ដោយ៖ សុផារី

ភ្នំពេញ៖ ការដ្ឋានសាងសង់ស្ពានបេតុងខ្សែកាបឫស្សីកែវឆ្លងកាត់ទន្លេសាបសម្រេចបាន ៩៣ភាគរយនៃគម្រោងទាំងមូលហើយ ហើយនឹងបើកដំណើរការនៅខែមេសា ឆ្នាំ២០២៣ខាងមុខ។

នេះបើយោងតាមមន្ទីរសាធារណការ និងដឹកជញ្ជូនរាជធានីភ្នំពេញ នៅព្រឹកថ្ងៃទី១៦ ខែមករា ឆ្នាំ២០២៣នេះ បានឱ្យដឹងថា ការដ្ឋានសាងសង់ស្ពាននេះបានសម្រេចលទ្ឋផលដល់ដំណាក់កាលនៃការតភ្ជាប់តួស្ពានទាំងមូលហើយ ធ្វើឡើងក្រោមអធិបតីភាព លោក ឃួង ស្រេង អភិបាលរាជធានីភ្នំពេញ និងអ្នកឧកញ៉ា ពុង ឃាវសែ។

មន្ទីរសាធារណការ និងដឹកជញ្ជូនបានឱ្យដឹងថា តាមផែនការ គម្រោងស្ពាន ដែលចំណាយចំណាយថវិកាប្រមាណ៣៥លានដុល្លារសហរដ្ឋអាមេរិកនេះ នឹងបញ្ចប់ការសាងសង់ទាំងស្រុង នៅក្នុងខែមេសា ឆ្នាំ២០២៣ខាងមុខ។

ស្ពានបេតុងខ្សែកាបថ្មីនេះ ឆ្លងកាត់ទន្លេសាបពីក្រុងរណបជ្រោយចង្វារ និងផ្លូវជាតិលេខ៦ មកកាន់ផ្លូវជាតិលេខ៥។ ស្ពានថ្មីនេះនឹងជួយសម្រួលឱ្យការដឹកជញ្ជូនទំនិញ និងការធ្វើដំណើរផ្សេងៗចេញពីខេត្តនានាមកកាន់រាជធានីភ្នំពេញ និងពីរាជធានីភ្នំពេញទៅកាន់ខេត្តនានា ដែលកំពុងមានកំណើនការធ្វើចរាចរណ៍ជាប្រចាំ។

គម្រោងស្ពានខ្សែកាបឫស្សីកែវនេះ មានរចនាបទទំនើប ដែលមានសរសរធំចំនួន៤បង្គោល មានកម្ពស់រហូតដល់៤០ម៉ែត្រ សម្រាប់ព្យួរខ្សែកាប។ ស្ពានបេតុងនេះ ស្ថាបនានៅអមជាមួយស្ពានបេឡេ មានប្រវែង៩២២ម៉ែត្រ មានទទឹង២០,៥ម៉ែត្រ ចិញ្ចើមស្ពានសម្រាប់ថ្មើរជើង មានទទឹង១,២៥ម៉ែត្រសងខាង។

កម្ពស់សរសរស្ពានសម្រាប់ព្យួរខ្សែកាបធៀបនឹងកម្រាលស្ពាន៣៤ម៉ែត្រ។ គន្លងខ្សែយានយន្តមានទទឹង៣,៧៥ម៉ែត្រ គន្លងធ្វើចរាចរណ៍២ខ្សែទៅ២ខ្សែមក។ កម្ពស់នាវាចរក្រោមស្ពានអតិបរមានៅរដូវវស្សា១០,៥ម៉ែត្រ។ កម្ពស់នាវាចរក្រោមស្ពានអប្បរមានៅរដូវប្រាំង ២០,៥ម៉ែត្រ ដោយមានបំពាក់បង្គោលភ្លើងបំភ្លឺ និងដាក់ស្លាកសញ្ញាចរាចរណ៍៕

  ដោយៈ វឌ្ឍនៈ

ភ្នំពេញៈ នៅតាមបណដោយផ្លូវជាតិសំខាន់ៗ ដែលមានទិសដៅចេញពីរាជធានីភ្នំពេញ បាននិងកំពុងទាក់ទាញការអភិវឌ្ឍ លើលំនៅឋានជាពិសេសបណ្ដុំលំនៅឋានជាបុរី ហើយយើងមើលឃើញថាផ្លូវជាតិសំខាន់ៗត្រូវបានអភិវឌ្ឍន៍ជាលំនៅឋាន សម្រាប់ផ្គត់ផ្គង់លើទីផ្សារស្របនឹងកំណើនប្រជាពលរដ្ឋរស់នៅភ្នំពេញកាន់តែកើនឡើង។

ជាការកត់សម្គាល់យើងសង្កេតឃើញថា ផ្លូវជាតិពីលេខ១ដល់លេខ៦ សុទ្ធតែមានគម្រោងអភិវឌ្ឍន៍លំនៅឋាន នៅតាមបណ្ដោយផ្លូវជាតិទាំងនោះគ្រាន់តែផ្លូវជាតិខ្លះ មានការអភិវឌ្ឍលំនៅឋានតម្លៃខ្ពស់ ផ្លូវជាតិខ្លះតម្លៃមធ្យម និងខ្លះទៀតតម្លៃសមរម្យ ។

ផ្លូវជាតិលេខ១ និងលេខ៦ ត្រូវបានមើលឃើញថា ជាតំបន់ដែលមានការទាក់ទាញ លើលំនៅឋានដែលមានតម្លៃមធ្យមឡើងទៅ ដោយក្រុមហ៊ុនខ្លះអភិវឌ្ឍន៍លំនៅឋានតម្លៃ រាប់ម៉ឺនដុល្លារនិងមានរហូត ដល់ខ្ទង់លានដុល្លារផងដែរ។

ផ្លូវជាតិលេខ២លេខ៣ និងលេខ៤ ក៏មានការអភិវឌ្ឍលើលំនៅឋានច្រើនគួរសមដែរ ប៉ុន្តែអ្នកអភិវឌ្ឍន៍ផ្ដោតលើលំនៅឋាន ដែលមានតម្លៃសមរម្យក្រោម១០ម៉ឺនដុល្លារអាមេរិក ហើយការរីកចម្រើននៃលំនៅឋានប្រភេទក៏កាន់តែរីកដុះដាលខ្លាំងឡើង ពីមួយឆ្នាំៗទៅមួយឆ្នាំ ស្របនឹងរដ្ឋាភិបាលក៏បានលើកទឹកចិត្ត ដល់បណ្ដាវិនិយោគិននានា បន្តអភិវឌ្ឍន៍លំនៅឋានតម្លៃសមរម្យ ដោយរដ្ឋាភិបាលបានបន្តលើកលែង ការយកពន្ធប្រថាប់ត្រាលើការផ្ទេរកម្មសិទ្ធិលំនៅឋាន ដែលមានតម្លៃក្រោម៧ម៉ឺនដុល្លារអាមេរិក ពីក្រុមហ៊ុនអភិវឌ្ឍន៍ ។

តាមរយៈការអភិវឌ្ឍលំនៅឋានតម្លៃសមរម្យនេះដែរ ក៏ជាចំណែកមួយដល់ការចូលរួម ដោះស្រាយបញ្ហាលំនៅឋាន របស់ប្រជាពលរដ្ឋរស់នៅរាជធានីភ្នំពេញ និងមានក្រុមហ៊ុនខ្លះ បានផ្ដល់លក្ខខ័ណ្ឌងាយស្រួលក្នុងការបង់ប្រាក់ទៀតផង ដោយក្រុមហ៊ុនមួយចំនួន បានផ្ដល់ឱកាសឱ្យអតិថិជនទិញផ្ទះពីគម្រោងរបស់ខ្លួនដោយបង់រំលស់ ។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ប្រចាំឆ្នាំ២០២២ ក៏បានបង្ហាញផងដែរថា ក្នុងចំណោមគម្រោងសំណង់ ដែលក្រសួងបានចេញលិខិត អនុញ្ញាតឱ្យសាងសង់នោះ ឃើញថាគម្រោងអភិវឌ្ឍន៍ លំនៅឋានមានចំនួនច្រើនជាងគេ រួមទាំងទឹកប្រាក់វិនិយោគផងដែរ។ ការនេះបានបញ្ជាក់ពីតម្រូវការ លំនៅឋាននៅក្នុងប្រទេសកម្ពុជា នៅតែបន្តមានតម្រូវការខ្ពស់ ដែលធ្វើក្រុមហ៊ុនអភិវឌ្ឍន៍ត្រូវការស្នើសុំសាងសង់ផ្ទះបន្ថែមដើម្បីបំពេញតម្រូវការលើទីផ្សារ ។

លោកប៉ូ អ៊ាវគង់ អគ្គនាយកក្រុមហ៊ុនអចលនទ្រព្យAdvanceបានឱ្យដឹងថា ទីផ្សារលំនៅឋាននៅក្នុងប្រទេសកម្ពុជា នៅតែបន្តមានខ្ពស់ជាពិសេ​សនៅរាជធានីភ្នំពេញ និងតំបន់ជាយៗរាជធានីភ្នំពេញ ហើយវាក៏កាន់តែមានតម្រូវការខ្ពស់បន្ថែមទៀត នៅពេលអនាគតខាងមុខគ្រា ដែលផ្ទៃដីរាជធានីភ្នំពេញកាន់តែរីកធំជាបន្តបន្ទាប់៕

  ដោយៈ គង់ សូរិយា

       ភ្នំពេញៈ ប្រជាពលរដ្ឋចំនួន៤០គ្រួសាររបស់នៅ ភូមិជ្រោយអំពិលសង្កាត់ក្បាលកោះ ខ័ណ្ឌច្បារអំពៅបានធ្វើញត្តិតវ៉ាជាបន្តបន្ទាប់ ដល់អាជ្ញាធរមូលដ្ឋាន ដើម្បីរកដំណោះស្រាយករណីក្រុមហ៊ុនបុរីហាយ ធិយ ចំប៉ាក្បាលកោះ ដែលបានចាក់ដីធ្វើបុរី ដោយមិនបានទុកផ្លូវទឹក ដែលបានបង្កការជន់លិចដល់លំនៅដ្ឋាន និងផលដំណាំរបស់ពួកគាត់។

ទោះជាយ៉ាងណាការតវ៉ាទៅកាន់់អាជ្ញាធរ និងមានលិខិតស្នើសុំពីគណៈពង្រឹងមូលដ្ឋានតាំងពីឆ្នាំ២០២១កន្លងមកក្តី ប៉ុន្តែម្ចាស់បុរីនេះ ដែលមានលោកឧកញ៉ាលាង សាំងជាប្រធានក្រុមហ៊ុន មិនបានឆ្លើយតបនឹងសំណើរនេះនោះទេ។

យោងតាមលិខិតចុះថ្ងៃទី១៤ ធ្នូ ឆ្នាំ២០២១ របស់ប្រជាពលរដ្ឋគោរពជូនមេភូមិជ្រោយអំពិល និងចៅសង្កាត់ក្បាលកោះ ខ័ណ្ឌច្បារអំពៅ ដែលមានកម្មវត្ថុ សំណើរអន្តរាគមន៍ទៅម្ចាស់បុរីហាយធិច ចំប៉ាក្បាលកោះដើម្បី​ដោះស្រាយបញ្ហាទឹក។

លិខិតរបស់ប្រជាពលរដ្ឋ ដែលមានស្នាមមេដៃភ្ជាប់ផងដែរនោះបាន ឲ្យដឹងថា ដំណាំតាមក្បាលដីនិមួយៗ ដែលយើងខ្ញុំបាន និងកំពុងអាស្រ័យផលសម្រាប់ដោះស្រាយជីវភាពប្រចាំថ្ងៃ ត្រូវបានជន់លិចលង់អស់ទៅហើ​យ។ ក្រៅពីនេះផ្ទះយើងខ្ញុំមួយចំនួន ក៏ត្រូវបានទឹកលិចដល់គ្រែដេកទៅហើយ​ដែរ។ នេះមិនមែនជាជំនន់ទឹកភ្លៀងធម្មជាតិនោះទេ តែជាទឹកជំនន់បង្កឡើងដោយសកម្មភាពមនុស្ស គឺបង្កឡើងដោយសារសកម្មភាពចាក់លុបដីរបស់បុរីហាយ ធិច ចំប៉ាក្បាលកោះ ដោយពុំបានទុកផ្លូវទឹកសម្រាប់បង្ហូរចេញ។

លិខិតប្រជាពលរដ្ឋបានលើកជាសសំណួរថា “តើឲ្យយើងរស់នៅយ៉ា​ងដូចម្តេចទៅ បើផ្ទះក៏លិច ដំណាំក៏រលួយអស់បែបនេះ យើងខ្ញុំទាំងអស់គ្នាស្នើសុំដោយទទូច សូមលោកមេភូមិជ្រោយអំពិល២ លោកចៅសង្កាត់ក្បាលកោះ មេត្តាជួយធ្វើអន្តរាគមន៍ទៅម្ចាស់បុរីហាយធិច ចំប៉ាក្បាលកោះ ដើម្បីចាត់វិធានការណ៍ដោះស្រាយបញ្ហាទឹកលិច និងការខូចខាតផលដំណាំ​យើងខ្ញុំ ដែកបង្កឡើងដោយសារម្ចាស់បុរីខាងលើដោយក្តីអនុគ្រោះ។

ជាមួយគ្នានេះ កាលពីថ្ងៃទី២៥ វិច្ឆិកា ឆ្នាំ២០២២ រដ្ឋបាលសង្កាត់ក្បាលកោះ ខ័ណ្ឌច្បារអំពៅបានចេញលិខិតលេខ០៩៥ /២២ លស ដែលផ្ញើរទៅកាន់ឧកញ៉ាលាង សាំងប្រធានក្រុមហ៊ុនហាយធិច ចំប៉ាក្បាលកោះ ដែលមានកម្មវត្ថុបានលើកឡើងថា សំណើរសុំជួយដាក់លីរំដោះទឹកចំនន១ខ្សែទៀត ទំហំមុខកាត់១ម៉ែត្រ មានទីតាំងស្ថិតនៅភូមិជ្រោយអំពិល២ សង្កា​​ត់ក្បាលកោះ ខ័ណ្ឌច្បារអំពៅ រាជធានីភ្នំពេញ។

លិខិតដដែលបានសរសេរថា យោងតាមប្រសាសន៍របស់លោកស៊ុយ សេរិទ្ឋ អភិបាលរងនៃគណៈអភិបាលរាជធានីភ្នំពេញ និងជាប្រធានក្រុមការ​ងារ សម្រាប់ការចុះសិក្សាគំរោងប្លង់មេប្រព័ន្ឋបង្ហូរទឹក និងអាងប្រព្រឹត្តិកម្មទឹកកខ្វក់ ក្នុងភូមិសាស្រ្តខ័ណ្ឌច្បារអំពៅនាថ្ងៃទី២៥ វិច្ឆិកា ឆ្នាំ២០២២។

លិខិតដដែលបានញ្ជាក់ថា យោងតាមកម្មវត្ថុ និងយោងខាងលើខ្ញុំមាន​កិត្តិយសសូមគោរពជូនលោកឧកញ៉ា មេត្តាជួយដាក់លូរំដោះទឹក១ខ្សែទៀត (មានទំហំដូចខាងលើ) និងប្រវែងបណ្តោយចាប់ពីរបងបុរីហាយធិច ចំប៉ា ក្បាលកោះ ខ័ណ្ឌច្បារអំពៅ រាជធានីភ្នំពេញ។ ចំពោះជម្រៅលូ តាមការ​សិក្សាបច្ចេកទេសជាក់ស្តែង ដែលអាចរំដោះទឹកចេញបាន។

ទោះជាមានសំណើរជាច្រើនលើកច្រើនសារក្តី ប៉ុន្តែលោកឧកញ៉ាលាង សាំងមិនបានឆ្លើយតបនឹងសំណើរនេះនោះទេ។

តំណាងប្រជាពលរដ្ឋរងគ្រោះ បានលើកឡើងដោយសុំមិនបញ្ចេញឈ្មោះថា ពួកគាត់ពិតជាអស់សង្ឃឹម ព្រោះទោះជាមានលិខិតសំណើរជាបន្តបន្ទាប់ក្តីប៉ុន្តែនៅតែគ្មានប្រសិទ្ឋភាព និងគ្មានការអើរពើពីម្ចាស់បុរីនេះឡើយ ដោយមិនដឹងគាត់អភិវឌ្ឍន៍គិតតែផលចំណេញរបស់ខ្លួន ដោយមិនខ្វល់ពីសហគមន៍ប្រជាពលរដ្ឋមូលដ្ឋានននោះឡើយ។

តំណាងប្រជាពលរដ្ឋដដែលបានបញ្ជាក់ថា “សង្ឃឹមថាអ្នកទិញផ្ទះនៅបុរីនេះ នឹងពិចារណាទៅលើក្រមសីលធ៌មរបស់អ្នកអភិវឌ្ឍ ដែលគិតតែពីផលចចំណេញ និងមិនខ្វល់ពីសុខទុក្ខរបស់ប្រជាពលរដ្ឋឡើយ”។

គេហទំព័រPropertyarea.asia មិនអាចទាក់ទងសុំការអត្ថាធិប្បាយ និងបំភ្លឺពីលោកឧកញ៉ាលាង សាំងបានឡើយ៕

ដោយៈ គង់ សូរិយា

       ភ្នំពេញៈ បុរី ឡាក់ឃី វ័ន គម្រោង 217 បាន​បើក​សម្ពោធ​ផ្ទះ​គំរូ​ពិត ជាមួយការផ្តល់លាភសំណាងមាស10តម្លឹង និងរង្វាន់ដទៃទៀតយ៉ាងច្រើនសន្ធឹកសន្ធាប់ដល់អតិថិជនដែលបានទិញផ្ទះ។

នេះជាការផ្តល់ជូនលាភសំណាងឆ្នាំថ្មីពី បុរី​ ឡាក់​ឃី ​វ័ន គម្រោង​ 217 ដល់អតិថិជនទូទៅ លើសពីការរស់នៅធម្មតា​។ នេះជាការផ្តល់ សេរី ហេង ហេង សម្រាប់ឆ្នាំថ្មីជូនដល់អតិថិជនគ្រប់រូប។

បុរីឡាក់ឃី វ័ន​ គម្រោង217 មានទីតាំងស្ថិតនៅជាប់ផ្លូវធំ 217 ដោយភ្ជាប់ទៅវីថីសម្តេចតេជោ​ ហ៊ុន សែន និងផ្លូវក្រវ៉ាត់ក្រុងទី3 ជាទីតាំងស្ថិតនៅក្បែរផ្សារព្រែកជ្រៃ ដែលផ្តល់ភាពងាយស្រួលក្នុងការទិញបន្លែ ត្រីសាច់ស្រ​ស់សម្រាប់ធ្វើម្ហូបអាហារប្រចាំថ្ងៃ​។ រៀងរាល់ចុងសប្តាហ៍ លោកអ្នកអាចដើរទិញទំនិញឥវ៉ាន់ និងរបស់ប្រើប្រាស់ នៅផ្សារទំនើបអ៊ីអន3 មានជ័យ ដោយចំណាយតែ7នាទីក្នុងការធ្វើដំណើរ។

បុរី ឡាក់ឃី វ័ន​ គម្រោង217 ផ្តល់លើសពីការរស់នៅ ដោយជុំវិញបុរីមានផ្ទះអាជីវកម្មជាច្រើន ដែលជាឱកាសសម្រាប់ការប្រកបមុខរបរ និងជំនួញខ្នាតតូច មធ្យម ធំ គ្រប់ប្រភេទ។

ទាំងផ្ទះគំរូពិត និងសំណង់ផ្ទះពិត ដែលកំពុងសាងសង់ មានគុណភាពខ្ពស់ ម៉ូតស្រស់ស្អាតប្លែក មានតម្លៃសមរម្យ។ ផ្ទះ​និមួយៗត្រូវបានសាងសង់ឡើង ដោយប្រើតែសម្ភារៈដែលមានគុណភាពល្អបំផុត ក្នុង​គោល​ដៅ​មួយ​គឺ​ ចង់បាន​អោយ​ឱ្យមាន​ការ​ប្រើប្រាស់បានយូរអង្វែង​ និង​ត​កូន​ត​ចៅ។

ផ្ទះអា​ជីវកម្ម​ក្នុងតម្លៃដ៏ល្អនេះ គឺជាការ​ផ្តល់ជូនយ៉ាងពិសេស សម្រាប់ក្រុមគ្រួសារតូចធំ ដែលចង់បានការរស់នៅក្នុង​សហគមន៍បុរី ឡាក់ឃី វ័ន​ គម្រោង217 ឲ្យ​​ប្រកប​ដោយ​​លាភ​សំណាង។

លោក លី លឹមស្រ៊ុន នាយកគ្រប់គ្រងគម្រោង បុរី ឡាក់ឃី វ័ន បានមានប្រសាសន៍ឲ្យដឹង ក្នុងពិធីបើកការដ្ឋានសាងសង់បុរីនេះ កាលពីថ្ងៃទី១៤ មករាថា ​​ការ​ផ្លាស់​ប្តូររូបរាងថ្មី គឺ​មានការ​ចាប់​អារម្មណ៍យ៉ាង​ខ្លាំង​​ពី​មហា​ជន​ជា​ច្រើន​ ហើយ​ស្របពេល​​គ្នា​នេះ​ដែរ​ ក្រុមការងារសាងសង់របស់ បុរី​ ឡាក់ឃី វ័ន​គម្រោង​217 ក៏បានអនុវត្តបញ្ចប់ការសាងសង់ផ្ទះគំរូ អាជីវកម្ម ដូចដែលយើងបានបញ្ជាក់ជាសក្ខីភាពតាមរយៈ កម្មវិធីបើក​សម្ពោធ​ផ្ទះ​គំរូ​ពិត និងទិញ​ផ្ទះ​បាន​មាស​10តម្លឹង ដែលផ្តល់ជូន​​លាភ​សំណាង​ជា​ច្រើន​សន្ធឹក​សន្ធាប់នាថ្ងៃនេះ។

នៅក្នុងថ្ងៃកម្មវិធីនេះ បុរីឡាក់ឃី វ័ន​ គម្រោង217 ទទួលបានភ្ញៀវទិញ និងកក់ផ្ទះយ៉ាងច្រើន ដែលនេះជាមោទនភាពមួយ ដែលធ្វើឲ្យបុរី ឡាក់ឃី វ័ន មានភាពជឿជាក់ក្នុងការបន្តគុណភាពរបស់ខ្លួន និងពង្រឹងបន្ថែមឲ្យកាន់ល្អឡើងមួយកំរិតទៀត។

គម្រោង 217 គឺជាគម្រោងមួយ ក្នុងចំណោមគម្រោងជាច្រើនរបស់ បុរីឡាក់ឃី វ័ន ដែលតែងតែទទួលបានការគាំទ្រ និងជឿជាក់រៀងមកលើស្នាដៃ ក៏ដូចជាគុណភាពសំណង់ដែលជឿទុកចិត្ត។ នេះក៏ជាការចូលរួមចំណែកក្នុងការបង្កើតឲ្យមានលំនៅដ្ឋាន រីកដុះដាលប្រកបដោយគុណភាព នៅលើទឹកដីនៃភាគខាងត្បូងនៃរាជធានីភ្នំពេញ។

ក្លាយ​ជា​ម្ចាស់​ផ្ទះ​ដំបូងគេ​ឥឡូវ​នេះ៖ 098 225 323 / 089 323 523៕