ដោយៈគង់ សូរិយា

       ភ្នំពេញៈ ក្នុងគោលដៅលើកទឹកចិត្តអតិថិជន ទទួលបានដីលំហែរកំសាន្តចុងសប្តាហ៍ ក្រុមហ៊ុនYoungssia Real Estateបានផ្តល់កញ្ចប់បង់ប្រាក់លើសទឹកចិត្តដល់អតិថិជន ត្រឹម៥០ដុល្លារប៉ុណ្ណោះក្នុងមួយខែ។

អគ្គនាយកក្រុមហ៊ុនYoungsia Real EstateលោកCololer Tanបានមានប្រ​សាសន៍ឲ្យដឹងកាលពីចុងសប្តាហ៍មុនថា គំរោងឋានសួគ៌លំហែរបាន និងកំពុងកសាងហេដ្ឋារចនាសម្ព័ន្ឋជាច្រើន ដើម្បីបំពេញនូវទីតាំងមួយ ដែលមានភាពស័ក្តិសម ជាទីតាំងលំហែរកាយពិតប្រាកដ និងជាទីតាំងដែលអតិថិជន ទទួលអារម្មណ៍មានផាសុខភាព និងមនោរម្យសំរាប់ការសំរាក​បន្ទាប់ពីនឿយហត់ពីការងារ។

លោកបន្តថា “ការសម្រេចដាក់ឈ្មោះគំរោងនេះ “ឋានសួគ៌លំហែរ” ព្រោះទីតាំងនេះ បណ្តុំទៅដោយរមណីយដ្ឋានទេសចរណ៍កែច្នៃ និងធម្មជាតិ ដោយជុំវិញទីនេះមានជួរភ្នំ មានទឹកធ្លាក់ពីលើភ្នំ និងទេសភាពដ៏ស្រស់ត្រ​កាល”។លោកបន្ថែមថា “យើងកំពុងអភិវឌ្ឍន៍តំបន់នេះ ជារមណីយដ្ឋានលំហែរ ដោយមានដាំផ្កាក្ងោក៤០០ដើម មានស្រះទឹកសម្រាប់កំសាន្ត មានសួនច្បារ និងទេសភាពជើងភ្នំ១៨០ដឺក្រេ ពិសេសយើងមានផ្តល់ជូនសេវាសន្តិសុខ២៤ម៉ោង”។

លោកCooler Tanជាអ្នកអភិវឌ្ឈន៍ និងជាម្ចាស់គំរោងបូកគោលែន១ បូកគោលែន២ និងបូកគោលែន៣ និងគំរោងឆ្នេរសមុទ្រកោងកាង ដែលសុទ្ឋជាគំរោងទទួលបានការគាំទ្រខ្ពស់ ដោយសារការអភិវឌ្ឍគំរោងនិមួយៗផ្តោតលើនិរន្តរភាពបរិស្ថាន និងមានទស្សនទានរៀបចំផែនការអភិវឌ្ឍន៍ប្រកបដោយចីរភាព។

គំរោង “ឋានសួគ៌លំហែរ”ស្ថិតនៅកៀកនឹងផ្លូវជាតិលេខ៤១ ព្រំប្រទល់រវាងខេត្តតាកែវ និងខេត្តកំពត ពោលគឺស្ថិតនៅក្បែររមណីយដ្ឋានត្រីមាស រមណីយដ្ឋានកំពូលពេជ្រ រមណីយដ្ឋានពុទ្ឋគិរីជាដើម៕

 ដោយៈ គង់ សូរិយា

       ភ្នំពេញៈ អ្នកបើកបរល់ផ្លូវល្បឿនលឿនភ្នំពេញ ព្រះសីហនុបានលើកជាសំណួរចំនួនបី ទាក់ទងនឹងផ្លូវល្បឿនលឿនភ្នំពេញ ព្រះសីហនុប្រវែងជាង១៨៧គីឡូម៉ែត្រ។

ផ្លូវល្បឿនលឿនជាប្រវត្តិសាស្រ្តនេះ ចាប់អនុវត្តន៍ការបង់ប្រាក់ពីថ្ងៃទី១ វិច្ឆិកានេះតទៅហើយ ខណៈមានការលើកឡើងពីតម្លៃ ធ្វើដំណើរខ្ពស់ ពិសេសរដ្ឋរថយន្តកុងទីណ័រ ប៉ុន្តែក្រោមការសម្របសម្រួល ពីក្រសួងសាធា​រណការ និងដឹកជញ្ជូន និងថ្នាក់ដឹកនាំក្រុមហ៊ុនកាលពីអំឡុងសប្តាហ៍មុន គឺក្រុមហ៊ុន នឹងបញ្ចុះតម្លៃថ្លៃធ្វើដំណើរឆ្លងកាត់លើផ្កូវនេះ។

លោកមករា វង្សដែលបានធ្វើដំណើរលើផ្លូវនេះ កាលពីសប្តាហ៍មុនបានលើកឡើងជាសំណួរថា ការធ្វើដំណើរលើផ្លូវនេះ ពិតជារឿងគួរឲ្យរំភើបមួយ ព្រោះវាជាប្រវត្តិសាស្រ្តសម្រាប់កម្ពុជា ដែលវានឹងផ្តល់ផលប្រយោជន៍ និងជម្រុញការរីកចម្រើនសេដ្ឋកិច្ចជាតិ ប៉ុន្តែលោកបានលើកជាសំណួរថា ចំនួនបី ទី១ ហេតុអ្វីផ្លូវនេះ មិនដាក់ភ្លើងបំភ្លឺផ្លួវនៅពេលរាត្រី ព្រោះបើតាមទំហំចំណាយ​២០០០លានដុល្លារ លើការសាងសង់ផ្លូវនេះ គឺជាការចំណា​យច្រើនណាស់ ហេតុអ្វីមិនមានភ្លើងបំភ្លឺនាពេលរាត្រី។ លោកបន្តថា ដើម្បីសុវត្ថិភាពអ្នកបើកបរ និងដើម្បីជាចំណងដៃល្អ និងសម្រាប់ការចងចាំដ៏ល្អរបស់ប្រជាជនកម្ពុជា ក្រុមហ៊ុនគួរតែបំពាក់ភ្លើងបំភ្លឺផ្លូវលើផ្លូវនេះ ព្រោះទំហំចំណាយវាមិនច្រើនពេកនោះទេ។

ទី២ ហេតុអ្វីក្រុមហ៊ុន មិនធ្វើរបងសងខាងផ្លូវឲ្យមានកំពស់ខ្ពស់ជាងនេះ ដើម្បីបង្ការសត្វគោ ក្របីឆ្លងកាត់បាន ព្រោះរបងបច្ចុប្ប​ន្នដែលមានកំពស់ប្រហែល៤០ទៅ៥០សង់ទីម៉ែត្រ គឺគោ ក្របីអាចរត់ឆ្លងកាត់បាន និងសំណួរទី៣ ហេតុអ្វីផ្លូវនេះសាងសង់ដោយគ្មានបច្ចេកទេស កៅស៊ូមិនម៉ដ្ឋ​រលោង និងមានស្នាមបំណះរួចទៅហើយ ខណៈផ្លូវនេះទើបបើកដំណើរការ​ទើបបាន១ខែប៉ុណ្ណោះ។

ជាមួយគ្នានេះ លោកស៊ីវ ម៉េងដែលបានធ្វើដំណើរលើផ្លូវនេះកាលពីសប្តាហ៍មុនផងដែរ ក៏បានលើកឡើងស្រដៀងគ្នាថា ការមានផ្លូវជាប្រវត្តិ​សាស្រ្តនេះ ពិតជាធ្វើឲ្យមនុស្សគ្រប់គ្នាសប្បាយចិត្ត ប៉ុន្តែមិនមែនគ្រប់គ្នាសុទ្ឋតែពេញចិត្តគុណភាពផ្លូវនេះនោះទេ ព្រោះភាពរពើតរពើងរបស់ផ្លូវនេះ និងបំណះលើផ្លូវបានកើតមានរួចទៅហើយ។

លោកបន្តថា “ទំហំចំណាយសាងសង់ផ្លូវនេះធំណាស់ ច្រើនណាស់ ហេតុអ្វីមិនធ្វើឲ្យល្អ និងស័ក្តិសមនឹងតម្លៃលុយដែលបានចំណាយលើវា”។​លោកបន្តថា “យើងសង្ឃឹមថាផ្លូវល្បឿនលឿនភ្នំពេញ បាវិតដែលគ្រោងបើកការដ្ឋានសាងសង់នាខែមិថុនា ឆ្នាំ២០២៣ខាងមុខ នឹងមានគុណភាពល្អជាងផ្លូវទី១នេះ”។

វិស្វករផ្នែកស្ពាន ថ្នល់មួយរូបដែលបានបញ្ចប់ការសិក្សានៅប្រទេសរុស្ស៊ីបាននិយាយក្នុងលក្ខខ័ណ្ឌមិនបញ្ចេញឈ្មោះថា តាមរយៈបទពិសោធន៍របស់លោក និងអ្វីដែលលោកបានមើលឃើញ បន្ទាប់ពីបានធ្វើដំណើរលើផ្លូវនេះកាលពីថ្ងៃច័ន្ទ លោកគិតថា ការចំណាយសាងសង់ផ្លូវនេះអស់ទឹកប្រាក់ចន្លោះពី១០០០ ទៅ១២០០លានដុល្លារអាមេរិកប៉ុណ្ណោះ ប៉ុន្តែទំហំចំណាយប៉ោងធំបែបនេះ ដោយសារក្រុមហ៊ុនChina Road and Bridgeជារបស់រដ្ឋាភិបាលចិន ហេតុនេះរដ្ឋាភិបាលប្រទេសរបស់គេ តម្រូវឲ្យប្រើប្រាស់ក្រុមហ៊ុនមកពីប្រទេសចិន ដូច្នេះផលចំណេញពិតជារឿងធម្មតា សម្រា​ប់ទំនាក់ទំនងមួយ ដែលត្រូវការពឹងគ្នាទៅវិញទៅមក៕

  ដោយៈ វឌ្ឍនៈ

ភ្នំពេញៈ យោងទៅលើការសិក្សាថ្មីមួយ របស់កម្មវិធីអភិវឌ្ឍន៍របស់អង្គការសហប្រជាជាតិ(UNDP) ប្រចាំកម្ពុជាឱ្យដឹងថា វិស័យសំណង់នៅក្នុងប្រទេសកម្ពុជា បានប្រើប្រាស់ថាមពលច្រើនជាងគេ បើធៀបនឹងវិស័យផ្សេងៗទៀត។

ការសិក្សានេះបានរកឃើញថា វិស័យសំណង់នៅប្រទេសកម្ពុជាបានប្រើប្រាស់ថាមពល ប្រមាណ៥០ភាគរយនៃថាមពល ដែលបានប្រើប្រាស់សរុបនៅក្នុងប្រទេស រាប់តាំងពីចាប់ផ្ដើមការសាងសង់សំណង់ដំបូង រហូតដល់សំណង់នោះ បានរួចរាល់និងដាក់ដំណើរការ។

យ៉ាងណាក្ដី អ្នកជំនាញនៃវិស័យសំណង់បៃតង បានជំរុញឱ្យអ្នកអភិ​វឌ្ឍន៍ក្រោយៗ គិតគូរពីការប្រើប្រាស់ថាមពល ដោយសំដៅលើការសាង​សង់អគារបៃតង។

ការកើនឡើងនៃវិស័យសំណង់នេះដែរ កម្ពុជាធ្លាប់ជួបនូវវិបត្តិថាមព​លម្ដងរួចមកហើយកាលពីឆ្នាំ២០១៩ ដោយកាលនោះអាជ្ញាធរអគ្គិសនីបានកាត់ផ្ដាច់អគ្គិសនី នៅតាមតំបន់មួយចំនួន ដើម្បីសន្សំថាមពលទៅប្រើប្រាស់នៅតំបន់ ដែលមានការចាំបាច់ ដូចជា តំបន់ឧស្សាហកម្ម តំបន់ពាណិ​ជ្ជកម្មជាដើម។

លោកហាក់ទ្រី ទេវាយុធ ប្រធាននាយកដ្ឋានអភិវឌ្ឍន៍ធុរៈកិច្ចនៃក្រុមហ៊ុនGolden Tree បានមានប្រសាសន៍ឱ្យដឹងថា កម្ពុជាគួរតែគិតគូរដល់ការសាងសង់អគារបៃតងចាប់ពីពេលតទៅ ពីព្រោះអគារបៃតងវាបានជួយសន្សំសំចៃថាមពល តាំងពីការសាងសង់រហូតដល់អគារដំណើរការ។

លោកបន្តថា “ការសាងសង់អគារបៃតង នឹងជួយកាត់បន្ថយនូវការប្រើប្រាស់ថាមពលអគ្គិសនី ឬក៏ទឹកនៅក្នុងអគារទាំងមូល ពីព្រោះថាអគារប្រភេទនេះ វានឹងទាកយកថាមពលកកើតឡើងវិញ មកប្រើប្រាស់ដូចជាខ្យល់ និងពន្លឺព្រះអាទិត្យជាដើម”។

លោកបន្តថា ជាការពិតណាស់ វិស័យសំណង់គឺជាវិស័យមួយដែលមានការបំពុលបរិស្ថាន ខ្ពស់ជាងវិស័យដទៃទៀត។ ដូច្នេះហើយយើងត្រូវការយកចិត្តទុកដាក់ដល់បញ្ហាបរិស្ថាន ជាក់ស្ដែងក្រុមហ៊ុនរបស់យើង Golden Tree ដែលជាក្រុមហ៊ុនគិតគូរ ដល់សំណង់អគារបៃតងបានចាប់ផ្ដើមអនុវត្តន៍និងជាគំរូ ដល់អ្នកអភិវឌ្ឍន៍អគារនៅក្នុងប្រទេសកម្ពុជា ។

លោកស៊ីម បូវិសាល ទីប្រឹក្សានៃសមាគមទីប្រឹក្សាសមាគមអ្នកផ្ដល់ប្រឹក្សាសំណង់អគារបៃតងកម្ពុជាបានថ្លែងឱ្យដឹងថា កត្តាដែលអ្នកអភិវឌ្ឍន៍សំណង់អគារ នៅក្នុងប្រទេសកម្ពុជា មិនសូវគិតគូរទៅលើអគារបៃតងពីព្រោះតែការសាងសង់អគារបៃតង ត្រូវការចំណាយច្រើនជាងការសាងសង់អគារធម្មតាៗ។

លោកបន្តថា “ប៉ុន្តែអគារបៃតង នឹងធ្វើឱ្យម្ចាស់អគារចំណេញមកវិញនៅពេលសាងសង់រួច ដូចជាសន្សំសំចៃក្នុងការប្រើប្រាស់ថាមពល ក្នុងអគារ ជួយដល់ផាកសុខភាពអ្នកធ្វើការនៅក្នុងអគារ និងមិនបញ្ចេញជាតិពុលទៅក្នុងបរិយាកាស តាមរយៈការប្រើប្រាស់ម៉ាស៊ីនត្រជាក់ច្រើន ប្រើប្រា​ស់ថាមពលច្រើនជាដើម”។

លោកក៏បានជំរុញឱ្យអ្នកអភិវឌ្ឍន៍សំណង់អគារ គួរតែងាកមកគិតគូរពីបរិស្ថាន និងនាំគ្នាចាប់ផ្ដើមសាងសង់អគារបៃតង ខណៈនៅកម្ពុជាមានចំនួនអគារបៃតងតិចតួចបំផុត បើធៀបនឹងប្រទេសក្នុងតំបន់អាស៊ាន ជាពិសេសប្រទេសជិតខាងកម្ពុជា៕

 ដោយៈស៊ីវ ម៉េង

       ភ្នំពេញៈ ការវិនិយោគដីធ្លីនៅតែមានភាពចំណេញខ្ពស់ ធៀបនឹងការវិនិយោគផ្នែកផ្សេងៗទៀត ក្នុងវិស័យអចលនទ្រព្យ ប៉ុន្តែមិនប្រាកដថាអ្នកមានប្រាក់វិនិយោគ សុទ្ឋតែទទួលបានផលចំណេញនោះទេ។

លោក​ឧកញ៉ាកាង សុធី អគ្គ​នាយ​អគ្គនាយក​ក្រុមហ៊ុន Century21 Land Station Real Estate បាន​មានប្រសាសន៍ ឲ្យ​ដឹង​តាម​ទូរស័ព្ទ​កាលពីពេលថ្មីៗនេះ​ថា ការវិនិយោគ​ដីធ្លី អ្នកណា​ក៏​ចង់​លក់​ឆាប់​ដាច់ និង​ទទួលបាន​ផលចំណេញ​លឿន​ដែរ ប៉ុន្តែ​លក្ខ​ខ័​ណ្ឌ​ទីតាំង សណ្ឋាន​ដី​ពិតជា​កត្តា​សំខាន់ ដើម្បី​ឲ្យ​ដី​របស់ខ្លួន​លក់​ឆាប់​ដាច់ និង​ទទួលបាន​ផលចំណេញ​ខ្ពស់។

ទី១ ដី​មាន​ទីតាំងនៅ​ជុំវិញ​វត្ត​អា​រ៉ា​ម

លោក​ឧកញ៉ា​កាង សុធី បានមានប្រសាសន៍​ឲ្យ​ដឹងថា ទោះជា​ប្រជាជន​ខ្មែរ​និយម​ទៅធ្វើ​បុណ្យ​នៅ​វត្ត​អា​រ៉ា​ម​ក្តី តែ​ទីតាំង​ដី​ដែល​នៅក្បែរ​វត្ត​អា​រ៉ា​ម ទាំង​ខាងមុខ​ខាងក្រោយ និង​ជាប់​របង​វត្ត ពិតជា​ដី​មិន​ងាយ​លក់​ចេញ​នោះទេ ទោះជា​ដី​នោះ​មានតម្លៃ​ទាប​ជាង​ទីផ្សារ​ក៏ដោយ។

លោក​បន្តថា ដី​នៅតាម​ជុំវិញ​វត្ត​អា​រ៉ា​ម ពិតជា​មិន​ងាយ​ទាក់ទាញ​ការចាប់អារម្មណ៍​ច្រើន​នោះទេ និង​ប្រហែល​ពួកគេ​មិន​ចង់​មាន​សម្លេង​រំខាន នៅពេល​មានកម្ម​វិធី​បុណ្យទាន​នានា ក៏ដូចជាពាក់ព័ន្ឋនឹង​បញ្ហា​ហុងស៊ុយ​ផងដែរ។

ទី២ដី​មាន​ផ្នូរ​ឬ​ម៉ុង​ខ្មោច​នៅក្បែរ

ជាទូទៅ​មនុស្ស​ណា​ក៏​ស្លាប់​ដែរ តែ​ពេល​ស្លាប់​ពួកគេ​នឹង​ក្លាយជា​ខ្មោច ហេតុនេះ​ទីតាំង​ដី​ដែល​នៅក្បែរ​ផ្នូរខ្មោច ឬ​ចេតិយ មិនគួរ​ទិញ​នោះទេ ដោយ​សារ​មនុស្ស​មិន​ចូលចិត្ត​ផ្នូរ ឬ​ម៉ុង​ខ្មោច​នោះឡើយ។

ការទិញ​ដី​មាន​ទីតាំង​បែបនេះ ពិតជា​ពិបាក​លក់​ចេញ និង​មិន​ងាយ​បាន​ផលចំណេញ។

ទី៣ រាង​ឬ​សណ្ឋាន​ដី

រាង​ឬ​សណ្ឋាន​ដី​ក៏មាន​សារៈសំខាន់ ដើម្បី​ទាក់ទាញ​អ្នកទិញ​បន្ត ឬ​អ្នកវិនិយោគ​ផងដែរ ព្រោះ​បើ​រាង​ដី​មិន​សមស្រប និង​មាន​សណ្ឋាន​វៀច ពិតជា​មិន​ធ្វើ​ឲ្យ​ដី​នោះ​ងាយ​លក់​នោះទេ ហើយ​វា​ក៏​មិន​ឡើងថ្លៃ​លឿន​ដែរ។

លោក​ឧកញ៉ា​កាង សុធី​បាន​ឲ្យ​ដឹងថា ដើម្បី​ដឹង​ពី​រាង​ឬ​សណ្ឋាន​ដី​ណាមួយ សូមកុំ​មើល​នឹង​ភ្នែក​ទទេ តែ​ត្រូវសុំ​ប្លង់​ម្ចាស់​ដី​យកមក​មើល ទើប​យើង​អាច​ដឹងថា​រាង​ឬ​សណ្ឋាន​ដី​នោះ​មាន​លក្ខណៈ​ដូចម្តេច។

ទី៥ ដី​មាន​ប្រវត្តិ​មិន​ច្បាស់លាស់

ដី​មាន​ប្រវត្តិ​មិនសូវ​ច្បាស់លាស់ ច្រើន​ជា​ដី​នៅ​ខេត្ត​ទើប​មានការ​រីកចម្រើន និង​ទាក់ទាញ​ការវិនិយោគ ដែល​បច្ចុប្បន្ន​ដី​ប្រភេទ​នេះ​ច្រើន​មាននៅ​ខេត្តមណ្ឌលគិរី កំពង់ស្ពឺ​ជាដើម ដោយសារ​មាន​មន្ត្រី​ខិលខូច​មួយចំនួន បានចេញ​ប្លង់ដី​ត្រួត​លើ​គ្នា ដែល​ដី​ខ្លះ​មាន​ប្លង់​កាន់កាប់​រហូតដល់៤ ទៅ៥នាក់​ក៏មាន។

ដីដែលគ្មានផ្លូវច្បាស់លាស់

       ដីមានផ្លូវមិនច្បាស់លាស់ ឬគ្មានផ្លូវតែម្តង ហើយបើមានគឺមានតែក្នុងផែនទី មិនគួរវិនិយោគនោះទេ ព្រោះមិនដឹងថា ដីនោះនឹងឡើងនៅពេលណា និងផ្លូវសាងសង់ពេលណាច្បាស់លាស់ឡើយ ប៉ុន្តែក៏មានអ្នកវិនិយោគ​មួយចំនួនហ៊ានប្រឈមហានិភ័យ និងអាចមានឱកាសទទួលបានផលចំណេញខ្ពស់ផងដែរ។

ដីដែលមានផ្លូវទាល់ និងផ្លូវតូច

       ដីដែលមានទីតាំងស្ថិតនៅលើផ្លូវតូចៗ ដែលរថយន្តមិនអាចជៀសគ្នាបាន និងជាដីមានផ្លូវទាល់ វាជាប្រភេទដីមិនងាយឡើងថ្លៃឡើយ ព្រោះតំបន់ដែលមានផ្លូវតូចៗបែបនេះ អ្នកអភិវឌ្ឈន៍ធំៗពួកគាត់មិនងាយទៅអភិវឌ្ឍន៍ឡើយ ព្រោះវាពិបាកក្នុងការដោះស្រាយ បញ្ហាសំណងជូនប្រជាពលរដ្ឋ៕

ដោយៈ វឌ្ឍនៈ

ភ្នំពេញៈ ក្នុងស្ថានភាពនៃសេដ្ឋកិច្ច ដែលមិនទាន់ប្រាកដប្រជា១០០ភាគរយ ការវិនិយោគលើវិស័យនានារួមទាំងអចលនទ្រព្យ នៅក្នុងប្រទេសកម្ពុជានៅតែមិនទាន់ច្បាស់លាស់នៅឡើយ។

យ៉ាងណាក្ដី ក៏មានអ្នកជំនាញអចលនទ្រព្យមួយចំនួន បានបង្ហាញពីទស្សនទាន ជាគន្លឹះមុននឹងសម្រេចចិត្តបណ្ដាក់ទុនវិនិយោគ នៅក្នុងស្ថានភាពដែលមិនទាន់ច្បាស់លាស់នេះ។

លោកង៉ែត ជូ ជាអ្នកជំនាញនៃវិស័យហិរញ្ញវត្ថុ និងអចលនទ្រព្យមួយរូបនៅក្នុងប្រទេសកម្ពុជា បានបង្ហាញពីទស្សនទានរបស់ខ្លួនផ្ទាល់ ដល់បណ្ដាកវិនិយោគិនថ្មីៗ ឬអ្នកដែលចង់ប្រឡូក ក្នុងវិស័យអចលនទ្រព្យនាពេលបច្ចុប្បន្ននេះ ។

នៅក្នុងវេទិកាមួយកាលពីពេលថ្មីៗកន្លងទៅនេះ លោកង៉ែត ជូបានមានប្រសាសន៍ឱ្យដឹងថា ការវិនិយោគនៅក្នុងវិស័យអចលនទ្រព្យនៅកម្ពុជាបានវិវត្តន៍ ទៅក្នុងទម្រង់ដែលមានទ្រង់ទ្រាយកាន់តែធំ។  នៅក្នុងការវិវត្ត នេះ ផ្នែកចម្បងចំនួនបី នៅក្នុងវិស័យអចលនទ្រព្យក៏ត្រូវវិត្តន៍ខ្លួនផងដែរ ។

ទី១ ដី សម្រាប់លក់រាយ និងពាណិជ្ជកម្ម ។ នៅពេលបច្ចុប្បន្ន និងទៅថ្ងៃខាងមុខ វិស័យលក់រាយ និងពាណិជ្ជកម្មនឹងត្រូវការដីទំហំយ៉ាងហោចណាស់២ពាន់ម៉ែត្រការេ សម្រាប់ហាងលក់រាយទំនើប។ វិស័យនេះវិវត្តន៍ចេញពីហាង ផ្ទះ និងដីឡូតិ៍ពាណិជ្ជកម្មតូចៗ។

លោកបន្តថា នាពេលបច្ចុប្បន្ន គេអាចសង្កេតឃើញទំនោរនៃការកើនឡើងវិស័យនេះ តាមរយៈការលេចឡើងនូវហាងកាន់តែច្រើន ដូចជាប្រេន Lucky Express 7Eleven Chip Mong Retail, Makro និង PTT Amozon ជាដើម។ នាពេលថ្មីៗនេះ ឆ្នាំ២០២២ ក្រុមហ៊ុន Big C ដែលជាប្រេនធំមួយរបស់ថៃ និងជាក្រុមហ៊ុនលក់រាយ បានទិញម៉ាត Kiwi ក្នុងចំនួន១៨ទីតាំង ហើយក៏មានផែនការដល់ឆ្នាំ២០២៦ ក្នុងការពង្រីកឱ្យបាន៣៥០ម៉ាតនៅកម្ពុជា។ ដូច្នេះ ទំនោរនៃតម្រូវការដីប្រភេទទីមួយនេះ នឹងកើនឡើងផងដែរ។

ទី២ គឺផ្ទះឬលំនៅដ្ឋាន។ ផ្នែកនេះ នឹងវិវត្តន៍ទៅប្រើប្រាស់ដីយ៉ាងហោចណាស់បីហិចតា សម្រាប់ការសាងសង់បុរីលំនៅដ្ឋាន។ វាជាវិស័យដែលនៅពីអតីតកាល និងបច្ចុប្បន្ន មានទម្រង់ដីឡូតិ៍តូច ដីស្រែតូច និងដីភូមិតូចៗសម្រាប់លំនៅដ្ឋាន។

ផ្នែកទី៣ គឺ ដីសម្រាប់ឧស្សាហកម្ម ដែលនឹងវិវត្តន៍ទៅប្រើប្រាស់ទំហំដីយ៉ាងហោចណាស់៥ហិចតា (ឬបើល្អបំផុតជាង ៥០ហិចតា) សម្រាប់ការប្រមូលផ្ដុំក្រុមហ៊ុនតូច និងមធ្យម សួនឧស្សាហកម្ម និងតំបន់សេដ្ឋកិច្ចពិសេស។ វិស័យនេះវិវត្តន៍ពីដីស្រែតូចៗ ដីស្រែចម្ការ ឬដីភូមិតូចៗសម្រាប់អចល​នទ្រព្យឧស្សាហកម្ម ។

លោកង៉ែត ជូបានបន្ថែមថា ទៅថ្ងៃខាងមុខ ការវិនិយោគលើវិស័យអចលនទ្រព្យនឹងបន្ដវិវត្តន៍ទៅមុខ ហើយនិងកាន់តែមាន “យុទ្ធសាស្ត្រ” ។ គេអាចសង្កេតទំនោរនៃការវិវត្តន៍ចំនួនប្រាំ ដូចជា ទី១ ការផ្លាស់ប្តូរពីការ “ដើរតាមហ្វូងមនុស្ស ទៅជាការវិនិយោគប្រកបដោយយុទ្ធសាស្រ្ត ភាពច្នៃប្រឌិត និងគោលដៅ”។ ទី២ ការផ្លាស់ប្តូរពីការវិនិយោគលើគម្រោងតូចៗ ទៅជាគម្រោងទាក់ទាញ ខ្នាតធំ និងគម្រោងប្រកួតប្រជែង។

ទី៣ ការបង្កើតប្រព័ន្ធគ្រប់គ្រងឌីជីថល។ ទី៤ ការផ្លាស់ប្តូរពីអាជីវកម្មក្រៅផ្លូវការទៅជាការចុះបញ្ជីជាផ្លូវការ និងការអនុលោមតាមច្បាប់ពេញលេញ (រួមទាំងការបង់ពន្ធ) និងទី៥ ដើម្បីអាចសម្រេចចំណុចខាងលើទាំងអស់ គេត្រូវត្រូវការចំណេះដឹងស៊ីជម្រៅ បណ្តាញសង្គមច្រើន និងក្រុមការ​ងារ​​ដែលមានសមត្ថភាព និងប្តេជ្ញាចិត្ត៕