ដោយ: លាងហួរ

ហុងកុង: ប្រធានក្រុមហ៊ុនអចលនទ្រព្យ Evergrande លោក Hui Ka Yan បានឱ្យដឹង នៅក្នុងលិខិតមួយ ទៅកាន់និយោជិតនៅថ្ងៃចូលឆ្នាំសកលថា នេះគឺជាឆ្នាំដ៏សំខាន់សម្រាប់ក្រុមហ៊ុន ក្នុងការផ្ទេរលំនៅដ្ឋានទៅកាន់អតិថិជន។

លោក Hui Ka Yan ជឿជាក់ថាក្រុមហ៊ុននឹងអាចសងបំណុលទាំងអស់របស់ខ្លួនបាន។ ដោយជាប់បំណុលជាង៣០០ពាន់លានដុល្លារអាមេរិក និងកំពុងស្ថិតក្រោមការរៀបចំរចនាសម្ព័ន្ធបំណុល ក្រុមហ៊ុនអភិវឌ្ឍន៍អចលនទ្រព្យ ដែលជំពាក់បំណុលគេច្រើនបំផុតរបស់ពិភពលោកមួយនេះ បាននិងកំពុងតស៊ូ ដើម្បីសងបំណុលម្ចាស់បំណុល និងអ្នកផ្គត់ផ្គង់ជាច្រើន និងខិតខំបញ្ចប់គម្រោងជាច្រើន។

លោក Hui បញ្ជាក់ថា “ខ្ញុំជឿជាក់យ៉ាងមុតមាំថា ដរាបណាបុគ្គលិកក្រុមហ៊ុន Evergrande ទាំងអស់ធ្វើការងារយ៉ាងរ៉ឹងមាំ រួមមាន ការបញ្ចប់ការសាងសង់ ការស្តារការលក់ ការស្តារប្រតិបត្តិការឡើងវិញ យើងពិតជាអាចធានាបាននូវការផ្ទេរលំនៅដ្ឋានទៅឱ្យអតិថិជន និងសងបំណុលគ្រប់ប្រភេទ ព្រមទាំងដោះស្រាយហានិភ័យផងដែរ”។

លោកបានបន្ថែមថា ក្រុមហ៊ុនបានបន្តការសាងសង់ឡើងវិញ នៅក្នុងគម្រោងទាំង៧៣២ នៅទូទាំងប្រទេស ក្នុងឆ្នាំ២០២២ ដោយបានផ្ទេរផ្ទះសរុបចំនួន៣០១.០០០។ នៅក្នុងឯកសារខែធ្នូ ក្រុមហ៊ុនបានបញ្ជាក់ថា ប្រតិបត្តិការរបស់ខ្លួននៅតែប្រឈមមុខ នឹងបញ្ហាប្រឈមជាច្រើន ដោយសារតែបំណុលដ៏ច្រើនរបស់ខ្លួន។

ក្រុមហ៊ុនបានអះអាងថា មានភាពមិនប្រាកដប្រជាយ៉ាងខ្លាំង ថាតើធនធានសម្រាប់ការសងបំណុលអាចបង្កើតតម្លៃ ដែលរំពឹងទុក ឬអត់ ដោយបង្កើតភាពខ្វែងគំនិតគ្នា រវាងក្រុមហ៊ុន និងម្ចាស់បំណុលរបស់ខ្លួន លើលក្ខខណ្ឌនៃផែនការរៀបចំរចនាសម្ព័ន្ធបំណុល។

ក្រុមហ៊ុន Evergrande ក៏មានគោលបំណងទទួលបានការយល់ព្រមពីក្រុមម្ចាស់បំណុល សម្រាប់សំណើរៀបចំរចនាសម្ព័ន្ធបំណុលរបស់ខ្លួន នៅដើមខែកុម្ភៈផងដែរ៕

ដោយ៖ វឌ្ឍនៈ

ភ្នំពេញ ៖ ក្នុងឆ្នាំ២០២២កន្លងទៅ សេដ្ឋកិច្ចកម្ពុជាមានកំណើនប្រមាណ៥,៥ភាគរយ ដែលគាំទ្រដោយវិស័យមួយចំនួន ជាពិសេសសកម្មភាពនៃការវិនិយោគក៏ហាក់មានសញ្ញាប្រសើរបន្តិចដែរ។ លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងក្នុងកិច្ចសម្ភាសន៍មួយថា ឆ្នាំ២០២៣នេះ កម្ពុជាគឺជាគោលដៅវិនិយោគដ៏សំខាន់មួយរបស់វិនិយោគិនបរទេស។

លោកឧកញ៉ាបានមានប្រសាសន៍ថា កម្ពុជាជាប្រទេសមួយកំពុងមានការទាក់ទាញអ្នកវិនិយោគនានា ដោយកម្ពុជាបានបើកទូលាយ ដល់បណ្ដាវិនិយោគិន មកពីគ្រប់ទិសទី។ ជាក់ស្ដែង នៅក្នុងវិបត្តិដែលពិភពលោកមានការព្រួយបារម្ភ និងការវិនិយោគ នៅប្រទេសនានា លើពិភពលោក កំពុងមានសភាពស្ងប់ស្ងាត់នោះ ក៏កម្ពុជានៅតែទទួលបានការវិនិយោគជាបន្តបន្ទាប់ ទាំងការវិនិយោគមកពីខាងក្រៅប្រទេស និងការវិនិយោគ ពីសំណាក់អ្នកក្នុងប្រទេសកម្ពុជា។

លោកឧកញ៉ាបន្តថា បច្ចុប្បន្ន កម្ពុជាទទួលបានការវិនិយោគលើផ្នែកជាច្រើន ដូចជា រោងចក្រឧស្សាហកម្មតូចធំ សហគ្រាសក្នុងស្រុក ផ្សារទំនើបធំៗ និងបានបើកដំណើរការ ជាបន្តបន្ទាប់ផងដែរ។ ទាំងនេះវាបានបង្ហាញពីការងើបឡើងវិញជាបន្តបន្ទាប់ និងបន្តទាក់ទាញការវិនិយោគ ជាហូរហែរបន្ថែមទៀត នៅក្រោយវិបត្តិកូវីដ១៩ ហើយឆ្នាំ២០២៣នេះ ក៏រំពឹងថា កម្ពុជានឹងទទួលបានការវិនិយោគបន្ថែម ពីក្នុង និងក្រៅប្រទេសផងដែរ។

លោក វ៉ាង វិនធាន ឯកអគ្គរដ្ឋទូតនៃសាធារណរដ្ឋប្រជាមានិតចិន បានថ្លែងកាលពីថ្ងៃទី២ មករា ២០២៣កន្លងទៅនេះថា កម្ពុជាជាគោលដៅសំខាន់បំផុតរបស់ប្រជាជនចិន ទាំងទេសចរ និងវិនិយោគិន។ នៅពេលប្រទេសចិនបើកប្រទេសបើកទូលាយ ឱ្យប្រជាជនចេញក្រៅប្រទេស ពេលនោះប្រជាជនចិននឹងចូលមកកម្ពុជាចំនួនច្រើន។

តាមការចុះផ្សាយរបស់បណ្ដាញសារព័ត៌មានចិនមួយ បានបង្ហាញថា នៅមុនពេលចិនបើកប្រទេសជាផ្លូវការនោះ មានប្រជាជនប្រមាណ១០០លាននាក់ហើយ បានដាក់ពាក្យស្នើសុំចេញក្រៅប្រទេស ពីព្រោះតែពួកគេមិនបានចេញក្រៅប្រទេស ជាយូរមកហើយ ដោយសារតែស្ថានភាពកូវីដ១៩ក្នុងប្រទេសចិន។ កម្ពុជាក៏ជាគោលដៅនៃប្រជាជនជាង១០០លាននាក់នោះផងដែរ ដែលនឹងអាចធ្វើឱ្យសេដ្ឋកិច្ចកម្ពុជា នឹងមានកំណើនមួយកម្រិតទៀត៕

ដោយ: គង់ លាងហួរ

បាងកក: ក្រុមហ៊ុនអចលនទ្រព្យ Supalai បានព្យាករណ៍ថា លំនៅដ្ឋានចំនួន១២០.០០០យូនីត នឹងត្រូវបានលក់អស់យ៉ាងឆាប់រហ័ស នៅឆ្នាំ២០២៣នេះ ទោះបីជាអត្រាអតិផរណាកំពុងកើនឡើងយ៉ាងណាក្តី។

លោក Prasas Tangmatitam នាយកក្រុមហ៊ុន Supalai បានមានប្រសាសន៍ថា ក្រុមហ៊ុនអចលនទ្រព្យដែលបានចុះបញ្ជីរបស់លោក លក់លំនៅដ្ឋានបានចំនួន១១៥.៩០២យូនីត កាលពីឆ្នាំ២០២២ ធៀបនឹង៧៥.៣៦៤យូនីតនៅឆ្នាំ២០២១។ នេះគឺជាសូចនាករដ៏ច្បាស់លាស់ ដែលឆ្លុះបង្ហាញឱ្យឃើញពីការកើនឡើងនៃទីផ្សារអចលនទ្រព្យ។

លោក Prasas បាន​ចាត់​ទុក​ថា ការកើនឡើងនៃការ​លក់​អចលន​ទ្រព្យ ត្រូវបានជំរុញមកពីក្រុមអតិថិជនទិញ​ផ្ទះ​ ដែលអាយុចន្លោះពី២៦ ទៅ៣០ឆ្នាំ ដោយពួកគេមិន​បាន​រង​ផល​ប៉ះ​ពាល់​ពី​ការ​ធ្លាក់​ចុះ​សេដ្ឋកិច្ច​នោះទេ។

លោក​រំពឹង​ថា​ ទីផ្សារ​អចលន​ទ្រព្យ​ថៃ​ នឹង​មាន​ទំនុក​ចិត្ត​ឡើង​វិញ​ ដោយ​សារ​ការ​កើន​ឡើង​នៃ​វិស័យ​ទេសចរណ៍ និង​ការ​វិនិយោគ​ ចាប់​តាំង​ពី​ត្រី​មាស​ទី​៣ ឆ្នាំ២០២២។ ការ​ឡើង​ថ្លៃ​សម្ភារៈ​សំណង់ និង​អត្រា​ការ​ប្រាក់​កម្ចី​ខ្ពស់​ ដែល​បង្ក​ឡើង​ដោយ​អត្រាអតិផរណា​ មិនអាចជះផលប៉ះពាល់​ ដល់​ទីផ្សារ​អចលនទ្រព្យ​ខ្លាំងពេកនោះ​ទេ។

លោក​ក៏​បាន​បញ្ជាក់ផងដែរ​ថា ​“ដោយ​គិត​ពី​កត្តា​ទាំង​អស់​ តម្រូវ​ការ​ផ្ទះ​ថ្មី​ៗ ត្រូវ​បាន​គេ​រំពឹង​ថា​ នឹង​មាន​ចំនួន១២ម៉ឺន​យូនីត​នៅ​ឆ្នាំ​២០២៣នេះ។ ក្រុមហ៊ុនអចលនទ្រព្យនានា ប្រហែលជានឹង ខិតខំប្រឹងប្រែង យ៉ាងខ្លាំង ទៅលើការផ្សព្វផ្សាយ ដើម្បីទាក់ទាញអតិថិជនទិញផ្ទះវ័យក្មេងនៅឆ្នាំ២០២៣នេះ ដើម្បីជំរុញការលក់លំនៅដ្ឋានរបស់ពួកគេ៕

ដោយ៖ វឌ្ឍនៈ

ភ្នំពេញ៖ នៅចុងឆ្នាំ២០២២ និងដើមឆ្នាំ២០២៣នេះ តំបន់សមុទ្រ និងតំបន់ប៉ែកឦសាន្តនៃប្រទេសបានបង្ហាញសាច់ដុំកាន់តែខ្លាំង ក្នុងការទាក់ទាញវិនិយោគិនលើអចលនទ្រព្យ ដីធ្លី ស្របពេលរដ្ឋាភិបាលបានបង្ហើបពីគម្រោងវិនិយោគសាធារណ ជាពិសេសហេដ្ឋារចនាសម្ព័ន្ធជាបន្តបន្ទាប់។

ចុងឆ្នាំ២០២២ រដ្ឋាភិបាលដាក់ដំណើរការផ្លូវថ្មីៗនៅក្នុងខេត្តព្រះសីហនុ និងបើកការដ្ឋានលើកកម្រិតគុណភាពផ្លូវមួយចំនួន នៅតំបន់សមុទ្រ នៃខេត្តកំពត និងខេត្តកែប ជាមួយនឹងផ្លូវតភ្ជាប់ពីភ្នំពេញទៅកាន់តំបន់ទាំងនោះផងដែរ។ ការអភិវឌ្ឍហេដ្ឋារចនាសម្ព័ន្ធ នៅតំបន់សមុទ្រនេះបានបង្ហាញពីសក្ដានុពលបន្ថែម ទៅកាន់វិនិយោគិនជាតិ និងអន្តរជាតិ ក្នុងការបណ្ដាក់ទុនវិនិយោគ នៅក្នុងតំបន់មួយនេះ។

កាលពីពេលថ្មីៗនេះ សម្ដេចតេជោ ហ៊ុន សែន នាយករដ្ឋមន្ត្រីក៏បានបង្ហើបពីសក្ដានុពល ដែលវិនិយោគិនគួរតែបណ្ដាក់ទុនវិនិយោគ ជាពិសេសទៅលើឧស្សាហកម្មធុនធ្ងន់ ដើម្បីផ្គត់ផ្គង់លើទីផ្សារក្នុងស្រុក និងអាចនាំចេញទៅកាន់ទីផ្សារក្រៅប្រទេសផងដែរ។ ក្រៅពីឧស្សាហកម្មសម្ដេចតេជោក៏បានបង្ហាញពីសក្ដានុពល នៃវិស័យទេសចរណ៍ក្នុងខេត្តកំពត ដែលកំពុងមានការចាប់អារម្មណ៍ ពីសំណាក់ភ្ញៀវទេសចរក្នុងស្រុក។

បណ្ដាខេត្តនៅតំបន់សមុទ្រនេះក៏ឃើញថា វិនិយោគិនក្នុងស្រុកជាច្រើន បានចាប់អារម្មណ៍ និងចាប់ផ្ដើមអនុវត្តគម្រោងរបស់ខ្លួនបណ្ដើរៗ និងខ្លះទៀតត្រៀមចាំស្វាគមន៍ ជាមួយវិនិយោគិនបរទេស ដែលនឹងចូលមកកម្ពុជាវិញ ក្នុងពេលឆាប់ៗនេះផងដែរ។

ក្រៅពីតំបន់សមុទ្រ រដ្ឋាភិបាលក៏បានបង្ហាញពីសក្ដានុពលតំបន់ប៉ែកឦសាន្ត នៃប្រទេសកម្ពុជាផងដែរ ដោយនៅក្នុងឆ្នាំ២០២៣ រដ្ឋាភិបាលកម្ពុជាចាប់ផ្ដើមប្រកាសពីគម្រោងអភិវឌ្ឍន៍ហេដ្ឋារចនាសម្ព័ន្ធជាច្រើន នៅតំបន់ប៉ែកឦសាន្ត ដែលគម្រោងអភិវឌ្ឍន៍ហេដ្ឋារចនាសម្ព័ន្ធទាំងនេះ មិនត្រឹមតែផ្ដល់ជាប្រយោជន៍ ដល់ពលរដ្ឋក្នុងមូលដ្ឋាននោះទេ តែវាក៏ជាធ្នាក់មួយទាក់ទាញអ្នកអភិវឌ្ឍន៍ក្នុង និងក្រៅប្រទេសផងដែរ។

បើយើងក្រលេកទៅមើលបទពិសោធន៍ នាពេលកន្លងមក ទីណាមានការអភិវឌ្ឍហេដ្ឋារចនាសម្ព័ន្ធថ្មីៗ ទីនោះតែងតែជំរុញឱ្យតម្លៃដីធ្លីមានការកើនឡើងមួយកម្រិត វាអាស្រ័យទៅលើទីតាំងនោះអាចអភិវឌ្ឍន៍ជាអ្វី ហើយគម្រោងអភិវឌ្ឍន៍របស់ឯកជនក៏ចាប់ផ្ដើមរីកសាយទៅកាន់តំបន់ទាំងនោះដែរ។ ទាំងនេះសុទ្ធសឹងតែកត្តា ដែលធ្វើឱ្យរដ្ឋាភិបាលខិតខំសន្សំថវិកា និងកៀរគរថវិកា ដើម្បីអភិវឌ្ឍន៍ហេដ្ឋារចនាសម្ព័ន្ធខ្វាត់ខ្វែងនៅក្នុងប្រទេស៕