ដោយ: គង់ លាងហួរ

ហុងកុង: ទំហំនៃការលក់ផ្ទះក្នុងប្រទេសចិននឹងធ្លាក់ចុះ ក្នុងរយៈពេល២ឆ្នាំជាប់ៗគ្នា ក្នុងឆ្នាំ២០២៣ ប៉ុន្តែល្បឿននៃការធ្លាក់ចុះនឹងធូរស្រាល ដោយសារវិធានការគាំទ្ររបស់រដ្ឋ និងការលុបចោលនយោបាយកូវីដសូន្យរបស់រដ្ឋាភិបាល។

ការលក់អចលនទ្រព្យត្រូវបានគេរំពឹងថា នឹងធ្លាក់ចុះជាមធ្យម៨ភាគរយ នៅឆ្នាំ២០២៣នេះ ធៀបទៅនឹងការធ្លាក់ចុះប្រហែល២៥ភាគរយ ក្នុងឆ្នាំ២០២២ ដោយសារ សកម្មភាពសេដ្ឋកិច្ច ប្រាក់ចំណូលគ្រួសារ និងទំនុកចិត្តរបស់អ្នកប្រើប្រាស់ ត្រូវបានគេមើលឃើញថា មានការងើបឡើងវិញ។

ក្រុមសេដ្ឋវិទូ និងអ្នកវិភាគ ជឿជាក់ថា ក្រុមអ្នកបង្កើតគោលនយោបាយនឹងដាក់ចេញវិធានការគាំទ្របន្ថែមទៀត ដើម្បីជំរុញតម្រូវការផ្ទះ នៅឆ្នាំ២០២៣នេះ ដែលជាផ្នែកមួយនៃគោលដៅរួមរបស់ទីក្រុងប៉េកាំង ដើម្បីជំរុញសេដ្ឋកិច្ចទំហំ១៧ពាន់ពាន់លានដុល្លារអាមេរិក បន្ទាប់ពីបានធ្លាក់ចុះយ៉ាងខ្លាំងក្នុងឆ្នាំ២០២២។

គោលនយោបាយទាំងនោះអាច រួមមាន ការបញ្ចុះអត្រាការប្រាក់កម្ចីទិញផ្ទះបន្ថែមទៀត និងតម្រូវការបង់ប្រាក់កក់ ក៏ដូចជាការបន្ធូរបន្ថយ ការរឹតបន្តឹងការទិញផ្ទះ នៅក្នុងបណ្តាទីក្រុងលំដាប់កំពូលរបស់ប្រទេសចិន។

ក្តីសង្ឃឹមនៃការកើនឡើងសេដ្ឋកិច្ច នៅឆ្នាំ២០២៣នេះ ត្រូវបានជំរុញដោយការលុបចោលគោលនយោបាយសូន្យកូវីដ របស់រដ្ឋាភិបាល ដែលបានអូសទាញកំណើន GDP របស់ប្រទេសចិនឱ្យធ្លាក់ចុះមកត្រឹម៣ភាគរយ កាលពីឆ្នាំ២០២២។

ទោះបីជាយ៉ាងនេះក្តី ការលុបចោលគោលនយោបាយនេះ បានបង្កឱ្យមានរលកនៃការឆ្លងជំងឺកូវីដ-១៩ ដែលត្រូវបានគេរំពឹងថា នឹងបង្កឱ្យមានការរំខានផ្នែកសេដ្ឋកិច្ចបន្ថែមទៀត និងធ្វើឱ្យពលរដ្ឋចិនរងផលប៉ះពាល់យ៉ាងហោចណាស់ពីរបីខែទៀត៕

ដោយ៖ សហការី

ភ្នំពេញ៖ ក្រុមហ៊ុន ប៉េង ហួត គ្រុប កាលពីថ្ងៃទី២៧ ខែធ្នូ ឆ្នាំ២០២២ បានឧបត្ថម្ភថវិកា ៥ម៉ឺន ដុល្លារអាមេរិក ដល់សមាគមគ្រូពេទ្យស្ម័គ្រចិត្ត យុវជនសម្តេចតេជោ (TYDA) ដើម្បីរួមចំណែកជាមួយ TYDA ក្នុងសកម្មភាពមនុស្សធម៌ ជាពិសេស គឺសម្រាប់ការពិនិត្យ និងព្យាបាលជំងឺដោយឥតគិតថ្លៃ ជូនប្រជាពលរដ្ឋក្រីក្រទូទាំងព្រះរាជាណាចក្រកម្ពុជា។​ ​

លោក ចាន់ រដ្ឋា នាយករងផ្នែកកិច្ចការសាធារណៈរបស់ក្រុមហ៊ុន ប៉េង ហួត គ្រុប បានមានប្រសាសន៍ថា “ក្រុមហ៊ុន ប៉េង ហួត គ្រុប មានមោទនភាពយ៉ាងក្រៃលែង ក្នុងការរួមចំណែកបេសកកម្មមនុស្សធម៌ជាមួយសមាគមគ្រូពេទ្យស្ម័គ្រចិត្ត យុវជនសម្តេចតេជោ ក្នុងការព្យាបាលជំងឺជូនប្រជាពលរដ្ឋដោយឥតគិតថ្លៃនៅទូទាំងប្រទេស ជាពិសេសក្នុងបរិបថដែលប្រទេសកម្ពុជា ក៏ដូចជាពិភពលោកបាននឹងកំពុងតែប្រឈមជាមួយការឆ្លងរាលដាលនៃជំងឺកូវីដ-១៩។ ក្រុមហ៊ុនបានយល់ច្បាស់ ពីតម្រូវការដ៏ចាំបាច់ផ្នែកសេវាសុខាភិបាល របស់ប្រជាពលរដ្ឋ។ ហើយក្រុមហ៊ុនជឿជាក់ថា ការរួមចំណែកនេះ អាចជួយលើកកម្ពស់សុខុមាលភាពសង្គម ក៏ដូចជាជួយអភិវឌ្ឍវិស័យសុខាភិបាលនៅកម្ពុជា ឱ្យកាន់តែប្រសើរឡើងទៀតផងដែរ”។​ ​​​​​

លោកបានបន្តទៀតថា “ការចែករំលែក និងការជួយគ្នាក្នុងគ្រាលំបាក គឺជាគុណតម្លៃរបស់ក្រុមហ៊ុន និងទឹកចិត្តដ៏ប្រពៃរបស់ថ្នាក់ដឹកនាំក្នុងការចូលរួមជាមួយរាជរដ្ឋាភិបាល តាំងពីក្រុមហ៊ុនចាប់ផ្តើមដំបូង និងរីកចម្រើនរហូតមកដល់ពេលនេះ ហើយក៏នឹងបន្តនៅពេលខាងមុខទៀតផងដែរ ហើយការចែករំលែកគឺជាគំរូដ៏ល្អមួយនៃវប្បធម៌សាមគ្គី និងចែករំលែកចេះជួយគ្នាក្នុងគ្រាលំបាក”។​​

កាលពីឆ្នាំ ២០២០-២០២១ និង ២០២២ កន្លងទៅ  ក្រុមហ៊ុន  ប៉េង  ហួត  គ្រុប បានបរិច្ចាគថវិកាជាង ១៥លាន ដុល្លារអាមេរិក ទៅក្នុងកិច្ចការងារសង្គម។ តួយ៉ាង វិស័យសុខាភិបាល ក្រុមហ៊ុនបានឧត្ថម្ភថវិកាដល់រាជរដ្ឋាភិបាលដើម្បីទិញថ្នាំវ៉ាក់សាំង កូវីដ-១៩ ​និងការផ្ដល់ជាទីកន្លែង សម្រាប់ចាក់វ៉ាក់សាំងដល់ប្រជាពលរដ្ឋរាប់ពាន់នាក់ ទិញស្បៀងអាហារចែកជូនដល់ប្រជាពលរដ្ឋ ដែលកំពុងត្រូវការស្បៀងជាចាំបាច់ ក៏ដូចជាបងប្អូនកម្មករជាង ៧០០០នាក់ ដើម្បីជួយសម្រួលដល់ជីវភាពប្រចាំថ្ងៃរបស់បងប្អូនកម្មករគ្រប់ការដ្ឋានរបស់ក្រុមហ៊ុន ក្នុងតំបន់នានាក្នុងភូមិសាស្រ្ដរាជធានីភ្នំពេញ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។

ប៉េង ហួត គ្រុប បានកំណត់អាទិភាពការងារសង្គមរបស់ក្រុមហ៊ុន ដែលមានសសរស្ដម្ភធំ ៣ ហើយក៏ស្របទៅនឹងគោលការណ៍របស់អង្គការសហប្រជាជាតិ ពោលគឺ “ការងារបរិស្ថាន អប់រំ និង សង្គម”។ កន្លងមកតាមរយៈការងារសង្គម ក្នុងវិស័យសុខាភិបាល ដែលក្រុមហ៊ុនបានធ្វើរួមមាន ការចូលរួមបរិច្ចាគថវិកាជារៀងរាល់ឆ្នាំជូនកាកបាទក្រហមកម្ពុជា មន្ទីរពេទ្យគន្ធបុប្ផា មន្ទីរពេទ្យកុមារអង្គរ និងសមាគមគ្រូពេទ្យស្ម័គ្រចិត្ត យុវជនសម្តេចតេជោ ព្រមទាំងរៀបចំកម្មវិធីស្ម័គ្រចិត្តបរិច្ចាគឈាម ដល់មជ្ឈមណ្ឌលជាតិផ្តល់ឈាម។ល៕ ​​

ដោយៈ ស៊ីវ ម៉េង

       ភ្នំពេញៈ មានមេរៀននិងឯកសារជាច្រើនបានចងក្រងទុក ដោយអ្នកជំនាញអចលនទ្រព្យអន្តរជាតិ ដែលបង្ហាញពីចំណុចមួយចំនួន ដែលអ្នកចង់វិនិយោគលើវិស័យអចលនទ្រព្យគួរអនុវត្តន៍ ដើម្បីទទួលបានជោគជ័យ។

       នៅក្នុងឧស្សាហកម្មដែលមានលំហូរសាច់ប្រាក់ និងឱកាសចំណេញប្រាក់ដ៏ច្រើននេះ អ្នកជំនាញនានាបានលើកឡើងពីចំណុចសំខាន់ៗចំនួន៦ ដើម្បីក្លាយជាអ្នកជោគជ័យក្នុងវិស័យនេះ។ ចំណុចទាំងនោះមានដូចជា

១.រៀនសិនមុនចាប់ផ្ដើមកម្មវិធីនិយោគ

កុំធ្វើអ្វីមួយដែលគ្មានចំណេះដឹង វាប្រឈមមុខនឹងការខាតបង់ ហើយពិបាកនឹងស្តារឡើងវិញណាស់ ដូចនេះបងប្អូនទៅរៀនសូត្រសិនមុនចាប់ផ្ដើមវា។ ការរៀន និងបន្តអភិវឌ្ឍន៍ ចំណេះដឹងគ្មានទីបញ្ចប់រៀនផង អនុវត្តន៍ផង ដើម្បីក្លាយជាអ្នកជំនាញទើបរីកចម្រើន និងមានឱកាសទទួលបានប្រាក់ចំណេញជាអតិបរមា។

២ គោលបំណងជាក់លាក់ ដើម្បីទទួលបានផលចំណេញជាអតិបរមា

ត្រូវមានគោលបំណងជាក់លាក់ ដើម្បីអោយការវិនិយោគនេះ ទទួលបានប្រាក់ចំណេញច្រើន តាមតែអាចធ្វើទៅបាន។ មិនមែនវិនិយោគ ព្រោះតែចង់មានដី ឬផ្ទះលំហែ សម្រាប់ថ្ងៃចុងសប្តាហ៍ ឬថ្ងៃឈប់សម្រាកឲ្យតែមានអចលនទ្រព្យនឹងគេដែរនោះទេ។

នៅពេលដែលយើងមានគោលបំណងត្រឹមតែលំហែរ ឬជាចំការ ប្រាកដណាស់អចលនទ្រព្យ ដែលយើងទិញ មិនមានការទទួលបានប្រាក់ចំណេញខ្ពស់នោះទេ។ ការដឹងពីព័ត៌មានច្បាស់លាស់ វិភាគចំនេញ ខាត ដោយប្រើខួរក្បាល រឺប្រើតួរលេខ មិនប្រើអារម្មណ៍ ឬប្រើបេះដូងដើម្បីទិញនោះ ប្រាកដណាស់យើងនឹងទទួលបានផលចំណេញខ្ពស់។

៣. ជ្រើសរើសតំបន់ ឬគម្រោងដែលមានសក្កានុពលខ្ពស់

ជាអ្នកវិនិយោគ ក៏មិនខុសពីភ្នាក់ងារអចលនវត្ថុដែរ នៅពេលចាប់ផ្ដើម ត្រូវផ្តោតតំបន់ណាមួយ អោយច្បាស់ហើយ ចងបណ្ដាញនៅតំបន់នោះ ប្រើយុទ្ធសាស្ត្រផ្ការីក។ ចង់បានអចលនទ្រព្យល្អ តម្លៃក្រោមទីផ្សារ មិនមានយើងមានលុយ ហើយចុះទៅទិញដូចទិញត្រី ឬបន្លែពីផ្សារមកទេ គឺត្រូវអត់ធ្មត់រង់ចាំទើបឍឱកាសល្អនឹងមកដល់។

ម្យ៉ាងទៀតដោយសារកត្តាធនធាន និងពេលវេលាមានកំណត់ ដូចនេះហើយអ្នកវិនិយោគត្រូវតែផ្តោត តាមតំបន់សក្តានុពលដែល យើងបានកំណត់។

៤.ចងបណ្តាញ

ចងក្រងបណ្ដាញក្នុងតំបន់គោលដៅ របស់យើងដើម្បីទទួលបានព័ត៌មានគ្រប់ជ្រុងជ្រោយ ដូចជា ជាមួយនឹងអាជ្ញាធរមូលដ្ឋាន អ្នករកស៊ីក្នុងវិស័យអចលនទ្រព្យ ភ្នាក់ងារអចលនវត្ថុជំនាញ រឺអ្នកគួកជេរដែលអាចជឿទុកចិត្តបាន ដើម្បីដឹងពីគម្រោងអភិវឌ្ឍន៍នានា និងអចលនទ្រព្យ ដែលដាក់លក់បន្ទាន់ រឺអចលនទ្រព្យនៅទីតាំងល្អៗ។

៥. មានផែនការរយៈពេលវែងនិងផែនការហិរញ្ញវត្ថុ

សម្រាប់អ្នកវិនិយោគផ្ទះ ត្រូវការពេលវេលាពី២ទៅ ៣ឆ្នាំ។ រីឯដីធ្លី ត្រូវការរយៈពេលវែងចាប់ពី៥ឆ្នាំឡើង រហូតដល់១០ទៅ១៥ឆ្នាំ ឬលើសនេះទៀតក៏មាន។ ដូចនេះត្រូវមានផែនការហិរញ្ញវត្ថុ ឲ្យសមស្របនឹងពេលវេលា ដែលយើងបានកំណត់នោះដែរ។

ប្រសិនបើគ្មានផែនការជាក់លាក់ គ្មានផែនការហិរញ្ញវត្ថុសម្រាប់រយៈពេលវែង ប្រាកដជាត្រូវបង្ខំចិត្តលក់វិញ ជាមួយនឹងតម្លៃដើម ឬចំណេញតិចតួច នៅពេលខ្លះលក់ខាតផងក៏មានដែរ។

៦. ដឹងពីពេលវេលាត្រូវទិញ និងពេលវេលាចាកចេញ

ទិញនៅពេលទីផ្សារស្ងាត់ ហើយលក់វិញនៅពេលទីផ្សារឈូឆរ រឺដល់ចំណុចខ្ពស់។ ជាធម្មតាសម្រាប់អ្នកជួញដូរអចលនទ្រព្យ គឺពួកគាត់ទៅទិញនៅពេលដែលគេផ្អើលហើយប៉ុណ្ណោះ ព្រោះតែគាត់គ្មានបណ្ដាញ រឺប្រភពព័ត៌មាន។

បន្ថែមលើផែនការរយៈពេលវែងខាងលើ យើងត្រូវដឹងពីទីផ្សារតំបន់និងដល់ចំណុចកំពូលហើយពេលណា ត្រូវចាកចេញពេលណា អ្នកខ្លះមិនព្រមលក់ទេ ទោះជាទីផ្សារជិតដល់កំពូល រឺដល់កំពូលហើយ ដែលវាដល់ពេលនឹងឡើងយឺត ឬចិត្តដល់ពេលធ្លាក់ចុះមកវិញហើយ។

សូមប្រុងប្រយ័ត្នទីផ្សារនៅស្រុកយើង ពិបាកនឹងទុកចិត្តណាស់ នៅពេលដែលអាចជាយុទ្ធសាស្ត្រ ដែលអ្នកមានដីធំៗប្រើសំរាប់លក់ដីគេចេញវិញក៏មានដែរហើយ យើងទិញគឺមានតម្លៃថ្លៃបាត់ទៅហើយ បន្ទាប់ពីផ្អើលហើយ ទីផ្សារអាចនឹងចាប់ផ្ដើមស្ងាត់វិញក៏មាន៕

  ដោយៈ គង់ សូរិយា

       ភ្នំពេញៈ បំណុលមិនមែនអាក្រក់នោះទេ គឺមានបំណុលល្អផងដែរ ប៉ុន្តែនៅទីនេះយើងនិយាយពីការប្រើប្រាស់បំណុល ដើម្បីទាញយកផលប្រ​យោជន៍ពីវិស័យអចលនទ្រព្យ។

អគ្គនាយកក្រុមហ៊ុនCentury21 Mekong និងជាអតីតប្រធានសមា​គមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបាន​មានប្រសាសន៍ឲ្យដឹងកាលពីពេលថ្មីៗនេះថា ជាទូទៅនៅក្នុងពិភពលោក តែងតែមានបំណុ​ល ដែលបំណុលទាំងនេះ មានលក្ខណៈជាគ្រួសារ សហគមន៍ ឯកជន ក្រុមហ៊ុន និងប្រទេសជាតិ  ហើយនៅពេលដែលប្រើប្រាស់បំណុលទាំងនេះ មានប្រសិទ្ធិភាពនោះ នឹងជំរុញឱ្យជីវភាព នៅក្នុងស្ថានភាពសេដ្ឋកិច្ចគ្រួសារ សហគន៍ ប្រទេស និង ក្រុមហ៊ុន មានការរីកចំរើន។

លោកពន្យល់ថា “បំណុលគឺជាការប្រើប្រាស់ធនធានអ្នកដទៃ តាមរយៈការប្រើប្រា​ស់ជាថវិកាឬជាទ្រព្យសម្បត្តិ និងអ្វីផ្សេងៗទៀតសម្រាប់ធ្វើការការដោះដូរ និងជាប្រយោ​ជន៍ក្នុងការវិស័យជំនួញឱ្យមានប្រសិទ្ធិភាព”។

លោកបន្តថា នៅក្នុងការវិនិយោគលើវិស័យអចលនទ្រព្យ អ្នកវិនិយោ​គអាចស្វែងរកបំណុល តាមរយៈធនាគារដែលជាស្ថាប័នឯករាជ្យ ក្នុងការផ្តល់ប្រាក់កម្ចីដល់អតិថិជនទូទៅ ក្នុងការទិញលំនៅឋានសម្រាប់ស្នាក់នៅ ឬទិញលំនៅឋានសម្រាប់ធ្វើការវិនិយោគ​បន្ត ។

លោកច្រឹក សុខនីមបានពន្យល់ថា មុនដំបូងយើងត្រូវធ្វើការសិក្សានូវគុណតម្លៃ នៃវិស័យអចលនទ្រព្យដែលយើងត្រូវវិនិយោគ តើជាប្រភេទអចលនទ្រព្យបែបណា ។ ឧទាហរណ៍ បើយើងវិនិយោគលើលំនៅឋាន ដូចជាផ្ទះ ឬខុនដូ ឬមួយជាគម្រោងដែលកំពុងសាងសង់ សម្រាប់ទុកវិនិយោគបន្ត ឬសម្រាប់ជួលជាដើមនោះ យើងត្រូវសិក្សាពីចំណូល និងកំណើនតម្លៃអចលនទ្រព្យនៅពេលខាងមុខ ដោយធៀបជាមួយនឹងបំណុល។

លោកបន្ថែមទៀតថា នៅពេលដែល យើងមានគម្រោងដាក់ទុនវិនិយោគ លើវិស័យអចលនទ្រព្យប្រកបដោយចីរភាព យើងត្រូវវិភាគអំពីឱកាសនៅក្នុងការវិនិយោគ រួមផ្សំជាមួយនឹងការសងត្រឡប់ បូកជាមួយប្រាក់បំរ៉ុងទុក។ បើយើងមានធនធានទាំងអស់នេះ បំណុលនៅក្នុងវិស័យអច​លនទ្រព្យ គឺទុន និងជាលទ្ធភាពល្អបំផុត ពីព្រោះ នៅពេលដែលយើងប្រើប្រាស់បំណុល ធ្វើឱ្យយើងចំណេញពេលវេលា និងអាចធ្វើឱ្យជីវភាពដើរលឿនជាអ្នកដែលមិនប្រើប្រាស់បំណុល។

លោកច្រឹក សុខនីមបានបញ្ជាក់ថា “ដូច្នេះនៅពេលដែលយើងប្រើប្រាស់បំណុលបានត្រឹមត្រូវ ហើយ ស្ទង់មើលនូវឥទ្ធិពល នៅក្នុងកម្រិតដែលជាវិជ្ជមាន គឺជាហេតុផលចម្បងដែលធ្វើឱ្យសេដ្ឋកិច្ចក្រុមគ្រួសារ មានការរីកចំរើន”។ លោកបន្ថែមថា “ការប្រើប្រាស់បំណុល ជាទ្រព្យសម្បត្តិ នឹងទទួលបាននូវគុណតម្លៃពីការវិនិយោគ”។

លោកបន្ថែមថា ជាមួយគ្នានេះដើម្បីទទួលបាននូវព័ត៌មានជុំវិញ ការប្រើប្រាស់បំណុ លើការវនិយោគវិស័យអចលចនទ្រព្យ លោកអ្នកអាចប្រឹក្សាយោបល់ជាមួយភ្នាក់​ងារអចលនវត្ថុ ឬ ក៏មន្ត្រីធនាគារ៕

ដោយៈ សុខុម

រីយ៉ាដៈ ទីក្រុងឌូបៃ នៃប្រទេសអារ៉ាប់រួមអេមីរ៉ាត បានដាក់ចេញនូវផែនការសេដ្ឋកិច្ច៨,៧ពាន់លានដុល្លារ កាលពីថ្ងៃពុធ ទី៤ ខែមករា ជាមួយនឹងគោលដៅជំរុញពាណិជ្ជកម្ម និងការវិនិយោគនៅទសវត្សរ៍ក្រោយ ខណៈក្រុងនេះ មានមហិច្ឆតាពង្រីកទំហំសេដ្ឋកិច្ចរបស់ខ្លួនទ្វេដង។

ផែនការសេដ្ឋកិច្ចថ្មីដែលមានឈ្មោះថា “D33” នេះរួមបញ្ចូលទាំងគម្រោងផ្លាស់ប្តូរ រហូតដល់ទៅ១០០គម្រោងនៅក្រុងឌូបៃផងដែរ ខណៈរដ្ឋាភិបាលចង់ធ្វើឱ្យឌូបៃ ជាប់ឈ្មោះក្នុងចំណោមទីក្រុង សេដ្ឋកិច្ចកំពូលទាំង៣ក្នុងពិភពលោក។ នេះបើយោងតាមសារព័ត៌មាន Arab News ចុះផ្សាយកាលពីថ្ងៃព្រហស្បតិ៍ ទី៥ ខែមករា។

លោក Sheikh Mohammed bin Rashid Al-Maktoum ដែលជាអនុប្រធានាធិបតី និងជានាយករដ្ឋមន្ត្រី នៃប្រទេសអារ៉ាប់រួមអេមីរ៉ាត និងជាមេដឹកនាំក្រុងឌូបៃផងដែរនោះ បានសរសេរបង្ហោះលើបណ្ដាញទំនាក់ទំនងសង្គម Twitter ថា “យើងមានវិនិយោគិនជាង៣០០.០០០នាក់នៅក្រុងឌូបៃ ហើយខ្ញុំសូមអញ្ជើញអ្នកគ្រប់គ្នា ឱ្យចូលរួមក្នុងដំណើររបស់យើង ដើម្បីឆ្ពោះទៅកាន់គោលដៅក្លាយ ជាទីក្រុងមួយក្នុងចំណោមទីក្រុង ដែលមានការរីកចម្រើនលឿនបំផុតក្នុងពិភពលោក”។

ក្រោមផែនការនេះ ពាណិជ្ជកម្មបរទេសត្រូវបានកំណត់គោលដៅឱ្យឈានដល់៧,៩៧ទ្រីលានដុល្លារ នៅរយៈពេល១០ឆ្នាំក្រោយ ដោយកើនឡើងពីជាង៣,៨៦ទ្រីលានដុល្លារ ក្នុងទសវត្សរ៍កន្លងមក។

មេដឹកនាំក្រុងឌូបៃ រូបនេះក៏សរសេរបន្ថែមទៀតថា ក្រុងឌូបៃ កំពុងរៀបចំផែនការទាក់ទាញការវិនិយោគផ្ទាល់ពីបរទេស (FDI) ជាមធ្យម១៦ពាន់លានដុល្លារ ក្នុងមួយឆ្នាំៗនៅទសវត្សរ៍ក្រោយ ដើម្បីឈានលើស១៧៧ពាន់លានដុល្លារ នៅត្រឹមឆ្នាំ២០៣៣។

ម្យ៉ាងវិញទៀតការចំណាយរបស់រដ្ឋាភិបាលត្រូវបានរំពឹងថា នឹងឈានដល់១៩០ពាន់លានដុល្លារ នៅឆ្នាំ២០៣៣ បើធៀបនឹង២១៥ពាន់លានដុល្លារ ក្នុងពេល១០ឆ្នាំកន្លងមក។

សម្រាប់ការវិនិយោគផ្នែកឯកជនត្រូវបានព្យាករថា នឹងឈានដល់២៧២ពាន់លានដុល្លារ នៅទសវត្សរ៍ខាងមុខ ដោយកើនឡើងពី២១៥ពាន់លានដុល្លារ ក្នុងពេល១០ឆ្នាំកន្លងមក៕ Arab News៕

ដោយៈ សុខុម

បាងកក: ថ្វីបើមានការរឹតបន្តឹងការធ្វើដំណើរលើចិនដីគោក យ៉ាងណាក្ដី ក៏ពលរដ្ឋចិន នៅតែជាអ្នកទិញខុនដូច្រើនជាងគេបំផុត ក្នុងប្រទេសថៃ ក្នុងឆ្នាំ២០២២ ខណៈពលរដ្ឋមីយ៉ាន់ម៉ា ជាប់ចំណាត់ថ្នាក់កំពូលទី១០ ជាលើកដំបូង ដោយសារហេតុផលសេដ្ឋកិច្ច និងនយោបាយ។

នេះបើយោងតាមកាសែត Bangkok Post ចុះផ្សាយកាលពីថ្ងៃព្រហស្បតិ៍ ទី៥ ខែមករា។

លោក Karlo Pobre នាយគ្រប់គ្រងក្រុមហ៊ុនប្រឹក្សាអចលនទ្រព្យ CIM Propert Consultants Co ដែលមានមូលដ្ឋាននៅក្រុងយ៉ង់ហ្គូន (Yangoon) ប្រទេសមីយ៉ាន់ម៉ា បានលើកឡើងថា បញ្ហាប្រឈមផ្នែកសេដ្ឋកិច្ច បានធ្វើឱ្យអ្នកមានស្ដុកស្ដម្ភមួយចំនួន នៅក្នុងប្រទេសមីយ៉ាន់ម៉ា ស្វែងរកផ្ទះទី២ ក្នុងទីផ្សារដែលមានសុវត្ថិភាព និងស្ថិរភាពល្អប្រសើរ ជាពិសេសប្រទេសថៃ ដែលជាប្រទេសជិតខាង។

លោកគូសបញ្ជាក់ថា “គ្រួសារជាច្រើននៅមីយ៉ាន់ម៉ា បានទិញផ្ទះទី២ នៅប្រទេសថៃ ដោយសារហេតុផលសំខាន់៣យ៉ាង។ ហេតុផលទី១ គឺទិញសម្រាប់គោលបំណងវិនិយោគ ទិញទុកជាទ្រព្យ ហេតុផលទី២ គឺទិញទុកសម្រាប់ស្នាក់នៅពេលទៅព្យាបាលជំងឺនៅថៃ ដែលមានសេវាថែទាំសុខាភិបាលល្អប្រសើរ និងហេតុផលទី៣ គឺទិញសម្រាប់ឱ្យកូនៗរបស់ពួកគេស្នាក់នៅពេលទៅបន្តការសិក្សានៅថៃ”។

យោងតាមមជ្ឈមណ្ឌលព័ត៌មានអចលនទ្រព្យថៃ (REIC) ឱ្យដឹងថា ចំនួនយូនីតខុនដូក្នុងប្រទេសថៃ ដែលទិញដោយពលរដ្ឋមីយ៉ាន់ម៉ា បានកើនឡើងជាង៦ដង ដែលមានចំនួនកើនឡើងហូតដល់១៨៨យូនីត ក្នុងពេល៩ខែដើមឆ្នាំ២០២២ បើធៀបនឹង៣០យូនីតក្នុងឆ្នាំ២០២១ និង២៦យូនីតក្នុងឆ្នាំ២០២០។

កត្តានេះបានធ្វើឱ្យពលរដ្ឋមីយ៉ាន់ម៉ា ក្លាយជាជនបរទេសដែលទិញខុនដូច្រើនជាងគេទី៧ នៅប្រទេសថៃ ក្នុងពេល៩ខែដើមឆ្នាំ២០២២ ហើយនេះជាលើកដំបូងហើយ ដែលពួកគេឈានដល់ចំណាត់ថ្នាក់កំពូលទី១០ ចាប់តាំងពីREIC បានចាប់ផ្ដើមប្រមូលចងក្រងទិន្នន័យក្នុងឆ្នាំ២០១៨ មក។

ក្នុងឆ្នាំ២០១៨ ខុនដូដែលពលរដ្ឋមីយ៉ាន់ម៉ា ទិញនៅប្រទេសថៃ មានចំនួន៤៨យូនីត ហើយចំនួននេះបានកើនឡើងដល់៥៤យូនីត ក្នុងឆ្នាំ២០១៩ មុនពេលធ្លាក់ចុះដល់២៦យូនីតក្នុងឆ្នាំ២០២០។

លោកKarlo Pobre បានលើកឡើងថា ការធ្លាក់ចុះការទិញក្នុងឆ្នាំ២០២០ ទំនងជាបណ្ដាលមកពីប្រទេសមីយ៉ាន់ម៉ា បិទអាកាសយានដ្ឋាននានារបស់ខ្លួន នៅពេលចាប់ផ្ដើមផ្ទុះការឆ្លងវីរុសកូវីដ-១៩៕ Bangkok Post៕