ដោយ: គង់ លាងហួរ
អន្តរជាតិ: យោងតាមធនាគារហ្វាំងឡង់បានឱ្យដឹងកាលពីពេលថ្មីៗនេះថា ការដកការរឹតបន្តឹងលើជំងឺកូវីដ-១៩ នៅក្នុងប្រទេសចិនអាចបង្កើនការប្រើប្រាស់ឯកជន និងជំរុញលើកស្ទួយដល់ពាណិជ្ជកម្មពិភពលោកផងដែរ។

យោងតាមរបាយការណ៍ចុងក្រោយរបស់ធនាគារនេះបានបង្ហាញថា ការរួមចំណែកនៃការប្រើប្រាស់ឯកជនចំពោះផលិតផលក្នុងស្រុកសរុប (GDP) បានធ្លាក់ចុះក្នុងអំឡុងពេលជំងឺរាតត្បាត ប៉ុន្តែបច្ចុប្បន្ននេះវាអាចត្រលប់ទៅរកនិន្នាការកំណើនមុនវិបត្តិកូវីដ-១៩ឡើងវិញ។

របាយការណ៍នេះបានបន្តថា “ដោយសារប្រទេសចិនគឺជាប្រទេសដែលមានសេដ្ឋកិច្ចធំជាងគេមួយក្នុងពិភពលោក វានឹងជះឥទ្ធិពលយ៉ាងសំខាន់ទៅលើរចនាសម្ព័ន្ធតាមវិស័យ និងភូមិសាស្រ្តនៃពាណិជ្ជកម្មពិភពលោកក្នុងរយៈពេលមធ្យម និងរយៈពេលវែង”។

របាយការណ៍ដដែលបានឱ្យដឹងទៀតថា ប្រទេសចិនបានមើលឃើញពីការកើនឡើងគួរឱ្យកត់សម្គាល់នៃតម្រូវការសម្រាប់ការផលិតម្ហូបអាហារ ក៏ដូចជានៅក្នុងវិស័យកសិកម្ម វាយនភ័ណ្ឌ ការថែទាំសុខភាព និងវិស័យសេវាកម្មធ្វើដំណើរផងដែរ។

បណ្តាប្រទេសសេដ្ឋកិច្ចនៅតំបន់អាស៊ីដែលកំពុងរីកចម្រើនដូចជាកម្ពុជា និងវៀតណាម ដែលនាំចេញទំនិញប្រើប្រាស់ទៅកាន់ប្រទេសចិន ត្រៀមនឹងទទួលបានអត្ថប្រយោជន៍ដ៏ច្រើនបំផុត។

ទោះបីជាសហរដ្ឋអាមេរិក និងតំបន់ចាយប្រាក់អឺរ៉ូអាចមើលឃើញពីការធ្លាក់ចុះកម្រិតមធ្យមនៃការនាំចេញតម្លៃបន្ថែមរបស់ពួកគេទៅកាន់ប្រទេសចិនយ៉ាងណាក្តី ក៏វិស័យកសិកម្ម និងផលិតកម្មស្បៀងរបស់សហរដ្ឋអាមេរិកនឹងកើនឡើងពីការផ្លាស់ប្តូរនេះផងដែរ។

ប្រទេសអុីតាលី និងបារាំងនឹងទទួលបានពីការកើនឡើងនៃតម្រូវការសម្រាប់ផលិតផលម្ហូបអាហារ វាយនភ័ណ្ឌ និងផលិតផលស្បែក ក៏ដូចជាសារធាតុគីមីសម្រាប់អ្នកប្រើប្រាស់។

លើសពីនេះ ការនាំចេញពីប្រទេសអៀរឡង់ និងអេស្បាញទៅកាន់ប្រទេសចិនអាចកើនឡើង ដោយជំរុញពីតម្រូវការសម្រាប់ផលិតផលម្ហូបអាហារ សេវាកម្មផលិតកម្ម និងការធ្វើដំណើរផ្សេងៗទៀត។

របាយការណ៍នេះត្រូវបានធ្វើឡើងដោយវិទ្យាស្ថាន Bank of Finland Institute for Emerging Economies ដែលជាវិទ្យាស្ថានស្រាវជ្រាវរបស់ធនាគារដែលមានឯកទេសក្នុងសេដ្ឋកិច្ចរបស់ប្រទេសកំពុងរីកចម្រើន៕

សុខុម

ហាណូយ: ទោះជាមានការរំពឹងទុកថា តម្រូវការដែកធម្មតា និងដែកថែបនឹងកើនឡើងដោយសារការខិតខំប្រឹងប្រែងរបស់រដ្ឋាភិបាលនៅក្នុងការកាត់បន្ថយការផ្គត់ផ្គង់យ៉ាងណាក្ដី ក៏សម្ភារសំណង់នៅតែមានតម្លៃខ្ពស់ដែរ។

បណ្ដាក្រុមហ៊ុនម៉ៅការ និងវិនិយោគិននៅទីក្រុងហាណូយ បានទម្លាយឱ្យដឹងថា តម្លៃស៊ីម៉ងត៍នៅថេរ ប៉ុន្តែសម្ភារសំណង់សំខាន់ៗផ្សេងទៀតដូចជាដែក និងខ្សាច់នៅតែបន្តឡើងថ្លៃ។ នេះបើយោងតាមសារព័ត៌មាន Vietnam News ចុះផ្សាយកាលពីថ្ងៃពុធ ទី១៥ ខែមីនា។

និន្នាការនេះបានធ្វើឱ្យក្រុមហ៊ុនសាងសង់នានាលំបាកទទួលយកការងារសាងសង់ក្នុងគម្រោង ដែលត្រូវការប្រើដែកថែបក្នុងបរិមាណច្រើនដោយសារពួកគេភ័យខ្លាចការខាតបង់ធ្ងន់ធ្ងរ ប្រសិនបើតម្លៃដែកបន្តកើនឡើង។

ជាលទ្ធផល គម្រោងសាងសង់ជាច្រើននៅជាប់គាំងកណ្ដាលទីដោយសារក្រុមហ៊ុនសាងសង់នានាមិនហ៊ានប្រថុយទទួលការងារសាងសង់បង្ហើយ ព្រោះមិនចង់ប្រឈមហានិភ័យហិរញ្ញវត្ថុ។

ចាប់តាំងពីដើមឆ្នាំនេះមក តម្លៃដែករ៉ូឡូ និងដែកថ្នាំងអំពៅបានឡើងថ្លៃរហូតដល់ប្រមាណ៦៧៨ដុល្លារអាមេរិក ក្នុង១តោន។ បន្ទាប់ពីបុណ្យចូលឆ្នាំថ្មីប្រពៃណីចិន-វៀតណាម រួច ខ្សាច់ក៏បានឡើងថ្លៃយ៉ាងខ្លាំងផងដែរ៕ Vietnam News៕

សុខុម

ប៉េកាំងៈ វាជាសញ្ញាវិជ្ជមានដ៏គួរឱ្យសាទរដែលវិស័យអចលនទ្រព្យនៃប្រទេសចិន បានសន្ទុះរើបឡើងជាបន្តបន្ទាប់ជិតងើបផុតពីការដាំក្បាលចុះជាច្រើនខែ ខណៈទិន្នន័យផ្លូវការសម្រាប់ខែមករា ដល់ខែកុម្ភៈ កាលពីថ្ងៃពុធ ទី១៥ ខែមីនា បានបង្ហាញថា ការលក់ផ្ទះធ្លាក់ចុះកាន់តែតិចជាងមុន ហើយបណ្ដាក្រុមហ៊ុនអភិវឌ្ឍន៍ក៏ចាប់ផ្ដើមឡើងវិញ ចំណែកឯការចាប់ផ្ដើមការសាងសង់ក៏ចាប់ផ្ដើមឡើងវិញ។

ទិន្នន័យពីការិយាល័យជាតិស្ថិតិ (NBS) នៃប្រទេសចិន បង្ហាញថា ការលក់ផ្ទះក្នុងរយៈពេល២ខែដើមឆ្នាំ២០២៣ នៅក្នុងទីផ្សារប្រទេសចិន បានធ្លាក់ចុះ៣,៦%បើធៀបនឹងការធ្លាក់ចុះដល់ទៅ២៤%នៅក្នុងឆ្នាំ២០២២ ទាំងមូល។

ការធ្លាក់ចុះកាន់តែតិចនូវការលក់ផ្ទះនេះកើតមានឡើង បន្ទាប់ពីតម្លៃផ្ទះថ្មីបានហក់ឡើងក្នុងខែមករា ដែលជាហក់ឡើងថ្លៃលើកដំបូងក្នុងរយៈពេល១ឆ្នាំមកនេះ ខណៈអ្នកទិញដែលនៅតែប្រុងប្រយ័ត្នបានធូរចិត្តក្រោយពីរដ្ឋាភិបាលក្រុងប៉េកាំង បានដាក់ចេញគោលនយោបាយគាំទ្រជាបន្តបន្ទាប់ និងដោយសារការរំពឹងថានឹងមានការដាក់ចេញវិធានការស្ដារសេដ្ឋកិច្ចបន្ថែមទៀត និងការបោះបង់គោលនយោបាយសូន្យ-កូវីដ ដ៏តឹងរ៉ឹងរបស់ប្រទេសចិន។

ការវិនិយោគអចលនទ្រព្យដោយបណ្ដាក្រុមហ៊ុនអភិវឌ្ឍន៍ក្នុងខែមករា ដល់ខែកុម្ភៈ បានធ្លាក់ចុះ៥,៧%បើធៀបនឹងការធ្លាក់ចុះ១២%ក្នុងខែធ្នូ និងការធ្លាក់ចុះ១០%សម្រាប់ឆ្នាំ២០២២ ទាំងមូល។

អ្នកវិភាគរំពឹងថា ការលក់អចលនទ្រព្យនឹងក្លាយជាសូចនាករដំបូងដែលនឹងផ្ដល់សញ្ញាវិជ្ជមានសម្រាប់វិស័យអចលនទ្រព្យនៃប្រទេសចិន ក្នុងពេលឆាប់ៗនេះ។ អ្នកវិភាគទាំងនោះព្យាករថា ការវិនិយោគអចលនទ្រព្យនឹងងើបឡើងវិញនៅក្នុងឆមាសទី២ ចុងឆ្នាំ២០២៣៕ Reuters៕

ដោយ: គង់ លាងហួរ
ប៉េកាំងៈ ក្រុមអាជ្ញាធរ​ទិដ្ឋាការ​របស់​ប្រទេស​ចិន​នៅ​បរទេស​គ្រោងបន្ត​ផ្តល់​ទិដ្ឋាការ​គ្រប់​ប្រភេទ​ដល់​ជនបរទេស​ចាប់​ពី​ថ្ងៃ​ពុធ​នេះ​ឡើងវិញ។ នេះបើ​យោង​តាម​សេចក្តី​ថ្លែងការណ៍​របស់​ក្រសួងការបរទេស​ចិន​។

សេចក្តី​ថ្លែងការណ៍​នោះបាន​បន្ត​ថា ការ​សម្រេច​ចិត្ត​នេះ​ត្រូវ​បាន​ធ្វើ​ឡើង​ដើម្បី​សម្រួល​ដល់​ការ​ធ្វើ​ដំណើរ​ឆ្លង​កាត់​ព្រំដែន​បន្ថែម​ទៀត។

បន្ថែមពីលើឯកសារធ្វើដំណើរថ្មីដែលកំពុងត្រូវបានពិនិត្យ និងអនុម័ត ទិដ្ឋាការដែលបានចេញមុនថ្ងៃទី២៨ ខែមីនា ឆ្នាំ២០២០ ដែលនៅតែមានសុពលភាពនឹងអនុញ្ញាតឱ្យជនបរទេសអាចចូលមកប្រទេសចិនម្តងទៀត ។ នេះបើយោងតាមការជូនដំណឹងរបស់ស្ថានទូតចិននៅទីក្រុងវ៉ាស៊ីនតោនកាលពីថ្ងៃចន្ទកន្លងទៅ។

គោលនយោបាយ ដែលត្រូវបានធ្វើបច្ចុប្បន្នភាពនេះក៏នឹងអនុញ្ញាតឱ្យបើកការធ្វើដំណើរដោយគ្មានទិដ្ឋាការឡើងវិញសម្រាប់អ្នកដែលមកដល់ តាមកប៉ាល់ទេសចរណ៍ទៅកាន់ទីក្រុងសៀងហៃ ក៏ដូចជាសម្រាប់ក្រុមទេសចរណ៍មួយចំនួនមកពីក្រុងហុងកុង ម៉ាកាវ និងបណ្តាប្រទេសនៅក្នុងក្រុមតំបន់អាស៊ានផងដែរ។

វិធានការនេះគឺជាជំហានចុងក្រោយបំផុតឆ្ពោះទៅរកការបើកប្រទេសចិនឡើងវិញទៅកាន់ពិភពខាងក្រៅ ខណៈទីក្រុងប៉េកាំងបានបំបែកជាបណ្តើរៗជាមួយនឹងយុទ្ធសាស្ត្រសូន្យកូវីដដ៏តឹងរុឹងរបស់ខ្លួន។

យោងតាមទិន្នន័យពីអង្គការទេសចរណ៍ពិភពលោករបស់អង្គការសហប្រជាជាតិ (WTO) បានឱ្យដឹងថា ប្រទេសចិនបានទទួលភ្ញៀវអន្តរជាតិចំនួន៦៥,៧លាននាក់ក្នុងឆ្នាំ២០១៩ មុនពេលដែលជំងឺកូវីដ-១៩បាននាំឱ្យប្រទេសនេះបិទខ្លួនចេញពីពិភពលោកទាំងមូល។

ខណៈប្រទេសផ្សេងទៀតភាគច្រើនបានចាប់ផ្តើមបើកសេដ្ឋកិច្ចឡើងវិញយ៉ាងពេញលេញ និងស្វាគមន៍អ្នកដំណើរអន្តរជាតិមុននេះ ចំណែកប្រទេសចិនទើបតែចាប់ផ្តើមចាកចេញពីគោលនយោបាយទប់ស្កាត់កូវីដដ៏តឹងរុឹងនៅចុងឆ្នាំ២០២២ប៉ុណ្ណោះ បន្ទាប់ពីផ្ទុះបាតុកម្មដ៏កម្រប្រឆាំងនឹងយុទ្ធសាស្ត្រសូន្យកូវីដរបស់រដ្ឋាភិបាលនៅទូទាំងប្រទេស៕

ដោយ៖វឌ្ឍនៈ

ភ្នំពេញ ៖ ប្រជាពលរដ្ឋរស់នៅរាជធានីភ្នំពេញជាច្រើនចាប់ផ្ដើមស្វែងរកទិញលំនៅឋានពីក្រុមហ៊ុនអភិវឌ្ឍន៍នៅតំបន់ប៉ែកខាងកើតរាជធានីភ្នំពេញ ជាបន្តបន្ទាប់ ជាពិសេសពលរដ្ឋដែលទទួលបានសំណងពីគម្រោងអភិវឌ្ឍន៍រាជធានីភ្នំពេញ ។នេះបើតាមម្ចាស់ក្រុមហ៊ុនអភិវឌ្ឍន៍លំនៅឋានមួយនៅតំបន់អរិយក្សត្រនិងវិហារសួគ៌ ។

លោកថាន់ ចាន់ណា អគ្គនាយកក្រុមហ៊ុនអភិវឌ្ឍន៍លំនៅឋានចាន់ណាលែន បានឱ្យដឹងថា ជាការកត់សម្គាល់ចាប់តាំងពីរាជរដ្ឋាភិបាល ប្រកាសចាប់ផ្ដើមគម្រោងសាងសង់ស្ពានឆ្លងទន្លេពី ភ្នំពេញទៅជ្រោយចង្វារនិងពីជ្រោយចង្វារទៅអរិយក្សត្រនោះ ឃើញថាប្រជាពលរដ្ឋដែលទទួលបានសំណងពីគម្រោងអភិវឌ្ឍន៍របស់រដ្ឋនៅរាជធានីភ្នំពេញ និងប្រជាពលរដ្ឋនៅរាជធានីភ្នំពេញផ្សេងទៀតបានទៅកាន់តំបន់អរិយក្សត្រក៏ដូចជាតំបន់ក្បែរៗនោះដើម្បីរកទិញផ្ទះស្នាក់នៅ ក្រោយពីស្ពានតភ្ជាប់រួច ។

លោកបន្តថា ក្រៅពីប្រជាពលរដ្ឋនៅរាជធានីភ្នំពេញក៏មានបងប្អូនពលករនៅកូរ៉េជាច្រើនបានរកទិញគម្រោងលំនៅឋាននៅតំបន់អរិយក្សត្រច្រើនដែរ ពីព្រោះតែស្ពានឆ្លងទន្លេពីភ្នំពេញ អរិយក្សត្រ គឺជាគម្រោងដែលទទួលបានឥណទានពីសាធារណរដ្ឋកូរ៉េ ហើយគម្រោងនេះក៏ត្រូវបានភាគីកូរ៉េផ្សព្វផ្សាយនៅប្រទេសគេច្រើនដែរ ដែលធ្វើឱ្យបងប្អូនពលករកម្ពុជានៅកូរ៉េចាប់អារម្មណ៍លើការទិញផ្ទះដើម្បីស្នាក់នៅ និងវិនិយោគនៅតំបន់អរិយក្សត្រច្រើន ។

លោកបន្ថែមថា បច្ចុប្បន្ននេះមានក្រុមហ៊ុនអភិវឌ្ឍន៍លំនៅឋានជាច្រើនបាននិងកំពុងត្រៀមអភិវឌ្ឍន៍គម្រោងរបស់ខ្លួន ដើម្បីផ្គត់ផ្គង់ទៅតាមកំណើននៃតម្រូវការនៅពេលអនាគតខាងមុខនេះ ហើយក៏រំពឺងថាប្រជាពលរដ្ឋពីភ្នំពេញ និងបណ្ដាខេត្តទៅរស់នៅតំបន់អរិយក្សត្រកាន់តែច្រើន ។ លោកថា”បច្ចុប្បន្ននេះក្រុមហ៊ុនរបស់យើងក៏បាននិងកំពុងត្រៀមអភិវឌ្ឍគម្រោងថ្មីមួយស្របនឹងគម្រោងពីរកន្លងទៅបានលក់អស់និងទទួលបានជោគជ័យត្រចះត្រចង់ ” ។

លោកឌឹត ចណ្ណា អគ្គនាយកក្រុមហ៊ុន Lucky បានមានប្រសាសន៍ថាគម្រោងស្ពានតភ្ជាប់ភ្នំពេញ អរិយក្សត្រនឹងជួយតភ្ជាប់ទំនាក់ទំនងរវាងក្រុងអរិយក្សត្រ និងភ្នំពេញកាន់តែខិតជិតគ្នាហើយនឹងធ្វើឱ្យប្រជាពលរដ្ឋនៅអរិយក្សត្រកាន់តែមានភាពងាយស្រួលក្នុងការធ្វើដំណើរចេញ ចូលភ្នំពេញ ដូចជាការធ្វើដំណើរមកធ្វើការនៅភ្នំពេញនិងត្រលប់ទៅស្នាក់នៅតំបន់អរិយក្សត្រវិញដោយងាយស្រួល ។

បើតាមមន្ត្រីជាន់ខ្ពស់នៃក្រសួងសាធារណការនិងដឹកជញ្ជូនបានបង្ហើបថា គម្រោងនេះអាចនឹងចាប់ផ្ដើមបើកការដ្ឋាននៅចុងឆ្នាំ ២០២៣នេះ ឬនៅដើមឆ្នាំ២០២៤ខាងមុខ ៕