ដោយៈ វឌ្ឍនៈ

ភ្នំពេញៈ ប្រជាពលរដ្ឋរស់នៅរាជធានីភ្នំពេញជាច្រើន បានចាប់ផ្ដើមស្វែងរកទិញលំនៅឋាន ពីក្រុមហ៊ុនអភិវឌ្ឍន៍នៅតំបន់ប៉ែកខាងកើតរាជធានីភ្នំពេញ ជាបន្តបន្ទាប់ ជាពិសេសពលរដ្ឋដែលទទួលបានសំណងពីគម្រោងអភិវឌ្ឍន៍រាជធានីភ្នំពេញ ។នេះបើតាមម្ចាស់ក្រុមហ៊ុនអភិវឌ្ឍន៍លំនៅឋានមួយ នៅតំបន់អរិយក្សត្រនិងវិហារសួគ៌។

លោកថាន់ ចាន់ណា អគ្គនាយកក្រុមហ៊ុនអភិវឌ្ឍន៍លំនៅឋានចាន់ណាលែន បានឱ្យដឹងថា ជាការកត់សម្គាល់ចាប់តាំងពីរាជរដ្ឋាភិបាល ប្រកាសចាប់ផ្ដើមគម្រោងសាងសង់ស្ពាន ឆ្លងទន្លេពីភ្នំពេញទៅជ្រោយចង្វារ និងពីជ្រោយចង្វារទៅអរិយក្សត្រ។

លោកបន្តថា ប្រជាពលរដ្ឋ ដែលទទួលបានសំណង ពីគម្រោងអភិវឌ្ឍន៍របស់រដ្ឋនៅរាជធានីភ្នំពេញ និងប្រជាពលរដ្ឋនៅរាជធានីភ្នំពេញផ្សេងទៀត បានទៅកាន់តំបន់អរិយក្សត្រ ក៏ដូចជា តំបន់ក្បែរៗនោះ ដើម្បីរកទិញផ្ទះស្នាក់នៅ ក្រោយពីស្ពានតភ្ជាប់រួច ។

លោកបន្តថា ក្រៅពីប្រជាពលរដ្ឋនៅរាជធានីភ្នំពេញ ក៏មានបងប្អូនពលករនៅកូរ៉េជាច្រើន បានរកទិញគម្រោងលំនៅឋាន នៅតំបន់អរិយក្សត្រច្រើនដែរ ពីព្រោះតែស្ពានឆ្លងទន្លេពីភ្នំពេញ អរិយក្សត្រ គឺជាគម្រោងដែលទទួលបានឥណទាន ពីសាធារណរដ្ឋកូរ៉េ ហើយគម្រោងនេះ ក៏ត្រូវបានភាគីកូរ៉េផ្សព្វផ្សាយ នៅប្រទេសគេច្រើនដែរ ដែលធ្វើឱ្យបងប្អូនពលករកម្ពុជា នៅកូរ៉េចាប់អារម្មណ៍លើការទិញផ្ទះដើម្បីស្នាក់នៅ និងវិនិយោគនៅតំបន់អរិយក្សត្រច្រើន។

លោកបន្ថែមថា បច្ចុប្បន្ន មានក្រុមហ៊ុនអភិវឌ្ឍន៍លំនៅឋានជាច្រើនបាន និងកំពុងត្រៀមអភិវឌ្ឍន៍គម្រោងរបស់ខ្លួន ដើម្បីផ្គត់ផ្គង់ទៅតាមកំណើន នៃតម្រូវការនៅពេលអនាគតខាងមុខនេះ ហើយក៏រំពឺងថាប្រជាពលរដ្ឋពីភ្នំពេញ និងបណ្ដាខេត្តទៅរស់នៅតំបន់អរិយក្សត្រកាន់តែច្រើន។ លោកបន្តថា” បច្ចុប្បន្ននេះក្រុមហ៊ុនរបស់យើងក៏បាននិងកំពុងត្រៀមអភិវឌ្ឍគម្រោងថ្មីមួយ ស្របនឹងគម្រោងពីរកន្លងទៅបានលក់អស់ និងទទួលបានជោគជ័យត្រចះត្រចង់”។

ចំណែកលោកឌឹត ចណ្ណា អគ្គនាយកក្រុមហ៊ុន Lucky បានមានប្រសាសន៍ថា គម្រោងស្ពានតភ្ជាប់ភ្នំពេញ អរិយក្សត្រនឹងជួយតភ្ជាប់ទំនាក់ទំនងរវាងក្រុងអរិយក្សត្រ និងភ្នំពេញកាន់តែខិតជិតគ្នាហើយនឹងធ្វើឱ្យប្រជាពលរដ្ឋនៅអរិយក្សត្រ កាន់តែមានភាពងាយស្រួលក្នុងការធ្វើដំណើរចេញ ចូលភ្នំពេញ ដូចជា ការធ្វើដំណើរមកធ្វើការនៅភ្នំពេញ និងត្រលប់ទៅស្នាក់នៅតំបន់អរិយក្សត្រវិញ ដោយងាយស្រួល ។

បើតាមមន្ត្រីជាន់ខ្ពស់នៃក្រសួងសាធារណការ និងដឹកជញ្ជូនបានបង្ហើបថា គម្រោងនេះអាចនឹងចាប់ផ្ដើម បើកការដ្ឋានសាងសង់នៅចុងឆ្នាំ ២០២៣នេះ ឬនៅដើមឆ្នាំ២០២៤ខាងមុខ៕

ដោយៈ វឌ្ឍនៈ

ភ្នំពេញៈ ក្រសួងសាធារណការ និងដឹកជញ្ជូនកាលពីសប្ដាហ៍មុននេះ បានបង្ហាញពីគម្រោងអភិវឌ្ឍន៍ខ្សែក្រវ៉ាត់ទី៣ នៅប៉ែកខាងកើតរាជធានីភ្នំពេញ ដែលមានតម្លៃប្រមាណ២៤០លានដុល្លារអាមេរិកតភ្ជាប់ពីផ្លូវជាតិលេខ៦ ទៅតំបន់កោះដាច់ និងតភ្ជាប់ពីកោះដាច់ទៅកោះតាង។

ការអភិវឌ្ឍខ្សែក្រវ៉ាត់ទី៣នេះ នឹងជំរុញឱ្យតម្លៃដីធ្លីនៅតំបន់កោះដាច់ និងកោះតាង មានកំណើនតម្លៃបន្ថែមទៀតនៅពេលអនាគត។

បច្ចុប្បន្នតម្លៃដីធ្លីនៅក្នុងតំបន់កោះដាច់ និងកោះតាងនេះ មានតម្លៃទាបនៅឡើយទេ ក្នុងរង្វង់ក្រោម១០០ដុល្លារអាមេរិកប៉ុណ្ណោះ ក្នុងមួយម៉ែត្រការ៉េ ហើយក្រោយពីរដ្ឋាភិបាល ប្រកាសពីគម្រោងខ្សែក្រវ៉ាត់៣ នឹងជំរុញឱ្យមានការអភិវឌ្ឍ នៅតំបន់នោះបន្ថែមទៀត។នេះបើតាមការព្យាករណ៍របស់អ្នកជំនាញ។

លោកថាន់ ចាន់ណាអគ្គនាយកក្រុមហ៊ុនចាន់ណាលែន បានមានប្រសាសន៍ តាមទូរសព្ទនៅរសៀលថ្ងៃទី១៥ មីនា ២០២៣នេះឱ្យដឹងថា ក្រោយពីរដ្ឋាភិបាលបានបង្ហាញ ពីគម្រោងខ្សែក្រវ៉ាត់ទី៣នៅប៉ែកខាងកើត រាជធានីភ្នំពេញ យើងរំពឹងថាតម្លៃដីធ្លីនៅតំបន់នោះនឹងមានសន្ទុះបន្ថែមទៀត ជាពិសេសតំបន់ដែលរដ្ឋាភិបាល គ្រោងនឹងតភ្ជាប់ស្ពានទៅកាន់ទីនោះផ្ទាល់តែម្ដង។

លោកបន្តថា “ដីធ្លីនៃតំបន់កោះដាច់ និងកោះតាង ថ្វីត្បិតតែវាមានតម្លៃទាបនៅឡើយមែន ប៉ុន្តែដីនៅតំបន់នោះសុទ្ធតែមានឈ្មួញនិងអ្នកអភិវឌ្ឍន៍ទិញរួចហើយ”។ លោកបន្តថា “ដូច្នេះបើសិនជាមានអ្នកចង់ទិញ ដីនោះបន្តយកមកអភិវឌ្ឍន៍ ក៏មិនមែនទិញពីម្ចាស់ដើមផ្ទាល់តែដែរ គឺទិញពីឈ្មួញដីធ្លីដែលទិញរួចហើយដែរ”។

ម្យ៉ាងវិញទៀតការអភិវឌ្ឍអចលនទ្រព្យ នៅតំបន់នៃកោះទាំងពីរនេះក៏ឃើញថា នៅមានភាពទូលាយច្រើន ដែលធ្វើឱ្យអ្នកអភិវឌ្ឍន៍មានឱកាសខ្ពស់ក្នុងការរកប្រាក់ចំណេញ ។

លោកថាន់ ចាន់ណាបានបន្ថែមថា តំបន់ប៉ែកខាងកើតរាជធានីភ្នំពេញមួយរយៈនេះ ហាក់មានគម្រោងអភិវឌ្ឍន៍ច្រើន ដែលជំរុញឱ្យតំបន់ប៉ែកខាងកើត ទាក់ទាញការវិនិយោគបន្ថែម ដូចជា គម្រោងស្ពានតភ្ជាប់ពីភ្នំពេញ ទៅអរិយក្សត្រ គម្រោងតភ្ជាប់ពីផ្លូវជាតិលេខ១ទៅស្រុកល្វាឯមជាដើម ដែលនឹងជំរុញឱ្យពលរដ្ឋងាយស្រួល ក្នុងការធ្វើដំណើរទៅមករវាងភ្នំពេញនិងអរិយក្សត្រ ។

ចំណែកលោកប៉ូ អ៊ាវគង់ អគ្គនាយកក្រុមហ៊ុនអចលនទ្រព្យAdvance ក៏បានថ្លែងបញ្ជាក់ផងដែរថា តំបន់ប៉ែកខាងកើតភ្នំពេញ នឹងមានការអភិវឌ្ឍ លើលំនៅឋានកាន់តែច្រើន ហើយប្រជាពលរដ្ឋទាំងរស់នៅភ្នំពេញ និងពីបណ្ដាខេត្តនឹងចូលមករស់នៅ តំបន់ប៉ែកខាងកើតភ្នំពេញ ជាពិសេសទីក្រុងអរិយក្សត្រ និងតំបន់ជិតៗនោះកាន់តែច្រើន ដែលនឹងជំរុញឱ្យតម្រូវការកាន់តែច្រើនដូចគ្នាផងដែរ៕

ដោយ: គង់ លាងហួរ

ប៉េកាំង: ការវិនិយោគអចលនទ្រព្យ នៅប្រទេសចិនបានធ្លាក់ចុះក្នុងល្បឿនយឺតជាងមុន ក្នុងរយៈពេល២ខែដំបូង ឆ្នាំ២០២៣ ដោយបង្ហាញសញ្ញានៃភាពប្រសើរឡើង ដែលត្រូវបានជំរុញដោយគោលនយោបាយគាំទ្រមួយចំនួន ទោះបីជាអ្នកទិញ និងអ្នកអភិវឌ្ឍន៍នៅតែមានការប្រុងប្រយ័ត្នយ៉ាងណាក្តី។

យោងតាមទិន្នន័យពីការិយាល័យស្ថិតិជាតិ (NBS) បានឱ្យដឹងថា ការវិនិយោគលើអចលនទ្រព្យ បានធ្លាក់ចុះ៥,៧ភាគរយ នៅក្នុងខែមករាដល់ខែកុម្ភៈ បន្ទាប់ពីបានធ្លាក់ចុះរហូត ដល់១២,២ភាគរយនៅក្នុងខែធ្នូ និងយឺតជាងការធ្លាក់ចុះ១០ភាគរយ ដែលបានចុះបញ្ជីសម្រាប់រយៈពេលដូចគ្នាក្នុងឆ្នាំ២០២២។

នៅដើមកិច្ចប្រជុំប្រចាំឆ្នាំ នៃសភារបស់ប្រទេសចិនកាលពីសប្តាហ៍មុន រដ្ឋាភិបាលចិនបានធ្វើការ ដើម្បីការពារហានិភ័យចំពោះអ្នកអភិវឌ្ឍន៍អចលនទ្រព្យកំពូលៗ ដែលជាអាទិភាពចម្បងមួយ ក្នុងអាទិភាពជាច្រើនផ្សេងទៀត នៅក្នុងរបាយការណ៍ការងារសម្រាប់ឆ្នាំ២០២៣នេះ។

លោក Yan Yuejin អ្នកវិភាគនៅស្ថាប័នស្រាវជ្រាវ និងអភិវឌ្ឍន៍ E-house China ក្នុងទីក្រុងសៀងហៃ បានអះអាងថា “តួលេខនេះគឺជាការចាប់ផ្តើមដ៏ល្អមួយ សម្រាប់ការងើបឡើងវិញ នៃទីផ្សារអចលនទ្រព្យក្នុងឆ្នាំ២០២៣នេះ និងបង្កើនទំនុកចិត្តបន្ថែមទៀតផងដែរ”។ លោកបានបន្តថា “តួលេខនៃការលក់អចលនទ្រព្យ ត្រូវបានគេរំពឹងថា នឹងប្រែក្លាយពីអវិជ្ជមានទៅជាវិជ្ជមាន នៅក្នុងត្រីមាសទី១នៃឆ្នាំនេះ ដែលជាសញ្ញាដ៏ធំបំផុត ដើម្បីបង្ហាញថាទីផ្សារអចលនទ្រព្យកំពុងងើបឡើងវិញ”។

ការលក់ផ្ទះគិតជាផ្ទៃក្រឡា បានធ្លាក់ចុះ៣,៦ភាគរយពីមួយឆ្នាំទៅមួយឆ្នាំ ក្នុងរយៈពេលពីរខែដំបូង ឆ្នាំ២០២៣ ធៀបនឹងការធ្លាក់ចុះរហូតដល់២៤,៣ភាគរយ នៅឆ្នាំ២០២២ ដោយសារគ្រួសារជាច្រើននៅតែមិនទាន់ អាចសម្រេចចិត្តលើការទិញផ្ទះ។

ចំណែក ការចាប់ផ្តើមសាងសង់ថ្មី ដែលវាស់វែងដោយផ្ទៃក្រឡាបានធ្លាក់ចុះ៩,៤ភាគរយ នៅក្នុងខែមករាដល់ខែកុម្ភៈធៀបនឹងឆ្នាំមុន បន្ទាប់ពីបានធ្លាក់ចុះ៤៤ភាគរយនៅក្នុងខែធ្នូ និងធ្លាក់ចុះ៣៩ភាគរយសម្រាប់រយៈពេលដូចគ្នាក្នុងឆ្នាំ២០២២។

ស្ថានភាពសម្រាប់ការទទួលបានមូលនិធិ របស់អ្នកអភិវឌ្ឍន៍ក៏មានភាពប្រសើរឡើងផងដែរ។

មូលនិធិដែលប្រមូលបាន ដោយអ្នកអភិវឌ្ឍន៍បានធ្លាក់ចុះ១៥ភាគរយ ក្នុងរយៈពេលពីរខែដំបូង បើធៀបនឹងការធ្លាក់ចុះរហូតទៅដល់២៦ភាគរយ ក្នុងរយៈពេលដូចគ្នាកាលពីឆ្នាំមុន។

កាលពីខែមករាកន្លងទៅ តម្លៃផ្ទះថ្មីបានកើនឡើងជាលើកដំបូងក្នុងរយៈពេលមួយឆ្នាំ ដែលត្រូវបានជំរុញពីការគាំទ្រ យ៉ាងខ្លាំងក្លារបស់ក្រុមអ្នកបង្កើតគោលនយោបាយ និងការបោះបង់ចោលគោលនយោបាយសូន្យកូវីដ កាលពីដំណាច់ឆ្នាំ២០២២។

លោក Ni Hong រដ្ឋមន្ត្រីក្រសួងលំនៅដ្ឋានបានមានប្រសាសន៍នៅក្រៅកិច្ចប្រជុំប្រចាំឆ្នាំរបស់សភាថា “លោកមានទំនុកចិត្តថា ទីផ្សារអចលនទ្រព្យចិន នឹងមានស្ថិរភាព និងស្ទុះងើបឡើងវិញនៅឆ្នាំ២០២៣”៕

ដោយៈ វឌ្ឍនៈ

ភ្នំពេញៈ ខណ្ឌទួលគោកជាតំបន់មួយ ដែលមានការអភិវឌ្ឍគួរឱ្យកត់សម្គាល់ ក្នុងរយៈពេលប៉ុន្មានឆ្នាំកន្លងមកនេះ ហើយតាមរយៈការអភិវឌ្ឍនេះដែរ ក៏បានជំរុញឱ្យតម្លៃដីធ្លី នៅក្នុងខណ្ឌមួយនេះកើនឡើងជាបន្តបន្ទាប់ផងដែរ។

នៅថ្ងៃនេះយើងនឹងបង្ហាញពីតម្លៃដីធ្លី នៅតាមបណ្ដាសង្កាត់នានា ក្នុងខណ្ឌទួលគោកសម្រាប់វិនិយោគិន ឬអ្នកអភិវឌ្ឍន៍សិក្សាក្នុងការពិចារណាវិនិយោគឬអភិវឌ្ឍន៍។

១. សង្កាត់ផ្សារដេប៉ូ១

សង្កាត់នេះតម្លៃដី មានចន្លោះពី២១០០ដុល្លារអាមេរិក ក្នុងមួយម៉ែត្រការ៉េដល់៥៦០០ដុល្លារអាមេរិក ក្នុងមួយម៉ែត្រការ៉េ វាអាស្រ័យទៅលើស្ថានភាពដីទីតាំង នៅផ្លូវធំៗឬផ្លូវតូច។

២.សង្កាត់ផ្សារដេប៉ូ២

តម្លៃដីធ្លីនៅក្នុងសង្កាត់មួយនេះ មានចន្លោះពី២១០០ដុល្លារទៅ៥៧០០ដុល្លារអាមេរិកក្នុងមួយម៉ែត្រការ៉េ ។

៣.សង្កាត់ផ្សារដេប៉ូ៣

តម្លៃដីធ្លីនៅក្នុងសង្កាត់មួយនេះ មានតម្លៃមិនខុសពីតម្លៃដីធ្លីនៅក្នុងសង្កាត់ផ្សារដេប៉ូ២ឡើយ ពោលគឺស្ថិតនៅក្នុងចន្លោះពី២១០០ដុល្លារទៅ៥៧០០ដុល្លារអាមេរិក ក្នុងមួយម៉ែត្រការ៉េ ។

៤.សង្កាត់ទឹកល្អក់១

សង្កាត់នេះក៏ជាតំបន់សំខាន់មួយ នៅក្នុងខណ្ឌទួលគោក ហើយតម្លៃដីធ្លីវាមានតម្លៃចន្លោះ ពី២១០០ដុល្លារអាមេរិក ទៅ៥៦០០ដុល្លារអាមេរិក។

៥.សង្កាត់ទឹកល្អក់២

សង្កាត់មួយនេះតម្លៃដីធ្លី គឺប្រហាក់ប្រហែលនឹងតម្លៃដីធ្លី ក្នុងសង្កាត់ទឹកល្អក់១ដែរ ដោយតម្លៃដីធ្លី មានចាប់ពី២១០០ដុល្លារអាមេរិក ទៅ៥៦០០ដុល្លារអាមេរិកអាស្រ័យលើទីតាំង។

៦.សង្កាត់ទឹកល្អក់៣

តម្លៃដីធ្លីនៅតំបន់ទឹកល្អក់៣ មានការខុសគ្នាបន្តិចពីតំបន់ នៃសង្កាត់ទឹកល្អក់១ និងទឹកល្អក់២ ពោលគឺតម្លៃនៅក្នុងសង្កាត់ទឹកល្អក់មានតម្លៃ ចន្លោះពី២១០០ដុល្លារទៅ ៥១០០ដុល្លារអាមេរិកក្នុងមួយម៉ែត្រការ៉េ។

៧. សង្កាត់បឹងកក់១និង២

បឹងកក់ជាតំបន់ដែលមានសក្ដានុពល ក្នុងការទាក់ទាញការវិនិ​យោគហើយបច្ចុប្បន្ននេះ មានគម្រោងជាច្រើន ក៏កំពុងលេចរូបរាងជាបន្តបន្ទាប់នៅតំបន់។

តម្លៃដីធ្លីនៅសង្កាត់បឹងកក់ចាត់ថា មានតម្លៃខ្ពស់ជាងក្នុងខណ្ឌទួលគោកដោយ នៅសង្កាត់បឹងកក់១ មានតម្លៃចន្លោះពី២៣០០ដុល្លារអាមេរិកទៅ៦១០០ដុល្លារអាមេរិក ហើយសង្កាត់បឹងកក់២មានតម្លៃចន្លោះពី២៨០០ដុល្លារ ដល់៦១០០ដុល្លារអាមេរិក។

៨.សង្កាត់ផ្សារដើមគរ

ផ្សារដើមគរក៏ជាតំបន់មមាញឹក និងពិបាកក្នុងការស្វែងរកដីធ្លីសម្រាប់វិនិយោគបន្តិច ប៉ុន្តែតម្លៃនៅតំបន់នេះ មានតម្លៃពី២១០០ដុល្លារអាមេរិក ទៅ៥៦០០ដុល្លារអាមេរិក ក្នុងមួយម៉ែត្រការ៉េ ។

៩. សង្កាត់បឹងសាឡាង

ដីធ្លីនៅសង្កាត់បឹងសាឡាង ក៏មិនខុសគ្នាប៉ុន្មានដែរ ពីតំបន់ក្នុងសង្កាត់ផ្សារដើមគរ ក្នុងនោះតម្លៃដី មានចាប់១៩០០ដុល្លារអាមេរិកដល់៥៥០០ដុល្លារអាមេរិកក្នុងមួយម៉ែត្រការ៉េ ។

ជាការកត់សម្គាល់ឃើញថា តម្លៃដីធ្លីនៅក្នុងរាជធានីភ្នំពេញនិងតាមបណ្ដាខេត្តនានា ក្នុងប្រទេសកម្ពុជា ទោះបីជាស្ថានភាពនៃវិបត្តិកូវីដ១៩ និងវិបត្តិនៃសង្គ្រាមរុស្ស៊ីអ៊ុយក្រែនក្ដី មិនមានការប្រែប្រួលធ្លាក់ចុះទេ ពោលគឺនៅរក្សាថេរ ឬមានការកើនឡើងតិចតួច ធៀបនឹងមុនវិបត្តិ។

យ៉ាងណាក៏មានតំបន់ខ្លះ បានធ្លាក់ចុះតិចតួច អាស្រ័យលើម្ចាស់ដី ដោយមិនទាក់ទងនឹងទីផ្សាររួមឡើយ៕