឌ្ឍខេត្តព្រះសីហនុឆ្នាំ២០២២-២០៣៨។
លោកផៃ ស៊ីផាន នាំអ្នកនាំពាក្យរាជរដ្ឋាភិបាលបានឱ្យដឹងថា គោលនយោបាយគ្រប់គ្រង និងប្រើប្រាស់ដីធ្លី ដើម្បីអភិវឌ្ឍខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង សំដៅដល់ការរៀបចំ គោលនយោបាយគ្រប់គ្រងវិស័យដីធ្លី ដែលក្នុងនេះមានអនុវិស័យរដ្ឋបាលដីធ្លី អនុវិស័យរៀបចំដែនដី ការគ្រប់គ្រងនិងការអភិវឌ្ឍតំបន់ឆ្នេរសមុទ្រកម្ពុជា ក្នុងខេត្តព្រះសីហនុ អនុវិស័យបែងចែកដីធ្លីនិងលំនៅឋាន និងការគ្រប់គ្រងនិងការអភិវឌ្ឍវិស័យសំណង់ និងវិស័យពាក់ព័ន្ធដីធ្លី ផ្អែកលើមូលដ្ឋាននៃគោលនយោបាយដីធ្លី “សៀវភៅសដីធ្លី” គោលនយោបាយជាតិស្ដីពី ការរៀបចំដែនដីនៃព្រះរាជាណាចក្រកម្ពុជា និងគោលនយោបាយ នៃវិស័យពាក់ព័ន្ធដីធ្លី។
ដំណើរការរៀបចំសេចក្តីព្រាង គោលនយោបាយយរួមមាន គ.ជ.ដ.ស. មានគោលសំដៅតម្រង់ទិស និងកំណត់ការគ្រប់គ្រងដីធ្លី និងប្រើប្រាស់ដីធ្លីខេត្តព្រះសីហនុ តាមគន្លងគំរូអភិវឌ្ឍសេដ្ឋកិច្ច សង្គម ស្របតាមគោលនយោបាយ ច្បាប់ និងលិខិតបទដ្ឋានគតិយុត្តជាធរមាន។
លោកផៃ ស៊ីផានបានឱ្យដឹងទៀតថា រដ្ឋាភិបាលមានចក្ខុវិស័យរយៈពេលវែង ដែលមានវិសាលភាពរហូតដល់ឆ្នាំ២០៣៨ “អភិវឌ្ឍខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង ជាទីក្រុងបៃតងអាស៊ាននៃប៉ូលអភិវឌ្ឍជាតិទំនើបប្រកដោយចីរភាព ជវភាព សុខភាព និងសុភមង្គល តាមរយៈការជំរុញសមាហរណកម្មការអភិវឌ្ឍទីក្រុងឆ្លាត ការអភិវឌ្ឍបៃតង រមណីយដ្ឋានឆ្នេរសមុទ្រ ដែលស្អាតបំផុតលើសកលលោក មជ្ឈមណ្ឌលកំណើនជាតិ មជ្ឈមណ្ឌលហិរញ្ញវត្ថុអន្តរជាតិ ច្រកចេញចូលអន្តរជាតិ មជ្ឈមណ្ឌលភស្តុភារកម្មជាតិ ដោយមានទំនាក់ទំនងជាមួយទីផ្សារអាស៊ាន និងសកលលោក និងមជ្ឈមណ្ឌលឧស្សាហកម្ម វិទ្យាសាស្រ្ត បច្ចេកវិទ្យាទំនើប និងនវានុវត្តន៍។
គោលនយោបាយនេះ មានសុខដុមនីយកម្មជាមួយនឹងបរិស្ថានរស់នៅល្អប្រសើរ និងរក្សាបាននូវអត្តសញ្ញាណ វប្បធម៌ និងប្រវត្តិសាស្ត្រជាតិ និងមានគោលបំណងផ្ដល់ក្របខ័ណ្ឌ និងតម្រង់ទិសការគ្រប់គ្រង ការប្រើប្រាស់ដីធ្លី ការបែងចែកដីធ្លី ការអភិវឌ្ឍដែនដី និងនគរូបយកម្ម ដើម្បីអភិវឌ្ឍខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង ប្រកដោយចីរភាព ជវភាព សុខភាព និងសុភមង្គលព្រមទាំងមានភាពទាក់ទាញនិងឧត្តមភាពវានុវត្តន៍ខ្ពស់ សំដៅរួមចំណែកប្រែក្លាយកម្ពុជា ជាប្រទេសមានចំណូលមធ្យមកម្រិតខ្ពស់នៅឆ្នាំ២០២៣ និងជាប្រទេសមានចំណូលខ្ពស់នៅឆ្នាំ២០៥០ ៕
