កំណើនសេដ្ឋកិច្ចដ៏រឹងមាំរបស់តំបន់អាស៊ាននឹងជួយជំរុញដល់ការវិនិយោគលើទីផ្សារអចលនទ្រព្យក្នុងតំបន់

ដោយ: សហសេវិក
អន្តរជាតិ: តំបន់អាស៊ាននៅតែជាប៉ូលសេដ្ឋកិច្ចមួយដែលមានការរីកចម្រើនលឿនបំផុតនៅលើពិភពលោក។ នេះបើយោងតាមការស្រាវជ្រាវក្នុងរបាយការណ៍ Southeast Asia Outlook ឆ្នាំ២០២៦ របស់ក្រុមហ៊ុន Cushman & Wakefield។

ផលទុនជាតិសរុប (GDP) របស់តំបន់អាស៊ានបានបន្តសម្រេចបាននូវកំណើនទោះបីជាបរិយាកាសពាណិជ្ជកម្មពិភពលោកមានភាពច្របូកច្របល់កាលពីឆ្នាំមុនយ៉ាងណាក្តី ដោយការប៉ាន់ស្មានបានបង្ហាញពីការកើនឡើង៤,៨%សម្រាប់ឆ្នាំ ២០២៥។

នៅឆ្នាំ២០២៦ កំណើន GDP ត្រូវបានគេរំពឹងថា នឹងកើនឡើង៤,៣%។ របាយការណ៍បានបង្ហាញថា ការប្រើប្រាស់ឯកជន ដែលជាកត្តាជំរុញកំណើនដ៏សំខាន់នៅក្នុងតំបន់ នៅតែមានភាពធន់ ដោយសារអត្រាភាពគ្មានការងារធ្វើមានកម្រិតទាប និងការកើនឡើងនៃប្រាក់ចំណូលគ្រួសារ។

ក្រុមហ៊ុន Cushman & Wakefield វាយតម្លៃថា សូចនាករសេដ្ឋកិច្ចវិជ្ជមានទាំងនេះ រួមផ្សំជាមួយនឹងកត្តាប្រជាសាស្ត្រអំណោយផល និងការអភិវឌ្ឍហេដ្ឋារចនាសម្ព័ន្ធយ៉ាងឆាប់រហ័ស នឹងធ្វើឱ្យតំបន់អាស៊ានបោះជំហានក្លាយជាប៉ូលសេដ្ឋកិច្ចធំបំផុតទី៤នៅលើពិភពលោក។

កំណើនសេដ្ឋកិច្ចនេះត្រូវបានគេរំពឹងថានឹងផ្តល់អត្ថប្រយោជន៍ដល់វិស័យអចលនទ្រព្យ ខណៈការវិនិយោគនៅក្នុងតំបន់អាស៊ានបន្តបង្ហាញសន្ទុះប្រកបដោយស្ថិរភាព។

នៅឆ្នាំ២០២៥ ការវិនិយោគលើទីផ្សារអចលនទ្រព្យរបស់តំបន់នេះសម្រេចបានទំហំទឹកប្រាក់សរុបប្រមាណ២១,៨ពាន់លានដុល្លារអាមេរិក ដែលកើនឡើងជិត១៦ភាគរយបើធៀបនឹងឆ្នាំ២០២៤៕ប្រភព: Edgeprop៕

ក្រសួងស្ថាប័នចំនួន១៩រៀបចំ “ក្របខ័ណ្ឌទស្សនាទាន និង ផែនទីបង្ហាញផ្លូវនៃការប្រមើលអនាគតនៅកម្ពុជាឆ្នាំ២០៣០

ដោយៈ ចំណាន

ភ្នំពេញៈ ក្រុមមន្រ្តីមកពីក្រសូង ស្ថាប័នចំនួន១៩ បានចូលរួមកិច្ចប្រជុំពិគ្រោះយោបល់អន្ដរក្រសួងស្ដីពី ការរៀបចំ “ក្របខ័ណ្ឌទស្សនាទាន និង ផែនទីបង្ហាញផ្លូវនៃការប្រមើលអនាគត (foresight) នៅកម្ពុជា ឆ្នាំ២០៣០”។

ក្នុងស្មារតីបុរេសកម្មដើម្បីបុព្វហេតុ នៃការអភិវឌ្ឍជាតិរយៈពេលវែង នាព្រឹកថ្ងៃទី១៣ ខែ មីនា ឆ្នាំ ២០២៦ នៅទីស្តីការក្រសួងសេដ្ឋកិច្ច និងហិរញ្ញវត្ថុ លោកបណ្ឌិតសភាចារ្យហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានដឹកនាំកិច្ចប្រជុំពិគ្រោះយោបល់អន្តរក្រសួងកម្រិតថ្នាក់ដឹកនាំ ដោយមានការអញ្ជើញចូលរួមពី ថ្នាក់ដឹកនាំ និងមន្ត្រីជំនាញតំណាងក្រសួង-ស្ថាប័នចំនួន១៩ ដើម្បីពិនិត្យ និងផ្តល់ធាតុចូលលើសេចក្តីព្រាង “ក្របខ័ណ្ឌទស្សនាទាន និង ផែនទីបង្ហាញផ្លូវនៃការប្រមើលអនាគត នៅកម្ពុជាឆ្នាំ២០៣០”។

កិច្ចប្រជុំបានផ្ដោតការពិភាក្សា លើភាពចាំបាច់បន្ទាន់នៃឧបករណ៍ប្រមើលអនាគត (Foresight) ក្នុងបរិការណ៍ដែលពិភពលោកកំពុងជួបប្រទះនូវចល័តភាព ភាពមិនប្រាកដប្រជា មិស្សភាពនិងភាពមន្ទិល (Volatility, Uncertainty, Complexity and Ambiguity—VUCA) ។

ក្នុងបរិការណ៍នេះ ការគិតគូរ និងរៀបចំគោនយោបាយដើម្បីឆ្លើយតបនឹងបញ្ហាប្រឈម ឬព្រឹត្តិការណ៍ ដែលមិននឹកស្មានដល់ (Wild Cards) ការប្រមើលអនាគតដែលជា “ការគិតគូរជាប្រព័ន្ធ” មានតួនាទីដ៏សំខាន់បំផុត ដើម្បីប្រែក្លាយប្រព័ន្ធរដ្ឋបាលសាធារណៈ ឱ្យក្លាយជាប្រព័ន្ធរ៉ាដា ដែលអាចស្កេនរកសញ្ញាផ្លាស់ប្តូរសកល និង ត្រៀមខ្លួនគ្រប់គ្រងកត្តាចៃដន្យនានា ឱ្យបានទាន់ពេលវេលា និងមានប្រសិទ្ធភាព ក្នុងដំណើរឆ្ពោះទៅសម្រេចចក្ខុវិស័យកម្ពុជាឆ្នាំ២០៥០។

ការរៀបចំក្របខ័ណ្ឌទស្សនាទាន និងផែនទីបង្ហាញផ្លូវខាងលើ មានគោលដៅ ដើម្បីដាក់ចេញនូវផែនការជាជំហាន ក្នុងការកសាងមូលដ្ឋានគ្រឹះ ដើម្បីត្រៀមខ្លួនចាប់យកការប្រើប្រាស់ ក្របខ័ណ្ឌការប្រមើលអនាគតឱ្យបានពេញលេញ ចាប់ពីឆ្នាំ២០៣០ តទៅតាមរយៈទី១). ការបញ្ជ្រាបទស្សនាទានការប្រមើលអនាគត ទៅដល់ក្រសួង-ស្ថាប័ន ដើម្បីត្រៀមខ្លួនក្នុងការចាប់យក ការប្រើប្រាស់ក្របខ័ណ្ឌគិតគូរពីចម្ងាយ ទី២) ការពង្រឹងសមត្ថភាពមន្រ្តី និងស្ថាប័នអំពីក្របខ័ណ្ឌការប្រមើលអនាគត ទៅក្នុងការរៀបចំគោលនយោបាយ និងយុទ្ធសាស្ត្រសំខាន់របស់រាជរដ្ឋាភិបាល និងទី៣). ការគិតគូររៀបចំក្របខ័ណ្ឌស្ថាប័ន ដើម្បីដឹកនាំ និងសម្របសម្រួលការងារប្រមើលអនាគត កម្រិតរាជរដ្ឋាភិបាល ឱ្យមានស្តង់ដារ និងប្រសិទ្ធភាពខ្ពស់ ស្របតាមឧត្តមានុវត្តន៍ក្នុងតំបន់។

លោកបណ្ឌិតសភាចារ្យ ហ៊ាន សាហ៊ីប ប្រធានអង្គប្រជុំ បានវាយតម្លៃខ្ពស់ ចំពោះក្រុមការងាររៀបចំសេចក្តីព្រាង ក្របខ័ណ្ឌទស្សនាទាន និងផែនទីបង្ហាញផ្លូវដ៏មានសារៈសំខាន់នេះ ។ ជាមួយគ្នានេះ លោកបានវាយតម្លៃខ្ពស់ ចំពោះតំណាងក្រសួង-ស្ថាប័នពាក់ព័ន្ធ ដែលបានចូលរួមយ៉ាងសកម្ម និងចែករំលែកនូវមតិយោបល់ ក៏ដូចជាគំនិតផ្ដួចផ្ដើមផ្សេងៗ សំដៅជំរុញឱ្យការរៀបចំ ឯកសារបង្គោលចរយុទ្ធសាស្រ្តដ៏មានសារៈសំខាន់នេះ ឱ្យកាន់តែមានភាពគ្រប់ជ្រុងជ្រោយ និង ស៊ីជម្រៅ៕

វៀតណាមកំពុងសាងសង់គម្រោងអចលនទ្រព្យធំៗចំនួន ២៧ ដែលមានតម្លៃជាង១១៥ ពាន់លានដុល្លារអាមេរិក

ដោយ: សហសេវិក
អន្តរជាតិ: យោងតាមរបាយការណ៍មួយបានបង្ហាញថា ប្រទេសវៀតណាមមានគម្រោងអភិវឌ្ឍន៍ទីក្រុងខ្នាតយក្សចំនួន ២៧ ដែលមានទំហំដើមទុនវិនិយោគសរុបលើសពី១១៥ពាន់លានដុល្លារអាមេរិក។នេះបើយោងតាមការចុះផ្សាយដោយកាសែត Vnexpress។

ទីភ្នាក់ងារវាយតម្លៃឥណទាន S&I Ratings ដែលមានមូលដ្ឋាននៅទីក្រុងហាណូយ បានឱ្យដឹងថា គម្រោងនីមួយៗគ្របដណ្តប់លើផ្ទៃដីរាប់រយទៅរាប់ពាន់ហិកតា រួមមានគម្រោងអភិវឌ្ឍដែលទើបនឹងដាក់ឱ្យដំណើរការថ្មី កំពុងសាងសង់ ឬទើបតែត្រូវបានអនុម័តទូទាំងប្រទេស។

របាយការណ៍ខាងលើបានបន្តថា ចំនួនជាង៥០ភាគរយនៃការវិនិយោគសរុបត្រូវបានដឹកនាំដោយក្រុមហ៊ុនអភិវឌ្ឍន៍ធំៗ រួមមាន ក្រុមហ៊ុន Vingroup និង ក្រុមហ៊ុន Sun Group ដែលឆ្លុះបញ្ចាំងពីការប្រកួតប្រជែងកាន់តែខ្លាំងឡើងដើម្បីអភិវឌ្ឍគម្រោងទីក្រុងធំៗ។

តំបន់ភាគខាងជើងប្រទេសវៀតណាមមានគម្រោងអចលនទ្រព្យធំៗចំនួន៩ ដែលភាគច្រើនស្ថិតនៅក្នុង និងជុំវិញទីក្រុងហាណូយ ក៏ដូចជាខេត្ត Hung Yen និងខេត្ត Quang Ninh។

តំបន់ភាគកណ្តាលវៀតណាមមានគម្រោងចំនួន៨ ដែលក្នុងនោះគម្រោងធំជាងគេ មានឈ្មោះថា Cam Lam ក្នុងខេត្ត Khanh Hoa ដែលត្រូវបានអភិវឌ្ឍដោយសម្ព័ន្ធក្រុមហ៊ុន Vinhomes។ គម្រោងនេះលាតសន្ធឹងលើផ្ទៃដីជាង ១០.០០០ ហិកតា និងមានទុនវិនិយោគជិត១១ពាន់លានដុល្លារ។

តំបន់ភាគខាងត្បូងវៀតណាមមានគម្រោងធំៗចំនួន១០ ដែលក្នុងនោះចំនួន៥០ភាគរយនៃគម្រោងទាំងនោះកំពុងស្ថិតក្នុងដំណាក់កាលដំបូងនៃការស្នើសុំការអនុម័តទុនវិនិយោគ៕ប្រភព: Vnexpress៕

ផ្ទៃដីប្រព័ន្ធអេកូឡូស៊ីទំហំជាង៨២,០០០ហិកតា និងតំបន់សហគមន៍ទេសចរណ៍ចំនួន១៦កំពុងសហការជាមួយគម្រោងCamAdapt

ដោយៈ ចំណាន

ភ្នំពេញៈ ប្រព័ន្ធអេកូឡូស៊ីជាង៨២,០០០ហិកតា និងតំបន់សហគមន៍ការពារធម្មជាតិចំនួន១៦ ដែលគ្រប់គ្រងដោយក្រសួងបរិស្ថាន កំពុងសហការជាមួយគម្រោងCamAdapt ដើម្បីពង្រឹងការបន្ស៊ាំនឹងការប្រែប្រួលអាកាសធាតុ ភាពធន់ និងការធ្វើពិពិធកម្មជីវភាពរស់នៅ នៅតាមតំបន់ឆ្នេរកម្ពុជា។

ក្រសួងបរិស្ថាន តាមរយៈគម្រោង CamAdapt បានរៀបចំសិក្ខាសាលាពិគ្រោះយោបល់ស្តីពី “ការពង្រឹងបណ្តាញសហគមន៍តំបន់ការពារធម្មជាតិ និងការត្រួតពិនិត្យឡើងវិញ នូវវឌ្ឍនភាពនៃការអភិរក្សសហគមន៍”។

សិក្ខាសាលានេះ មានការអញ្ជើញចូលរួម ពីតំណាងមន្ទីរបរិស្ថានខេត្ត និងតំណាងសហគមន៍តំបន់ការពារធម្មជាតិ នៃខេត្តកំពត និងខេត្តកោះកុង ដើម្បីពង្រឹងកិច្ចសហប្រតិបត្តិការ នៅក្នុងបណ្តាញសហគមន៍ កែលម្អផែនការគ្រប់គ្រង និងធ្វើសមាហរណកម្មវិធានការបន្ស៊ាំនឹងការប្រែប្រួលអាកាសធាតុ ព្រមទាំងលើកកម្ពស់ការផ្តល់អាទិភាពយេនឌ័រ នៅក្នុងការគ្រប់គ្រងប្រព័ន្ធអេកូឡូស៊ីនៅតំបន់ឆ្នេរ។

ជាលទ្ធផល សហគមន៍តំបន់ការពារធម្មជាតិទាំង១៦ បានធ្វើបច្ចុប្បន្នភាព និងកែសម្រួលផែនការគ្រប់គ្រង សម្រាប់សហគមន៍នីមួយៗ ដើម្បីបំពេញចន្លោះខ្វះខាត លើការបន្ស៊ាំនឹងការប្រែប្រួលអាកាសធាតុ ការគ្រប់គ្រងប្រព័ន្ធអេកូឡូស៊ី ការចូលរួមរបស់សហគមន៍ និងការបញ្ជ្រាបយេនឌ័រ។

ព្រឹត្តិការណ៍ការណ៍នេះ បានជួយពង្រឹងសមត្ថភាពក្នុងការដោះស្រាយបញ្ហាប្រឈមនានា ដែលបង្កឡើងដោយអាកាសធាតុ ព្រមទាំងធានាបាននូវការចូលរួម ពីគ្រប់សមាសភាព ក្នុងកិច្ចការអភិរក្ស និងការអភិវឌ្ឍសហគមន៍។

គម្រោងCamAdapt ត្រូវបានផ្តល់ថវិកាដោយមូលនិធិបរិស្ថានសកល (GEF) និងអនុវត្តដោយក្រសួងបរិស្ថាន រដ្ឋបាលជលផល និងអង្គការស្បៀងអាហារ និងកសិកម្មនៃអង្គការសហប្រជាជាតិ (FAO) ប្រចាំប្រទេសកម្ពុជា៕

ក្រុមការងារវិស័យឯកជនពិភាក្សាពីបញ្ហាប្រព័ន្ធសុវត្ថិភាព ចំណតនៅក្នុងអគារCondo និងអគារពាណិជ្ជកម្មខ្ពស់ៗ

ដោយៈ គង់ សូរិយា

ភ្នំពេញៈ ក្រុមការងារផ្នែកឯកជន ក្រុមការងារ “ឌ” “ផ្នែកសំណង់ និងអចលនទ្រព្យ” នៃវេទិការាជរដ្ឋាភិបាល-ផ្នែកឯកជនបានបើកកិច្ចប្រជុំពាក់ព័ន្ធនឹងបញ្ហាក្នុងវិស័យសំណង់។

កិច្ចប្រជុំនេះ ដឹកនាំដោយ ឧកញ៉ាបណ្ឌិត តាន់ មុន្នីវណ្ណ សហប្រធានក្រុមការងារ “ឌ” តំណាងផ្នែកឯកជន។

កិច្ចប្រជុំនេះក៏មានការចូលរួមផងដែរពីសំណាក់ លោកឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា តំណាងក្រុមហ៊ុន ខ្មែរ រៀល អ៊ីស្ទេត ក្រុមហ៊ុនបុរី ខេស៊ី ឯ.ក អគ្គនាយកក្រុមហ៊ុន ព្រុំ មុន្នីទេ, អគ្គនាយកក្រុមហ៊ុន សេម អេសអិន រៀលធី ឯ.ក។ តំណាងសមាគមសហព័ន្ធវិនិយោគិនកម្ពុជា និងតំណាងក្រុមហ៊ុនឯកជនពាក់ព័ន្ធក្នុងវិស័យសំណង់ និងអចលនទ្រព្យមួយចំនួនទៀតផងដែរ។

កិច្ចប្រជុំនេះមានគោលបំណង ដើម្បីបន្តធ្វើការពិនិត្យ ពិភាក្សាលើបញ្ហាប្រឈមដែលនៅសេសសល់ និងបន្តលើកឡើងនូវបញ្ហាប្រឈមថ្មីៗបន្ថែមទៀត ក្នុងវិស័យយសំណង់ និងអចលនទ្រព្យ ដើម្បីដាក់ស្នើសុំដំណោះស្រាយជាមួយនឹងដៃគូ គឺក្រសួងរៀបចំដែនដី នគរូបនីយកម្ម និងសំណង់ នាពេលខាងមុខនេះ។

ជាលទ្ធផល កិច្ចប្រជុំបានធ្វើការពិនិត្យ ពិភាក្សាលើបញ្ហាប្រឈមមួយចំនួនរួមមាន៖ ១.ការពិភាគ្សាលើ អនុក្រឹត្យលេខ០៣ អនក្រ.បក “ស្តីពីការគ្រប់គ្រងសន្តិសុខសុវត្ថិភាព តាមទីតាំងរស់នៅប្រមូលផ្តុំ” ២.បញ្ហាចំណតនៅក្នុងអគារCondo និងអគារពាណិជ្ជកម្មខ្ពស់ៗ រួមនឹងបញ្ហាប្រឈមមួយចំនួនផ្សេងទៀតផងដែរ៕

រដ្ឋាភិបាលចាប់ផ្តើមរៀបចំទិន្នន័យហេដ្ឋារចនាសម្ព័ន្ធផ្លូវថ្នល់ សម្រាប់ការផលិតផែនទីគោល

ដោយៈ និស្ស័យ

ភ្នំពេញៈ ក្រុមមន្រ្តីក្រសួងសាធារណការ និងដឹកជញ្ជូនបានបើកកិច្ចប្រជុំក្រុមការងារ រៀបចំទិន្នន័យហេដ្ឋារចនាសម្ព័ន្ធផ្លូវថ្នល់ សម្រាប់ការផលិតផែនទីគោល។

កិច្ចប្រជុំនេះ ដឹកនាំដោយលោកយិត បុណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំក្រុមការងាររៀបចំទិន្នន័យហេដ្ឋារចនាសម្ព័ន្ធផ្លូវថ្នល់ សម្រាប់ការផលិតផែនទីគោល ដោយមានការចូលរួមពីសំណាក់ថ្នាក់ដឹកនាំក្រសួង និងមន្ត្រីជំនាញពាក់ព័ន្ធផងដែរ។

កិច្ចប្រជុំរៀបចំឡើងដើម្បីពិភាក្សាកម្រិតផ្ទៃក្នុង សម្រាប់អ្នកបច្ចេកទេសក្រសួង ដោយយោងទៅតាមសេចក្តីសម្រេច ស្តីពីការបង្កើតក្រុមការងារអន្តរក្រសួង ដើម្បីរៀបចំទិន្នន័យហេដ្ឋារចនាសម្ព័ន្ធ ផ្លូវថ្នល់សម្រាប់ការផលិតផែនទីគោល៕

រដ្ឋមន្រ្តីក្រសួងកសិកម្មស្វាគមន៍ក្រុមហ៊ុនធំមួយរបស់អាល្លឺម៉ង់ ក្នុងការកែច្នៃម្រេចនៅកម្ពុជា

ដោយៈ និស្ស័យ

ភ្នំពេញៈ រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទលោកឌិត ទីណា អញ្ជើញជួបជាមួយ ឯកឧត្តមឯកអគ្គរដ្ឋទូត Stefan Messerer និងប្រតិភូក្រុមហ៊ុនអាល្លឺម៉ង់Fuchs Gruppe។

ក្នុងជំនួបនេះ លោកឌិត ទីណាបានស្វាគមន៍លោក Stefan Messerer ឯកអគ្គរដ្ឋទូតសហព័ន្ធអាល្លឺម៉ង់ និងប្រតិភូក្រុមហ៊ុនអាល្លឺម៉ង់ Fuchs Gruppe ដឹកនាំដោយលោកអគ្គនាយក Nil Meyer-Pries ក្នុងជំនួបសម្តែងការគួរសម និងពិភាក្សាការងារ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។

នាឱកាសនៃជំនួប លោករដ្ឋមន្រ្តី បានកត់សម្គាល់អំពីកិច្ចសហប្រតិបត្តិការល្អរវាងកម្ពុជា និងអាល្លឺម៉ង់លើវិស័យកសិកម្ម ជាពិសេសភាពជាដៃគូល្អ ក្នុងការបណ្ដុះបណ្ដាលការអនុវត្តកសិកម្មល្អ (GAP) ដែលបានជួយលើកស្ទួយ គុណភាពកសិផលកម្ពុជា សម្រាប់នាំចេញទៅទីផ្សារអន្តរជាតិ។

លោករដ្ឋមន្ត្រីឌិត ទីណា ក៏បានស្វាគមន៍ផែនការរបស់ក្រុមហ៊ុន Fuchs Gruppe ក្នុងការវិនិយោគលើការកែច្នៃម្រេចកម្ពុជា សំដៅផ្ដល់តម្លៃបន្ថែមខ្ពស់ ក្នុងខ្សែច្រវាក់តម្លៃកសិកម្មកម្ពុជា និងជំរុញការនាំចេញកសិផលកម្ពុជាទៅកាន់ទីផ្សារអន្តរជាតិ។

តាមរយៈជំនួបនេះ ភាគីកម្ពុជា-អាល្លឺម៉ង់ បានបង្ហាញសុទិដ្ឋិនិយម ចំពោះកិច្ចសហប្រតិបត្តិការរយៈពេលវែង ដើម្បីជំរុញកសិ-ពាណិជ្ជកម្ម និងការបង្កើនប្រសិទ្ធភាព និងនិរន្តរភាពនៃវិស័យកសិកម្ម៕

បណ្តាប្រទេសចំនួន៤ កំពុងនាំមុខគេក្នុងការសម្រេចបានកំណើនតម្លៃអចលនទ្រព្យសកលនាពេលបច្ចុប្បន្ន

ដោយ: សហសេវិក
អន្តរជាតិ: ទិដ្ឋភាពនៃការវិនិយោគលើអចលនទ្រព្យសកលកំពុងផ្លាស់ប្តូរយ៉ាងឆាប់រហ័ស ដោយទីផ្សារមួយចំនួននឹងនាំមុខទីផ្សារផ្សេងទៀតនៅឆ្នាំ២០២៦។ ខាងក្រោមនេះជាប្រទេសទាំង ៤ ដែលនាំមុខគេលើកំណើនតម្លៃអចលនទ្រព្យសកលនាពេលបច្ចុប្បន្ន។

ទី១: ប្រទេសព័រទុយហ្កាល់

ក្នុងរយៈពេល៥ឆ្នាំកន្លងមក តម្លៃផ្ទះនៅប្រទេសព័រទុយហ្គាល់បានហក់ឡើង ៤៨% ដែលធ្វើឲ្យប្រទេសនេះក្លាយជាប្រទេសដែលមានសក្តានុពលផ្នែកអចលនទ្រព្យលំដាប់កំពូលមួយរបស់ពិភពលោក។

ទោះបីជាមានភាពមិនប្រាកដប្រជាផ្នែកសេដ្ឋកិច្ចពិភពលោក និងកម្រិតអត្រាការប្រាក់ខ្ពស់យ៉ាងណាក្តី ទីផ្សារអចលនទ្រព្យរបស់ប្រទេសព័រទុយហ្គាល់នៅតែមានភាពធន់ និងសម្រេចបានលទ្ធផលល្អប្រសើរលើសពីការរំពឹងទុក។

ទី២: ប្រទេសម៉ិកស៊ិក

ទីផ្សារអចលនទ្រព្យរបស់ប្រទេសម៉ិកស៊ិកកំពុងរីកចម្រើន ដោយសារតែគម្រោងអភិវឌ្ឍន៍អចលនទ្រព្យប្រណីត។ នៅទូទាំងប្រទេសម៉ិកស៊ិក តម្លៃផ្ទះបានកើនឡើង៨,៨% ក្នុងឆ្នាំ ២០២៤ ខណៈទំហំទីផ្សារទាំងមូលត្រូវបានប៉ាន់ប្រមាណថា ឈានដល់៥,៧៤ ទ្រីលានដុល្លារនៅឆ្នាំ២០២៥។

ទី៣: ប្រទេសក្រិក

ទីផ្សារអចលនទ្រព្យរបស់ប្រទេសក្រិកបានទទួលអត្ថប្រយោជន៍ពីឥទ្ធិពលនៃវិស័យទេសចរណ៍ និងការលើកទឹកចិត្តពន្ធ។ វិស័យនេះត្រូវបានគេរំពឹងថា នឹងឈានដល់ទំហំទឹកប្រាក់១,៥៦ទ្រីលានដុល្លារនៅឆ្នាំ២០២៩ ដោយលំហូរជនបរទេស កំពុងកើនឡើងនិងជំរុញតម្រូវការលំនៅឋាន។

ទី៤: ប្រទេសតួកគី

ទោះបីជាទីផ្សារមានភាពប្រែប្រួលយ៉ាងណាក្តី តម្រូវការអចលនទ្រព្យនៅក្នុងប្រទេសតួកគីនៅតែមានភាពរឹងមាំ និងមានសក្តានុពលខ្ពស់ផ្នែកលំនៅឋានជួល។ទីក្រុងអ៊ីស្តង់ប៊ុលបានជាប់ឈ្មោះជាទីក្រុងមួយលើពិភពលោក ដែលសម្រេចបានកំណើនខ្ពស់បំផុតនៃតម្លៃអចលនទ្រព្យ ជាពិសេសនៅក្នុងផ្នែកលំនៅឋានប្រណីត៕ប្រភព: Benoit Properties៕

កម្ពុជាពិភាក្សាជាមួយអ្នកជំនាញការWorld Bankទាក់ទងការតភ្ជាប់ការដឹកជញ្ជូនកម្ពុជា ឡាវ

ដោយៈ ម៉ាណា

ភ្នំពេញៈ មន្រ្តីជាន់ខ្ពស់ក្រសួងសាធារណការ និងដឹកជញ្ជូនបានបើកកិច្ចជំនួបពិភាក្សា ការងារជាមួយក្រុមជំនាញការ Worldbank ស្តីពីការតភ្ជាប់ការដឹកជញ្ជូនកម្ពុជា-ឡាវ។

កិច្ចប្រជុំនេះដឹកនាំដោយលោកជំទាវ សន សុភាវត្តី អគ្គនាយក នៃអគ្គនាយកដ្ឋានភស្តុភារកម្ម បានអញ្ជើញដឹកនាំកិច្ចជំនួបពិភាក្សាការងារជាមួយក្រុមជំនាញការក្រសួង និងមានការចូលរួមពីប្រធាននាយកដ្ឋាន ក្រុមការងារបច្ចេកទេសWorldbank និងមន្ត្រីជំនាញផងដែរ។

គោលបំណងនៃកិច្ចជំនួបពិភាក្សានេះគឺ ដើម្បីផ្លាស់ប្តូរយោបល់បច្ចេកទេស និងកំណត់អាទិភាពសំខាន់ៗ សម្រាប់ការពង្រឹងការតភ្ជាប់ការដឹកជញ្ជូន និងភស្តុភារកម្មរវាងកម្ពុជា និងឡាវ៕

ភាពតានតឹងនៅមជ្ឈិមបូព៌ាអាចបង្វែរទិសដៅនៃលំហូរមូលធនសកល ទៅកាន់ទីផ្សារអចលនទ្រព្យរបស់ទីក្រុងហុងកុង

ដោយ: សហសេវិក
អន្តរជាតិ: ក្រុមអ្នកវិភាគលើកឡើងថា ភាពតានតឹងកាន់តែខ្លាំងឡើងនៅតំបន់មជ្ឈិមបូព៌ាអាចបង្វែរទិសដៅនៃលំហូរមូលធនសកល និងជំរុញតម្រូវការអចលនទ្រព្យនៅទីក្រុងហុងកុង ខណៈវិនិយោគិនស្វែងរកមជ្ឈមណ្ឌលហិរញ្ញវត្ថុដែលមានស្ថិរភាព ស្របពេលភាពមិនប្រាកដប្រជាខាងភូមិសាស្ត្រនយោបាយកើនឡើង។

ការប្រែប្រួលនេះកើតឡើង ខណៈការបង្វែរទិសដៅនៃលំហូរមូលធនសកលកំពុងជះឥទ្ធិពលលើទីផ្សារអចលនទ្រព្យប្រណីត ដូចជានៅទីក្រុងស៊ីដនី ទីក្រុងឌូបៃ និងទីក្រុងហុងកុង។

ធនាគារ Citigroup បានគូសបញ្ជាក់នៅក្នុងរបាយការណ៍មួយថា អស្ថិរភាពយូរអង្វែងនៅក្នុងតំបន់មជ្ឈិមបូព៌ាអាចជំរុញឱ្យលំហូរមូលធន និងមនុស្សមានទេព្យកោសលខ្ពស់ងាកចេញពីតំបន់មជ្ឈិមបូព៌ា។

របាយការណ៍ខាងលើបានបន្តថា ទីក្រុងហុងកុងរបស់ប្រទេសចិនអាចស្រូបទាញបានលំហូរទាំងនោះ ដែលអាចជួយគាំទ្រដល់តម្រូវការលំនៅឋាន និងការិយាល័យ។

ជាមួយគ្នានេះ ធនាគារវិនិយោគ Morgan Stanley បានលើកឡើងថា ការវិវឌ្ឍថ្មីៗនៅតំបន់មជ្ឈិមបូព៌ាអាចប្រែក្លាយទីក្រុងហុងកុងទៅជាមជ្ឈមណ្ឌលហិរញ្ញវត្ថុជំនួសដ៏សំខាន់មួយ (Alternative) ដោយសារកត្តាស្ថិរភាព និងការយកអត្រាពន្ធទាបរបស់ទីក្រុងហុងកុង។

ទីផ្សារលំនៅឋានលំដាប់ខ្ពស់របស់ទីក្រុងហុងកុងកំពុងបង្ហាញសញ្ញានៃការងើបឡើងវិញ។ ទីក្រុងហុងកុងបានកត់ត្រាការលក់ផ្ទះលំដាប់ខ្ពស់ចំនួន៨១យូនីត ដែលមានតម្លៃលើសពី១០លានដុល្លារអាមេរិកក្នុងមួយយូនីតនៅក្នុងត្រីមាសទី៤ ឆ្នាំមុន កើនឡើង៤៥ភាគរយធៀបនឹងត្រីមាសទី៣។

ក្រុមអ្នកវិភាគនៅធនាគារ J.P. Morgan បានអះអាងថា ទីក្រុងហុងកុងនៅតែជាគោលដៅទាក់ទាញសម្រាប់វិនិយោគិនអចលនទ្រព្យនៅបរទេស ខណៈជនបរទេសមិនប្រឈមមុខនឹងការរឹតបន្តឹងខ្លាំងលើការទិញផ្ទះពីអាជ្ញាធរទេ បើប្រៀបធៀបជាមួយទីផ្សារប្រកួតប្រជែងដូចជាប្រទេសសិង្ហបុរី៕ប្រភព: SCMP៕

1...114115116...3,340 Page 115 of 3,340