ដោយ: សុផារី

សៀមរាបៈ ដោយទទួលបានការអភិវឌ្ឍប្រព័ន្ធហេដ្ឋារចនាសម្ព័ន្ធ និងស្ថានភាពល្អប្រសើរ នៃវិស័យទេសចរណ៍ បានជំរុញឱ្យអចលនទ្រព្យសៀមរាប ចាប់ផ្តើមមានការងើបឡើងវិញហើយ ជាពិសេសប្រភេទ ផ្ទះអាជីវកម្ម និងផ្ទះសម្រាប់ស្នាក់នៅតម្លៃមធ្យម។

លោកស៊ា សុផល ទីប្រឹក្សាជាន់ខ្ពស់នៃក្រុមហ៊ុនKW ប្រចាំខេត្តសៀ​មរាបបានមានប្រសាសន៍នៅថ្ងៃទី៦ ខែមករា ឆ្នាំ២០២៣នេះថា ចាប់ពីចុងឆ្នាំ២០២២ រហូតមកដល់ ដើមឆ្នាំ២០២៣ ចរន្តនៃការទិញលក់អចលនទ្រព្យពីរប្រភេទ ទទួលបានការគាំទ្រខ្លាំងជាងគេ រួមមាន ផ្ទះអាជីវកម្ម និងផ្ទះលំនៅឋាន។

លោកបន្តថា “ផ្ទះអាជីវកម្មហាក់មានសន្ទុះខ្លាំងជាងគេ ដែលជំរុញដោយកំណើនទេសចរជាតិ និងអន្តរជាតិ ដែលចូលមកទស្សនាខេត្តសៀម​រាប ចាប់តាំងពីពាក់កណ្តាលឆ្នាំ២០២២”។ លោកបន្ថែមថា “ចំណែក ផ្ទះលំនៅឋាន មានការស្វែងរកដីធ្លីទំហំមធ្យម ដើម្បីសាងសង់ថ្មីៗច្រើនផងដែរ”។

លោកបានបញ្ជាក់ប្រាប់ថា “ផ្ទះអាជីវកម្មមានគេស្វែងរកច្រើន។ ភាគច្រើនជាអតិថិជន ដែលមានថវិកាច្រើន មិនសូវទទួលផលប៉ះពាល់ខ្លាំងពីកូវីដ១៩ គេរកមើលតំបន់ទាំងឡាយណា នៅជាប់នឹងផ្លូវជាតិ ផ្លូវធំៗ ដើម្បីពង្រីកអាជីវកម្ម របស់គេ”។

ជាមួយគ្នានេះ លោក បាន ធារ៉ា ប្រធានផ្នែកលក់នៃក្រុមហ៊ុនអចលនទ្រព្យ SR Property បានមានប្រសាសន៍ឲ្យដឹងនៅដដែលថា លោកសង្គេតឃើញថា សកម្មភាពទិញ លក់ ជួល អចលនទ្រព្យគ្រប់ប្រភេទនៅក្នុងខេត្តសៀមរាប នាពេលប៉ុន្មានខែចុងក្រោយនេះ មានកំណើនល្អប្រសើរច្រើនជាងពេលមុនៗ។

លោកអះអាងថា “សន្ទុះល្អប្រសើរនេះ ចំពោះអចលនទ្រព្យនេះ ជំរុញដោយកំណើនទេសចរ និងការអភិវឌ្ឍហេដ្ឋារចនាសម្ព័ន្ធផ្លូវថ្នល់ នៅក្នុងខេត្ត”៕

ដោយ: គង់ លាងហួរ

បាងកក: អាជ្ញាធរ​អចលនទ្រព្យឧស្សាហកម្ម​នៃ​ប្រទេស​ថៃ (IEAT) កំពុង​ប្រើប្រាស់​យុទ្ធសាស្ត្រ​ទីផ្សារ ​នៅ​ក្នុង​តំបន់​ឧស្សាហកម្ម​អចលនទ្រព្យចំនួន​៤របស់​ខ្លួន ដើម្បី​ទាក់ទាញ​វិនិយោគិនថៃ និង​បរទេស​ឱ្យ​កាន់​តែ​ច្រើន។

កញ្ចប់ថ្មីនេះផ្តល់ការបញ្ចុះតម្លៃលើការលក់ដីឧស្សាហកម្ម និងការលើកលែងលើការជួលដី និងថ្លៃសេវា សម្រាប់ការប្រើប្រាស់គ្រឿងបរិក្ខារនៅលើអចលនទ្រព្យ សម្រាប់រយៈពេលជាក់លាក់មួយត្រូវបានដាក់ឱ្យដំណើរការ ក្នុងកិច្ចខិតខំប្រឹងប្រែង ដើម្បីទាក់ទាញការវិនិយោគបន្ថែមទៀត។

លោក Veeris Ammarapala អភិបាលនៃ IEAT បានមានប្រសាសន៍ថា “យើងរំពឹងថាកញ្ចប់ទាំងនេះនឹងជួយដល់វិនិយោគិន ក្នុងការធ្វើការសម្រេចចិត្តរបស់ពួកគេឱ្យកាន់តែងាយស្រួល ដើម្បីវិនិយោគនៅក្នុងប្រទេសថៃ”។ កញ្ចប់នេះមានសុពលភាពតាំងពីថ្ងៃទី១ ខែតុលា ឆ្នាំ២០២២ ហើយផុតកំណត់នៅថ្ងៃទី៣០ ខែកញ្ញា ឆ្នាំ២០២៣។

អចលនទ្រព្យឧស្សាហកម្មទាំង៤នោះ រួមមាន ឧស្សាហកម្មភូមិភាគខាងត្បូង និងតំបន់ឧស្សាហកម្មសុងក្លា ដែលតំបន់ទាំង២មានទីតាំងនៅភាគខាងត្បូងនៃខេត្តសុងក្លា ក៏ដូចជា ឧស្សាហកម្មស្រះកែវនៅភាគខាងកើត និងតំបន់ឧស្សាហកម្មភីឈីតនៅភាគខាងជើង។

លោក Veeris បានបន្តថា វិនិយោគិនថ្មី ដែលមានបំណងទិញដីឧស្សាហកម្មនៅក្នុងតំបន់ឧស្សាហកម្មភាគខាងត្បូង នឹងទទួលបានការបញ្ចុះតម្លៃពី១៥ ទៅ២០ភាគរយ។ ថ្លៃសេវាសម្រាប់ការប្រើប្រាស់គ្រឿងបរិក្ខារត្រូវបានលើកលែង សម្រាប់រយៈពេលមួយឆ្នាំ។

ក្រុមហ៊ុនផលិតដែលមានស្រាប់ និងបានជួលដីនៅតំបន់ឧស្សាហកម្មភាគខាងត្បូងក៏នឹងត្រូវបានលើកលែងផងដែរ លើការជួលដីសម្រាប់រយៈពេល២ឆ្នាំ និងសម្ភារៈប្រើប្រាស់៕

ដោយ៖ សុផារី

ស្ទឹងត្រែង៖ ដើមឆ្នាំ២០២៣ ចរន្តទិញលក់នៅខេត្តភាគខាងកើតចំនួនពីរ រួមមាន ខេត្តស្ទឹងត្រែង និងខេត្តកំពង់ចាម ចាប់ផ្តើមងើបឡើងវិញបណ្ដើរៗវិញ ស្របពេលមានការអភិវឌ្ឍប្រព័ន្ធហេដ្ឋារចនាសម្ព័ន្ធផ្លូវថ្នល់ ដែលជំរុញការទិញលក់អចលនទ្រព្យក្នុងតំបន់។ អ្នកជំនាញបង្ហាញក្តីរំពឹងថា ទីផ្សារនៅក្នុងឆ្នាំ២០២៣នឹងមានសញ្ញាវិជ្ជមានបន្ថែមទៀត។

លោក ជុំ វិចិត្រ ប្រធានសាខានៃក្រុមហ៊ុនអចលនទ្រព្យ Century 21 Zillion Holding ប្រចាំខេត្តស្ទឹងត្រែង បានមានប្រសាសន៍នៅថ្ងៃទី០៦ ខែមករា ឆ្នាំ២០២៣នេះថា “ការលក់អចលនទ្រព្យ ទិញលក់ដីធ្លីតម្លៃសមរម្យ មានចរន្តទិញលក់ងើបឡើងវិញខ្លះ។ ចំណែក តម្លៃដីធ្លីមានការកើនឡើងបន្តិចបន្តួច ប្រហែលជា១០ភាគរយ តំបន់ខ្លះនៅទ្រឹង”។

លោកបានបង្ហាញក្តីសង្ឃឹមចំពោះកំណើននិងការផ្លាស់ប្តូរនៃទីផ្សារអចលនទ្រព្យនៅក្នុងខេត្តស្ទឹងត្រែង នៅក្នុងឆ្នាំ២០២៣ ខណៈបច្ចុប្បន្ននេះសញ្ញាវិជ្ជមានចាប់ផ្តើមងើបឡើងបន្តិចម្តងៗហើយ ក្រោយប៉ះពាល់ខ្លាំងនាពេលកន្លងមក។

បើក្រលេកមើលខេត្តកំពង់ចាម ដែលទើបទទួលបានការយកចិត្តទុកដាក់លើហេដ្ឋារចនាសម្ព័ន្ធនានា គឺគម្រោងលើកកម្ពស់ និងធ្វើឱ្យប្រសើរឡើងផ្លូវជាតិលេខ៧ បានកំពុងបង្កើនភាពទាក់ទាញចំពោះតំបន់មួយចំនួននៅតាមបណ្តោយផ្លូវជាតិមួយនេះ។

លោកស្រី ក្រី ម៉ាយ៉ាន ប្រធានសាខានៃក្រុមហ៊ុនអចលនទ្រព្យ KW Cambodia បានមានប្រសាសន៍នៅថ្ងៃទី០៦ ខែមករា ឆ្នាំ២០២៣នេះថា បច្ចុប្បន្ននេះ គម្រោងប្រភេទតម្លៃសមរម្យទទួលបានការគាំទ្រខ្លាំង ពីសំណាក់អ្នកមានថវិកា និងស្វែងរកការវិនិយោគ នៅក្នុងខេត្តកំពង់ចាម ជាពិសេសក្នុងឃុំល្វា មកដល់ស្គន់។

លោកស្រីបញ្ជាក់ថា ដោយសារសក្តានុពលផ្លូវថ្នល់ និងការអភិវឌ្ឍបានជំរុញឱ្យមានគម្រោងវិនិយោគធំច្រើនចូលមកបោះទុន រួមមាន សកម្មភាពពាណិជ្ជកម្ម រោងចក្រ សហគ្រាស ។ល។

លោកស្រីបញ្ជាក់ថា “មានរោងចក្រមួយចំនួនធំ និងគម្រោងនានាបានចូលមក ធ្វើឲ្យមានចរន្តទិញលក់ និងអភិវឌ្ឍន៍បន្ថែមទៀតនៅក្នុងរយៈពេលប៉ុន្មានខែចុងក្រោយនេះ”។

រដ្ឋបាលខេត្តនីមួយៗ ក៏បានចាប់ផ្តើមជុសជុល និងកសាងហេដ្ឋារចនាសម្ព័ន្ធរូបវន្តសាធារណៈនានា ដើម្បីជំរុញការអភិវឌ្ឍ និងសម្រស់ខេត្ត ដើម្បីទាក់ទងការវិនិយោគពីសំណាក់អ្នកវិនិយោគពីគ្រប់ទិសទី៕

ដោយ៖ សហការី

ភ្នំពេញ៖ ផ្លូវល្បឿនលឿនភ្នំពេញ-បាវិត នឹងត្រូវសង់ស្ពានឆ្លងកាត់ទន្លេមេគង្គមួយដែលមានតម្លៃជាង២០០លានដុល្លារ ដែលត្រូវប្រើប្រាស់ថវិកាជាតិក្នុងការសាងសង់ ដែលអាចឱ្យប្រជាពលរដ្ឋធ្វើដំណើរឆ្លងកាត់ដោយគ្មានការបង់ប្រាក់​។

លោកទេសរដ្ឋមន្ត្រី ស៊ុន ចាន់ថុល រដ្ឋមន្រ្ដីក្រសួងសាធារណការ និងដឹកជញ្ជូនបានមាន ប្រសាសន៍ថា ផ្លូវល្បឿនលឿនភ្នំពេញ-បាវិត នឹងត្រូវសាងសង់ស្ពានមួយកន្លែងនៅតំបន់ឃុំដីឥដ្ឋ ស្រុកកៀនស្វាយ ឆ្លងកាត់ទន្លេមេគង្គ ឆ្ពោះទៅតំបន់ល្វាឯម ខេត្ដកណ្ដាល ដែលក្បែរនឹងផ្លូវក្រវាត់ក្រុងទី៣ផងដែរ។

លោកបានបន្តថា នៅពេលស្ពាននេះសាងសង់រួចរាល់ គឺការធ្វើដំណើរមិនតម្រូវឱ្យមានការបង់ប្រាក់ទេ។ បន្ថែមពីនោះទៀត វាផ្តល់ភាពងាយស្រួល ក្នុងការដឹក ជញ្ជូនទំនិញ និងការធ្វើដំណើររបស់ប្រជាពលរដ្ឋ។

លោកបានមានប្រសាសន៍ថា  “ផ្លូវល្បឿនលឿនភ្នំពេញ-បាវិត អ៊ីចឹងត្រូវសង់ស្ពានមួយនៅដីឥដ្ឋ ឆ្លងទៅល្វាឯមមួយទៀតឆ្លងកាត់ទន្លេមេគង្គ។ ស្ពាននេះវែងណាស់ស្ពាន ប្រវែង២ពាន់ម៉ែត្រជាង។ ពេលយើងសាងសង់ផ្លូវល្បឿនលឿនភ្នំពេញទៅបាវិត យើងត្រូវតែមានស្ពានហ្នឹងដែរ ដោយប្រើថវិកាជាតិយើងតែម្ដង”។

លោករដ្ឋមន្ត្រីឱ្យដឹងទៀតថា “ផ្លូវល្បឿនលឿនជាថវិកាផ្នែកឯកជន ប្រហែល១៤០០លានដុល្លារ ស្ពានប្រហែល២០០លានដុល្លារ ដែលសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ចង់ឱ្យប្រជាពលរដ្ឋឆ្លងកាត់ស្ពានទន្លេមេគង្គហ្នឹង ភ្ជាប់ជាមួយខ្សែក្រវាត់ក្រុងទី៣ដោយមិនគិតថ្លៃ ប៉ុន្តែចង់ជិះផ្លូវល្បឿនលឿនត្រូវបង់កម្រៃឱ្យគេ ឬជិះផ្លូវលេខ១ក៏បានដែរ”។

រាជរដ្ឋាភិបាល កាលពីពេលថ្មីៗ បានប្រកាសថា នឹងបញ្ចេញថវិកាជាតិប្រមាណជាង២០០លានដុល្លារអាមេរិក ដើម្បីសាងសង់ស្ពានឆ្លងកាត់ទន្លេមេគង្គពីផ្លូវជាតិលេខ១ ទៅកាន់តំបន់ល្វាឯម ដើម្បីតភ្ជាប់ជាមួយផ្លូវល្បឿនលឿនភ្នំពេញ-បាវិត ដែលគ្រោងដំណើរការសាងសង់នៅពាក់កណ្ដាលឆ្នាំ២០២៣ខាងមុខនេះ។

ផ្លូវល្បឿនលឿនភ្នំពេញ-បាវិត អាចនឹងត្រូវបើកការដ្ឋានសាងសង់ពាក់កណ្តាលឆ្នាំ២០២៣ខាងមុខ។ ផ្លូវល្បឿនលឿនភ្នំពេញ-បាវិត គឺជាគម្រោងផ្លូវល្បឿនលឿនទី២ហើយក្នុងប្រទេសកម្ពុជាបន្ទាប់ផ្លូវល្បឿនលឿនភ្នំពេញក្រុងព្រះសីហនុ ខណៈផ្លូវនេះគឺជាផ្លូវថ្មីទាំងស្រុង ដែលមានប្រវែង សរុបប្រហែល១៣៥គីឡូម៉ែត្រ ហើយដែលត្រូវសាងសង់ជា ០៤គន្លង តួផ្លូវមានទទឹង២៥,៥ម៉ែត្រ។ ផ្លូវមួយខ្សែនេះនឹងចាប់ផ្ដើមចេញពីភ្នំពេញនៅចំណុចផ្លូវក្រវាត់ក្រុងទី៣ កាត់តាមខេត្ត កណ្តាល ខេត្តព្រៃវែង និងខេត្តស្វាយរៀង ឆ្ពោះទៅក្រុងបាវិត ព្រំដែនកម្ពុជា-វៀតណាមតែម្ដង៕