ដោយ: សុផារី

ភ្នំពេញ: ក្នុងរយៈពេល១០ ឆ្នាំចុងក្រោយនេះ ស្ថានភាពនៃទីផ្សារអចលនទ្រព្យ នៅក្នុងប្រទេសកម្ពុជា នៅតែបន្តដំណើរទៅមុខបន្តិចម្ដងៗ បើទោះបីជាប្រឈមនឹងបញ្ហាមួយចំនួនក្តី។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ឲ្យដឹងកាលពីចុងសប្តាហ៍មុនថា យើងឃើញថា ស្ថានភាពនៃវិស័យចលនទ្រព្យ នៅក្នុងប្រទេសកម្ពុជា ជាពិសេសក្នុងរយៈពេល១០ឆ្នាំចុងក្រោយនេះ នៅតែបន្តដំណើរការបន្តិចម្ដងៗដដែល ដោយមិនមានការរាំងស្ទះ រហូតដល់មានជាវិបត្តិធ្ងន់ធ្ងរនោះទេ។

លោកបានបន្តថា “នេះគឺជានៃយន្តការ នៃការអភិវឌ្ឍនាពេលបច្ចុប្បន្ននេះ។ ប៉ុន្តែបញ្ហាប្រឈម និងផលប៉ះពាល់មួយចំនួន ដែលធ្វើឲ្យមានការធ្លាក់ចុះក្នុងការទិញលក់ ដោះដូរអចលនទ្រព្យខ្លះ ដោយសារបញ្ហាកូវីដ១៩​”។

ជាមួយគ្នានេះ លោក សន សៀប អគ្គនាយកក្រុមហ៊ុនអចលនទ្រព្យ Key Real Estate បានមានប្រសាសន៍ឲ្យដឹងកាលពីពេលថ្មីៗថា ស្ថានភាពអចលនទ្រព្យកម្ពុជា ទទួលរងនូវឥទ្ធិពលទាំងកត្តាខាងក្នុង និងកត្តាខាងក្រៅ។

លោកលើកឡើងបន្តថា ជាក់ស្តែងកាលពីឆ្នាំ២០០៣ ជាឆ្នាំបោះឆ្នោត ទីផ្សារអចលនទ្រព្យមានបញ្ហាតិចតួច ដោយសារតែមានការព្រួយបារម្ភអំពីការផ្លាស់ប្ដូរស្ថានភាពនយោបាយ។ ម្យ៉ាងទៀត ស្ថានភាពទីផ្សារពិភពលោ​កនិងក្នុងតំបន់ ក៏ជាកត្តាជះឥទ្ធិពល ដល់ទីផ្សារអចលនទ្រព្យកម្ពុជាផងដែរ។

លោកបញ្ជាក់ថា ក្នុងរយៈពេលច្រើនឆ្នាំចុងក្រោយនេះ ផលប៉ះពាល់ ដែលធ្ងន់ធ្ងរបំផុត លើទីផ្សារអចលនទ្រព្យកម្ពុជា កើតឡើងនៅក្នុងឆ្នាំ២០០៨ ដោយសារតែវិបត្តិហិរញ្ញវត្ថុ ដែលសាយភាយចេញពីសហរដ្ឋអាមេរិក។ បច្ចុប្បន្ន បញ្ហាកូវីដ១៩ និងសង្គ្រាមរុស្ស៊ី-អ៊ុយក្រែន ក៏ជាបញ្ហាធំមួយផងដែរ ដែលប៉ះពាល់ដល់ការទិញលក់អចលនទ្រព្យ សង្វាក់ផលិតកម្ម ការធ្វើអាជីវកម្ម និងការធ្វើជំនួញ។

យ៉ាងណាក្តី លោកបញ្ជាក់ថា “បើប្រៀបធៀបជាមួយនឹងប្រទេសមួយចំនួននៅក្នុងពិភពលោក ប្រទេសកម្ពុជាមានផលប៉ះពាល់ ក្នុងកម្រិតតិចតួចជាងប្រទេសមួយចំនួនផ្សេងទៀត”។

លោកសន សៀប អះអាងថា លទ្ធផលល្អប្រសើរនេះបានមកពីភាពជោគជ័យរបស់រាជរដ្ឋាភិបាលកម្ពុជា ក្នុងការចាក់វ៉ាក់សាំង និងទប់ស្កាត់ការជំងឺកូវីដ១៩ ព្រមទាំងការវិនិយោគ ប្រព័ន្ធហេដ្ឋារចនាសម្ព័ន្ធធំៗផងដែរ។ នេះក៏ដើម្បីត្រៀមខ្លួនក្នុងការស្វាគមន៍ ការត្រឡប់មកវិញនៃវិនិយោគិនបរទេស ព្រមទាំងបានផ្តល់នូវទំនុកចិត្តដល់ទីផ្សារអចលនវត្ថុផងដែរ៕

 ដោយៈ ជេស៊ីកា

       ភ្នំពេញៈ អ្នកអភិវឌ្ឍន៍ និងជាអ្នកជំនាញលំដាប់អន្តរជាតិបានថ្លែងថា អ្នកមានធនធាននៅកម្ពុជា គួរបន្តវិនិយោគលើបវិស័យអចលនទ្រព្យ ដោយ​សារកម្ពុជាជាប្រទេសមួយ ដែលមានកំណើនសេដ្ឋកិច្ចល្អបំផុត ក្នុងពិភពលោក។

លោកBen LI ប្រធានកិត្តិយសសមាគមពាណិជ្ជកម្មកម្ពុជា ចិន និងជាប្រធានក្រុមប្រឹក្សាភិបាល នៃគំរោងUrban Villageបានមានប្រសាសន៍ក្នុងសិក្ខាសាលាមួយកាលពីចុងសប្តាហ៍មុនថា នៅពេលអនាគត តំបន់អាស៊ាន នឹងក្លាយជាតំបន់ដែលមានការរីកចម្រើនលឿន ពោលគឺមិនមែនអាមេរិក និងអឺរ៉ុបនោះទេ ហើយក្នុងចំណោមប្រទេសចំនួន១០ ក្នុងតំបន់អាស៊ាន គឺកម្ពុជាជាប្រទេសមួយមានការរីកចម្រើនលឿនបំផុត និងជាប្រទេសប្រើប្រាស់ប្រាក់ដុល្លារច្រើនជាងគេ។

លោកបន្តថា “កម្ពុជា ជាប្រទេសដែលមានសេដ្ឋកិច្ច ងើបឡើងលឿនជាងគេក្នុងតំបន់អាស៊ាន ហេតុនេះបើអ្នកមានលុយ ខ្ញុំលើកទឹកចិត្តឲ្យអ្នកវិនិយោគលើវិស័យអចលនទ្រព្យ”។ លោកបន្តថា “ការទិញអចលនទ្រព្យនៅកម្ពុជាទទួលបាន ផលចំណេញពីការវិនិយោគ ក្នុងចន្លោះពី៨ ទៅ១២ភាគរយជាមធ្យមប្រចាំឆ្នាំ”។

តើគួរវិនិយោគនៅទីណា នៅទីក្រុងភ្នំពេញ? តើអ្នកគួរវិនិយោគភាគខាងលិច ខាងកើត និងជើងឬខាងត្បូងរាជធានីភ្នំពេញ? លោកBen Liបានមានប្រសាសន៍ថា តំបន់ភាគខាងត្បូងរាជធានីភ្នំពេញ ដែលស្ថិតនៅស្របនឹងមហាវិថីសម្តេចតេជោ គឺជាមហាវិថីដែលតភ្ជាប់ជាមួយផ្លូវសំខាន់ៗជាច្រើន រួមមាន មហាវិថីមុនីវង្ស មហាវិថីនរោត្តម និងមហាវិថី២៧១ និងជាគំរោង តភ្ជាប់ទៅកាន់ព្រលានយន្តហោះលំដាប់អន្តរជាតិភ្នំពេញថ្មី។

លោកបន្តថា “នៅពេលផ្សារទំនើបAEON MALL3បើកដំណើរការនៅពេលឆាប់ៗខាងមុខ តំបន់ផ្លួវ៦០ម៉ែត្រ នឹងធ្វើឲ្យតំបន់ភាគខាងត្បូងក្លាយជាតំបន់ដ៏រីកចម្រើនមួយនាពេលអនាគត”៕

ដោយៈយិន លាងគង់សហស្ថាបនិកនិងជាអគ្គនាយកគេហទំព័រPropertyarea.asia

       ភ្នំពេញៈ ទំហំវវិនិយោគក្នុងវិស័យសំណង់ បានដាំក្បាលចុះនៅកម្ពុជា ក្នុងរយៈពេល៩ខែនៃឆ្នាំនេះ ស្របពេលការរទន្ទឹងលំហូរទុនវិនិយោគពីបរទេស ពិសេសអ្នកវិនិយោគចិននៅតែបន្ត និងគ្មានចម្លើយជាក់លាក់នៅឡើយ។

យ៉ាងណាក្តីឱកាស នឹងកើតមាននៅក្នុងវិបត្តិ ស្របពេលបរិបទ ភូមិ​សាស្រ្តនយោបាយ និងសេដ្ឋកិច្ចកម្ពុជា បានក្លាយជាផ្នែកមួយនៃគំនិតសុទិ​ដ្ឋិនិយមសម្រាប់អ្នកជំនួញកម្ពុជាផងដែរ។

នៅឆ្នាំ២០២៣ ជាពេលវេលាសុទិដ្ឋិនិយមមួយ សម្រាប់អ្នកវិភាគនានា ប៉ុន្តែស្ថានភាពហាក់កាន់តែអស់សង្ឃឹម នៅពេលស្ថាប័នអន្តរជាតិធំៗដូចជា World Bank, IFM បានព្រមានពីហានិភ័យ នៃវិបត្តិសេដ្ឋកិច្ចពិភពលោកសាជាថ្មី ខណៈរយៈពេលបីឆ្នាំកន្លងមកនេះ សេដ្ឋកិច្ចពិភពលោក បាន​រងវិបត្តិដោយសារជំងឺកូវីដ១៩ និងបញ្ហាសង្រ្គាមរវាងរុស្ស៊ី និងអ៊ុយក្រែន។

យ៉ាងណាទីផ្សារកម្ពុជា នៅតែមានសុទិដ្ឋិនិយម ដោយសារផែនទីកម្ពុជា នឹងបង្ហាញទៅកាន់ពិភពលោក កាន់តែចែងចាំងម្តងទៀត ខណៈប្រទេសនេះ កំពុងត្រៀមរៀបចំកិច្ចប្រជុំកំពូល មេដឹកនាំាំអាស៊ាននៅចុងឆ្នាំនេះ និងការរៀបចំព្រឹត្តិការណ៍ធំៗចំនួនពីរនៅឆ្នាំ២០២៣ខាងមុខ។

កម្ពុជាប្រៀបដូចសំប៉ាន

       នៅក្នុងវិបត្តិ ឱកាសអាចកើតមានឡើងផងដែរ ពិសេសសម្រាប់កម្ពុជា ដោយសារប្រទេសនេះ ប្រៀបបាននឹងសំប៉ានតូចមួយ ដែលអាចរសាត់តាន​កប៉ាល់យក្សមួយ និងអាចរងរលកតូចៗ ជាជាងប្រឈមនឹងរលកធំៗ ដែលអាចឲ្យសំប៉ានក្រឡាប់បាន។

ការចូលជាធរមាន នៃកិច្ចព្រមព្រៀងពាណិជ្ជកម្មសេរីកម្ពុជា ចិន ការចូលជាធរមាននៃកិច្ចព្រមព្រៀងភាពជា ដៃគូសេដ្ឋកិច្ចគ្រប់ជ្រុងជ្រោយតំបន់ និងការត្រៀមចូលជាធរមាននៃកិច្ច ព្រមព្រៀងពាណិជ្ជកម្មសេរីកម្ពុជា កូរ៉េនាពេលខាងមុខ បាននិងកំពុងផ្តល់កាលានុវត្តន៍ភាពសំខាន់ លំហូរពាណិជ្ជកម្ម ដែលនឹងជួយជម្រុញដល់កំណើនសេដ្ឋកិច្ចជាតិ។

ទន្ទឹមនឹងនេះមានដំណឹងល្អមួយ គឺសេដ្ឋកិច្ចកម្ពុជាអាចរំពឹងនឹងមាន​កំនើនវិជ្ជមាន ដោយរដ្ឋាភិបាល និងស្ថាប័នអន្តរជាតិធំៗដូចជា ADB, World Bank, IMFជាដើមបានបបង្ហាញថា​សេដ្ឋកិច្ចកម្ពុជា នឹងសម្រេចបានកំនើនក្នុងរង្វង់៥,៤ភាគរយ នៅឆ្នាំនេះ និងអាចសម្រេចបានកំណើន៦ភាគរយនៅឆ្នាំក្រោយ។

ការជួបរលកតូចៗ ជាមួយនឹងខ្យល់បក់ ក៏អាចរួមចំណែកជួយដល់សំប៉ានមួយនេះ អាចបោះពួយលយលឿនទៅមុខផងដែរ ពិសេសវិស័យអចលនទ្រព្យ ដែលមូលដ្ឋានគ្រឹះនៃទីផ្សារនៅតែមានភាពរ៉ឹងមាំ ឱកាសចំណេញ និងតម្រូវការខ្ពស់ ដោយសារប្រទេសនេះមានប្រជាជនវ័យក្មេងអាយុ៤០ឆ្នាំចុះប្រមាណ១០លាននាក់។

ពិភពលោកសម្លឹងមកកម្ពុជា

       សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានត្រៀមនាឡិកាម៉ាកអាស៊ានចំនួន២៥គ្រឧងររួចហើយ សម្រាប់មេដឹកនាំអាស៊ាន និងមេដឹកនាំពិភពលោកដទៃទៀត ដែលនឹងអញ្ជើញមកចូលរួមកិច្ចប្រជុំកំពូលអាស៊ាននាខែវិច្ឆិកាខាងមុខនេះ។

ការមកដល់នៃមេដឹកនាំពិភពលោកនៅកម្ពុជា នឹងធ្វើឲ្យកិត្យានុភាពកម្ពុជារះត្រដែតឡើងជាថ្មីលើឆាកអន្តរជាតិ ដែលវានឹងផ្តល់ផលចំណេញលកាន់តែច្រើនដល់ប្រទេសនេះ ទី១ គេស្គាល់កម្ពុជា ជាដែនដីនៃសុខសន្តិភាព និងការអភិវឌ្ឍន៍ ទី២ គេស្គាល់កម្ពុជា មានមេដឹកនាំដែលមានភាពឆ្លាតវាងវៃ ដែលបានដឹកនាំសេដ្ឋកិច្ចទទួលបានកំនើនខ្ពស់ ទី៣ អ្នកវិនិយោគអន្តរជាតិ នឹងសម្លឹងមកកាន់កម្ពុជា ដោយសារប្រទេសនេះទទួលបាន​ផលចំណេញពីការវិនិយោគខ្ពស់ ធៀបជាមួយប្រទេសក្នុងតំបន់ ទី៤ កម្ពុជានឹងទាក់ទាញភ្ញៀវទេសចរណ៍អន្តរជាតិ កាន់តែច្រើននាពេលអនាគត និងទី៥ កម្ពុជាចំណេញប្រាប់រាប់រយលានដុល្លារ ដោយមិនចាំបាច់ចំណាយ​លុយផ្សាយពាណិជ្ជកម្ម។

កម្ពុជាបាននិងកំពុងរៀបចំ និងរាប់ថយក្រោយឆ្ពោះទៅកាន់ ព្រឹត្តិការ​ណ៍ដ៏ធំស៊ីហ្គេម នឹងធ្វើឲ្យកម្ពុជាលេចត្រដែតលើឆាកអន្តរជាតិ ជាមួយនឹងការមកដល់របស់កីឡាករ ភ្ញៀវទេសចរណ៍ជាតិ អន្តរជាតិរាប់ម៉ឺននាក់នឹងចូលរួមអមអរសាទរ និងរីករាយក្នុងព្រឹត្តិការណ៍ជាប្រវត្តិសាស្រ្ត ដែលកម្ពុជាមិនធ្លាប់បានប្រារពកន្លងមក។

ការបោះឆ្នោតជាមួយលទ្ឋផលវិជ្ជមាន

       ការបោះឆ្នោតជ្រើសរើតំណាងរាស្រ្តនាពេលខាងមុខ លែងជាបញ្ហាគួរឲ្យបារម្ភទៀតហើយ ដោយសារប្រទេសនេះសម្រេចបាននូវវិបុលភាពសង្គម និងកំពុងមានស្ថេរភាពនយោបាយរយៈពេលវែង ដោយសាររលកឬព្យុះនយោបាយហាក់ត្រូវបានផុតរលត់ពីសៃវៀននយោបាយនៅកម្ពុជា។

ការរៀបចំការបោះឆ្នោតជ្រើសរើសតំណាងរាស្រ្ត ក៏ជាព្រឹត្តិការណ៍ធំមួយទៀត ដែលកម្ពុជានឹងបង្ហាញពិភពលោក ពីភាពចាស់ទុំខាងនយោ​បាយរបស់ខ្លួន ពិសេសការដើរត្រឹមត្រូវលើគន្លងប្រជាធិបតេយ្យមួយ ស្របតាមបរិបទសង្គម វប្បធ៌មកម្ពុជា។

ជាមួយនឹងលក្ខខ័ណ្ឌអំណោយផលនៃប្រជាសាស្រ្ត (ប្រជាជនវ័យក្មេងច្រើន) តម្លៃអចលនទ្រព្យមានតម្លៃទាប ស្ថេរភាពនយោបាយ និងកំនើន​សេដ្ឋកិច្ចរ៉ឹងមាំ បានធ្វើឲ្យកម្ពុជាមានឱកាសទាក់ទាញ ការវិនិយោគពីអន្តរជាតិកាន់តែច្រើននាពេលអនាគត ដោយសារផលចំណេញពីការវិនិយោគនៅកម្ពុជា នៅតែមានកម្រិតខ្ពស់ធៀបជាមួយប្រទេសក្នុងតំបន់។

កំណែទម្រង់ច្បាប់

       នៅឆ្នាំ២០២៣នេះ រដ្ឋាភិបាលបានអនុម័តច្បាប់ជាច្រើន ក្នុងនោះច្បាប់ដែលមានភាពលេចធ្លោជាងគេ គឺច្បាប់វិនិយោគថ្មីនៃព្រះរាជាណាចក្រកម្ពុឃា ដែលច្បាប់នេះមានមាត្រាជាច្រើន បានលើកទឹកចិត្តដល់វិនិយោគិនក្នុងស្រុក និងអន្តរជាតិ។

នេះជាផ្នែកមួយយ៉ាងសំខាន់ ក្នុងការលើកកំពស់បរិយាកាសវិនិយោគ និងធ្វើឲ្យបរិស្ថានវិនិយោគ និងការធ្វើធុរកិច្ចនៅកម្ពុជាកាន់តែមានភាពប្រសើរឡើង ដែលតាមពិតបរិយាកាសវិនិយោគ មូលដ្ឋានច្បាប់បទដ្ឋានគតិយុត្តិរ៉ឹងមាំ ការលើកទឹកចិត្ត កត្តាសុខសន្តិភាព ស្ថេរភាពនយោបាយរយៈពេលវែង ឱកាសចំណេញ និងសក្តានុពលប្រជាជនវ័យក្មេងច្រើន ជាកត្តាសំខាន់មិនអាចខ្វះបាន ក្នុងការជម្រុញសេដ្ឋកិច្ចជាតិ ក៏ដូចជាលើកកំពស់បរិយាកាសវិនិយោគក្នុងវិស័យសំណង់ និងអចលនទ្រព្យកាន់តែប្រសើរឡើងនាពេលខាងមុខ៕

ដោយៈ គង់ សូរិយា

       ភ្នំពេញៈ ឯកអគ្គរដ្ឋទូតជប៉ុនប្រចាំកម្ពុជា លោក មីកាមិ ម៉ាសាហីរ៉ូបានមានប្រសាសន៍ថា ផ្សារទំនើបAEON Mall3នៅទីក្រុងភ្នំពេញ នឹងក្លាយជាផ្សារទំនើបធំជាងគេនៅតំបន់អាស៊ី។

លោកបានមានប្រសាសន៍ឲ្យដឹងបែបនេះ ក្នុងអំឡុងពេលលោក និងលោកអភិបាលរាជធានីភ្នំពេញ លោកឃួង ស្រេងបានប្រារពពិធីដាំដើមឈើចំនួន៨០០០ដើម នៅបរិវេណផ្សារទំនើបដ៏ធំ ដែលមានទីតាំងស្ថិតនៅបណ្តោយមហាវិថីសម្តេចតេជោកាលពីដើមសប្តាហ៍មុន។

លោកមីកាមិ ម៉ាសាហ៊ីរ៉ូបានបន្តថា ផ្សារទំនើប អ៉ីអន ម៉ល មានជ័យ នឹងក្លាយជាផ្សារធំជាងគេនៅអាស៊ី ក្រោយពេលសាងសង់រួច បើកឱ្យណើរការ ហើយតាមរយៈផ្សារទំនើបនេះ នឹងធ្វើឱ្យជីវភាពប្រជាពលរដ្ឋប្រសើរឡើង ពិសេសធ្វើឱ្យផ្លាស់ប្តូរសេដ្ឋកិច្ចជាតិ នៃប្រទេសទាំង២ កម្ពុជា-ជប៉ុន កាន់តែប្រសើរឡើង។

អភិបាលរាជធានីភ្នំពេញ លោក ឃួង ស្រេង បានសម្តែងការអបអរសាទរ ចំពោះវឌ្ឍនភាព នៃការសាងសង់ផ្សារទំនើបអ៉ីអនម៉ល គំរូទី៣ របស់ក្រុមហ៊ុនអ៉ីអនម៉លខូអិលធីឌី ដែលបានដំណើរការជាតិប្រក្រតី និងសម្រេចបានតាមផែនការដែលបានគ្រោងទុក ទោះបីក្រៅពីបើកការដ្ឋានជាពិសេសនៅឆ្នាំ២០២១កន្លងទៅ ប្រទេសកម្ពុជានិយាយជារួម និងនិយាយដោយឡែក រាជធានីភ្នំពេញ ក្រៅប្រឈមនឹងវិបត្តិជាសកលបង្កឡើង ដោយជំងឺកូវីដ-១៩ យ៉ាងណាក្ដី។

​ពិធីដាំកូនឈើ ការបង្កើតព្រៃឈើក្នុងមាតុភូមិ កំណើតជាមួយនឹងអ៉ីអន មានគោលបំណងបង្កើតផ្សារទំនើប ដែលហុំព័ទ្ធដោយរុក្ខជាតិពណ៌បៃតង នៅក្នុងសហគមន៍មូលដ្ឋាន ក្នុងបរិវេណផ្សារទំនើបសាងសង់ថ្មី ជាមួ​យប្រជាពលរដ្ឋក្នុងសហគមន៍តំបន់នោះ​ និងយកចិត្តទុកដាក់ថែទាំ​ ដើម្បីក្លាយជាផ្សារទំនើប ដែល​បណ្តុះស្មារតីសហគមន៍បៃតង។

ដើមឈើដែលបានដាំកន្លងមក និងដាំរួមគ្នានៅថ្ងៃនេះ នឹងក្លាយជានិមិត្តរូបនៃសាមគ្គីភាព ផ្សាភ្ជាប់យ៉ាងស្អិតរវាងវិស័យ សាធារណៈវិស័យឯកជន និងកម្លាំងមហាជន ក្នុងការលើកកម្ពស់អនាម័យបរិស្ថាន ក្នុងទីក្រុងឱ្យកាន់តែល្អប្រសើរឡើង ហើយក៏ជាចំណងសាមគ្គីភាព និងកិច្ចសហប្រតិបត្តិការកាន់តែស៊ីជម្រៅនៃទំនាក់ទំនងការទូតកម្ពុជា-ជប៉ុន ឱ្យកាន់តែមានភាពរឹងមាំថតថេរជានិរន្តរ៍៕

ដោយ: លាងហួរ

សិង្ហបុរី: សេដ្ឋកិច្ចរបស់ប្រទេសសិង្ហបុរី បានធ្លាក់ចុះដល់៤,៤ភាគរយ ប៉ុន្តែលើសពីការរំពឹងទុកនៅក្នុងត្រីមាសទី៣ នៃឆ្នាំ២០២២។ នេះបើយោងតាមការព្យាករណ៍ ដោយក្រសួងពាណិជ្ជកម្ម និងឧស្សាហកម្ម (MTI) នៅថ្ងៃសុក្រ ទី១៤ ខែតុលានេះ។

នេះជាតួលេខធៀបជាមួយនឹងតួលេខ ដែលបានកែប្រែចំនួន៤,៥ភាគរយនៅក្នុងត្រីមាសមុន។ ក្រុមសេដ្ឋវិទូដែលត្រូវបានស្ទង់មតិដោយសារពត៌មាន Reuters បានរំពឹងថា សេដ្ឋកិច្ចនឹងមានការកើនឡើង៣,៤ភាគរយចាប់ពីខែកក្កដា ដល់ខែកញ្ញាធៀបនឹងឆ្នាំមុន។

ផ្អែកលើមូលដ្ឋានដែលបានកែតម្រូវ តាមរដូវកាលពីមួយត្រីមាសទៅមួយត្រីមាស ផលិតផលក្នុងស្រុកសរុប (GDP) របស់ប្រទេសសិង្ហបុរីបានកើនឡើង១,៥ភាគរយ បន្ទាប់ពីបានធ្លាក់ចុះ០,២ភាគរយ នៅក្នុងត្រីមាសទីពីរ។

កាលពីខែសីហា អាជ្ញាធរបានបន្ទាបការព្យាករណ៍ កំណើនសេដ្ឋកិច្ចផ្លូវការសម្រាប់ឆ្នាំ២០២២នេះ មកនៅចន្លោះពី៣ភាគរយទៅ៤ភាគរយ ពី ៥ភាគរយ ក្រោយពីមានការធ្លាក់ចុះនៃទស្សន វិស័យតម្រូវការខាងក្រៅ។ ការប៉ាន់ប្រមាណផលិតផលក្នុងស្រុកសរុប សម្រាប់ត្រីមាសទី៣ត្រូវបានគណនាភាគច្រើនពីទិន្នន័យក្នុងខែកក្កដា និងសីហា។

ចំណែកការប៉ាន់ប្រមាណអំពីផលិតផលក្នុងស្រុក សរុបបឋមសម្រាប់ត្រីមាសទី៣នៃឆ្នាំនេះ នឹងត្រូវបានចេញផ្សាយ ដោយក្រសួងពាណិជ្ជកម្ម និងឧស្សាហកម្ម (MTI) នៅក្នុងខែវិច្ឆិកាខាងមុខ៕